BAHAN SERMON PEKAN KEBAKTIN KELUARGA

GBKP RUNGGUN KISARAN

TANGGAL 18 NOVEMBER 2018

INVOCATIO : Masmur 119:63

OGEN : Kejadin 45:9-15
KHOTBAH : Epesus 2:19-22
TEMA : Iranggut Jadi Sada Keluarga

- Konsep Familia Dei (Ind. Keluarga Dibata) jadi pusat ibas bahan khotbah enda. Paulus ncidahken
maka perkuah ate man manusia enggo mereken dalan man kerina manusia guna ersada. Emaka
itekanken Paulus itengah-tengah perpulungen, lanai bo lit kalak Jahudi ntah lang, kalak asing ntah
pe pertandang (xenoi; orang asing, paraokoi: pendatang dianggap lawan kata Sympolitai: warga
negara yang memiliki hak penuh. Ungkapan yang dipakai dalam pemisahan secara politis, kultur
dan ekonomi). Ungkapan enda situhuna guna ngelayasi cara rukur kalak Jahudi Kristen si
menganggap dirina sibenarna, sibujurna erkiteken selaku kalak Kristen tetap idalankenna
undang-undang. Emaka terjadi pemisahen itengah-tengah gereja, antara kalak si sunat ntah lang,
kalak Jahudi bage pe kalak Junani.
- Gereja nina Paulus arus jadi familia Dei si enggo irakut ibas Kesah (Ep. 2:18-19), emaka arah Jesus
enggo perdameken ia dua mbelahna gelah ndatken hak guna rembak ras Tuhan. Kalak Junani
ndube ngenanami kesirangen secara vertikal (ras Dibata) bage pe secara horizontal (ras kalak
Jahudi sienggo leben nandai Dibata arah undang-undang). Arah Kristus si iberitaken ibas Berita Si
Meriah me maka si sirang erkiteken dosa banci ersada.
- Ibas keluarga Dibata lanai bo lit bangsa Jahudi ntah pe bangsa Yunanu tapi bangsa Dibata, warga
Kinirajan Sorga, lanai bo lit kalak asing, ntah pe kalak simengasingken kalak sideban bage pe
mengasingken bana itengah-tengah perpulungen, lanai lit kalak pertandang tapi enggo anggota
keluarga.
- Ikaten enda lebihen asangken ikaten secara politis, budaya, ekonomi bage pe ikaten dareh, sebab
KesahNa singeranggut jadi sada. Pengalamen enda pe teridah ibas Kej. 45:9-15, ija Jusup amin gia
nggo ngenanami kiniseran ras ngaloken perbahanen si la mehuli arah senina-seninana tapi la lit
ibas ia elem-elem nandangi senina-seninana si enggo ndayaken ia ras terpaksa ngenanami erbage-
bage kesusahen i tanah Mesir, tapi dungna Ia jadi wakil Firaun i Tanah Mesir, arah jabatenna labo
situhuna mesera atena guna mbalas kerina perbahanen senina-seninana tapi arah kerina sienggo
idalanina jadi rencana Tuhan guna siterulin eme kap banci nelamatken keluargana. Ianggapna
maka kesusahen si inanamina jadi dalan guna ngaloken siterulin si enggo i sikapken Dibata.
- Turi-turin kerna Jusup ngataken man banta, maka keluarga situhu-tuhu tetap nggit ngalemi salah
keluarganta, sebab labo lit istilah mantan keluarga, mantan anak, mantan senina ntah mantan
bapa ntah mantan nande. Iketen kekeluargaan sifatna kekal apalagi iketen keluarga ni Kristus.
Arah Jusup pe kita erlajar maka kita hadir guna nampati keluarga, ula min erkiteken kita enggo
sukses lupa kita man keluarga bage pe man orangtua, tapi adi kenca kita ibas kesusahen ije maka
si inget keluarga, orangtua ntah pe kade-kade. Jusup tetap ncidahken maka kekelengenna
nandangi keluargana la pernah masap amin gia ia nggo jadi pejabat tapi la ia pernah mela guna
ngaloken keluarga ras orangtuana, amin gia lit ndube kesalahen seninana man bana, tapi
kesuksesenna labo ipakena jadi nampilken bana tapi jadi kesempatan man kalak sideban kerna
kemuliaan Tuhan.
- Prasyarat maka Rumah Pertoton ibas pengertin pertendin, banci ia majek, berkembang janah
banci ia badia eme erkiteken teridah kiniersadaan itengah-tengah keluarga Dibata. janah Dibata
jadi Bapa itengah-tengah KeluargaNa. Keluarga si erbapaken Dibata ma mahan bana kerina anak-
anakNa iarapken ngusih biak Bapa. Emaka tuhu-tuhu gereja nggo jadi rumah pertendin, ingan cio
cilinggem, ingan ncidahken keleng ate bagi jabu kalak si erkiniteken.

DISKUSI
1. Tentu lit me nilai-nilai kekeluargaan itengah-tengah gerejanta GBKP saja tetap nge perlu lit lalap
peningkaten ku wari-wari siterusna. Salah sada buktina ibas pelayanen nehken penampat man
anggota jemaat si lit ibas kesusahen, mereken pengapul man teman si paksana erceda ate, nilai-
nilai kekeluargaan tetap nge teridah ibas kerina dahin-dahin pelayanen.
2. Melala hal-hal siperlu itingkatken itengah gerejanta, secara khusus ibas kita nampati teman-
temanta sada kiniteken. Keluarga Dibata labo saja keluarga GBKP tapi man kerina teman-temanta
manusia.
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 19 NOVEMBER 2018

INVOCATIO : Masmur 89:16

OGEN : Jakub 1:25-27
KHOTBAH : Keluaren 20:1-11
TEMA : Lebekenlah Tuhan I Bas Kegeluhen Jabu

- Tema pekan enda mpersingeti kita maka tujun kegeluhen itengah-tengah jabu labo saja guna jabu
e saja tapi arus ibaba gelah jadi kemuliaan man Tuhan. Ia arus jadi prioritas penting itengah-
tengah kegeluhen perjabun. Ngelebeken Tuhan ibas jabu banci iertiken maka keluarga arus jadi
komunitas rohani itengah-tengah geluhNa.
- Sijadi bahan khotbah ibas pekan keluarga wari sipeduaken enda ibuat ibas sepuluh pedah Dibata
e me kap pedah sipemena seh ku pedah sipempatken. Pedah ntah pe undang-undang si
merentahken manusia guna patuh ersembah man Tuhan. Empat pedah enda ikataken Tuhan Jesus
jadi perentah perentah sipentingna dingen simbelinna (LAI: hukum yang terutama dan pertama),
ikatakenna Kelengilah Tuhan Dibatandu asa ukurndu, asa tendindu dingen asa gegehndu lit (Mat.
22:37-38). Kata enda jadi jababen ibas penungkunen guru agama man Jesus Kristus kerna
perentah si apai kin sipentingna ibas kerina undang-undang agama. Alu kata sideban ibas Jesus
meringkas 4 perentah ibas pedah sipuluh, atena ngatakenca maka nilai-nilai kekelengen man
Tuhan arus lit ibas ncidahken kepatuhen man Tuhan Dibata.
- Ate Tuhan min ia tetap iutamaken ras ipelebeken ibas kegeluhen manusia, sebab leben nge Dibata
ngekelengi manusia asangkan manusia ngkelengi Dibata (I Yoh. 4:19). Ope lenga kita tubuh
itengah-tengah doni enda Tuhan nggo leben jagai kita ibas bertin nandenta (Msm. 139:13) labo e
saja, sebab ope denga doni enda lenga ijadiken nggo leben ipilihna manusia ibas rencanana
simehuli kempak kita (Ep. 1:4).
- Perentah enda labo la lit tujunna, sebab Dibata nge kekelengen situhu-tuhu (1 Yoh. 4:8), emaka
ibas kita ngkelengi Tuhan, erlajar ka kita guna merenungken uga arusna kekelengen e janah
teridah ka ibas caranta ngekelengi temanta manusia. Emaka la banci lang, caranta ngekelengi
Dibata erkawiten ras caranta ngekelengi temanta manusia. E me sebabna maka Jesus Kristus
menekanken ngkelengi Dibata lebe maka ngekelengi manusia bagi dirinta jine. Enda me si
itekanken ibas bahan ogen maka cara eragama labo saja megi kata Dibata saja tapi ndalanken
keleng ate man temanta manusia bagi anak melumang ras diberu simbalu.
- Labo saja erkawiten tapi pe mereken dampak ku sada ras sidebanna. Keleng ate kita man Tuhan
mereken dampak man kesusurenta, man anak-anak bage pe seh ku kempu-kempunta. Enda me si
itekanken ibas ay. 5, adi kita la patuh ersembah man Tuhan janah ersembah man dibata-dibata
sideban maka reh me pernembeh ate Dibata labo saja man dirinta tapi man kesusurenta seh ku
kesusuren sipeteluken bage pe si peempatken tapi adi singekelengi ia janah ngikutken pedahna
pasu-pasu Tuhan seh ku meribu-ribu kesusuranna (ay. 6). Ate Tuhan maka jabunta e jadi jabu
siersembah man Tuhan, jadi jabu sitetap pebadiaken gelar Tuhan, jadi jabu si ras-ras ku gereja
guna ersembah man Tuhan ibas wari Sabat.
- Emaka lit sada ungkapen ngataken: Keluarga yang kokoh menghasilkan gereja yang kokoh. Ertina
jabu si ersembah man Tuhan pasti menghasilken gereja simegegeh ras gereja si tetap ersembah
man Tuhan.
- Lebekenlah Tuhan berarti mendahulukan Tuhan, namaken Tuhan arah lebe-lebenta jadi ikutenna
gelah ia pe jadi ampang-ampang ibas kita menghadapi perbeben geluh, perbeben itengah-tengah
jabu kalak si erkiniteken.

DISKUSI
1. Banci jadi itengah-tengah kegeluhenta kita rusur iperhadapken ku bas pilihen ndahiken dahinta
ntah pe kepentingenta secara doni ntah pilihen pelebeken Tuhan ndahiken pelayanen ras dahin
itengah-tengah gereja. Ntah mungkin kita iperhadapken ku pilihen pelebeken keperlunta ntah pe
keperlun temanta sideban. Arah kegeluhen kita selaku kalak si erkiniteken tentu pernah nge kita
memprioritasken ras pelebeken kepentingen Dibata ntah pe pelayanen asangken ndalanken
kepentingen kita secara pribadi.
2. Si endeken KEE No. 75 enda labo saja iendeken tapi jadi prinsip geluh guna tetap gelem pedahNa
ras tetap tutus ngikutken Tuhan.
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 20 NOVEMBER 2018

INVOCATIO : Kuan-kuanen 22:6

OGEN : Ulangen 6:1-3
KHOTBAH : Matius 5:17-20
TEMA : Pengajaren Tuhan ngkuhi Orat Nggeluh

- Salah sada sijadi penekanen ibas bahan pekan keluarga sekalenda e me kap soal pendidiken
karakter ras spiritualitas. Salah hal sipenting simawen terlupaken kalak ibas zaman sigenduari
enda, si lebih menekanken soal pendidiken intelektualitas. Bahan khotbah sekalenda pe ngerana
soal sie, ija Jesus Kristus ngerana soal uga arusna pengikut Kristus ncidahken ketutusen ras
kualitas kepatuhenna labo hanya terjeng pengangkaan saja tapi tuhu-tuhu nggo jadi bagian
karakter kalak si erkiniteken.
- Ibas ay. 20, Tuhan Jesus ngerana soal kearusen kalak sibengket kubas kinirajan Sorga arus
melebihi perbahanen guru-guru agama ras kalak Parisi. Golongen enda duana terkenal kal kerna
pemahamenna simbages kerna Kata Dibata rikut pe ras praktekna. Saja sikurang ibas dua
golongen enda kerna kiniteken eme kap sikapna bagi ragi. Ibas Mat. 16:12, ijelasken maka Kalak
Parisi mindo tanda Jesus e rehna ibas Dibata nari, piher kel ukurna guna tek man Jesus Kristus
janah ibas Luk. 12:1, ikataken maka kalak Parisi e me kalak sipekulah-kulah.
- Jadi perentah Tuhan Jesus gelah melebihi perbahanen guru-guru agama ras kalak Parisi e me kap
soal perukurenna. Adi guru agama ras kalak Parisi mehuli perbahanenna tapi perukurenna la
mehuli maka pengikut Kristus arus lebih asa sie e me kap mehuli perbahanenna mehuli ka pusuh
ras perukurenna enda me kualitas kalak si erkiniteken. Dua hal enda la banci lang arus lit ibas diri
kalak Kristen, ula min ninta ukur nge sipentingna. Adi ukur mehuli teridah min arah perbahanen
simehuli, sebab ukur mehuli tapi la teridah arah perbahenen pekulah-kulah ka nge gelarna.
- Arah pengajaren Kristus enda, atena labo atena ncedai undang-undang sebab kerehen Tuhan
Jesus guna nggenepi undang-undang e. La lit sada bagin sikitikna kal ibas undang-undang enda ate
Jesus iubahna, tapi situhuna Jesus reh guna mpkena cara rukur ibas ngangkai undang-undang e.
Karakter kalak Kristen tuhu-tuhu ietehna maka ndalanken undang-undang guna ncidahken
kekelengen nge labo guna ncidahken maka dirina sibenarna ras sibujurna bagi si ilakoken guru-
guru agama ras kalak Parisi. Enda me si imaksudken ibas pendidiken spiritualias ras karakter si
ibangun Jesus Kristus arah pengajarenna idatas uruk.
- Pengajaren Tuhan enda nekanken maka pemahamen intelektual penting tapi arus ikuhi ia alu
pemahamen simembentuk karakter ras spiritual manusia. Bahan ogen ngerana soal proses
pendidiken kalak Israel itengah-tengah keluarga, maka orangtua pe hadir guna ngajarken kerna
undang-undang Dibata man anak-anakNa. Sebab orangtua tentuna labo lebih dalam soal
intelektualitas tapi biasana orangtua ngajarken kerna kiniulin rikut pe ras agama man anak-
anakna. Segelahna pendidiken si idatken anak-anak ibas pendidiken formal nari bagi sekolah
banci ipakena guna kiniulin ras erguna itengah-tengah masyarakat. Proses enda labo proses
sikentisik sebab bagi si ikataken ibas Kuan-kuan 22:6, maka anak si iajarken kerna kearusen
nggeluh (LAI: kepatutan), maka ikutkenna asa umurna nggeluh.
- Emaka mari radu ras kita mperlengkapi dirinta rikut pe anak-anakta, alu pendidiken formal,
pengalamen nggeluh, pengajaren kerna moralitas, budaya ras sidebanna janah sipentingna ikuhi
alu pengajaren kerna Kata Dibata.

DISKUSI
1. Perbahanen sekalak si orat nggeluhna enggo ikuhi pengajaren Tuhan teridah maka perbahanenna
terarah labo saja ku dirina jine, tapi pe terarah guna kinuliun kalak sideban, keluarga, gereja
bagepe masyarakat, janah sipaling pentingna kal guna kemuliaan Tuhan. Kerina kepentaren ras
ilmu si lit ibas ia labo erbahanca ia reh sombongna iakapna sibenarna ras sidebanna tapi malah
njadiken ia meteruk ukur.
2. Itengah-tengah zaman sigenduari, pengenalen kerna budaya Karo man generasi muda bagi kurang
denga, teridah maka anak-anak sigenduari labo meteh kal kerna bahasa, kekerabaten bage pe
kerna uga orat nggeluh kalak Karo.
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 21 NOVEMBER 2018

INVOCATIO : 1 Korinti 15:33

OGEN : 1 Samuel 2:12-17
KHOTBAH : Roma 6:12-14
TEMA : Pakelah Ringringndu Nehken si Ngena Atena

- Teologi pembenaren siikataken Paulus ibas pengajarenna, erbahanca kalak Jahudi ras kalak
kristen Jahudi nanggapi salah. Teologi Paulus kerna pembenaren eme la lit manusia sibenar,
Tuhan sibenarken manusia. Adi bage nina kalak e perbedaan antara simehuli ras la mehuli lanai lit
kap e, erbahanca kalak banci erbahan dosa. Ibas pengangkan sisalah enda me Paulus mereken
penjelasan kerna pembenaren situhu-tuhu.
- Pembenaren siibereken Tuhan man manusia eme keselamatan seutuhna. Keselamatan sialoken
manusia erbahanca kalak kristen nggo mate erkiteken dosa, tapi keke radu ras Kristus. Simbol
enda lit ibas pridin si Badia. Erkiteken sie me kalak kristen ula nari erbahan dosa. Emaka si jaga
kula manusia. Ula nai pelepas dosa ngerajai kula. Moral kalak kristen harus mehuli. Alu kata
sideban kalak kristen idilo ibas kegeluhen teptep wari guna mateken dosa. kalak kristen harus
nggeluh ibas kepatuhen man Tuhan.
- Kalak kristen iperentahken Paulus gelah ula nari erbahan dosa. Amin gia kalak kristen nggo
merdeka ibas dosa, tapi kuasa dosa ibas doni enda lenga dung. Kuasa dosa lalap erdahin. Bagepe
dosa e lit daya tarik tersendiri, emaka kalak kristen banci tergoda janah mulihi iteruh kuasa dosa.
Erkiteken sie isingetken Paulus gelah dosa ula nari erkuasa nandangi kula manusia si ermasap-
masap (fana).
- Ula min dosa ngkuasai diri manusia, tapi Dibata lah singkuasai manusia, erkiteken sie kalak
kristen harus ngendesken dirina man Dibata saja. Alu bage kerina ringring kula manusia ipake
guna ngelakoken simehuli singena ate Tuhan. Tuhu-tuhu kalak kristen arus ikuasai Dibata. Kalak
kristen harus nggeluh alu moral simehuli. Adi kegeluhen ikuasai Dibata, maka la lit ringring kula
ngelakoken si la mehuli.
- Keselamatan singgo ialoken kalak kristen, erkite-kiteken lias ate Tuhan. Ikataken Paulus enda
sebab lit kalak kristen Jahudi erpengakap maka keselamatan ialoken manusia adi idalankenna
undang-undang. Dosa banci italuken adi kalak kristen tetap nggeluh ibas lias ate Tuhan. Alu bage
kegeluhen kalak kristen tuhu-tuhu ikuasai kuasa Tuhan.
- Ringring kula eme bagin siitepa Dibata ibas diri manusia. Erkiteken sie me manusia ikataken
sentudu ras tempat Dibata. Janah ate Dibata ringring e ipake manusia guna ndalanken sura-sura
Dibata. Ringring kula la saja terjeng tan ras nahe, tapi panca indra ikut ibas ringring kula e.Sada
penungkunen, kai hubungan ringring kula ras keluarga. Sipemena : Ringring kula banci iibaratken
anggota keluarga. Anggota keluarga e harus nggeluh ras leket ibas sada keluarga janah ipinpin
langsung kepala keluarga. Bagepe anggota keluarga harus nggeluh sisampat-sampaten. Ngidah
keadaan sigenduari maka penting peranen keluarga, sebab keluarga eme sada institusi
pembentukan mental spiritual anggota keluarga e siutama. Pendidikan keluarga harus megegeh,
sebab adi pendidikan keluarga, khususna pendidikan agama megegeh, maka kerina anggota
keluarga (ringring kula) banci terhindar ibas penakit-pinakit sosial siberkembang genduari
enda. Anggota keluarga la banci papak ibas dalani kegeluhen i doni enda teptep wari. Sipeduaken
ringring kula harus ipake ibas komunikasi i tengah-tengah keluarga. Komunikasi simehuli i
tengah-tengah keluarga babai keluarga nggeluh alu harmonis, bagepe babai keluarga ngelakoken
simehuli si ngena ate Tuhan. Sumbatna komunikasi ibas keluarga erbahanca anggota keluarga
erbahan si la mehuli.
- Temanta sendah eme pakelah ringringndu nehken singena ateNa. Arah tema enda kita iajar gelah
selaku orang tua harus min riring kula simerupaken pemere Dibata ipake guna ngajari anak ras isi
jabu, subuk ibas baba ntah pe pengajaren praktek (verbal ras non verbal). Selaku anak, harus
megiken ras ngenen pengajaren orang tua gelah sangap nggeluh. Bagepe gedang umurna (bdk.
Kel. 20:12) . Anak-anak la ngelakoken si la mehuli. Anak-anak makeken ringring kulana guna si
mehuli. La bagi anak-anak Eli eme Hopni ras Pinehas, kai sijadi sikerajangen Tuhan pe i tangkona.
La ihamatina Tuhan. La ia mbiar man Tuhan. Bagepe kerina keluarga harus megiken kata Dibata
gelah ipasu-pasu Tuhan keluarganta.

DISKUSI
Berupa games
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 22 NOVEMBER 2018

INVOCATIO : Kuan-kuanen 14:23

OGEN : Kejadin 30:25-30
KHOTBAH : Perbahanen rasul 18:1-4
TEMA : Rasken bas Dahin (Entrepreneurship)

- Salah sada tugas kalak Kristen eme kap erdahin guna kegeluhenna gelah teridah pasu-pasu Tuhan
tetap maler kempak kalak si erkiniteken. Emaka ibas kitab kuan-kuanen 14:23; erdahinlah maka
kam nggeluh. Arah Kata Dibata enda ngatakenca maka syarat kegeluhen aruslah min erdahin, arus
tutus erdahin arus bekerja keras.
- Ibas bahan ogen teridah maka Jakup labo saja sekalak pekerja keras tapi pe ia sekalak pekerja si
cerdas. Ibas ia erdahin labo saja ototna ipakena otakna pe ipakena guna erdahin. Kenca piga-piga
tahun Jakup erdahin ibas ingan mamana si Laban. Ate Jakup lepas ibas mamana nari, emaka lawes
atena janah Laban mereken upah man Jakup. Ipindona upah janah ipakena kepentarenna emaka
melala kal idatkenna upah ibas pendahinna.
- Jiwa enterpreneurship e me kap jiwa berwiraswasta si menekanken kreativitas ras inovasi ibas
kerina usahana. Emaka sekalak enterpreneur ia labo bagi pengusaha biasa semungkin selama
enda nimai peluang usaha bage pe ndarami peluang bisnis. Sekalak enterpreneur malah
menciptaken peluang usaha simbaru. Si enda teridah ibas diri sekalak Jakup ibas ia erdahin, labo
saja ia bekerja keras tapi pe ia sekalak sibekerja alu cerdas.
- Lit usur si begi sada ungkapen eme, ‘kerja sama ras sama-sama bekerja’ janah duana e nerangken
kerna erdahin tapi isina berbeda. Adi ‘kerja sama’ lit biak saling menolong ras saling
membutuhken, nggit mperdiateken teman si ras erdahin lit interaksi antar sesama, penekanenna
eme kubas sierdahin. Tapi adi sama-sama kerja, radu latih nge mungkin tapi banci jadi lalit
hubungen sada ras sidebanna janah banci nge lalit hubungenna pe pendahin e janah penekanenna
hanya kubas dahin. Ibas ungkapen si pemena e nari me ikataken lit turah istilah ‘gotongroyong’,
orangtuanta si arah lebe enggo encidahken biak gotongroyong e ibas kegeluhenna, melala ulih
pendahinna (iwariskenna)si idah kita denga arah proses gotongroyong.
- Ibas ogenta isingetken sekilas kerna hubungen Paulus ras keluarga Akuila. Idahi Paulus kalak e
erkiteken seri pendahinna eme erbahan tenda. Adi si oge selanjutna maka si idah ibas litna
hubungen ‘sada dahin’ ndai mbaba kubas hubungen si terbagesen eme kerjasama ibas naksiken
Berita Simeriah. Akuila pe ras Persila melala nampati Paulus ibas dahinna, kalak enda sada jabu
nggit nehken pengajaren asa si etehna.
- Strategi pelayanen GBKP ibas periode enda eme, transformasi, janah khusus tahun 2018 enda
menekanken kubas menumbuh-kembangken jiwa entrepreneurship si iterjemahken rusur kubas
jiwa kewirausahaan. Jadi jiwa kewirausahaan e biasana terbingkai ibas masalah ekonomi tapi
sekali enda sitransformasi nilai-nilai kewirausahaan e ibas bingkai rohani. Kininggiten mbangun
kegeluhen alu ras-ras ibas nilai-nilai kiniteken.
- Bagi contoh si ibahan Paulus ras teman sekerjana terkhusus ibas oratenta ras keluarga Akuila,
banci jadi motivasi man banta guna ngasup mbangun relasi ibas mpesikap kegeluhenta baik
secara ekonomi bagepe secara kiniteken, jiwa pelayanen e sibaba ibas kerina dampar
kegeluhenta. Kerina silakoken secara bersama-sama guna kemulian Dibata. Guna sie kita enggo
pernah ibabai alu strategi pelayanen kolaborasi. Kengasupen erbahan kolaborasi ras kalak/pihak
sideban pe merupaken ciri kegeluhen kalak si erkiniteken man Tuhan Yesus.

DISKUSI
1. Ibas piga-piga jabu, teridah semangat “rasken bas dahin” labo saja terjeng ibas dahin-dahin rumah
tangga saja, tapi deba lit ka anak-anak ikut ia ras orangtuana ku juma bage pe ku ingan usaha
ipajak guna nampati orangtuana. Si enda tentuna labo gelah anakta jadi pekerja si bahan tapi
gelah tersuan ibas dirina semangat erdahin alu tutus. Sebab erdahin pe situhuna jadi kesempaten
guna erlajar.
2. Ras-ras ku Gereja bage pe ku kegiaten-kegiaten gereja sidebanna tentuna e pe jadi kesaksin man
jelma sinterem uga arusna jabu kalak Kristen. Arah ketutusen sada jabu guna ndahiken tugasna
selaku anggota ni perpulungen pe enda enggo nuduhken maka keluarga Kristen pe tetap ersada
arih lako ras-ras ersembah man Tuhan.
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 23 NOVEMBER 2018

INVOCATIO : Matius 25 : 13
OGEN : II Raja-raja 4 : 8 – 10
KHOTBAH : Ketangkasen 3 : 7 – 13
TEMA : Ersikaplah ! Dibata Reh Me

- Bahan khotbah enda me sada bagin surat siisehken Yohanes eme sekalak perBerita Si Meriah,
nandangi perpulungen i Piladelpia guna mpeseh berita kerna ulih kesetian man Tuhan. Ituriken
pe ibas ayat 7 – 8 maka Tuhan kap sinjemak kunci Daud, Ia erkuasa secara mutlak kerna
mbukaken bagepe si nutup pintu e. adi enggo ibukaNa maka lanai lit si banci nutupsa, bagepe adi
enggo itutupNa lanai banci isepe si mbukasa. Kunci Daud e melambangken kuasa dingen kemulian
ibas kerajan Daud. Dibata enggo erpadan maka kerajaan Daud e pepagi tetap rasa lalap, janah
kesusurenna pepagi jadi raja seh rasa lalap. Perpadanen enda merujuk kubas diri Yesus, selaku
kesusuren Daud, Yesus eme Raja si terpilih guna merentah i tengah-tengah bangsa Tuhan eme
kalak si tek man Dibata erkelangken Yesus Kristus. Ibas ayat 9 ituriken kerna kalak perguak si
ngakuken dirina kalak Jahudi, kalak si bage eme anggota perpulungen iblis janah ulihna eme
ibahan Tuhan ia ngadap, nembah erjimpuh i lebe-lebe kalak si tek. Ertina kalak si tek e pe pepagi,
daten kemulian ibas Tuhan nari.
- Ibas ayat 10 – 13 nuriken kerna, erkiteken perpulungen e njaga diri dingen ngikutken perentah
Tuhan alu saber, maka Tuhan mereken keterkelinen seh maka ibas kesusahen si nandangi reh e
perpulungen e imenangken. Janah ipersingeti pe maka perulungen e tetap megermet nandangi
sora Kesah Si Badia si ngerana kempaksa. Kesusahen si nandangi reh sinimaksudken ijenda eme
kesusahen siterjadi ibas masa – masa akhir zaman, entah pe masa sope Yesus reh peduakaliken
guna ngakimi doni enda. janah melala informasi Alkitab sinuriken kerna si enda misalna 2 Petrus
3 : 10; Wahyu 6 : 10; 16 : 14 – 15; ras sidebanna. Ibas ayat enda pe ituriken maka Tuhan Yesus
pedas me reh, emaka perpulungen e harus njagai kai si lit ibas ia segelah ula lit kalak si ngerebut
pemere-pemere si lit ibas ia.
- Enda jadi sada persinget pe man banta ibas masa genduari enda, megati maun kesusahen-
kesusahen si jadi i tengah-tengahta erbahansa maka kote kinitekenta dingen ndabuh kubas dosa.
Ayat enda jadi sada pergegeh maka metenget dingen harus kita megegeh dingen setia ibas
ngadapi kerina perbeben-perbeben sijadi ibas geluhta, alu arapen maka kita pe imenangken
Tuhan ibas masa kerehen Yesus Kristus sipeduakaliken e.
- Bahan ogenta nuriken kerna kisah Elisa ras sekalak diberu kalak bayak i Sunem. Ibas kerehen
Elisa diberu e nenahken Elisa man, janah kenca je nari adi Elisa ku Sunem, maka i rumah diberu e
ia rusur kesilang dingen man. Adi siidah kisah enda maka banci teridah diberu enda ras
perbulangenna tuhu-tuhu alu pusuh dingen sura-sura si bersih nikapken sada ingan tading ibas
rumahna nandangi Elisa. Tek ia maka Elisa eme sekalak dilaki si mehuli, suruh-suruhen Tuhan
maka ialo-alona dingen ersikap ia usur ibas kerehen Elisa ku rumahna. Tentu saja siilakoken
diberu ras perbulangenna enda la sia-sia, kerna ulih perbahanenna enda teridah ibas ayat
berikutna ija ibas ia lenga ndatken keturunen, maka ibereken Tuhan man bana sada anak dilaki
(ay. 17). Arah si enda banci teridah maka sekecil apapun yang kita lakukan untuk kemulian gelar
Tuhan, adi silakoken alu pusuh bersih dingen tuhu-tuhu ersikap alu payo, maka enda la sia-sia.
Tuhan mereken jaminen keselamaten dingen ulih si mbelin nandangi kalak si tek dingen setia
ngikutken perentahNa.
- Temata eme ersikaplah, Dibata reh me enda sebage sada persinget nandangi kerina serayan
bagepe perpulungen, gelah metenget janah ola tertaren-taren. Sue ras Invocatiota ngataken maka
katawari saja pe kita harus ersikap sebab kerehen Tuhan e la ise pe metehsa wari bagepe jamna.
Subuk ibas jabu asa ngasupta siarahken kubas dalan simehuli, ersada arih, makeken kinilitenta
jadi pasu-pasu man kalak sideban, sihamaten antara bapa, nande bagepe anak-anak. Ibas hal kai
pe kita harus ersikap ngalo-ngalo kerehen Yesus Kristus e, subuk ibas perulungen kita ikut muat
bagin ibas kegiaten perpulungen, bagepe ibas kita ngikuti kegiaten-kegiaten i tengah masyarakat
inganta tading. Tetaplah sipindo gegeh Kesah Si Badia guna ngarak-ngarak kita gelah ngasup
saber, megenggeng dingen setia ibas ndalani setiap proses siidalani kita ibas kegeluhenta.
DISKUSI
1. Kerehen Tuhan sipeduakaliken lanai bo mberitaken kerna kinirajan Dibata tapi enggo reh guna
menyataken Kinirajan e alu ngeranaken kalak simetunggung bengket kubas kinirajan e. Sikapta
ibas nimai kerehen Tuhan tentuna ncidahken maka kita e masuk ibas warga kinirajaan Sorga e.
2. Tentuna labo hanya terjeng persiapen secara fisik ngenca bagi pernak-pernik Natal ras sidebanna
tapi sipentingna kal pusuh ras perukuren si nggit ngaloken Jesus guna hadir itengah doni enda.
 BAHAN SERMON PEKAN KEBAKTIN KELUARGA
GBKP RUNGGUN KISARAN
TANGGAL 24 NOVEMBER 2018

INVOCATIO : Lukas 2:40

OGEN : Masmur 24:1-10
KHOTBAH : Matius 1:18-25
TEMA : Jabu si ngaloken ketubuhen Jesus

- Arah bahan khotbah ibas wari/berngi siterakhir ibas Pekan kebaktin keluarga enda, perpulungen
isuruh guna ersikap itengah-tengah jabuna ersikap guna ngalo-ngalo ketubuhen Jesus. Keriahen
ukur guna ngaloken natal enda labo saja teridah arah Mamre ntah arah Moria ntah arah Permata
bage pe arah KAKR ras orangtuana Saitun tapi pe secara utuh keluarga keseluruhen merayaken
Natal.
- Sebab labo saja erkiteken dorongen guna perayaan kiniteken saja tapi pe erkiteken perayaan
Natal enda jadi perayaan keluarga. Sebab peristiwa Natal peristiwa siterjadi itengah-tengah
keluarga kecil Yusup. Tentuna Jabu singaloken ketubuhen Jesus labo saja arah persiapen secara
fisik saja bagi baju simbaru ntah pe dekorasi simejile tapi arah keriahen sada jabu guna ras-ras
merayaken wari natal itengah-tengah keluarga.
- Peristiwa Natal e jadi tanda pendahin Kesah Sibadia kubas kegeluhen Maria nande Jesus si
paksana ertunangen ras Jusup. Mehuli kula Maria arah kuasa Kesah Si Badia janah erkiteken si e
ate Jusup nirangken Maria alu sinik-sinik. Tapi reh me Malekat Tuhan lako ngolangi jusup
nirangken si Maria. Alu ngataken ula lit kebiaren jusup guna muat Maria jadi ndeharana sebab
anak si lit ibas bertin Maria e me kap Mesias si pagi igelari Imanuel.
- Natal arusna ngapusken kebiaren ibas dirinta, natal arusna erbahanca kita lanai aru ateta bagi
kebiaren ras kearun Jusup. Natal itengah-tengah keluarga arus erbahanca maka keluarga Kristen
semakin tek ia maka kerina kebiaren Kesah Si Badia pasti nampati, bagi Kristus hadir ku tengah-
tengah doni enda jadi Juruselamat. Kehadiren Kesah SI Badia e erbahanca maka reh paguhna
kiniersadaan itengah jabu bagi kehadiren Jesus mpersadaken kegeluhen Jusup ras Maria.
- Pemilihen Maria ras Jusup jadi orangtua Jesus tentuna lit alasenna. Labo saja Maria ras Jusup
erkiteken duana ia keturunen Raja Daud, tapi duana ia teridah kal kal si bujur ras tetap
perngendes man Tuhan. Kepatuhenna man Tuhan tentuna enda ka kari siniajarken man Jesus.
- Emaka Invocationta ibas pekan sekalenda labo saja berdiri sendiri, sebab lit peran orangtua,
Maria ras Jusup guna ngajarken Jesus maka reh belinna Jesus reh pentarna ras reh gegehna Ia.
- Cara Jusup pe perlu iapresiasi, amin gia lit sura-surana nirangken Maria tapi tetap teridah ia
sekalak sibujur si la atena gelah mela Maria. Sikap Jusup enda perlu icidahken ibas perayaan Natal
maka kita selaku kalak simerayaken Natal tetap bagi Jusup ngukurken kalak sideban, la egois ras
mementingken diri sendiri.Jusup pe teridah tetap nggit ngaloken Maria uga litna Maria. Teridah
tuhu-tuhu pendahin Kesah sibadia ku tengah-tengah kegeluhen keluara kecil jusup enda.
- Jabu singaloken ketubuhen Jesus Kristus e me kap jabu singaloken keselamaten rikut pe ras dame.
Jabu si ngasup ngalaken erbage-bage tantangen ras perbeben si maba keriahen ukur labo saja
guna diri saja tapi pe guna kalak sideban.

DISKUSI
Permainen si sikapken ras-ras