Ekel Harfenta Tarigan, A.Md.

Farm

Meri Yesika Br.Ketaren, S.Tr. Ak

Jumat, 16 Juni 2023

Jam 14.00 WIB

I - GBKP Runggun Batulayang

Ielai : Pdt. Imza Sony Tarigan, S.Si (Theol)

PERSIKAPEN
Pengendesen Pengantin ibas orangtua nari man Runggun Gereja i lebe-lebe
pintun Gereja.
- Orangtua :

-0-
 “Enda kami reh keluarga TARIGAN Mergana ras KETAREN
Mergana ngendesken anak kekelengen kami Ekel Harfenta Tarigan
ras Meri Yesika Br.Ketaren man GBKP Rg. Batulayang, ija anak
kami enda duana atena erjabu i pasu-pasu, gelah min Runggun
ngaturkensa dahin enda alu mehuli. Tek kami maka kam ipake Tuhan
ngelakoken dahin enda.”
- Runggun Gereja :
“Bujur ibas pengendesen keluarga man Runggun Gereja kerna dahin
enda. Emaka mari kam duana anak kami, orangtua, keluarga,
Perpulungen radu ras kita bengket ku rumah pertoton gelah
sibenaken kebaktin pemasu-masun enda.
----------Pengantin iarakken kubas Gereja ----------

PENARUH KU BAS KEBAKTIN

Mejuah-juah ibas gelar Tuhan Yesus Kristus.
Perban enggo ersada arih runggun Gereja radu ras keluarga
TARIGAN ras KETAREN mergana, maka sendah pulung kita ibas rumah
pertoton enda, mindo pemasu-masun Tuhan Dibata, nandangi perjabun
kekelengenta sidilaki ras sidiberu. Pengarapenta arah kebaktin pemasu-
masun enda tangkas tergejap keleng ate Tuhan si mabai dingen ngarak-
ngarak perjabun si ni persadakenNa. Janah tek kita gelar Tuhan tetap terpuji
dingen ermulia ibas kebaktin enda, sebab ibahanNa metunggung tetap kita
ngaloken pemasu-masunNa,man kekelengenta si atena pejabuken bana wari
si sendah. Si pesikap dage ukurta, si bengketi me kebaktin pemasu-masun
enda alu ras kita Rende KEE No. 424 : 1-2
(Perp. Tedis)

Rende KEE No. 424 : 1-2

1) Ipuji kami Kam, Dibata si mbelin, alu ende-enden si meriah
Suari ras berngi kawali kami min, segelah la celus bas percuban
Reff : Sangap kap kalak si ‘rnalem baNdu e
Daten tuah ras kesenangen pe
Sangap kap kalak si ‘rnalem baNdu e
Daten tuah ras kesenangen pe
4) Dibata sajalah tetap si man pujin
Endeskenlah g’luhta man baNa min
Tetap Ia si mperdiateken kita min
KelengNa man Tuhan banta la erkerin Reff : …

KEBAKTIN.
1. Votum - Salam
Lit : Kebaktin Pemasu-masun perjabun enda ibenaken ibas gelar
Dibata Bapa si njadiken manusia, ibas gelar Yesus Kristus
takal perpulungen, ras ibas gelar kesah si Badia si
-1-
 mpersadaken jabu kalak si erkiniteken. Perkuah ate ras dame
ibas Dibata Bapa, ras ibas Tuhan Yesus Kristus nari, ibas
kerembaken Kesah si Badia, ras kita k’rina gelah. Amin.
Perp : Amin…Amin…Amin.
2. Invocatio :
Janah i babo si e kerina, arus kam sikeleng-kelengen sabap keleng ate
mpersadaken kerinana alu serta. Dame si ibereken Kristus i bas
pusuhndu min si ngajari kam i bas erbahan keputusen-keputusenndu.
Sabap guna dame kam ipilih Dibata jadi sada kula. E maka ngataken
bujurlah. (Kolose 3 : 14 – 15)
4. Rende KEE No. 345:1,2

1) Nggo kami sikap, dengkeh kataNdu, Tuhan ng’ranalah

Nggo kami sikap megi kataNdu,Tuhan ng’ranalah

Reff : Sehken kataNdu man kami min, arah kemahenNdu

Sehken pedahNdu man kami min, arah kemahenNdu

2) Merincuh kami ndengkeh kataNdu, Tuhan ng’ranalah

Man tendang kami bas kegeluhen, Tuhan ng’ranalah

Reff…. (Perp. kundul)

5. Koor / VG : 1..Keluarga Ketaren

2. MORIA Batu Layang
3. Keluarga Tarigan

5. Responsoria : Masmur 128 : 1-6 (Responsoria)

Lit :Sangap kal kalak simalang man Tuhan. Singgeluh ngikutken

kerina perentahNa.
Perp : Ipanna me ulihna latih, sangap ia nggeluh, Mehuli
sikerajangenna.
Lit : Ndeharana bali ras batang anggur simeramis buahna ibas
rumahna. Dingen anak-anakna bali ras tunas batang saitun i
sekelewet mejana.
Pengantin : Bageme pasu-pasu Tuhan man kalak simalang
man baNa.

-2-
 Lit : Tuhanlah simasu-masu kam i Sion nari, mbera idahndu
kesangapen Yerusalem kidekah umur geluhndu.
Perp : Cawirlah kam metua, maka sempat idahndu kempu-kempundu.
Damelah sikerajangen Israel.
Lit : Ketuahen kalak simegiken kata Dibata dingen simakekensa
ibas geluhna si tep-tep wari. Haleluya.
L+P : Haleluya……….Haleluya………..Haleluya
6. Khotbah :
7. Pengakun Kiniteken (Perp. Tedis)
(Perp. Kundul)
8. Koor / VG : 1. Koor Gabungan R. Sikeben
2. Pemdes Sikeben
2. Pjj sektor 2 Batu Layang
3. Moria Runggun Sikeben
9. Nehken Persembahen.
a. Kata Dibata sijadi palas ibas kita nehken pengataken
bujur : Roma 12 : 1b
Endeskenlah kulandu man Dibata saja selaku persembahen si
nggeluh rikutken si ngena ateNa. Sabap bage me arusna kam
ersembah man Dibata sue ras biakndu selaku mahluk si rukur.
b. Rende KEE No. 315 : 1-3
1) Simpar tuhu pemereNdu, jujurkenNdu kam man
bangku

Ermengkah kal me ukurku, la kulupa lias ateNdu

Reff : AlokenNdu o, Tuhanku, persembahen anakndu

Usekenlah pasu-pasu, peteguhi perpulengenNdu

2) Benih si isuan kami, e pe kap ibas Kam nari

kuasaNdu mahanca turah, kuasaNdu mahanca

erbuah

(Reff...)

3) Brendu kami kepentaren, g’lah nirangken kepapaken

-3-
 Ajar kami kebujuren, maka pinter ka perukuren

(Reff..)

c. Pertoton Persembahen

9. Koor / VG : 1. Mamre Runggun Batu Layang

2. Permata Klasis Sibolangit
3. Mamre Runggun Sikeben

11. Nehken Pemasu-masun Perjabun

a. Ngogeken Palas, Tujun ras pendilo ku bas Perjabun
b. Perpadanen Perjabun
Sidilaki :
Aku si Ekel Harfenta Tarigan muat kam si Meri Yesika
Br.Ketaren jadi ndeharangku. Aku erpadan tetap ngaloken
kam subuk ibas paksa senang entah pe susah, subuk ibas
paksa sehat entah pe sakit, subuk ibas paksa meriah ukur
bage pe erceda ate, janah aku erpadan njaga kebadian
perjabunnta seh Dibata nirangken kita alu kematen.

Sidiberu :
Aku si Meri Yesika Br.Ketaren muat kam si Ekel Harfenta
Tarigan jadi perbulangenku. Aku erpadan tetap ngaloken
kam subuk ibas paksa senang entah pe susah, subuk ibas
paksa sehat entah pe sakit, subuk ibas paksa meriah ukur
bage pe erceda ate, janah aku erpadan njaga kebadian
perjabunnta seh Dibata nirangken kita alu kematen.
Lit : Erjimpuh dage kam duana janah alokenlah pasu-pasu idur
Dibata nari :
“Ipasu-pasu janah ikawali Dibata kam, siang ayo Dibata
ersinalsal ibabodu janah melias atena ngenehen kam.
Itatap Dibata ku kam janah malem atendu ibahanNa.
Amin”
Rende KEE No. 124 : 1
I pasu-pasu Tuhan Dibatandu, O kam si empo kam si tersereh
Bahanlah Tuhan Yesus man temuendu, Lah sura-sura si mehuli seh
Bre Ia min si nujurken jabundu, Gegeh ras ukur pe ras peraten
Lah kekelengen ibas kam pekepar, La lesap pe seh nirang kematen
~ Ertoto guna jabu si mbaru
~ Makeken Cincin Perjabun
-4-
 Nina Pandita :
"Dibata pengarapen idemina pusuhndu alu erbage-bage
keriahen dingen dame ibas kiniteken, maka bayak kam
ibas pengarapen salu kuasa Kesah Si Badia" (bdk.
Roma 15:13).
Duet penganten……….
12. Nehken Persembahen Kulebe :
Rende KEE No. 451 : 1 - 3
1) Malerlah pasu-pasuNdu bagi ni padankenNdu
Gegeh ras ukur si paguh tetap iberekenNdu
Reff :
Pasu-pasuNdu, em ulu gegeh kami
Enggo kap maler me tuhu, sindemi geluh kami
2) Maler’lah pasu-pasuNdu g’luh kami jadi baru
Sorana bagi lau maler mpeteneng ukur kami
Reff : ...
3) Maler’lah pasu-pasuNdu mpetetap ukur kami
Rende janah muji g’larNdu
segedang-gedang geluh kami
Reff : .....
13. Pertoton Syafaat.
14. Koor / VG: 1 Permata Batu Layang
2.Permata Runggun Sikeben
3. Moria se GBKP
15. Tekad ibas Perjabun (Perp. tedis)
L : Sangap jabu sierkemalangen man Dibata.
P : Malem ateku ibas jabungku sabab keleng ate Dibata kap
palasna
L : Kelengilah teman geluhndu si ibereken Tuhan man bandu
P : Keleng ateku rasa lalap bagi keleng ate Kristus nandangi
aku
L : Ermulia gelar Dibata ibas jabundu sekalak-sekalak
P : Amin.
16. Rende KEE No. 425 : 1 – 2
1. Adi ras Yesus malem naring pusuhta
IperdiatekenNa me kita ban keleng ateNa
Amin gia jumpa erbage percuban
-5-
 La kap itadingkenNa kita isampatiNa
Reff :
Malem me ate je kita pe dat dame ras keriahen
ukur
Bene me kebiaren tading me keguluten
Mberat jadi menahang, pusuh pe jadi salang
2. Adi ras Yesus seh damena ukurta
IbereNa kepentarenNa idu kuasaNa
Ndauh me dage ukur ras ate ceda
Ukur mehuli turah ban sialoken kataNa
Reff : ....
17. Pertoton Tuhan
18. Pemasu-masun
Lit : Berkatlah ndalani geluhndu, jadilah kam pasu-pasu man
temanndu manusia, janah guna si e aloken pasu -pasu idur
Dibatanta nari :

“Dibata simada perkuah ate, si enggo nenahken

kam ku kemulianNa si rasa lalap ibas Kristus, Ia-
lah sinjadiken kam serta, njadiken kam tetap
megegeh dingen paguh. Ia nge simada kuasa seh
rasa lalap”. Amin.

Perp : Amin…Amin…Amin
ACARA KENCA DUNG KEBAKTIAN
1. Runggun Gereja nehken surat pasu-pasu
2. Penganten ergambar ras Pendeta.
3. Penganten ergambar ras Pendeta, Pt./Dk, rsd
4. Penganten ergambar ras Pengurus PJJ, KAKR, Permata, Teman
Meriah
5. Ngerana Keluarga Kedua Belah Pihak
6. Penganten ergambar ras orangtua siempo.
7. Penganten ergambar ras orangtua sinereh.
8. Penganten ergambar ras orangtua pekepar.
9. Runggun Gereja ngendesken acara ergambar man anak beru pekepar
guna iaturken alu ratur.

( Koor Moria Se - GBKP )

-6-
 O Tuhan i jenda kami naruhken anakNdu kin
Si nggo 'rpadan i lebeNdu, 'rjabu i adepenNdu
Dengkehken min o Bapa, toto kami man baNdu
Useken min dame baNa, jabuNa rembak ras Kam

B're min tuah pasu-pasuNdu, ku jabu anak kami Bapa

Tuhan lias siang ayoNdu, lalaplah bana la erleka
Tuhan Kam lah naruhken ia, nuduhken
dalin man bana kap
Gelah ibas jabuna gia, dame rusur seh rasa lalap

B're min tuah pasu-pasuNdu, ku jabu anak kami Bapa

Tuhan lias siang ayoNdu, lalaplah bana la erleka
Tuhan Kam lah naruhken ia, nuduhken dalin
man bana kap
Gelah ibas jabuna gia, dame rusur seh rasa lalap
Dame rusur seh rasa lalap.

-7-