LITURGI NATAL UMUM GBKP

KLASIS PANCUR BATU 2023

ILAI OLEH
PDT. KRISMAS IMANTA BARUS, M.TH, LM

Tema : “LUAH SI NGENA ATE TUHAN” ( Bnd. Miha 6:8)

Sub Tema : “Semangat Natal Enda Mpengasup Kita Guna
Mereken Si Mehulina Man Tuhan,
Ndalanken Kebujuren Ras Keadilen Dingen Erguna Man
Sekelewetta”

1
I. PERSIKAPEN

1. Mpelajari ende-enden ras ngaturken si muat bagin ibas kebaktin Natal.

2. Rende KEE No 114:1,3 “Sendah Jumpa Kita Wari Raya E”
1. Sendah jumpa kita wari raya e,
Peringeten tubuh Tuhan Yesus e.
Nusur ndahi kita manusia e, keriahen kap e.
Ermulia me Tuhanta ,e si puji me gelarNa
Perdamen i b’re Dibata,Tuhan Yesus kap e.
3. Sembah kami man baNdu si tubuh e,
Kam si maba dame ku pertibi e.
Bengket min ku tendi ukur kami e,dameNdu o Yesus.
Ermulia me Tuhanta, e si puji me gelarNa.
Perdamen ib,re Dibata, Tuhan Yesus kap e.

3. Ertoto

4. Kata Penaruh Ku Bas Kebaktin Natal.

Mejuah-juah ras Selamat Wari Natal man banta kerina. Meriah ukurta ras malem pe ateta enggo
pulung kita kerina guna mperingeti ketubuhen Jesus Kristus. Ketubuhenna e jadi jaminen man banta maka
Dibata tetap ngarak-ngarak geluhta tep-tep wari arah anakNa Jesus. Mari, dahilah Jesus e. Kai pe si jadi
perbebenta genduari, dahilah Jesus si tubuh e. Jesus reh lako maba terang si tuhu-tuhu man banta. Jesus e
enggo tading i tengah-tengahta. Ia reh lako nampati geluhta, mpenahangi babanta ras iberekenNa serpang
pulah man banta. Alu bage kita reh ngasupna nampati temanta pulah ibas perbebenna nari. Dage, meriahlah
ukurta, ersuraklah muji Tuhan, sabab Penebusta enggo reh.

5. Rende KEE No. 239:1,3 “Si Endekenlah ‘Nde-‘Nden Si Meriah” Perp. Tedis
(Barisen Prosesi bengket ku ruangen ibadah)
1. Si endeken lah ‘nde-‘nden si meriah,
Man Tuhanta si enggo tubuh ibas pelangkah
Sabab patut nge krina kita nembah
Ban babaNa terang ngaruh ras pe tuah
Reff. Dage mari kita kerina, ‘lah si puji gelar Dibata
Ulanai ukur erbera, Tuhan Jesus me kap Rajanta.
Gel-gel nari suratken nabi-nabi
2. Reh me s’kalak si nampati ku pertibi,
Em pemere idur Dibata nari
enggo tubuh i Betlehem tengah berngi.
Reff.

III. KEBAKTIN

1. Votum : Kebaktin Natal enda ibenaken ibas gelar Dibata Bapa, si nepa langit ras doni, ibas gelar AnakNa
Jesus Kristus si tubuh jadi Penebusta, ras ibas gelar Kesah Si Badia si mereken gegeh ate si tuhu-tuhu seh
rasa lalap.

2. Salam : Perkuah ate ras dame ibas Dibata Bapa, ras ibas Tuhan Jesus Kristus nari, ibas kerembaken Kesah
Si Badia ras kam (kita) kerina gelah. Gloria.
Perp : Glo...ria , Glo...ria, Glo...ria (Iendeken)

2
3. Invocatio : “Tapi nina malekat man bana, “Ola mbiar: Aku reh maba Berita Si Meriah, si Mereken
keriahen si mbelin man kerina manusia”, (Lukas 2:10).

4. Rende : KEE No. 115:1,2 “Keriahen Si Mbelinna”

1. Keriahen si mbelinna, si kuberitaken e, enggo tubuh si permakan e me Tuhan Jesus e.
Pujilah min Dibatanta, ras dame, dame, dame man banta.
Dibatanta si erkuah ate, man kita jelma e.
2. Ibas berngi enda terang, bintang si mehelhel e
T’rangna seh ku perukuren, si lanai erlayas pe.
Pujilah min Dibatanta, ras dame, dame, dame man banta
Dibatanta si erkuah ate, man kita jelma e

5. VG/KOOR/SOLO (Perp Kundul)

6. Berita Natal: Pujin Kerna Kemulian Dibata

L : Ope denga ijadiken Dibata doni enda, enggo isikapkenNa Juruselamat, si maba terang man manusia
(bdk.Joh.1)
----------- Mbacaken ayat-ayat Pustaka Si Badia -------------

Mamre : Joh.1 : 2 - 3
Moria : Joh.1 : 4 - 5
Saitun : Joh.1 : 8
Permata : Joh.1 : 9 ; 14
KAKR : Joh.1 : 18

L :Emaka rendelah muji Tuhan Dibata dingen si beritaken berita si mehuli si isehkenNa man kerina
manusia. Mari kita ersurak rende bas: KEE No.193: 1-2 “Bas Sinasa TinepaNa”

1. Bas sinasa tinepana tetap Krina rende trus

‘Nde - enden pujin badia, muji gelar penebus

Reff. Glo….ria muliaken Tuhan 2X

2. Bas ingan si meganjangna, bala Tuhan si surga
Rende m’riah ia k’rina, man Tuhan penebusta (Reff.)

7. Puji-Pujin Kerna Kiniulin Tuhan Erpalasken Masmur 34:2-9, siogeken Secara Responsoria :
(Perpulungen Kundul)

L : Lalap aku ngataken bujur man Tuhan, kupuji IA la erngadi- ngadi.

P : Kupuji IA sabap perbahanenNa, kerina kalak si itindih begikenlah janah meriahlah.
L : Marilah siberitaken kemulian Tuhan, mari radu ras kita muji gelarNa.
P : Ertoto aku, ibegiken TUHAN pemindonku, ipulahiNa aku ibas kerina kebiarenku.
L : Kalak siitindih erpengarapen man baNa, meriah ukurna la aru pe atena.
P : Kalak mesera erlebuh man baNa, janah ibegikenNa, ipulahiNa ia ibas kiniseran-
kiniseranna.
L : Malekat Tuhan ngkawali kalak si tutus, dingen mulahisa ibas si jahat nari. Malem kal
ate kalak si cilinggem man banNa, penanam-nanamlah uga belinna kiniulin Tuhan.

8. Rende KEE. NO. 136:1-2

3
 1. Kam k’rina si tek, mari surak janah puji
Pedas min kerina ku Betlehem
Nehenlah anak tubuh man Tuahta
Mari kita nembah, mari kita nembah
Mari kita nembah man Raja
2. O, Raja mulia sinjujurken k’rina
La mela Kam tunduh ibas ampun
Kam me Dibata mula-mula nari
Mari kita nembah, mari kita nembah
Mari kita nembah man Raja
9. Koor/Vg:

10. Manusia Ndabuh Kubas Dosa (Responsoria)

Lit : O Tuhan Dibata, tuhu-tuhu me kam Dibata si erdiate man doni ras kerina isina. Kam
Dibata si mbebasken kerina tinepaNdu nggeluh ibas kedamen.
Perp : O Tuhan Dibata, mekatep baban kami ngenca idah kami, lanai kami ngasup. Ngidah
kuasa ras keleng atendu jadi gegeh kami nampati teman kami manusia.
Mamre : Selaku bapa, ipebelin kami gegeh kami njagai jabu. Megegeh kami ncari, rukur, ras
ngasamken gegeh kula kami guna keperlun geluh kami saja, emaka mekatep kami lanai sempat
mperdiateken ras mulahi baban teman kami.
Moria : Kami pe selaku nande, mbiar kami rusur la idah kalak mejile, mbiar kami la tampil,
mbuesa si ukuri kami si la man ukuren, piah dungna lanai kami erdiate man teman-teman Moria
si man sampaten.
Saitun : Ibas erbage-bage keadaan geluh kami e, tep-tep anggota jabu lit beban si nindih kami, si
dungna erbanca lanai kami ngasup ngidah ras mpenahangi baban teman -teman kami sada
kiniteken.
Permata/ KAKR : Ibas pergaulen kami, kami ituntut jadi anak si pentar, berprestasi, ngikuti
perkembangen zaman, penampilen si erbanca kami lanai jadi diri kami sendiri. Lupa kami
mperdiateken teman kami si enggo terpengaruh pinakit sosial.
Lit : Dibata ngidah kerina perbebenta. Dibata ngajari kita gelah nggit kita kepate, Berempati
nandangi temanta sada kiniteken. Gegeh Tuhan jadi gegehta nampati temanta manusia.
Perp : O Tuhan, mekuah min ateNdu kami, sampati kami ibas kami gelah terbuka Pusuh kami
ngidah perbeben teman kami. Kami jadi alatNdu guna tecipta suasana si sampat-sampaten ras
meriah ukur kami ngidah teman kami tersampat.
Lit : Keleng ate Dibata ngelebihi keleng ate manusia. Arapkenlah keleng ateNa e.

9. Rende KEE 82: 1, 2 “Meriah Kal Ukurta”

1. Meriah kel ukurta reh kap penampat
Pesikaplah dalinNa ibas ukurta
Biak-biak keg’lapen tadingken k’rina
Aloken kesangapen keleng ateNa
Reff. Sialo-alo Ia, ralep-aleplah min kita
Pesikaplah inganNa bas pusuhta
2. Di lit si meluk-eluk si pesikaplah
Ukur si nggeduk-nggeduk jadi pinterlah
Pesai-pesai dalanNa Raja Mulia
Babailah kalak k’rina nembah man baNa
Reff...

10. Liturgi Berita Ketubuhen Juruslamat

4
 Dibata si perkeleng, la ateNa manusia bene ibas dosa, tapi gelah banci kemulian Dibata teridah
ngulihi ibas geluh manusia gelah kerina manusia si erdosa banci ngulihi ndatken keselamaten. Mari si
dengkehken liturgi si pe teluken....
1.Luk.2:1-3 4. Luk.2:13-14
2.Luk.2:4-5 5. Luk.2:15
3.Luk.2:6-7 6. Luk.2:16-17

11. Rende KEE123:1-3, “Ketuahen Me”.

1. Ketuahen me riah ukur me ketubuhen ni Jesus e,
Sangap me jelma, reh me Tuhanta, mari surak aleplah haleluya.
2. Ketuahen me riah ukur me ketubuhen ni Jesus e,
Malem me ateta, ‘rdame ras Dibata, mari surak aleplah haleluya.
3. Ketuahen me riah ukur me ketubuhen ni Jesus e,
Jesus Penawarta, tubuh man gunanta, mari surak aleplah haleluya.

12. Nagani Lilin (Perp.Tedis)

L : Senina ras turang kerina si ikelengi Jesus Kristus, ketubuhen Jesus maba terang man banta ras man
doni enda, bagi nina Johanes 1:5: “Terang e ersinalsal ibas gelap janah la tertaluken gelap e terang ndai”.

Rende KEE 135:1-3 “Berngi e, Enggo Kepe”

1. Berngi e, nggo kepe, Yesus reh ku doni e,
Nusurlah ngangkut dosanta me kin, jadi kap musillah sangap pagin
Asa si tek Tuhan e, asa si tek Tuhan e.
2. Anak e, bujur pe, si ngena me aku e
KiniulinNdu tadingken Kam kap, bengket ku donilah t’rang si gelap
Aku daramenNdu e, aku daramenNdu e.
3. Berngi e, nggo kepe Tuhan reh ku doni e,
Padan Dibata teridah tetap, kinikelengenNa banta me kap,
Tuhan si puji gelah, Tuhan si puji gelah.

13. Renungen Natal: (Perpulungen Kundul)

Pilihan Nats : Jesaya 9:6-7; Efesus 2:14-18

14. Pengakun Kiniteken (Perpulungen Tedis)

15. Koor/Vg : (Perpulungen Kundul)

16. Nehken Persembahen Natal (100% Guna Dana Pensiunen GBKP)

a. Kata Dibata Kerna Persembahen :
“Emaka bengket ia ku bas, idahna Anak ndai ras Maria nandeNa. Jenari erjimpuh ia nembah
Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-
erta si ipersembahkena e me, emas, kumenen ras mur”, (Matius 2:11).
b. Rende Ende-Endenta nomor 193:1------ “Bas Si Nasa TinepaNa”.
1. Bas si nasa tinepaNa, tetap k’rina rende t’rus,
‘Nde-enden pujin badia, muji gelar Penebus.
Reff. Glo…ooo….oooo…ria, muliaken Tuhan ) 2x
2. ‘Bas ingan si meganjangna, bala Tuhan i surga,
Rende m’riah ia k’rina, man Tuhan Penebusta,
Reff.
3. K’rina ginemgem Dibata, pehaga si tubuh e,
Surga doni rende ia, k’rina alokenNa pe.

5
 Reff.
c. Ertoto Kerna Persembahen Ras Pertoton syafaat

17. Koor/Vg:

18. Tekad Natal Perp. Tedis

Lit : Dibata Raja Dame maba kemalemen ate man kerina isi Doni Arah AnakNa Yesus Kristus
Perp : Bujur Tuhan, ibas Keleng ateNdu man kami ras kerina isi Doni, seh maka igejapken kami
tuhu-tuhu keleng ateNdu e maba keriahen man kami.
Lit : Kalak si ernalem man Tuhan ras ngikutken undang-undang Tuhan, teridah arah
kininggitenna guna njagai ras ngkelengi doni enda
Perp :Ibas kerina dampar geluh kami, ku ikutken me kata Tuhan gelah geluh kami ernanam ras
erguna man teman kami manusia.
Lit + Perp : Amin

19. Rende.199:1,2 “Senang Gundari Geluhku”

1. Senang gundari geluhku, ban Tuhan negu langkahku,
Ku ja pa pe perdalanku, tetap tanNa gelemenku
Reff. Tuhan nemani geluhku, cikepNa tanku meteguh,
Dibata pengendesenku, ibas tanNa aku nggeluh
2. Tah paksa berngi si gelap, tah paksa g’luhku la sikap,
Man baNa aku ernalem, KataNa lalap ku gelem.
Reff.

20. Pertoton Tuhan

21. Pemasu-masun :
Lit : Beritaken, Berkarya ras Ergunalah kam ibas geluhndu selaku kerajangen Dibata, Sebab enggo isehken
Dibata padanNa man bandu, malem me atendu, sebab enggo tangkas idahndu alu matandu jine penampat si
rehna ibas Dibata nari. Guna jadi gegehndu ndalanken singena ate Tuhannta alokenlah pasu-pasu idur Dibata
Nari : “Ipasu-pasu janah ikawali Dibata kita (kam), siang ayo Dibata ersinalsal ibabonta (ndu), janah
melias ateNa ngenehen kita (kam). Itatap Dibata ku kita (kam), janah malem ateta (ndu) ibahanNa. Amin

Perp : A…min…A…min…A…min (iendeken).

III. Acara Selanjutna Iaturken Panitia Natal Umum.