Liturgi Natal Umum

GBKP RUNGGUN KUTA GAMBER/LIREN

KLASIS LAU BALENG
Selasa,06 Desember 2022

Tema : “Ngikutken Dalan Kebenaren Dibata” (Matius 2:12)

Sub Tema : Natal mpengasup kita nggeluh ngikutken dalan kebenaren

siituduhken Dibata guna mpekena-kena doni enda

I Elai :Pdt. Yunus Bangun, M.Th (Sekretaris Umum Moderamen)

1
I. Persikapen
Ngaturken kerina hal-hal siberhubungen ras kebaktin, khususna persembahen-
persembahen pujin, ngaturken kerna petugas kebaktin (barisen prosesi, sinagani
lilin ras sidebanna). Bage pe erbahan pertoton persikapen ibas ingan si enggo
itetapken.
II. Kebaktin
1. Kata Penaruh
Kekelengen ni Tuhanta Jesus Kristus, mejuah-juah ras selamat wari natal
man banta kerina. Sikataken bujur man Dibata erkiteken lias ras keleng
ateNa enggo banci kita pulung ibas ingan enda, guna ngerayaken ketubuhen
Tuhan Jesus eme Juruselamat doni. Natal eme sada peristiwa ija doni enda
ngidah kekelengen Dibata arah anakNa Jesus Kristus. Kekelengen Dibata e
mabai kita selaku anak-anakNa guna ngikutken dalan kebenarenNa guna
mpekena-kena doni enda, simereken kejuah-juahen ras kedamen dingen
sipengasup kita nggeluh bagi singena ate Dibata.
Emaka mari sipuji Tuhan si enggo mereken kekelengenNa man banta. Alu
ras kita rende KEE 114:1-3 “Sendah Jumpa Kita Wari Raya E” (perp. tedis)
(Barisen prosesi bengket ku bas ingan kebaktin)
1. Sendah jumpa kita wari raya e
Peringeten tubuh Tuhan Jesus e
Nusur ndahi kita manusia e, keriahen kap e
Reff: Ermulia me Tuhanta, je sipuji me gelarNa
Perdamen ib’re Dibata, Tuhan Jesus kap e
2. Mari kita ku kuta Betlehem e
Muji nembah man Tuhanta Jesus e
E tinenges Tuhan si perkuah e, Dibata Bapa e (Reff…)
3. Sembah kami man baNdu si tubuh e
Kam simaba dame ku pertibi e
Bengket min ku tendi ukur kami e, dameNdu o Jesus (Reff…)
2. Votum + Salam
Lit : Ibas gelar Dibata Bapa si erkeleng ate man doni enda, ibas
gelar anakNa Jesus Kristus sijadi ulu dalan kebenaren, ibas

2
 gelar Kesah Si Badia si mpengasup manusia nggeluh ngikutken
dalan kebenarenNa guna mpekena-kena doni enda.
Perkuah ate ras dame ibas Dibata Bapa, anakNa Jesus Kristus,
ras kerembaken Kesah Si Badia ras kam kerina gelah. Amin.
Perp : Amin….Amin….Amin….
3. Berita Kerna Perbahanen ras Sura-sura Dibata (Invocatio)
“Nina Tuhan: perukurenKu la bali ras perukurenndu, dalanKu labo seri ras
dalanndu. Bagi langit ndauh ganjangen asa doni, bage me pe ndauh kel
ganjangen dalanKu asangken dalanndu, perukurenKu asangken
perukurenndu” (Jesaya 55:8-9).
Rende: KEE 115:1-3 “Keriahen Si Mbelinna”
1. Keriahen si mbelinna, si kuberitaken e
Enggo tubuh si Permakan eme Tuhan Jesus e
Reff: Pujilah min Dibatanta
Ras dame, dame, dame man banta
Dibatanta si erkuah ate man kita jelma e
2. Ibas berngi enda terang, bintang si mehel-hel e
T’rangna seh ku perukuren si lanai erlayas pe (Reff…)
3. Tuhan Jesus persadanta, em isuruh Bapa e
Sinasapken krina dosa ibas Golgota kepe (Reff…)
4. Koor/V.G/Solo/Puisi
5. Pujin Man Dibata Ibas PerbahanenNa Si Mbelin Man Manusia
Lit : Sabab enggo ipetangkas Dibata lias ateNa guna keselamaten
kerina manusia. Lias ateNa e ngajari kita nadingken kegeluhen si
la ngena ate Dibata ras sura-sura doni, gelah nggeluh kita
ngkuasai dirinta, bujur dingen si sembah Dibata ibas kegeluhen i
doni enda. Genduari kita paksa nimai wari kemalemen ate si
iarapken kita eme kerehen sinalsal Dibatanta si mbelin ras si
engkelini kita Jesus Kristus. Enggo iendeskenNa diriNa guna
kita, lako nebusi kita ibas kerina si jahat nari, jenari ibahanNa
kita jadi sikerajangenNa, jadi bangsa si bersih, si mesikel erbahan
si mehuli dingen ngikutken dalan kebenaren siituduhken Dibata
guna mpekena-kena doni enda.

3
 Perp : Terpujilah Dibata, sabab keleng ateNa si mbelin seh man banta,
seh maka ngasup kita erbahan si mehuli.
Rende: KEE 193:1-3 “Bas Si Nasa TinepaNa”
1. Bas si nasa tinepaNa tetap k’rina rende trus
Nde-enden pujin Badia muji gelar Penebus
Reff: Glo……,ria muliaken Tuhan
Glo…….ria muliaken Tuhan
2. Bas ingan si meganjangna bala Tuhan i surga
Rende m’riah ia k’rina man Tuhan Penebusta (Reff…)
3. K’rina ginemgem Dibata pehaga si tubuh e
Surga doni rende ia k’rina alokenna pe (Reff…)
6. Koor/V.G/Solo/Puisi
7. Kinata Kegeluhen Manusia
Lit : Jesus Kristus tubuh ku doni enda guna ngkelengi kita ras mabai
kiniulin ku tengah-tengah doni enda. Ia me simabai kita guna
nggeluh ngikutken dalan kebenarenNa, tapi megati kel kita la
ngikutken dalanNa. Sura-suranta ateta lalap si erdalan seh maka
turah kerangapen si erbahanca doni enda ceda lanai mehuli
jadina.
Perp : O Tuhan, ngaku kami maka megati kel kami la nggeluh
ngikutken dalan kebenarenNdu. Isalahgunaken kami kebebasen
si iberekenNdu, seh maka geluh kami lanai maba kiniulin
nandangi isi doni enda. O Tuhan alemi min kami.
Lit : Marilah siakuken kelepakenta, alu rende KEE 362:1-2
“AlemiNdu Aku Bas Dosangku”
1. AlemiNdu aku bas dosangku
AlemiNdu aku bas lepakku
O Tuhan sasap min
O Jesus sasap min, alemi dosangku
2. Si la payo dem ibas geluhku
Ngaku aku baNdu o Jesusku
O Tuhan sasap min
O Jesus sasap min, alemi dosangku

4
8. Padan Dibata Man Si Ngaloken Jesus Kristus
Dibata enggo ncidahken KekelengenNa man banta alu nuruh anakNa Si
Tonggal ku doni enda, gelah kita nggeluh arah Ia. Enda me kekelengen e;
labo kita si enggo engkelengi Dibata, tapi Ia nge si engkelengi kita. Emaka
isuruhNa AnakNa ku doni enda gelah arah Ia kita iperdameken ras Dibata
alu ngalemi dosa-dosanta (1 Joh. 4:9-10).
Rende: KEE 136:1-2 “Kam K’rina Si Tek”
1. Kam k’rina si tek mari surak janah puji
Pedas min kerina ku Betlehem
Nehenlah Anak tubuh man tuahta
Mari kita nembah, mari kita nembah
Mari kita nembah man Raja
2. O, Raja Mulia sinjujurken k’rina
La mela Kam tunduh ibas ampun
Kam me Dibata mula-mula nari
Mari kita nembah, mari kita nembah
Mari kita nembah man Raja
9. Koor/V.G/Solo/Puisi
10. Berita Kerna Kiniulin Dibata - Nagani Lilin Natal (Perp. Tedis)
Jesus me Raja Dame sireh man bandu guna nampati kam ibas erbage-bage
kesalahen ras kinilangasupenndu. Nina Tuhan: “Ernalemlah kam man
bangKu, ola susahi bandu alu dahin-dahin si la penting, tapi ayakilah kai si
ngena ateKu. Aku me penampatndu si mereken ketenangen man bandu.”
Amin.
Mari sisagani lilin natalta tandana kita ngaloken ketubuhen Jesus e janah ras
sipuji Ia. Rende: KEE 135:1-3 “Berngi E Nggo Kepe”
1. Berngi e, nggo kepe, Jesus reh ku doni e
Nusurlah ngangkut dosanta me kin
Jadi kap musil lah sangap pagin
Asa si tek Tuhan e, asa si tek Tuhan e
2. Anak e, bujur pe, si ngena me aku e
KiniulinNdu tadingken Kam kap
Bengket ku doni lah t’rang si gelap

5
 Aku daramenNdu e, aku daramenNdu e
3. Berngi e, nggo kepe, Tuhan reh ku doni e
Padan Dibata teridah tetap
KinikelengenNa banta me kap
Tuhan si puji gelah, Tuhan si puji gelah
11. Khotbah
12. Pengakun Kiniteken (Perp. Tedis)
13. Persembahen
Kata Dibata si jadi palas man banta ibas kita nehken persembahen
pengataken bujurta man Dibata: “Ietehndu uga liasna Tuhan Jesus Kristus;
maka aminna bayak gia Ia, tapi guna kiniulinndu, ipemusilNa baNa, gelah
arah kemusilenNa e jadi bayak kam” (2 Kor. 8:9).
Rende: KEE 239:1-4 “Siendeken Nde-nden Si Meriah”
1. Siendeken nde-nden si meriah,
man Tuhanta si nggo tubuh bas pelangkah
Sabab patut nge k’rina kita nembah,
ban babaNa terang ngaruh ras pe tuah
Reff: Dage mari kita kerina, lah sipuji gelar Dibata
Ulanai ukur erbera, Tuhan Jesus me kap Rajanta
2. Tuhan Jesus metunggung dat pujin,
sabab Ia singajari kita kin
KeklengenNa la erkeri-kerin,
adi pakelah pedahNa seh pagin (Reff…)
3. Gel-gel nari suratken nabi-nabi,
reh me s’kalak sinampati ku pertibi
Em pemere idur Dibata nari
enggo tubuh i Betlehem tengah berngi (Reff…)
4. Tuhan Jesus kuinget min Kam rusur,
lah babaiNdu pergeluhku ku sibujur
Dibage kiniteken la erkusur,
enggo paguh gia lit rusur si ngurgur (Reff…)
Pertoton Persembahen ras Syafaat
14. Koor/V.G/Solo/Puisi

6
15. Tekad Natal (Perp. Tedis)
Lit : Dibata mereken anakNa si tonggal eme Jesus Kristus jadi
singkelini geluh manusia.
Perp : Erpadan aku tetap nggeluh ibas Jesus Kristus amin kai pe si
terjadi.
Lit : Jesus Kristus reh ku doni enda maba dalan kebenaren, gelah
kalak si nggeluh ibas dalan sipapak lanai nggeluh ibas dalan
kebenen. Jesus me dalan kebenaren e.
Perp : Aku erpadan makeken geluhku ngikutken dalan kebenarenNa,
gelah terpuji gelar Dibata ibas dampar kegeluhenku.
Lit : Dibata njadiken doni enda tuhu-tuhu mehuli jadina.
IberekenNa perentah man manusia guna ngkuasai dingen
mpekena-kena doni enda.
Perp : Erpadan aku Tuhan nggeluh guna mpekena-kena doni enda, seh
maka sikap iakap kami nggeluh ibas doni enda.
Rende: KEE 307:1,3 “O Tuhanku Kam Me Permakanku”
1. O Tuhanku Kam me permakanku
Emaka la kekurangen aku
Ku mbal-mbal m’ratah aku babaNdu
Ipesenang-senangNdu geluhku
Reff: Permakanku si njayam geluhku
Malem ateku senang tuhu
KelengNdu tetap maler man bangku
Kam me Tuhanku permakanku
3. Amin aku bas kelbung si gelap
Arapenku man Tuhan e tetap
Lanai mbiar ndalani geluh e
Sabab Tuhan e temanku jine (Reff…)
16. Pertoton Tuhan
17. Pengutusen ras Pasu-pasu
Lit : Bengketlah ku kegeluhenta (ndu) sekalak-sekalak. Dage
alokenlah ketubuhen Jesus Kristus e ibas pusuhta (ndu) alu
nggeluh ngikutken dalan kebenaren Dibata. Guna si e, alokenlah

7
 pasu-pasu idur Dibata nari: “I pasu-pasu janah ikawali Dibata
kita (kam), siang ayo Dibata ersinalsal ibabonta (ndu), janah
melias atena ngenehen kita (kam). Itatap Dibata ku kita (kam),
janah malem ateta (ndu) ibahanNa.” Amin.
Perp : Amin….Amin….Amin….
III. Varia Natal (Iaturken Panitia)

GBKP RUNGGUN KUTA GAMBER

LIREN KLASIS LAU BALENG
Mengucapkan:

Selamat Hari Natal

25-26 Desember 2022
&
Selamat Tahun Baru
01 Januari 2023