Minggu, 17 Desember 2023 LITURGI

KEBAKTIAN MINGGU ADVENT III

(BAHASA KARO)
(09.30 WIB)
A. PERSIKAPEN
Rende: Rasa Lalap Kam Tuhan
Amin pe relung deleng munduk-unduk
Ras uruk-uruk miser ia
Tapi keleng ate-Ndu
Rasa lalap Tuhan
Man bangku
Ras lalap kam tuhan
Rasa lalap kam
Rasa lalap Tuhan..
Temanku

Amin matawari la pultak erpagi-pagi

Ras lanai ia sundut tupung berngi
Tapi keleng ate-Ndu rasa lalap Tuhan
Man bangku

Bagi tempa lanai lit gegehku.

Tegu-tegu-Ndu aku
Bagi tempa lanai lit pengarapenku
Idudurken-Ndu tan-Ndu
Rasa lalap kam Tuhan
Rasa lalap kam
Rasa lalap kam Tuhan
Temanku

B. KEBAKTIN
1. KATA PENGALO-NGALO RAS MOMO
Turang ras senina ibas Tuhanta Jesus Kristus, selaku serayan Tuhan,
ikataken kami mejuah-juah ras selamat wari Minggu man banta kerina. Ibas
bena kebaktinta mari dage sidengkehken momo kerna perdalanen
perpulungen Tuhan bage pe rencana pelayanen gerejanta ku bas wari-wari si
reh enda. (Ngogeken Momo).

1
2. KATA PENARUH (Singiahken i mimbar kitik)
I bas minggu enda si bengketi minggu Advent si peteluken. I bas minggu
enda kita Iajuk guna ersikap nimai kerehen Raja si Mbelin, si maba kedamen
ras si jadi Penebus man banta manusia. I bas minggu advent enda pe Iajuk
kita gelah banci kita nikapken dirinta guna ngalo-ngalo Raja si Mbelin e,
eme ketubuhen Tuhanta Jesus Kristus. Kita harus ncidahken persikapenta
subuk arah perukuren, pengerana ras perbahanenta i bas kegeluhenta. Jadi i
bas minggu enda kita banci ndatken cara si payo guna ngalo-ngalo kerehen
Tuhanta Jesus Kristus.
(3 lilin ibas 4 lilin si enggo sikap i bas inganna isagani)
 Erkata Lonceng (Perp. Tedis)
RENDE: KEE No. 221: 1-3 “Pesikaplah Ukurta”
1. Pesikaplah ukurta
Adi ndahi Dibata
Ukur si serbut, Si lit bas ‘bas kita
Endeskenlah man ba-Na
Ban Ia si mereken pengadin
Makana kita dorek min terkelin
‘Di Yesuslah si bahan man Temanta
E tentu malem kel ateta

2. Pesalanglah pusuhta
Adi nembah man ba-Na
Pusuh si gulut, si ndongkelisa
Totokenlah ku Ia
Ban Ia si mereken pengadin
Makana kita dorek min terkelin
‘Di Yesuslah si bahan man Temanta
E tentu malem kel ateta

3. Gejapkenlah dosanta
Adi ngadap Tuhanta
Dosa si runut, si ngampang kita
Ampekenlah kempak-Sa
Ban Ia si mereken pengadin
Makana kita dorek min terkelin
‘Di Yesuslah si bahan man Temanta
E tentu malem kel ateta

2
 (Serayan Kebaktin Bengket ku Mimbar)

3. VOTUM – SALAM (Liturgis-Pt/Dk)

Liturgis : Kebaktin enda lit i bas gelar Dibata Bapa si jadi ulu
pengarapenta, i bas gelar Jesus Kristus si jadi Penampat man
doni enda, ras i bas gelar Kesah Si Badia si tetap mpegegehi
kam (kita) guna nikapken dalan man Tuhan.
Perkuah ate ras dame i bas Dibata Bapa nari, i bas Tuhan
Jesus Kristus nari ras i bas Kesah Si Badia. Amin.
Perp. : Amin…Amin…Amin (iendeken)

4. Berita kerna Perbahanen ras Sura-sura Dibata

Liturgis : Emaka nina Johanes man bana kerina, "Aku mperidiken
kam alu lau, tapi reh me sekalak si belinen asang aku.
Ngosari nali Sepatu-Na pe labo aku metunggung. Ia
mperidiken kam pagi alu Kesah Si Badia ras api.
(Lukas 3:16)
Erpalasken kata Dibata enda, sipuji IA alu radu ras
ngendeken KEE 294:1-3 “Meriahkal Ukurta”
1. Meriah kal ukurta,
reh kap penampat
Pesikaplah dalin-Na ibas ukurta
Biak-biak keg’lapen
tadingken k’rina
Aloken kesangapen keleng ate-Na
Sialo-alo Ia
Ralep-alep lah min kita
Pesikaplah ingan-Na
Bas ukurta

2. Di lit si meluk-eluk si pesikaplah

Ukur si nggeduk-nggeduk
jadi pinterlah
Pesai-pesai dalan-Na Raja Mulia
Babailah kalak k’rina
nembah man ba-Na
Sialo-alo Ia
Ralep-alep lah min kita
Pesikaplah ingan-Na
Bas ukurta
3
 3. Dibata kap Bapanta si nuruh Ia
Nusur ku doni enda
ndahi manusia
Robahlah dingen jera kita kerina
Dosanta iangkut-Na
terkelin kita
Sialo-alo Ia
Ralep-alep lah min kita
Pesikaplah ingan-Na
Bas ukurta

(Perp. Kundul)
5. Pujin Man Kemulian Dibata
L : Tuhan Dibata dem alu kemuliaan si meganjangna i belang-belang
doni enda.

P : Terpujilah Tuhan ibelang-belang doni enda.

L : Dibata si erkuasa nandangi kerina si lit i bas doni enda, Dibata si

ngkuasai doni kerina.

P : Ipuji kami Kam Tuhan, erkiteken igejapken kami maka Kam kap
Dibata si erkuasa nandangi doni enda ras isina kerina.

L : Padan Dibata tetap kap tahan seh rasa lalap.

P : Padan-Ndu kap jadi gelemen man geluh kami Tuhan. Dibata si man
pujin dingen si isembah i bas kegeluhen kami.

L : Sipuji Tuhan alu ras kite rende arah KEE No. 53:1-2 “Pesikap
Kam K’rajangku”
1. Pesikap kam k’rajangndu e,
Ban Tuhan Yesus reh.
Melikas min ukurndu e,
Ban Tuhan Yesus reh.
Pesikap k’rajangku kin,
O, Tuhan lah kita jumpa min.

4
 2. Tadingken kam dosandu e,
Ban Tuhan Yesus reh.
Nggo masap me salahndu e,
Ban Tuhan Yesus reh.
Pesikap k’rajangku kin,
O, Tuhan lah kita jumpa min.

6. Kinata Kegeluhen Manusia I Bas Nimai Kerehen

L : Ibereken paksa man banta kentisik guna rukur kerna perukuren
ras perbahanenta sedekah enda i bas la kita ersikap, la kita
megenggeng, dingen la kita saber guna nimai kerehen Dibata e,
paksa teneng si benaken
(Paksa Teneng)
L : Dibata enggo erpadan reh ku doni enda guna encidahken
kemuliaan-Na man kita kerina manusia. Kerehen-Na e maba dame
ras keselamaten man manusia. Kai dage si enggo ibahanndu i bas
ngalo-ngalo kerehen Dibata e?
P : O Tuhan si maba dame kubas doni enda, ngaku kami maka
kami enda kurang ersikap i bas ngalo-ngalo kerehen-Ndu e. Rusur
kal kami la ngasup ngergaken kerehen Dibata si maba dame
dingen keselamatan man kami. La kami nikapken pusuh peraten
kami dingen mekarus kami i bas ngalo- ngalo Kam. Ngaku kami,
erkite-kiteken ngayak-ngayaki keriahen doni enda, piah dungna
tading keriahen si ibaba-Ndu man kami.
L : Sisehken pingko-pingkonta man Dibata alu ngendeken
KEE No. 409:1-3 ”Rehlah Kam O Immanuel”
1. Rehlah Kam o Immanuel
Mulahi kami Israel
Si tertaban, labuh ras ndele
Nimai Anak Dibata e
Ersuraklah, meriahlah
Reh me Tuhan Immanuel

2. Tuhan ulu kepentaren,

Pehulilah tinepaNdu
Tuduhken dalin kebenaren
Tegu kami bas dalinNdu
5
 Ersuraklah, meriahlah
Reh me Tuhan Immanuel

3. Rehlah Kam Anak Dibata

Pulahi kami kerina
Bas iketen kuasa dosa
Sinaban kami kerina
Ersuraklah, meriahlah
Reh me Tuhan Immanuel

(Perp. Tedis)
7. Padan Dibata man si Ngakuken Kinilatunggungenna
L : Dibata dem i bas IA kekelengen, si tetap ibereken-Na man kita
manusia. Aminna pe kita la sikap ngalo-ngalosa, tapi Tuhan tetap
reh ndahi kita. Kata Dibata si jadi palas man banta guna ngalo-
ngalo Tuhan, ni-Na :
“Dage o senina-seninangku, saberlah kam ngayak reh Tuhan.
Nehenlah sekalak perjuma kuga ia saber nimai seh jumana mereken
ulih si erguna. Saber ia nimai udan si reh nandangi merdang ras
udan si reh kenca rumpah page. Kam pe arus saber. Tetap min kam
erpengarapen, sabap wari kerehen Tuhan seh me” (Jakup. 5:7-8).
Meriah ukurta i bas kita enggo ngaloken padan-Na, emaka
rende kita KEE No. 303:1-3 ”O Yesus, Kam Terang
Geluhku”
1. O Yesus, Kam terang geluhku
Kam me si ngkelini tendingku
La kap lit si man kebiarenku
O Yesus Kam me kap bentengku
Emakana la lit gentarku
Amin lit si jahat nderpa aku
O, Bapa dengkeh pemindonku
Lit kap sada sura-surangku
Atan min aku ibas RumahNdu
Sedekah geluhku

2. O Yesus, Kam terang geluhku

Kam me si engkawali aku
Ibas paksa lit kesusahenku
O, Yesus ajari min aku
6
 Gelah nggeluh ngikut p’ratenNdu
Arah dalan salang babai aku
O, Bapa dengkeh pemindonku
Lit kap sada sura-surangku
Atan min aku ibas RumahNdu
Sedekah geluhku

3. O Yesus, Kam saja kusembah

Sabab Kam Kap si mada kuasa
Ibas surga bage pe i doni
O Yesus surak m’riah aku
Kudesken me persembahenku
Pengataken bujur bas RumahNdu
O, Bapa dengkeh pemindonku
Lit kap sada sura-surangku
Atan min aku ibas RumahNdu
Sedekah geluhku

(Perp. Kundul)
8. Persembahen Pujin PJJ Sektor 4 “Putri Sion Nyanyilah”
9. Kata Dibata
a. Ngoge Kata Dibata Bagin Si Pemena: Johanes 1:19-28 (Tunggal)
1:19 Piga-piga kalak Jahudi si erkuasa i Jerusalem nuruh imam-
imam ras suku Lewi njumpai Johanes guna nehken
penungkunen, "Ise kin kam si tuhuna?"
1:20 Johanes la nggit erbual. Ngaku ia alu terus terang nina ngaloi,
"Aku labo Raja Penampat si ipadanken Dibata."
1:21 Nina ka kalak ndai, "Adi bage, ise dage kam si tuhuna? Kam
kin Elia?" Erjabap Johanes, "Lang, labo aku." Nungkun tole
kalak ndai nina, "Kam kin Nabi si itimai kalak e?" Erjabap
Johanes, "Lang."
1:22 Nina ka kalak ndai, "Kataken dage ise kin kam si tuhuna,
sabap kami arus ngelapur man si nuruh kami. Turikenlah
kerna dirindu."
1:23 Ngaloi Johanes alu make ayat-ayat i bas kitap Nabi Jesaya
nari nina, "Aku e me, 'Sora si erlebuh i taneh si mesawang;
bahanlah dalan pinter gelah Ia mentas!'"
7
 1:24 Kalak si nungkun enda ndai bekas persuruhen kalak Parisi
kap.
1:25 Nungkun ka ia man Johanes nina, "Adi labo kam Raja
Penampat si ipadanken Dibata ntah Elia, bage pe labo kam
Nabi si itimai kami, ngkai maka kam mperidiken?"
1:26 Erjabap Johanes, "Aku mperidiken alu lau; tapi i tengah-
tengahndu nari reh me Sekalak si la itandaindu.
1:27 Ia reh pudin asa aku, tapi ngosari tinali Sepatu-Na pe aku la
metunggung."
1:28 Kerina si enda jadi i Betani, arah timur Lau Jordan. I Lau
Jordan e me Johanes mperidiken kalak.
Liturgis : Ketuahen kalak simegiken Kata Dibata, dingen
simakekenca i bas geluhna si tep-tep wari, Haleluya.
Perp. : Maranatha..... Maranatha..... Maranatha … (iendeken)

b. Khotbah : (Ibenai ras idungi alu pertoton)

Tema : “Pekena Dalan Tuhan“
Nats : Jesaya 40:3-11

(Perp. Tedis)
10. PENGAKUN KINITEKEN
Aku tek man Dibata Bapa, si la ersibar kuasa-Na, si nepa langit ras doni.
Aku tek man Yesus Kristus Anak-Na si tonggal, Tuhanta si jadi arah Kesah
Si Badia, tubuh idur singuda-nguda nari si so keliamen, tergelar si Maria, si
ngenanami kiniseran, sangana pemerentahen Pontius Pilatus, nipakuken ku
kayu persilang, mate, jenari ikuburken, nusur ku doni kematen petelu
wariken enggo keke ibas si mate nari, nangkih ku surga, perkundul-Na arah
kemuhen Dibata, Bapa si la ersibar kuasa-Na, jenari reh me Ia pagi
ngeranaken si nggeluh ras si enggo mate.
Aku tek man Kesah si Badia, janah lit sada Gereja si badia, persadaan kalak
si badia, pengalemi dosa, kinikeken kula, kegeluhen si rasa lalap, Amin.

(Perp. Kundul)
11. PERSEMBAHEN
Liturgis : Seh paksana man banta genduari nehken pengataken bujurta
man Dibata. Kata Dibata si jadi palas man banta eme :
8
 “Ngataken bujur e me persembahen si pehagaken Aku janah
sipatuh ngikutken Aku tentu Kukelini.” (Mas. 50:23).
Iherta ngendesken persembahen rende kita i bas KEE No.
366:1-3 ”Kataken Bujur Man Tuhan”
1. Kataken bujur man Tuhan
‘rkiteken kiniulinNa
KekelengenNa man banta
Tetap seh rasa lalap
Rendelah muji Tuhan
Si turikenlah min
Perbahanenna banta
Si enggo sialoken

2. Meriahlah min ateta,

Sabab kita si k’rajangNa
Meriah dage ukurta,
Si tetap nembah baNa
Rendelah muji Tuhan
Si turikenlah min
Perbahanenna banta
Si enggo sialoken

3. Malem kal tuhu ateta,

Bujur kal perbahanenNa
Pasu-pasuNa geluhta,
Si tetap nembah baNa
Rendelah muji Tuhan
Si turikenlah min
Perbahanenna banta
Si enggo sialoken
Doa Persembahan dan Syafaat (iiringi musik)

(Perp. Tedis)
12. Perpadanen man Dibata
L : Dibata nikapken kinulin man manusia. Reh me IA ku doni enda
guna maba anak-anak-Na guna bengket kubas kemulian-Na si rasa
lalap. Emaka ersikaplah alu tutus!
P : Erpadan aku Tuhan, ertutus ate ndalanken sura-sura-Ndu, ibas
ngalo-ngalo kerehen-Ndu.
9
L : Reh me Dibata peduakaliken, maba kegeluhenta kubas
kedamen si rasa lalap.
P : Erpadan aku Tuhan, tetap ngarapken kemalemen ate, si rehna ibas
Kam nari. Janah nggit aku nikapken dalan kerehen-Ndu.
L : Guna peteguhi perpadanenta man Dibata,si puji Tuhan alu
Rende KEE No. 286:1-4 ”Kuikutken Min Dalan-Ndu”
1. Kuikutken me dalan-Ndu
Dalan dame man bangku
Terkelin me kap geluhku
Itebusi dareh-Ndu
Ku ikutken me dalan-Ndu
Ku endesken geluhku
Bas Kam o Jurus’lamatku
Dame senang tendingku

2. Mesera gia dalanku

Padan-Ndu kap enteguh
Ngelawan kuasa gelap
Di ras Kam menang tuhu
Ku ikutken me dalan-Ndu
Ku endesken geluhku
Bas Kam o Jurus’lamatku
Dame senang tendingku

3. Kupersilahangken bangku
Ngikutken pendilo-Ndu
Kudalanken peraten-Ndu
Dat aku pasu-pasu
Ku ikutken me dalan-Ndu
Ku endesken geluhku
Bas Kam o Jurus’lamatku
Dame senang tendingku

4. Kupetetap me ukurku
Nggeluh bujur ras tuhu
B’reNdu usihen man bangku
Puji sembahku ba-Ndu
Ku ikutken me dalan-Ndu
10
 Ku endesken geluhku
Bas Kam o Jurus’lamatku
Dame senang tendingku

13. PERTOTON TUHAN

Bapa kami si ni surga.
Gelar-Ndu i Pebadia min.
Reh lah min kinirajan-Ndu.
Seh lah min bagi peratenNdu
I doni enda bagi ni surga.
Bereken kami nakan cukup bas wari si sendah enda.
Alemi-Ndu salah kami bagi ni alemi kami salah kalak si lit man
kami. Ula min babai-Ndu kami kubas percuban.
Tapi olangi lah kami idur si ilat nari.
Sebab Kam kap si mada kerajaan ras kuasa ras kemulian si ndekah ndekah
na. Amin.

14. PENGUTUSEN RAS PASU-PASU DIBATA

Liturgis : Bengketilah ku bas kegeluhen si teptep wari alu dame ras
mejuah-juah, beritakenlah kerehen anak Dibata man doni enda
alokenlah pasu-pasu idur Dibata nari :
“Dibata si mada perkuah ate, si enggo nenahken kita (kam) ku
kemulianNa si rasa lalap i bas Jesus Kristus njadiken kita (kam)
serta, tetap, megegeh dingen paguh. IA nge si mada kuasa seh
rasa lalap. Amin.
Perp. : Amin…Amin…Amin (iendeken)

15. PAKSA TENENG (SINARUHKEN)

Turang ras senina, ibas gelar Tuhanta Yesus Kristus
Kebaktinta enggo erdalan alu mehuli. Ibas gelar Majelis GBKP Runggun
Jakarta Pusat, ipersingeti kami man banta kerina perpulungen gelah tetap
jaga Kesehatan, itimai kami kerna kerehen turang ras senina ibas Kebaktin
si reh. Tuhan memberkati.
Seh paksana sikataken bujur man Tuhan, radu ras kita masuk ku paksa
teneng. Paksa tenang ibenaken… Amin.

11