WARI PELIMAKEN (Kamis Tgl.

1 Juni 2017)
Pdt. Jefri Alexander Keliat

Invocatio : “Kueteh maka mbelin kal sura-surandu ngaloken pemere-pemere Kesah,

tapi usahakenlah maka i bas kam lit pemere si majekken perpulungen ngelebihi
pemere-pemere si deban” (1 Korinti 14:12)
Renungen : 1 Tesalonika 1:6-10
Tema : “Kukelengi Gerejaku”

Penjelasen Bahan Pustaka Si Badia & Refleksi

Gereja Tesalonika e me kap gereja si ipanteki Paulus. Salah sada tantangen si

man hadapen Jemaat Tesalonika e me kap tantangen i bas kalak Yahudi nari si
ercian ate man Paulus i bas usaha Paulus meritaken Berita si Meriah man kalak si
non-Yahudi. E maka erkiteken mbuena tekanen enda tujun surat 1 Tesalonika ertujun
gelah jemaat tetap ukurna dingen tetap erpengarapen man Dibata. lit kebiaren
Paulus kerna jemaat enda erkiteken jemaat enda termasuk jemaat si nguda denga
(1 Tes. 3:1-15). Keriahen Dibata peduakaliken pagi nantangi kerina kelatihen si
enggo ialoken jemaat Tesalonika gel-gel nari. Lit piga-piga hal si menjadi pujin si
ibereken Paulus i bas kegeluhen jemaat si lit bas Tesalonika :
1) Megenggeng. Tantangen bergereja sialami Jemaat Tesalonika tentu labo
hal si melukah. Sada sisi ia enggo nadingken kinitekenna si ndekah tentu arah
temanna si ndekah pe lanai nge ia ialoken, tapi arah teman Kristen Yahudi pe la
ialoken. Adi bas konsep pemahamen si gundari banci ikateken enda me minoritas
ganda atau bas kalak Karo banci rusur ikataken ia bagi belo la ertange ku japa pe la
nai kut bas beligan. E maka tentu enda labo kondisi mudah guna ialoken. Bas
kondisi si bage rupa kecenderungen si paling mudah e me kap menyerah, sebab adi
ku japa pe imbang harusna menyerah menjadi pilihen si realistis. Tapi e la iambil
kalak Tesalonika. Ia malah terus berjuang bas minoritas ganda sialokenna.
Banci enda sibandingken ras Gerejanta. Sada sisi tanda kekelengenta man
Gereja-gereja la banci jadi Gereja si eksklusif (bagi kalak Yahudi) tapi jemaat si nggit
ngaloken kerina bangsa ras suku (bdk. GBKP KM 46 Jambi). Terdauhen i bas si e pe
jemaat harus mampu jadi jemaat si megegeh bas kiniteken i bas erbage tantangen
bergereja (bdk. Gereja Pentakosta i Simpang Basrah). Tempaan iman si mehulina e
me kap percubaan. Tanpa litna percuban imanna labo banci tertempa. Iman si
dewasa ngajari kita guna mengelola persoalen alu mehuli. Keleng ate man Gereja
tentu berkaiten pe ras uga kita tetap engkelengi Gereja uga litna (ula melukah
jajan, sebab adi rusursa jajan e la sehat ras engkeriken sen).
2) Man Usihen. Erkiteken saber dingen megenggeng Gereja i Tesalonika e
maka ia tentu enggo jadi usihen man Gereja-gereja si deban si lit i bas kuta-kuta si
deban. Menarik hal enda sebab Jemaat Tesalonika pang erbahan sada hal si hebat si
banci jadi usihen Gereja si deban.
Adi e baba man banta tentu menarik guna banci erbahan sada penungkunen
reflektif Gerejanta Gereja si uga nge? Atau alu bahasa si deban bas dampar si apai
nge kita banci jadi usihen bas Gereja-gereja si deban? Kekuatan Gereja GBKP nai
nari tandai kalak tuhu erkiteken kuatna diakonianta baik si sifatna karitatif bage pe
transformatif kerina lit bas Gerejanta ras melala Gereja erlajar bas kita nari. Tapi
secara Runggun kai nge si man usihen (hal pembeda) bas Gerejanta?
3) Metemue. Waktu Paulus reh pertama ku Tesalonika luar biasa kel pengalo-
ngalo Jemaat Tesalonika ia. Tentu hal enda berkaiten tuhu ras nilai persahabatan ras
keramah-tamahen si icidahken kalak enda man temuena. Salah sada Gereja i
Malaka (Malaysia) Anglican Church (Gereja Merah), kerina kalak si mbaru reh ialo-
alo tuhu alu bersahabat. Kerina jemaat nalami jemaat si mbaru reh tuhu malem
ateta. La terpungkiri melala Gereja lanai tandaina deba ise saja si reh. E maka
maun-maun orang baru merasa la nyaman reh. Ula lebe jemaat arah Gereja si
deban, maun-maun sama-sama GBKP pe la siakap nyaman je.
4) Pertobaten. Salah sada hal si sulit bas kegeluhen enda e me kap menjadi
Kristen si otentik (100%). Sebab kegeluhen doni enda megati lalap ngerintak kita
guna ndabuh ku dosa. Jemaat Tesalonika awalna labo kalak Kristen, tapi ketika ia
jadi kalak Kristen kerina hal si lanai ngena ate Dibata lanai e ikutkenna. La hanya
nadingken ritual-ritual si ndekah (adat) tapi pe nadingken kebiasaan si ndekah.
Pertobaten menjadi kunci awal bas engkelengi Gereja.
 BIMBINGEN KHOTBAH PEKAN DOA BERNGI SIPELIMAKEN
THEMA:KUKELENGI GEREJA
Khotbah : 1 Tesalonika 1 : 6 – 10

Pengantar
Kebersihan sebagian dari iman, enda me istilah si sangana ibas kita sekolah rusur itamaibas dinding
sekolah. Hal sienda tentuna ngajuk man kalak guna tetap jaga kebersihan, erkiteken salah sada bentuk
cidahken kiniteken kita eme kebersihan. Hal si enda tentuna lit perpayona adi sipahami alu kacamata
iman, erkiteken lanai mungkin sikataken dirinta kalak si erkiniteken adi la pernah kita ridi, la pernah kita
nggosok gigi ntah pe mbau kita. Emakana buah kiniteken enda labo terjeng uga hubungennta ras Dibata,
tapi uga kan hubungannta ras dirinta, masyarakat, lingkungen, bagepe gerejanta. Emakana ibas pekan
doa ibas wari sipelimaken, iajuk kita gelah pertoton enda banci jadi aksi ibas kegeluhennta. wari si
nderbih kita ngerana masalah keluarga, gundari kita ngerana ku skop si lebih mbelang eme gereja.
Gereja eme rumah pertoton janah gereja situhu-tuhu eme kita, kita kerina saling memperlengkapi ibas
gereja. Emakana nggo me sewajar selaku ingannta ertoto perlu sikelengi gerejanta enda. Inget salah sada
hal si mendukung kita ertoto man Dibata eme ingan ertoto e, kuakap kita kerina setuju ibas si e, lalit kalak
si meriah ntah pe kusuk adi ertoto bas ingan si mbau, melket ras sidebanna. Emakana ningku bas bagin
sipemena uga kita selaku kalak sierkiniteken ula terjeng hubungen Dibata rusur sipikirken, tapi harus
siinget hubungen ras sekelewetta e pe penting uga cidahken buah pertotonta enda. Sitotoken pe rusur
gereja enda, tapi adi la kita kelengisa banci kin gereja enda banci jadi mejile. Inget gambaran kalak
Kristen maun-maun iidah kalak uga sikap ras uga bangunan gerejana, lanai mungkin sikataken kita kalak
si tuhu-tuhu erkiniteken adi gerejannta peren. La mungkin sikataken dirinta mehuli adi la pernah kita ridi.
Emakana ibas wari enda kita erlajar guna engkelengi gereja. Ibas

1 Tesalonika 1 : 6-10
Bagin pustaka Sibadia enda nuriken erkiteken perpulungen tesalonika si ipanteki Rasul Paulus. Adi
ngerana kita erkiteken perpulungen Tesalonika enda, perpulungen enda banci ikataken “perpulungen
usihen” engkai maka bage. Adi menaken ayat 2 nari, banci melala siidah sicidahken kualitas perpulungen
Tesalonika enda.
1. Perpulungen Tesalonika enda, termasuk perpulungen si la ndekah ipanteki Rasul Paulus kurang
lebih sebulan (bnd perbahanen Rasul-rasul 17:1-9) tapi hal si enda labo erbahanca perpulungen
enda la berhasil tapi arah si enda tuhu-tuhu cidahken perpulungen enda banci maju aminna pe la
ndekah rasul Paulus ras ia.
2. Perpulungen tesalonika enda aminna ibas paksa si e melala penindasan si terjadi erkiteken
kinitekenna man Tuhan Yesus tapi tuhu-tuhu tetap sikap ia ngalo-ngalo kerehen Rasul Paulus.
Padahal adi siukuri arah perukuren manusia, banci saja kalak enda nilah arah sikapna man rasul
Paulus gelah ia pe datken kenyamanan
3. Perpulungen tesalonika eme perpulungen si perpulungen si mbuen kalak Non Yahudi, emakana
tentuna adat budaya bagepe kiniteken si adi lit ibas kalak enda sope ia jadi Kristen. Tapi adi siidah
ibas bahan pengogennta tuhu-tuhu kalak enda cidahken ketutusen atena guna ngikutken Yesus
erkiteken nggit ia nandangi kerina si nggo sedekah enda iaminina. Hal sienda si jarang terjadi ibas
kita. sadar ntah la sadar ntah nggo piga puluh tahun kita erkiniteken man Kristus, maun-maun ibas
paksa tertentu enterem denga ka kita si tetap ngikutken kiniteken si adi kita ka. Kita kurang
erpengendes man Dibata ibas kerina perbeben geluhta enda.
Arah 3 hal enda, situhunna luar biasa kal siidah uga kualitas perpulungen tesalonika ibas ia erkiniteken
man Dibata, aminna pe melala persoalan si lit ibas dirina.

Aplikasi
Ibas wari enda kita ngerana erkiteken kelengi gerejanta. Kualitas sekalak jelma, labo banci idatken kita arah
kata saja, tapi arah perbahanen, janah arah perbahanenna pe la banci kita ernin arah sada perbahanen saja,
kerina geluh enda tentuna si inget ipake guna memuliakken Dibata, emaka adi ate ernin kualitas kalak banci
si nin kerina dampat kegeluhenna. Ertoto eme salah sada kita banci ernin kualitas iman kalak si
erkiniteken,erkiniteken ninta tapi adi la pernah ertoto me labo tuhu. Tapi perlu ka siinget hubungan si ibahan
kita ras Dibata arah pertoton epe harus teridah arah perbahanennta. Salah sadana eme uga perbahanennta
nandangi gerejanta enda. Gereja eme milikta kerina, adi la kita engkelengisa ise ka siarapken kita guna
engkelengisa. Enterem kita kalak Kristen, adi ngerana masalah tanggung jawab ibas gereja kerina kiam,
siarapaken kalak sideban guna campur tangan ibas si e kerina. Inget bagi jabu, me adi lit masalah labo kalak
darat nari si reh guna ndungisa tapi me kita. bage ka gerejanta enda kita ka ras-ras ngkelengisa alu gegeh si
bereken Tuhan nandangi kita. emakana ibas pekan doa berngi sipelimaken ipersingeti kita gelah ndarat kita
guna cidahken kualitas imannta arah pengkelenginta nandangi gereja enda.
 PEKAN DOA GBKP WARI V
Kamis 01 Juni 2017

Renungen : 1 Tesalonika1 : 6 – 10
Tema : Kukelengi gerejaku

Perpulungen sikelengi Tuhan,

Gereja eme persadaan kalak sitek man Tuhan Yesus. Erkiteken gereja ersada ras Tuhan Yesus maka
gereja harus jadi usihen sebagai pribadi-pribadi kalak kristen ntahpe secara ras-ras. Jadi usihen adi
gereja tetap bas kekelengen, bagi Tuhan Yesus ngkelengi doni enda. Arah tema renungen sekalenda
iperhadapken kita ku bas pernyataan : ula sungkun “kai si ban gereja bangku, tapi kai ku ban man
gerejaku?” Alu pengharapen gelah kalak sitek man Tuhan Yesus, tetap ngkelengi gereja.

1 Tesalonika1 : 6-8 “perpulungen /gereja singusih Tuhan jadi usihen “

Surat Paulus man perpulungen Tesalonika nuriken kerna kegeluhen kiniteken perpulungen e siteridah
arah perbahanenna. Keteladanan Paulus sebagai perberita simeriah kuperpulungen Tesalonika, ras
erkiteken perbahanen Tuhan man perpulungen e erbahanca, melala gia kiniseran erkiteken tek man
Tuhan Yesus tapi tetap ngasup ngaloken berita simeriah alu meriah ukur. Keteladanan Paulus teridah
arah sikap nggeluhna siersaksi kerna Tuhan Yesus aminpe melala kiniseran si man bentasen. Ibas 1
Tesalonika 2 : 1- 15 iturikenna kerna kai si alami ras siidahikenna kutengah-tengah perpulungen
Tesalonika, antara lain :
- Ope denga ndahi perpulungen Tesalonika, nggo leben isiksa, igombang-gombangi kalak Pilipi.
- Paulus ngerana labo gelah ngena ate manusia tapi gelah ngena ate Dibata.
- Paulus labo ersura-sura gelah ipujiken kalak
- Amin pe lit hak mindo, Paulus nggeluh erberita simeriah ras mereken dirina guna berita simeriah e.
Teridah arah kelatihenna erberita simeriah bagepe kelatihenna erdahin suari ras berngi gelah ola jadi
tanggungen perpulungen.
- Lagu langkah bujur dingen la salah.
Perpulungen epe ngusih perbahanen Paulus seh maka perpulungen e pe banci jadi usihen man kalak
sitek siringan i Makedoni ras Akaya. Berita simeriah mbar labo saja kubelang-belang daerah Makedoni
ras Akaya, tapi mbar kujapape.

1 Tesalonika1 : 9-10 “ perpulungen e jadi topik percakapen simehuli “

Paulus nuriken maka perbahanen perpulungen, jadi percakapen enterem jelma, ibas :
- Ngalo-ngalo ras asum reh ndahi perpulungen e.
- Nadingken sembah-sembahenndu guna ndahi Dibata jenari nembah man Dibata singgeluh dingen
situhu-tuhu.
- Uga perpulungen e nimai kerehen Yesus Kristus sipeduakaliken surga nari, simulahi kita ibas ukumen
sinandangi reh ibas Dibata nari.

Perpulungen sikelengiTuhan,
Kukelengi gerejaku nina tema renungennta wari enda, kai dage siban man gerejanta ?
- Gereja banci min jadi percakapen “buah bibir“ simehuli. Turikenlah rusur kiniulin gerejanta ula situriken
rusur kekurangenna, pala sibereken solusi ras nggit muat bagin pekenasa. Gereja ula mbuesa ngerana
ngenca, ntah pe erbahan keputusen-keputusen ras rapat-rapat simbue tapi kai siilakoken ibas
perbahanen sinyata ibas erkiniteken ras kekelengen. Nina Eka Darmaputra: “Perbuatan kasih itu lebih
bermakna dari pada 1000 khotbah tentang kasih”.
- Gereja harus jadi usihen bas ketutusen erkiniteken man Tuhan Yesus. Adi keleng ateta gerejanta
siberelah dirinta jadi perkakasna. Sebagai anggota jemaat sisetia ras tutus, ula jadi jemaat siterdaftar
ngenca ntah paksa perlu maka reh. Jadilah kita sebagai “gereja yang berbuat untuk gereja “. Gereja
yang bersekutu, bersaksi dan melayani.
- Mediate nandangi gereja ibas perbebenna. Bagi Paulus sitetap mpediateken perpulungen Tesalonika,
gia arah surat ia ngerana, bage min gereja mediate min nandangi kecibal temannta sada kiniteken,
bagepe nandangi perbeben gereja-gereja si megati ndatken hambatan ras tantangan. Selamat,
kukelengi gerejaku, mari sikelengi gerejanta…..Tuhan Yesus simasu-masu. Amin
Pdt.Karvintaria br Ginting, STh
GBKP Rg.Klender
HP : 08126359640
http://gbkp-kbd.org/khotbah-pa-pjj/khotbah-pekan-pekan

http://www.gbkp-kjb.org/index.php?
option=com_content&view=category&layout=blog&id=80&Itemid=160