Sermon Khotbah Minggu 17 April 2022

Paskah I
Invocatio : “Jenari Jesus encidahken diriNa ibas rupa si la bagi biasana man dua kalak ajar-ajarNa. Ajar-ajar
e sangana ibas perdalanen ku bas sada kuta.” Markus 16:12
Ogen : Masmur 103 : 1-5
Khotbah : Lukas 24:1-12
Tema : Jesus Enggo Keke

I. Kata Perlebe
Kekeken Yesus ibas kalak Kristen ikataken wari Paskah, semal ka pe ikataken eme wari kemenangan kalak Kristen.
Perbahan enda me tandana pepagin krina kalak sitek ipekeke ibas simate nari guna ndatken kegeluhen sirasa lalap. Ibas
wari enda pe tole ka sipebagesi pengangkanta guna reh payona ngangkai kerna kekeken Jesus e, sitentuna e ka kari jadi
nambah pengarapenta guna erkiniteken man Tuhanta Yesus Kristus si enggo naluken kematen ibas wari peteluken e.

II. Isi
Keke ibas cakap indonesia eme, Bangkit, siertina bangun dari tidur, dari kubur hidup kembali. Ibas invocationta
nurikrn kerna ke keken Yesus, ijelasken je makana Yesus enggo keke bas simate nari si icidahkena pertama man Maria
Magdalena si pernah ipelawes Jesus 7 setan ibas ia, Yesus nuduhken diriNya tole man ajar-ajarNa, aminna awalna la ia
tek tapi kedungenna mis ia erberita kempak teman-temanna, tapi epe lenga bo tek temanna e.
Ibas ogenta ngajari kita segelah tetap tek dingen muji gelar Tuhan si mereken simehulina man banta manusia,
Mazmur 103:1-5 enda naksiken kerna enden pujin man Dibata, ija ia ercakap-capap ibas pusuhna guna ngeJapken
kinulin Dibata ibas geluhna eme salah sada erbahanca ia ndatken kemalemen ate. Penekanan si banci ipelajari kita ibas
kitab enda eme: Dibata e harus ndatken pujin sebab IA me sumbul kerina kiniulin, la banci kita muji Tuhan alu mekarus
tetapi arus kita muji arah pusuhta simbages, asa ukur, tendi, kula sebab enggo i bebaskenNa ibas pinakit simbabai
kukematen sirasa lalap. Harus sipahami ibas konteks kitab enda pinakit siimaksutken e me Penyakit jiwa yang sudah
bobrok, banci ikataken pe bagi gangguan jiwa singerehken kebenen, enda tentuna isebabken dosa manusia, tambarna
sada ngenca eme pengudusen ibas dosa-dosa nari, e makana pinakit e malem. Bagi si inanami raja saul si enggo erbahan
kesalahen, minter bene pengarapen ras arah tujuan kegeluhenna, seh kukedungen mate sia-sia ia.
Kesalahenta pantas ndatken ukumen i bas dibata nari, tapi perbahan keleng kel ate Dibata kita, i alemina kita
ibas kita ngaku salah man baNa bagi sini ilakoken Daud, ibas paksa ia erbahan dosa si merambat erbahan rencana
pembunuhen man uria panglimana. I akuina emakana i alemi Dibata ia. Igejapken Daud makana ibas perenungenna
tuhu-tuhu ia lanai nggit mekarus man Dibata sidem alu kekelengen e.
Pemasmur ngingetken maka kekelengen Tuhan enda erdandanken kiniulinNa nge, ia ngejapken krina dosa
enggo ipepalemna bagep pinakit ipepalemna, ibas kuburen nari pe kita enggo ipulahina ibahan perkuah atena. Enda me
jadi sada persinget man banta selaku kalak kristen si tek man Dibata, makana Kemenangen e enggo i breken man banta,
bagi pemasmur enggo ngejapken kekelengen Tuhan ibas kegeluhenna, kita pe tole i ingetken ibas wari paskah enda
makanan kita enggo menang, kuasa dosa enggo talu, kematen sirasa lalap lanai jadi baginta, dosa lanai erbisa man banta
enda krina perbahan enggo i menangken Jesus Kristus ibas pristiwa penyalipen si enggo siperingeti ibas wari jumat
silepas, emakana kita harus ngataken bujur man Tuhan enca man pujin. Ula lupaken krina kiniulun simbarenda bagepe
si enggo tuhu-tuhu tergejab ibas pusuh perukurenta selaku kita manusia sirukur, ras sienggo itebusNa.
Khotbahta nuriken man banta makana Jesus tuhu-tuhu enggo keke ibas kuburen nari, naluken kematen, tokoh
sibanci sinehen ibas nats ende eme murid Jesus bagepe diberu sireh ku kuburen Yesus, sieteh makana ibas wari ija
Yesus isilangken pepagina eme wari sabat, eme ertina makana la banci erkaipe seakatan muji Tuhan ngenca, emakana
ibas wari peteluken minter kel lawes diberu-diberu e nehkken tedehna, tanda keleng atena man Jesus kukuburen guna
naruhken rempah-rempah, wangi-wangian ku mait Yesus, tradisi orang Yahudi. Tapi sengget ia erkiteken idapetina
kubur Yesus nggo talang. mereka segera lawes ndahi ajar-ajar Yesus si 11 guna erberita, tapi sada pe ajar-ajarna la tek
kerna si e, padahal rusur kel enggo ikataken Yesus kerna kekekenNa e.

III. Pengkenaina
Erti Paskah ibas Padan Sindekah e me bebasna bangsa israel ibas perbudaken mesir nari, si i pake Tuhan Musa
jadi pemimpin guna mbaba kalak enda ndarat ibas perbudaken nari. Ibas Padan Simbaru eme wari kemenangan kalak
Kristen ija Yesus enggo keke ibas simate nari guna naluken dosa manusia, ras pengkenaina man kita :
1. Kinikeken Yesus nyata
Padan sipernah isehkenNa erkelangken nabi-nabi nyata seh ibas paksana. Arah kekekenNa e kita iajuk maka erkiniteken
ibas gelarNa pe nyata seiring berjalannya waktu. Harus si Yakini maka kai si enggo ijanjikenNa, pasti igenapiNa
2. Kinikeken Yesus mereken kemenangen
KekekenNa naluken kematen, ertina maka arah KekekenNa kerina kuasa dosa banci italuken. Kerina permasalahen,
perbeben banci tertasi. Kemenangen e teridah arah cara geluhta si lanai bagi si gelgel (Reh ulina)
Dibata ngijinken kita ngaloken lebih asa si ukurken kita, bahkan si la pernah iukurken kita. Tujunna emekap guna
mpermuliaken gelarNa. Bagi si kataken Yesus man Marta ngatakenca “Ma nggo ndai Kukataken man bandu maka adi
tek kam idahndu nge kuasa Dibata?” (Yoh 11:40). Teklah kita, Tuhanta erdahin lebih asa si ukurken kita, emaka
siandalken Ia ibas geluhta. Em tandana IA enggo keke 😊

Pdt. Inrie Ohistauni Br Ginting (Kutambaru)