LITURGI MINGGU UNITED EVANGELISM MISSION (UEM)

MINGGU, 11 JUNI 2023

A. PERSIKAPEN
Perpulungen nikapken pusuh ras ukur guna ngadap man Tuhan
Pelayan ibadah ersikap i ruang persikapen
…..Musik…..
B. KEBAKTIN
1. Kata Pengalo-ngalo ras Momo
Turang ras senina i bas Tuhanta Jesus Kristus, selaku serayan Tuhan, ikataken kami
mejuah-juah ras selamat Wari Minggu man banta kerina. Man bandu kekelengen kami si
sekali enda denga erkebaktin i bas gerejanta enda, ikataken kami mejuah-juah.
Kerehenndu nambahi keriahen man banta kerina. I bas bena kebaktinta mari dage
sidengkehken momo kerna perdalanen perpulungen Tuhan, bage pe rencana pelayanen
gerejanta ku bas wari-wari si reh enda (Ngogeken Momo).

2. Kata Penaruh
Turang ras Senina i bas Tuhanta Jesus Kristus, Minggu enda kita bengket kubas Minggu
UEM (United Evangelical Mission), eme Minggu si encidahken kiniersadanta ras gereja-
gereja si deban subuk i Jerman, Afrika ras Asia, si tergabung ibas UEM. Ibas minggu
enda, kebaktinta makeken liturgi si isikapken kekelengenta Gereja Kristen Protestan di
Mentawai (GKPM).

Minggu enda ngajuk kita lako ngataken bujur man Dibata si Telu Sada si enggo njadiken
langit ras doni ras kerina isina. Tanda pengataken bujurta tentuna teridah ibas kita
mpekena-kena, njagai ras ngusahai kerina tinepa Dibata. Arah kebaktinta ibas wari enda,
iarapken maka kita pe tetap erdiate nandangi sekelewetta. Mari dage sipesikap pusuhta
ndahi Tuhan.
Mari ras kita ertoto:
O, Bapa kami si ni Surga, tuhu meriah kal ukur kami ibas wari enda, erkiteken
pengasupNdu denga kami ngikuti kebaktin radu ras kerina anggota UEM i telu benua
(Asia, Afrika, ras Jerman). Rehlah min Kam i bas kebaktin si ilakoken kami i bas ingan
kami kerinana. Amin.

 Erkata Lonceng Perpulungen Tedis

 Rende KEE 196:-3
(Serayan Kebaktin bengket ku Mimbar)
3. Votum – Salam
L Ibas gelar Dibata Bapa sinjadiken kerina bangsa, ibas gelar AnakNa Jesus Kristus
si nebusi kerina manusia, ras ibas gelar Kesah Si Badia si mpengasup kita (kam)
nggeluh ibas kinierbagen.
Lias ate dingen kemalemen ate ibas Dibata Bapanta ras ibas Tuhan Jesus Kristus
nari man banta (ndu) gelah. Amin
P Amin….. Amin….. Amin…..(iendeken)

4. Berita kerna Perbahanen ras Sura-sura Dibata (Invocatio)

L (Ngogeken Teks Sue ras Almanak) (Epesus 2:22)
Erpalasken kata Dibata enda, sipuji IA arah ende-endenta KEE 372:1-3

5. Kata Dibata Kerna Kegeluhen (band. Kejadin 1-2) Perpulungen Kundul

L Kerina tinepa si lit i babo doni enda, subuk taneh, sinuan-sinuan, rubia-rubia ras
manusia itepa Dibata jadi sada keluarga, si nggeluh erkawiten sada ras si
debanna, saling ngergai alu mereken dirina guna kiniulin kegeluhen kerina tinepa.
P Ngendeken bagin KEE 263
Maka pusuhku e pehaga Kam
Mbelin me Kam, O Tuhanku
Maka pusuhku e pehaga Kam
O Tuhanku, mehaga Kam.
 L Dibata nepa manusia sentudu ras tempasNa, tuhu mulia ras mehaga bagi IA.
Dibata ersura-sura maka kita ngasup encidahken kemulian ras kinihaganNa i bas
kerina dampar kegeluhenta.
P Ngendeken bagin KEE 263
Maka pusuhku e pehaga Kam
Mbelin me Kam, O Tuhanku
Maka pusuhku e pehaga Kam
O Tuhanku, mehaga Kam.
L Dibata masu-masu manusia, niNa: ”Ertuahlah kam jadi enterem, demi dingen
taluken doni enda, kuasai kerina nurung, perik-perik i awang-awang, bagepe
kerina rubia-rubia i daraten.
P Ngendeken KEE 263:1-3

6. Kinata Kegeluhen Manusia

L Turang ras Senina, Dibata enggo njadiken kegeluhen alu mehuli, kai nge banci
silakoken guna njagai kiniulin tinepa Dibata e? Enggo nge ndia kita ikut muat bagin
i bas mpekena-kena doni enda? Me labo kita salah sadana si ikut muat bagin i bas
eksploitasi doni enda guna kepentingenta alu la ngukurken kalak si deban? Nggit
nge ndia kita ikut muat bagin i bas dahin reboisasi, njagai kebersihen lingkungen,
ras nggit jadi barisan terdepan guna menentang aksi si encedai lingkungen? Adina
kita terjeng ngukurken bana saja, la kita kepate nandangi sekelewetta, maka mari
siakuken salah lepakta i adepen Dibata.
Bapa kami si erkuasa, reh kami ku adepenNdu, ngakuken salah ras dosa kami.
rusur kel kami papak, la setia man baNdu. Mawen kami lupa, mawen kami sengaja
erbahan ceda pusuhNdu. O Tuhan, alemilah kami! O Kristus, alemilah kami!

P Rende KEE 467

O, Tuhan kelengi. O Tuhan kelengi. Tuhan kelengi kami..
L O, Tuhan, ngaku kami maka kami enggo gagal ibas ngusahai kerina tinepaNdu.
Rusuren kami ngukurken kepentingen kami saja, la arap kami maka perbahanen
kami e banci mereken ulih si la mehuli nandangi kegeluhen kami. O Tuhan,
alemilah kami! O Kristus, alemilah kami!
P Rende KEE 467
O, Tuhan kelengi. O Tuhan kelengi. Tuhan kelengi kami..
L O Tuhan, ngaku kami maka kami rusur gagal i bas pendahin bagepe pelayanen.
Lupa kami kerna tugas ras tanggungjawab si enggo ibereken Tuhan, e me guna
njagai ras ngusahai doni enda. Rusur kel ipake kami waktu kami alu sia-sia, lalit
gunana, si dungna mereken kinirugin pe man kami. O Tuhan, alemilah kami! O
Kristus, alemilah kami!
P Rende KEE 467
O, Tuhan kelengi. O Tuhan kelengi. Tuhan kelengi kami..
L O Tuhan, ngaku kami, maka rusur kal aru ate kami kerna kegeluhen ras wari-wari
kegeluhen kami. Biak rangap, melalasa muat untung i bas makeken kekayan alam,
biak la ngukuri anak ras kempu si lenga tubuh, lit ibas kami. lupa kami maka
kuasaNdu ngasup mpekena-kena kegeluhen kami, icukupkenNdu kerina keperlun
geluh kami. O Tuhan, alemilah kami! O Kristus, alemilah kami!
P Rende KEE 467
O, Tuhan kelengi. O Tuhan kelengi. Tuhan kelengi kami..
L O Tuhan, Bapa si perkuah. Ajarilah kami segelah tetap setia i bas engkelengi Kam.
Patuh man perentahNdu saja. Pengasup kami ngkelengi teman bagepe sekelewet
kami. Bahanlah min kami tetap makeken kataNdu i bas kerina dampar kegeluhen
kami, gundari nari seh rasa lalap.
P Rende KEE 394:1,2,4

7. Berita Pengalemi Dosa Perpulungen Tedis

L Selaku persuruhen Dibata aku nehken kataNa man banta (ndu) kerina si ngakuken
dosa ras kesalahenna, dingen jera ibas dosa ras kesalahenta (ndu) nari, niNa:
“Kataken man bana maka asa tuhu Aku nggeluh, Aku TUHAN si Erdolat, la ukurKu
meriah ngidah sekalak perdosa mate. Riahen ukurKu ngidahsa ia ngadi erbahan
dosa gelah ia nggeluh. “O Israel, ngadikenlah kejahatenndu. Engkai maka nggiten
kam mate?” (Jeheskiel 33:11). Amin
 Sipenangkih pujinta erkiteken dosanta enggo ialemi Dibata, arah ende-endenta
KEE 454:1,3

8. Kata Dibata Perpulungen Kundul

a. Ngoge kata Dibata Bagin Si Pemena (Keluaran 19:1-8)
L Ketuahen kalak si megiken Kata Dibata, dingen si makenca i bas geluhna si
teptep wari. Haleluya.
P Haleluya..... Haleluya..... Haleluya..... (Iendeken)
b. Kotbah (Matius 28:16-20) (Ibenaken ras i dungi alu pertoton)

9. Pengakun Kiniteken Perpulungen Tedis

10. Persembahen Perpulungen Kundul

L Ibereken kesempaten man banta guna nehken pengataken bujurta man Dibata.
Kata Dibata si jadi palas i bas kita nehken persembahenta, niNa:
“O senina-seninangku, nginget perkuah ate Dibata si mbelin si isehkenNa man
banta, kupindo man bandu: Endeskenlah kulandu man Dibata saja selaku
persembahen si nggeluh rikutken si ngena ateNa. Sabap bage me arusna kam
ersembah man Dibata sue ras biakndu selaku mahluk si rukur” (Rm. 12:1).

Tupung kita mpepulung persembahenta, rende kita arah KEE GBKP No. 300:1-

Pertoton Persembahen ras Sapaat

11. Persembahen Khusus Guna UEM

L Selaku ringring ni Kristus arah persadanta i bas UEM (United Evanglism Mission)
ras ndukung kerina program pelayanen UEM, e maka mari sibuat baginta alu
nehken persembahen khusus enda. Janah kita mpepulungsa, ras kita rende arah
KEE 184:1-3

Pertoton khusus kerna UEM ras GKPM.

12. Perpadanen man Dibata Perpulungen Tedis

L Turang ras Senina, Dibata enggo mereken diriNa jadi Penampat man banta
kerina manusia. Nggit IA jadi seri ras manusia segelah kita terkelin.
P O Tuhan, erpadan kami nggit mereken kegeluhen kami guna nampati ras
ngkelengi sekelewet kami. Nggit kami mperdiateken kerina tinepaNdu. Nggit
kami muat bagin i bas mpekena-kena doni ingan kami tading enda. Nggit kami
erpenalem man gegehNdu saja, Tuhan.
L Turang ras senina, ersada arih, ersada ukurlah min kam. Sada tujun, sikeleng-
kelengen sada ras si debanna. Alu meteruk ukur leben mperdiateken keperlun
kalak si deban asangken keperlun dirinta.
P O Tuhan, nggit kami ersada dingen jadi dalan pasu-pasu nandangi sekelewet
kami. Bahanlah min i bas kami engkelengi doni enda, tambah dolatna i bas
kegeluhenna, tama kemulian man gelarNdu si Badia. Amin.
L Sipeteguhi perpadanenta alu ngendeken KEE 296:1-4

13. Pertoton Tuhan

14. Pengutusen & Pasu-pasu
L Bengketilah ku bas kegeluhenta (ndu) si teptep wari, janah lakokenlah kai si
ngena ate Dibata. Guna si e, aloken pasu-pasu i dur Dibata nari:
“Ipasu-pasu janah ikawali Dibata kita (kam), siang ayo Dibata ersinalsal
ibabonta (ndu), janah melias ateNa ngenehen kita (kam), itatap Dibata ku kita
(kam), janah malem ateta (ndu) ibahanNa” Amin. (Bdk. Bil. 6:24-26)
P Amin, Amin, Amin (iendeken)