SERMON PJJ GBKP

26 Pebruari - 4 Maret 2023

Tema : Ernanam Man Kerinana

Ogen : 1 Korinti 12:1-7

1. Kata Penaruh
Tiap-tiap kalak lit kekurangen bagepe kelebihenna. Adi kekurangen ras kelebihen e ibanding-
bandingken apalagi itandingken, enda sada perbahanen si la mehuli, keliru janah berbahaya. Perbahanen
sibage rupana banci mpeturah iri nandangi kalak sideban, memicu persaingen si la sehat, meganjang ukur
ras sidebanna. Ujungna, manusia banci terjebak ibas usaha guna jadi si terutama ras si erkuasa. Menukah
sieteh, hasil akhirna si terjadi emekap kehancuren ibas komunitas, bas hubungen, entah pe bas
persekutuan. Hal-hal sibage rupana la terjadi bas luar gereja saja, kinatana bas kula Kristus pe rusur
denga terjadi. Bas PJJnta sekali enda, sipelajari kerna pandangen si payo kerna erbage-bage karunia si lit
ibas perpulungen. Gelah kita banci ermeriah ukur ras bersyukur bas kemajemuken pemere ntah karunia si
lit ibas perpulungen, janah banci ras-ras ipakeken gelah ernanam kubas kerinana.

2. Mpebagesi Pengangkan Kerna Ogen

Perlu sieteh makana perpulungen i Korinti emekap perpulungen si terpecah-pecah. Ikataken
erpecah-pecah emekap erkiteken perpulungen e tading bas kuta Korinti si lit erbage-bage penduduk
emaka enda erbahanca perpulungen Korinti la erasal arah sada bangsa entah pe suku, erbage-bage kalak
ercampur bas perpulungen i Korinti. Erkiteken sie, erbage-bage ka kinitekenna si pemena. Kinitekenna si
pemena e mpengaruhi cara berpikirna gia ia enggo jadi perpulungen kalak Kristen. Enda me sierbahanca
maka Paulus ibas suratna ku Korinti rusur ipesankenna amin gia kita erbage-bage tapi kita sada kap ibas
Tuhan.
Surat 1 Korinti pasal 12 secara umum emekap ngerana kerna erbage-bage pemere/karunia si
rehna ibas sada ulu eme Kesah Si Badia. Ayat 1-3 ogenta enda eme jadi sada pengantar kubas topik
kerna pemere-pemere Kesah. Isingetken Paulus kerna kegeluhen kalak Korinti asum ia ibas kinitekenna
sidekah denga, kinitekenna e la nampati ia ngangkai kerna kai siikataken alu pemere Kesah. Ibas ayat 3
pe Paulus ngingetken kerna kalak si ngataken: “Kena sumpahlah Jesus”, ipastiken Paulus maka kalak
singataken bage pasti labo erkiteken penjemba Kesah Si Badia, kalak si ni maksudken Paulus emekap
kalak Jahudi. Kalak Jahudi ibas mimbar-mimbar ras khotbah-khotbahna mekatep kal ngataken Jesus
kena sumpah erkiteken Jesus mate i kayu persilang. Sebab pengangkan kalak Jahudi adi sekalak mate i
kayu persilang eme kalak si terkutuk ntah pe kena sumpah. Janah man kalak Jahudi kalak si menodai
agama eme kalak si terkutuk, sebab ikataken Jesus diriNa Anak Dibata. Enda ianggap penodaan ras
penistaan nandangi agama makana ikataken kalak Jahudi me Jesus terkutuk ntah pe kena sumpah.
Tapi ibas sisi sideban kalak si enggo ngaloken Kristus jadi Juru Selamatna justru melasken bahwa
Jesus Tuhan kap. Si enda banci siidah ibas pengalamen Paulus sanga ia igelari Saulus denga, ia munuhi
kalak Kristen. Bas paksa si e, kalak Kristen ipaksa guna ngataken “Kaisar eme Tuhan” ise si la
ngatakenca ibunuh. Tapi enterem kalak Kristen i teruh ancamen pembunuhen pe tetap ngataken “Jesus
Tuhan kap”. Ituriken Paulus bas Perbahanen Rasul-Rasul 26:11 maka tiap jumpa ia ras kalak Kristen
ipaksana ia mersoken kinitekenna, tapi alu penjemba Kesah Si Badia la nggit kalak Kristen ngikutken
Paulus. Enda me erbahanca sengget Paulus, ternungkun-nungkun ia, ise singgerakken kalak Kristen
makana nteguh ia. Dungna idatken Paulus sada kesimpulen emekap Kesah Si Badia.
Ayat 4 she seterusna ngerana kerna erbage-bage pemere Kesah, tapi sada nge Kesah simerekenca.
Enda la banci kita lupa guna ngubungkenca ras perpulungen i Korinti si terpecah-pecah ras ebage-bage
macam karunia si lit ibas ia, tapi masing erpengakap dirina si mehulina. Emaka Paulus lalap ningetken
gia erbage-bage pemere/karunia tapi sada nge Kesah simerekenca. Dibata si seri kap sierdahin arah
erbage-bage pemere e, erbage-bage pelayanen ras erbage-bage dahin e. Erbage-bage dahin ibas bahasa
Junani iterjemahken emekap Energemata, arah kata enda me rehna kata Energy si ertina emekap tenaga
entah kekuaten. Bage pe Energetic si ertina penuh semangat bekerja ras giat.
Emaka Dibata me si menyalurken gegehNa, tenaga, kekuaten ntah pe semangatNa arah erbage-
bage dalan/dahin eme pemere-pemere sipelain-lain e. Alu kata sideban, pelain-lain dahin eme manifestasi
(pernyatan, perwujuten) Kesah Si Badia. Jadi Kesah Si Badia berwujud ibas erbage-bage macam
pendahin ntah pe pelayanen-pelayanen. Perukuren Paulus eme gereja emekap sada kesatuan ibas kula ni
Kristus. Tanda-tanda gereja si sehat eme adi kerina bagin kula e erdahin ibas fungsina masing-masing ras
erguna man kerinana. Tentu wajar Paulus ngerana kerna si e sebab karakter perpulungen i Korinti
persadan erbage-bage kalak arah erbage-bage bangsa, erbage-bage latar belakang ras pemeteh. Janah
kinierbagenna e justru erbahanca ia erkelompok-kelompok ras epengakap maka sada kelompok ulin asa
kelompok sideban. Enda me si la ngena ate Paulus, emaka Paulus ningetken uga pe buena kelebihen sada
nge kerina uluna gia lain-lain manifestasina, gia lain-lain wujudna.
3. Pengkenaina
Mungkin perpulungen si lit bas inganta labo gia seri bagi perpecahen perpulungen i Korinti. Tapi
tentu lit ibas tengah-tengah perpulungenta ermacam-macam karunia. Lit si beluh ngerana, lit si persinik
tapi megegeh erdahin, lit si beluh mengorganisir, banci ngiah-ngiahi, lit ka mungkin pencarinna ntah
pendapatenna mbue, arah si e ka ia erdahin, lit deba gegehna ka si iandalkenna ras sidebanna. Tentu
kerina e emekap karunia Kesah Si Badia, ras kerina e erguna man kula e, man gereja e, labo man dirina
sekalak saja. Tentu alu bage, ernanam me ia masing-masing, anggota kula ndai enggo ernanam man
kerinana ibas gereja. Aneka kekayaan karunia ibas perpulungen, ncidahken mbuena ka potensi si banci
ipakeken bas dahin pelayanen.

SERMON PJJ GBKP

5 - 11 Maret 2023

Tema : Pulung Ngaturken Dahin

Ogen : Perbahanen Rasul-Rasul 6:1-7

1. Kata Penaruh
Bagi sienggo siangkai maka salah sada Tritugas Gereja emekap erdiakonia. Labo hal si sulit bagi
sekalak Kristen mbegi ntah njumpai kata diakonia si ertina melayani e. Tapi perlu siangkai bas kegeluhen
ergereja, erdiakonia labo hal si mudah ilakoken bagi mbelaskenca. Lebih asa si e, erdiakonia emekap
sada makna si mbages janah menantang ilakoken kerina kalak Kristen. Bas bahan PJJnta sekali enda, kita
banci ngidah uga rasul ngaturken dahin diakonia i tengah-tengah perpulungen janah banci kita ngidah
kuga kita banci ngewujudken diakonia si mehuli i bas perpulungen.

2. Mpebagesi Pengangkan Kerna Ogen

Mari sipernehen ras sirenungken kerna sada kisah nyata ibas Perbahanen Rasul-Rasul 6:1-7. Ibas
paksa si e perpulungen sipemena i Jerusalem ngenanami sada perkembangen si pesat. Perpulungen e
enggo itebus ras ndatken keselamaten erkiteken Jesus Kristus, ia tetap nembah ras tutus bas mereken
dirina ikuasai Kesah Si Badia (Perb. 2:41-42). Tapi la banci sisangkal makana permasalahen banci tetap
turah bas perpulungen bagi tertulis bas ayat 1: “Paksa e, asum reh teremna kalak si tek man Jesus, turah
perubaten i tengah-tengah kalak Jahudi …”
Masalah jasmani ntah pe rohani arus iperdiateken i tengah-tengah perpulungen. Permasalahen si
turah bas perpulungen paksa si e igelari rasul-rasul emekap “Pelayanen Meja”. Permasalahen si turah
ibas perpulungen bas paksa si e emekap erkawiten kerna pemere si arus ialoken diberu si mbalu kalak
Jahudi si make cakap Junani. Kerina perpulungen e lit ibas sada bangsa nari tapi perbedan bahasa
mpeturah permasalahen ras jungut-jungut bas perpulungen e. Emaka guna ndungi permasalahen
Pelayanen Meja e, ibahan rasul sada sistem i tengah-tengah perpulungen e.
Rasul erbahan sada sistem kerja sama i tengah-tengah perpulungen sabab rasul-rasul e atena tetap
fokus bas pelayanen toto bagepe kata Dibata. Emaka ipindoken rasul-rasul man perpulungen segelah
milih pitu kalak alu kriteria: mehuli, dem alu Kesah Si Badia janah pentar. Banci saja turah penungkunen
ibas kita kerna kengasupen si pitu kalak si enggo ipilih ibas ndahiken tugasna, sebab sieteh makana
perpulungen e seh teremna mencapai ribuen kalak. Banci jadi enda emekap pemilihen tahap sipemena
janah pasti ilanjutken alu penambahen pelayan-pelayan sideban. Si pitu kalak e, banci jadi pemimpin
ntah pe ketua bas pelayanen meja sinilakokenna. Si enda emekap sada solusi si enggo tepat. Sistem
sinibahan rasul enda labo sada sistem si mbaru, tapi icontohkenna kuga Musa mimpin bangsa Israel bas
perdalinen ku Taneh Perpadanen nai (Keluaren 18:13-27). Kepe alu sistem si enggo iaturken e
permasalahen si turah e banci dung alu mehuli hasilna “Kata Dibata reh mbarna janah ertambahna kalak
si tek i Jerusalem. Bage pe nterem imam ngaloken Berita Si Meriah e.”
Ibas solusi siilakoken perpulungen paksa si e, banci siidah makanan rasul-rasul bas paksa e sadar
kerna keterbatasenna guna ngaturken dahin si lit bas perpulungen. Janah ibabaina kerina perpulungen
terlibat bas tanggung jabab dahin pelayanen. Ibas rasul milih diaken-diaken e, teridah kai situhuna tugas
pokok si arus ilakoken sekalak rasul. Alu litna pitu kalak sinampati rasul-rasul e ertambah kesempatenna
guna nehken tugas pokokna, e me meritaken Kata Dibata. Bali bagi si enggo ilakoken rasul-rasul, gereja
pe iajuk guna nggejapken dahin-dahin si enggo idahikenna. Tentu guna ndahiken dahin gereja e labo lit
dalanna gereja la nggit pulung guna ngaturken dingen ndahiken dahin e.
3. Pengkenaina
Adi kita jujur, salah sada penyebab gereja ntah pe perpulungen kurang erkembang e me kerna
pelayanen diakonia gereja lenga mehuli idalanken. Sistem enggo ibahan alu mehuli, tapi si jadi persoalen
emekap ibas ketutusen dalankenca. Emaka terkadang turah persoalen bagi siinanami perpulungen si
pemena e i tengah-tengah perpulungenta. Tapi situhuna kita la banci jadi saling menyalahken. Diaken
enggo ipilih rasul-rasul guna jadi si terdepan bas nangani masalah pelayanen meja, emekap
mengkoordinir pelayanen i tengah perpulungen erkawiten bas keperlun geluh bagi pangan ras inemen,
ras masalah-masalah si deban si berhubungen ras kesejahteran perpulungen. i samping si e pe, tentuna
dahin sekalak diaken e me meritaken kerna Kata Dibata. Tugas enda situhuna enggo jadi tugas kerina
kalak si tek. Labo terjeng diaken ntah pe pertua saja. Tugas enda enggo jelas icidahken Jesus nandangi
kita guna ikut bas pelayanen.
Erkawiten ras bahan PJJnta, maka kita iajuk gelah ula la ermediate kerna Musyawarah Warga
Sidi Runggun i tengah-tengah gerejanta. Ibas musyawarah e kita kerina pulung lako mereken masuken-
masuken ras guna mengevaluasi kerina dahin-dahin pelayanen i tengah-tengah gerejanta. Musyawarah
enda jadi wadah kesempaten man kerina perpulungen guna nguraki persoalen ntah pe kemungkinen-
kemungkinen si terjadi bas pelayanennta. Emaka ersikaplah kita guna pulung ngaturken dahin pelayanen
gerenta, janah ersikap ibas ngelakoken Musyawarah Warga Sidi Runggun ibas runggunta.