PJJ Tanggal 3-9 Juli 2016

Ogen : 2 Korinti 8:13-15

Thema : “Rutang Si Megegeh Nampati Si La Megegeh”

I. Kata Perlebe
Mperaktekken kegeluhen si sampat-sampaten nggo semal ilakoken manusia ibas kegeluhenna. Tapi
mekatep denga si sampat-samapten ibas hal bagi Serikat Tolong Menolong (STM). Asa adangen asa sie kange kari
pengalon ibas paksa ngalo. Tapi sekali enda ibas kegeluhen kiniteken man Tuhan Yesus e, nampati kalak si
kekurangen tanpa imbalan (pamrih).
Penggejapen rutang (tanggung jawab) ibas kalak si megegeh guna nampati kalak si la megegeh (ibas
kekurangen). Sue ras biak kegeluhen kiniteken e me ngelai, berarti kita isuruh rusur nampati temanta si man
sampaten. Kalak si nggit nampati (mere) ndatken pasu-pasu ibas Tuhan nari.

II. Isi
Kota Kotinti e me sada kota si galang (kota metropolis), kota perdagangen, melala suku bangsa tading i
kota Korinti enda (heterogen) bage pe merupaken kota propinsi Akaya si merupaken jajahen bangsa Romawi. Rasul
Paulus nulisken suratna man perpulungen i Korinti erkiteken lit persoalen i tengah-tengah perpulungen ibas paksa si
e, persoalen si turah e labo saja ibas bidang kegeluhen si tep-tep wari saja, tapi pe ibas bidang kiniteken
(spiritualitas) perpulungen. Tujun Paulus nulisken suratna man perpulungen i Korinti gelah ngawan perpulungen
Tuhan ibas paksa e la “tercemar” kubas gaya hidup “hedonis” bage pe peraktek-peraktek kiniteken “kekafiren” si
ilakoken penduduk kota Korinti (umpamana ibas paksa sie i tengah-tangah masyarakat korinti ilakoken peraktek
penembahen man dewa dewi bangsa romawi).
Emaka ipindoken Rasul Paulus man perpulungen Korinti gelah tetap ijagaina “kemurnian” kinitekenna man
Yesus Krisutus aminna gia melelala kiniseran si nihadapi perpulungen i Korinti. Tole pe rasul Paulus mpeteguhi
mulihi persadanna ras perpulungen enda, ija lit kelompok si atena mecah-mecah perpulungen bage pe lit
perpulungen si “menyerang” pengajaren Paulus. Erkiteken sie irawai rasul Paulus si ngelawan e, jenari mulihi
perpulungen e menjalin hubungen baik ras Paulus. Kenca bage ipindoken rasul Paulus maka perpulungen Korinti
ikut min muat bagin ibas nampati perpulungen i Judea.
Paulus ibas bahan ogenta sekali enda mereken contoh kerna kegeluhen perpulungen i Makedonia. Ibas
bagin awal bahan ogenta “igambarken” Paulus kerna kiniteken perpulungen i Makedonia bage pe sikap ngeluh si
nggit mere (berkoraban) amina gia kegeluhenna seh kel terbatasna. Penandaina kerna kristus si mbereken
kengasupen man perpulungen i Makedonia guna ngelakoken sie (ayat 9). Alu pemahamen si bagenda me maka
Paulus mpersingeti perpulungen Korinti gelah ula ngeluh egois tapi peduli man temana si kekurangen. Paulus
mereken motivasi man perpulungen i Korinti ibas paksa si e gelah perpulungen nggit bage pe pang guna naksiken
kinitekenna ibas lingkungen sekelewetna. Emaka ipujiken Paulus kel perpulungen Makedonia amin gia ia lit ibas
kemusilen tapi la e penghalang man bana guna muat bagin guna nampati, malah melumbar ia ibas nampati
perpulungen Jerusalem. Tuhu-tuhu teridah geluhna erguna man kalak si deban.
Ibas nggitna perpulungen e si sampat-sampaten ibas sampurna pemere Dibata, maka kecibal perpulungen
lit kiniersadan ras lanai situalen antara perpulungen si sangana sampur ngaloken pemere Dibata ras perpulungen si
sanganan kekurangen. Hanya kiniersadan ras Tuhan Yesus bage kininggiten nampati teman si kekurangen teridah
keersadan perpulungen si irakut ibas penebusen Tuhan Yesus Kristus. Kegeluhen anak-anak Tuhan la banci egois,
tapi nggit nampati erkiteken nggejapken kekelengen Tuhan ibas geluhna.

III. Aplikasi
1) Jadi tema: “Rutang Si Megegeh Nampati Si La Megegeh”, maka nampati e me buah kiniteken ibas
persadan ras Yesus Kristus, dingen ibas nggit nampati labo e erbahansa kita kekurangen sebab ibas nampati
e desken nuan janah kai si isuan e ka nge iperani (bdk. Gal. 6:7). Emaka ibas tiap kesempaten meriahlah
ukurta guna nampati. Pemahamen ras penggejapen rutang si megegeh nampati si la megegeh harus
itumbuh kembangken, sabab bage arusna kegeluhen kalak si erkiniteken man Tuhan Yesus Kristus.
2) Ibas Lukas 10:25-37 “Kalak Samaria Si Erkuah Ate” ipujiken erkiteken nggit nampati kalak si man
sampaten (kena rampok=kesusahen). Kiniteken situhu-tuhu arus icidahken nggit nampati kalak si deban
terlebih teman sada kiniteken si man sampaten.
3) Rasul Jakup ningetken “Kiniteken arus sue ras Perbahanen” ((Jak. 2:14-26). Kiniteken si labo sue ras
perbahanen e me kiniteken si mate (labo menyelamatken). Kinteken si nggeluh si menyelamatken eme
nggit nampati (mere) teman si kekurangen.