Ibadah Keluarga 27 Agustus 2022

1. Rende KEE 399:1,2 “Mari Surak Muji Tuhan” Ibabai Anak

Mari surak muji Tuhan, endeken nde-enden mriah
O Surga doni ersurak kerina
Mari rende muji IA, alu ukur si meriah
Puji gelarNa siBadia
La ‘rngadi-ngadi kupuji Kam Tuhan
Bas krina dampar kegeluhen
Ersurak mriah pusuhku ibas Kam
Terpuji Tuhan rasa lalap
Mari krina manusia sipuji dage Dibata
Rendelah ersuraklah kita krina
Ersadalah ukurta e, mujiken gelar Dibata
Ersurak dage kita krina
La ‘rngadi-ngadi kupuji Kam Tuhan
Bas krina dampar kegeluhen
Ersurak mriah pusuhku ibas Kam
Terpuji Tuhan rasa lalap

2. Ertoto Ibabai Bapa

3. Rende KEE 477 “Demi Pusuhku” iendeken 2x Ibabai Anak
Demi pusuhku O Tuhan
Alu dameNdu
Kuasailah O Tuhan
Haleluya
4. Renungen Ibabai Nande
Teks : Lukas 18:9-14
Tema : Kalak si peteruk bana ipeganjang Dibata
Adi babahta ngatakenca kita mehuli, lenga bo tentu. Adi jelma sinterem lah ngatakenca
banci saja, tapi pastin adi Dibata si ngatakenca kita mehuli. Lit prinsip manusia “adi la kin kita
si ngataken kita jago ise nari”. Tuhu, pas kin prinsip enda, dikune sesuai ka lah min ras
kenyataanna. Ola bagi kalak parisi si menganggap ia me si hebatna, ia me si rohanina, tapi ia ka
nge si beluhna mandangi kalak sideban bagi bas ayat 11. Lain ka bagi pemungut cuke si
memang bas pandangen jelma sinterem berprilaku la mehuli, tapi ibas ayat 13 ia mengakui
kelepakenna.
Arah perumpaman enda, Yesus ngajarken maka niat guna si mehuli e si lebih
iperdateken Dibata. Mehuli gia secara tindaken nyata, tapi adi pusuhna lalap mbanding-
mbandingi dirina ras kalak sideban ras menganggap kalak sideban la mehuli, e la kel ngena ate
Dibata. Ngenan ateNa, dikune kenyataan selama enda bas mata jelma sinterem ia la mehuli, tapi
bas pusuhna si mbagesna atena mperobahi lagu langkahna janah jera atena. Emaka tiap
pertotonna mindo penampat guna banci lepas ibas tindaken si la mehuli.
Kenyataan ibas kegeluhenta, mbue kel kita memiliki pola fikir bagi kalak parisi. Tempa
mehuli tapi ternyata ke egoisenta si pedalan. Ate Dibata isi pusuhta idemi niat guna mperobahi
hal si la mehuli, labo idemi hal-hal si terlalu membanggaken diri sendiri. La pe si banggaken
dirinta, adi kin ukurta mehuli, pasti nge Tuhan membanggaken cara fikir ras tingkah lakunta.
Maka arah si e, si isilah pusuh ras pemikirenta alu niat-niat meng Upgrade perbahanenta ku si
mehulina. Ras tetaplah kita meteruk ukur ibas ndalankenca, sebab kalak si meteruk ukur nge si
ipeganjang Dibata.
5. Rende KEE 350:1 “Kelengi Kebenaren” Ibabai Anak
 Kelengi kebenaren pedaulah si jahat
Pakeken kata Tuhan tahan rasa lalap
Nggeluhlah alu bujur meteruk ukur kin
Dalanken kebenaren maka ukur teneng
Erjaga-jagalah reh me wari Tuhan
Ersikap-sikaplah pake kata Tuhan

6. Pertoton Sapaat + Pertoton Tuhan Ibabai Bapa