LITURGI RAS RENUNGEN PEKAN KEBAKTIN KELUARGA WARI SI PEMENA

Minggu, 19 Nopember 2023

Tema Umum : Jabu Si Ndahiken Rencana Dibata (Bdk.Ep. 2:10)

I. PERSIKAPEN
• Nikapken kerina perlengkapen guna kebaktin dingen ngaturken si muat bagin i bas
kebaktin
• Si usahaken maka anak-anakta pe ikut muat bagin i bas kebaktin enda.
• Perdalanen kebaktin i bas kundul ntah tedis ilakoken sue ras kecibal.
II. KEBAKTIN
1. Kata Penaruh
Terpujilah Tuhan Dibata si mada gereja. Malem kal ateta sabab enggo itemaniNa gerejaNa
enggo ka seh kita ku Pekan Kebaktin Keluarga tahun 2023 enda. I bas Pekan Kebaktin
Keluarga enda tetap ilumbaken jabu-jabunta nggeluh i bas orat nggeluh kalak si enggo
iselamatken Tuhan Dibata e me nggeluh i bas rencanaNa. Enda me pe isenaken man banta i
bas Pekan Kebaktin Keluarga wari pemena enda e me jabu si ndahiken rencana Dibata
erdandanken kita enggo ngenanami lias ate Dibata dingen tek man baNa. Kita iajuk lako
ngumban jabu Nuah. Ulihna e me kemalemen ate.
Mari dage ersada kita i bas ndalani Pekan Kebaktin Keluarga wari pemena enda alu bulat
ukur erpengendes man Tuhan Dibata.
Ertoto
Si puji Tuhan alu ras kita ngendeken: KEE GBKP No. 16:1, 3
(Perp. tedis)
I bas Kam Tuhan nari, si bangku k’rina e
NgaruhNdu genduari, ngaruhNdu pagi pe
‘Di celus me nahengku, keleng ateNdu kap
Tundalen seh matengku, Kam saja si tetap
Bagi ateNdu kapen, bagi ateku min
‘Lah langkah pe tetapen, taruhken aku min
Min erta Surga bangku, si lalap la bene
‘Lah la gelap matangku, la gulut ukur pe
(Tupung rende iendesken perlengkapen kebaktin man si maba kebaktin)
2. Votum + Salam
L I bas gelar Dibata Bapa si mada rencana kempak anak-anakNa, i bas gelar AnakNa
Jesus Kristus si mereken keterkelinen man keluargaNa i bas rencanaNa si mehuli, ras
i bas gelar Kesah Si Badia si ngajari ras mpegegehi keluargaNa nggeluh i bas
rencanaNa.
Perkuah ate ras dame i bas Dibata Bapa ras i bas Tuhan Jesus nari, i bas kerembaken
Kesah Si Badia ras kita (kam) kerina gelah. Amin.
P A…min, a…min, a…min (Iendeken)
3. Invocatio
L Aku ngenca meteh sura-surangKu nandangi kam, e me gelah kam senang labo gelah
cilaka. RencanangKu e me mereken wari si pepagi bagi si iarapkenndu (Jer. 29:11).
Malem kal ateta i bas mehulina sura-sura Dibata man banta, e maka si puji IA alu
ngendeken: KEE GBKP No. 71:1, 3
Teman si sada perukur, si ndarami senang je
Ku bas Jesus legi ukur, maka jumpa dame e
Ia kapen ikutenta, kita kap ngawanNa e
Tuhan Jesus kap gurunta, kita ‘jar ajarNa e
Kam me si persada kami, k’rina si tek baNdu e
 Gelah sikeleng-kelengen, ngikutken pedahNdu e
Tudu ku bas kebenaren, e me kap ateNdu e
Kam me jadi penalemen, gelah kami la bene
4. Puji-pujin Kempak Dibata I Bas Ulina RencanaNa Kempak KeluargaNa --- (Perp.
Kundul) ---
L Si eteh maka i bas kai pe Dibata erdahin guna kiniulin man kalak si erkeleng ate man
baNa, e me kalak si enggo ipilih Dibata arah sura-suraNa.
P Kalak si enggo itandai Dibata arah lebe nai, enggo itetapkenNa gelah bali ras tempas
AnakNa, Jesus Kristus, gelah Anak e jadi sintua i tengah-tengah seninana si nterem.
L+P E maka enggo ipilih Dibata kalak si enggo itetapkenNa e; kalak si enggo ipilihNa e enggo
iperembakNa ras diriNa; janah kalak si enggo iperembakNa ras diriNa e enggo
ipermuliakenNa.
L Si puji Tuhan Dibata si tetap encidahken rencana si mehuli man banta i bas KEE GBKP
No. 6:1, 3
Tuhanta si Dibata kin, si puji lah min Ia
Apai kin ndia si ulin, bage mbelin mulia
La ‘rsibar kuasaNa kap, liasNa pe enggo tetap Ku Ia lah ernalem
O Tuhan Bapa kami e, ukurNdu k’rina bujur
‘Lah ukur kami bujur pe, ajari kami rusur
Kam si ngapuli kami e, si m’reken ‘ntabeh ukur pe Iban keleng ateNdu
5. Kinata Kegeluhen Keluarga Dibata Nggeluh I Bas Rencana Dibata
L Marilah siakuken dosanta man Dibata i bas kinilangasupenta nggeluh ndahiken
rencana Dibata.
Dilaki O Dibata mekuah min ateNdu kempak aku, erkiteken liasNdu, sasapkenlah dosangku,
erkiteken perkuah ateNdu. Peridi min aku maka masap kejahatenku, urasi min aku
maka masap dosangku.
Diberu Salah lepakku kueteh nge, dosangku pe rusur kuinget. Man baNdu, man baNdu saja
ngenca aku erdosa, kubahan si jahat i bas pengakapNdu. E maka patut nge aku
iukumNdu, janah bujur nge keputusenNdu.
P I bas kesalahen kap tubuhku ndube, sabap i bas bertin nari pe enggo ikuasai dosa
aku. Ukur si pinter ras kebujuren nge si ipindoNdu, dage demilah pusuhku alu
kepentarenNdu.
L Si akuken tole kelepakenta alu ngendeken KEE GBKP No.
63:1, 4
Keleng ateNdu min gejap, bas aku o Tuhan
Kam Penebus ndarami kap, si ‘nggo me kedosan Tapina kuakuken me,
salahku k’rina pe Mekuah min ateNdu pe, ‘Lah masap dosa e
6. Pergegeh Idur Dibata Kempak KeluargaNa Guna Nggeluh I Bas RencanaNa --- (Perp.
Tedis) ---
L Tole nina TUHAN, "Marilah maka si dungi cakapta enda. Kam enggo erkubang-kubang
ibahan dosa, tapi kuperidi kam maka bersih bagi salju. Aminna gia erkiteken dosandu
kam enggo mbiring bagi tengguang, mulihi kam jadi mbentar bagi kapas (Jes. 1:18).
Sicidahken pengataken bujurta alu ngendeken KEE GBKP No. 21:1, 4
O Tuhan si erkuah ate, man kami si perdosa e
Ipuji kami me gelarNdu, perban lias Ndu mbelin e
Dengkehken sora kami e, begiken toto kami pe
Isehken kami bujur baNdu, o Tuhan o Dibatangku
Labo ateNdu kami bene, tapina gelah terkelin
Petetap ukur kami e, aminna masap doni
--- (Perp. Kundul) ---
 7. Ngoge Kata Dibata (iogeken si mada jabu)
Ngoge Kata Dibata (iogeken si mada jabu)
L : Kata Dibata si jadi ogen pemena i bas wari enda e me i bas:
Kejadin 7:1-5
L : Ketuahen kalak si megiken Kata Dibata dingen si makekenca i bas geluhna si
teptep wari. Haleluya!
P : Haleluya .... Haleluya ..... Haleluya (iendeken)
8. Kotbah (ibenai ras iujungi alu pertoton) Kotbah: Epesus 2:1-10
Tema : Jabu Si Ndahiken Rencana Dibata

9. Pengakun Kiniteken (Perp. Tedis)

10. Nehken Persembahen (Perp. Kundul) Kekelengen ni Tuhan, seh
me paksana kita ngataken bujur man Dibata arah persembahenta. Kata Dibata si jadi
palas man banta e mekap: ”Ngataken bujur e me persembahen si pehagaken Aku, janah
sipatuh ngikutken Aku tentu Ku kelini”(Msm. 50:23). Tupung kita ngendesken
persembahenta man Tuhan, rende kita i bas: KEE GBKP No. 86:1, 3
Tuhan Jesus si Permakan, aku biri-biriNa
Jesus si ‘ndemi pusuhku, ku ikutken Ia nge
Ku ikutken Ia nge, ku ikutken Ia nge
Jesus si ‘ndemi pusuhku, ku ikutken Ia nge
Jumpa gia kebiaren, Tuhan si kawalku pe
Tetap Ia nge temanku, ku ikutken Ia nge
Ku ikutken Ia nge, ku ikutken Ia nge
Tetap Ia nge temanku, ku ikutken Ia nge

Pertoton Persembahen ras Sapaat

1. Kerna persembahen
2. Gelah ngawan perpulungen GBKP ngasup ngumban kepatuhen jabu Nuah nggeluh
ndahiken rencana Dibata.
3. Gelah ngawan perpulungen GBKP ngasup nggeluh ndahiken rencana Dibata.
4. Kerna jabu kundulen ras si turah i bas perpulungen.

11. Perpadanen Man Dibata (Perp. Tedis)

L Kerina anak-anak Dibata patut ngusih kepatuhen jabu Nuah nggeluh ndahiken rencana
Dibata
P Erpadan aku Tuhan tetap patuh man baNdu lako nggeluh ndahiken rencanaNdu.
L Dibata ndilo anak-anakNa lako ndahiken rencanaNa segelah kerinana nggeluh guna
kemulianNa
P Erpadan aku Tuhan tetap ndahiken rencanaNdu lako nggeluh mpermuliaken Kam alu
nggeluh mehuli man kerina tinepaNdu. Amin.
L Si peteguhi perpadanenta alu ngendeken KEE GBKP No. 191: 1-3
Iban kelengNdu e, iban liasNdu e, la ku bene
Aku idilo Kam, bas lias ateNdu, ku Surga e
Bujur ningkami ka, man baNdu o Tuhan, si mulia
Si mere dalan e, arah anakNdu e, ku Surga e
Bahanlah min tetap, Kam kukelengi kap, rasa lalap
Senang geluhku e, ‘di tanNdu negu pe, ku Surga e
12. Pertoton Tuhan
13. Pemasu-masun
L Bengketilah kegeluhenndu dingen tetaplah nggeluh ndahiken rencana Dibata. Guna jadi
gegehndu alokenlah pasu-pasu idur Dibata nari: “Dibata, si mada perkuah ate, si enggo
nenahken kita (kam) ku kemulianNa si rasa lalap i bas Kristus, njadiken kita (kam) serta,
 tetap, megegeh dingen paguh. IA nge si mada kuasa seh rasa lalap”. Amin (1 Pet. 5:10-
11).
P A…min, a…min, a…min (iendeken)
Pdt. Christopher Sinulingga, M.Th. HP/WA :
081376291768