TATA IBADAH

Buka Kunci Rumah

Keluarga Bp. Siena Keliat
Sabtu, 13 Juli 2019

Gereja Batak Karo Prostestan

MAJELIS RUNGGUN
KISARAN
A. ACARA IKESAIN RUMAH
1. Rende KEE GBKP No. 205 :1,2
Rehlah min o Tuhan, sikap kami k’rina,
Ersembah man baNdu jenda.
Nusurlah min Tuhan, bahan sikap k’rina,
Ukur kami pe badia.
O Bapa, b’re gelah, daten pasu-pasu
Kami k’rina enda.
Tuhan Dibatanta lit bas rumah enda,
Nembah kita k’rina baNa.
Alu kehamaten mungkuklah baNa,
Kula, tendi pe kerina.
Aloken kataNa ras pasu-pasuNa,
UsekenNa banta.

2. Ertoto
3. Pengakun Simada Jabu
Begiken jenari aloilah penungkunen si kusehken bandu
simengket rumah enda:
1. Tek nge kam man Dibata si Sada, Bapa AnakNa Yesus
Kristus ras Kesah Si Badia?
2. Tek nge kam bagi si tersurat ibas Pustaka si Badia,
maka doni enda ras kerina isina, termasuk rumah
enda, Dibata kap siempuna?
 3. Erpadan kam man Dibata, maka ipakeken kam rumah
enda nehken si ngena ateNa.

ADI TUHU BAGE ATENDU, NINDULAH:

“TUHU, BAGE ATEKU”

4. Ngendesken Kunci man Simaba Kebaktin

5. Nalangi Pintu : Alu kekelengen ras perkuah ate Dibata,
rumah enda ibereken man bandu guna ipakeken kam gelah
reh gegehna kam nehken singena ateNa.
Ibas Gelar Dibata Bapa, Anakna Yesus Kristus, Ras Kesah
Si Badia. Amin

(Masuk kubas rumah)

B. ACARA IBAS RUMAH

1. Votum : Dame ibas Dibata nari simahanca atendu
malem katawari pe, erkiteken Tuhan Yesus
Kristus.
2. Salam : Penampat man bandu reh ibas Dibata nari,
sinepa langit ras doni, singkawali peberkat ras
permulihndu, genduari nari she rasa lalap.
Amin
A….min A…min A…..min (iendeken)
3. Introitus : Jaga, maka ola ilupakenndu TUHAN Dibatandu.
Ola silahken sada pe undang-undangNa si
kubereken man bandu wari enda. Adi enggo
idatndu kerina kai atendu si ipanndu, janah
enggo ipajekkenndu rumah si mejile man
inganndu (Ulangen 8:11-12)

4. Rende KEE 417:1,2

Kam Yesus Tuhanku palas kegeluhenku
Reh aku ngadap man banndu
Teguhlah min aku bas ndalani geluhku
Lah ula celus nahengku
Reff : Dengkehken sorangku erlebuh o Tuhan
Ngendesken pingko pingkoku
Alemi min salah dosangku o Tuhan
Lah atan bas kiniulin
Kam Yesus Tuhanku sampati min geluhku
Alemi Tuhan dosangku
La kap lit terligen bas adep adepenndu
Kerina salah lepakku
Reff : Dengkehken sorangku......
5. Kata Dibata Kerna Jabu Si Ermalangen Man Tuhan (Msm.
128:1-6)
L : Sangap kal kalak si malang man Tuhan, si nggeluh
ngikutken kerina perentahNa.
P : Ipanna me ulihna latih, sangap nggeluh, mehuli
sikerajangenna.
L : Ndeharana bali ras anggur si meramis buahna i bas
rumahna, dingen anak-anakna bali ras tunas batang saitun
i sekelewet mejana.
P : Bage me pasu-pasu Tuhan, man kalak si malang man baNa.
L : Tuhanlah si masu-masu kam i Sion nari,mbera idahndu
kesangapen Jerusalem kidekah umur geluhndu. Cawirlah
kam metua, maka sempat idahndu kempu-kempundu.
Damelah sikerajangenndu.
P : Amin
Rende KEE GBKP N0. 201:1,4
Malem ate tuhu-tuhu si ernalem man baNdu
Kam Dibata si ‘najdiken langit ras doni enda
SalsaliNdu pusuh kami Maka t’rangNdu tergejap
Kalak si tek la kap bene ‘Ban kelengNdu e tetap
Aloken Kamlah o, Bapa Kuendesken geluhku
KesahNdu min ngajarisa Lah kuteh nembah baNdu
Pasu-pasu min kerina Daging, ukur, tendingku
Gelah arah tan ras kata Ipujina gelarNdu
6. Renungen

7. Pengakun Kiniteken

8. Persembahen :
Ingetlah maka kalak si sitik ngerdangken benih, sitik ka
iperanina, kalak si melala ngerdangken benih, melala ka
iperanina (II Kor. 9:6)
Rende KEE GBKP No. 445:1,3,4
Sipepulung me persembahenta. Siendesken dage man Dibata.
Tanda meriah ukur ban pasu-pasuNa si simpar breNa man banta.
Reff : Asa si nggo isikapken, Asa si nggo itotoken.
Em pengataken bujurta kempak Dibata.
Pengataken bujur man Dibata enda mbelin tuhu gunana.
Jadiken geluhta, kula ras tendita, persembahenta si nggeluh
Reff : Asa si nggo isikapken...
Persembahen kami e O Tuhan, eme sada bagin pemereNdu
Ajarindu kami ersembah man baNdu, pehaga kinirajanNdu
Reff : Asa si nggo isikapken...

9. Pertoton Syafaat
10. Tekad ket. S: Simada Jabu
L : Enggo ipasu-pasu Tuhan geluhndu, jabundu ras
pendahinndu termasuk rumah enda, kai dage si jadi
tekadndu?
S : Tetap kami nggeluhken geluh kami, makeken pasu-pasu
Tuhan guna jadi jabu sierkemalangen man Tuhan. Gelah
kami ras kiniliten kami pe jadi pasu-pasu ka man
sekelewet kami.
L : Enggo icidahken Tuhan keleng ateNa man Bandu guna
nampati ras pegegehi kam, kai dage tekadndu?
S : Tetap ipakeken kami keleng ate Tuhan jadi palas geluh ras
jabu kami, gelah alu bage tetap dame jadi sikerajangen
kami.
L : Tuhanlah si tetap ndemi kam alu pasu-pasuNa arah keleng
ateNa si la ersibar, tetap paguh jabundu, mehuli kerina
pendahinndu ibas tutus atendu, icukupkenNa kerina
keperlunndu, janah kesangapen tetap jadi sikerajangendu.
P : Amin

11. Rende KEE GBKP no. 381:1,3

Sura-sura Yesus bangku, Ersinalsal tetap
Nggeluh bujur ras mehuli, Si ngena ateNa
Reff : Ersinalsal terang, Em sinisuraken Yesus
Ersinalsal terang, Ku tetap ersinalsal
 Ku pindo Yesus nampati, Njaga pusuhku e
Gelah ngasup ersinalsal, Ngikutken Tuhan e
Reff : Ersinalsal terang......

12. Pertoton Tuhan & Pemasu-Masun

Tetaplah paguh kinitekenndu, jadikan Keleng ate ibas Kristus
nari jadi palas jabundu maka kedamen lit ibas kam kerina
dingen tetap ermeriah ukurlah ibas dalani kegeluhenndu.
Emaka alokenlah pasu-pasu idur Dibata nari:
Perkuah ate Tuhan Yesus Kristus, Kekelengen Dibata Bapa
ras kerembaken Kesah si Badia ras kam kerina gelah. Amin.
A….min A…min A…..min (iendeken)