SERMON KHOTBAH MINGGU PASSION III

REMINESCERE: INGETLAH MIN PERKUAH ATENDU O

JAHWE
(25 Februari 2024)
Invocatio : “Ingetlah, Aku ras kam dingen ngkawali kam ku japa pe kam lawes, janah Aku ka
pagi maba kam mulih ku taneh enda. La Kutadingken kam seh enggo dung
Kulakoken kerina si Kukataken bandu e” (Kej. 28 : 15)
Ogen : Galati 3 : 6-9 (Tunggal)
Kotbah : Nehemia 9 : 26-31 (Tunggal)
Tema : Erlebuh Man Tuhan Mindo Penampat

I. Kata Pengantar
Kiniteken eme bagin utama ntah pe si pentingna kal i bas konsep
keterkelinen/keselamaten si iajarken i bas agamanta Kristen. Kiniteken e me si mabai kita
ngendesken dirinta man Tuhan. Secara teologis i bas kita erkiniteken melibatken 3 aspek : 1).
Pengetahuan, sekalak jelma la mungkin ia ikataken sekalak si erkiniteken adina la ietehna kai si
man tek-kenna (yang di-imani). 2). Konfirmasi, sekalak si erkiniteken perlu ntah pe harus
ngueken (meng-iya-kan) kai si ietehna i bas ia erkiniteken e. 3). Penyerahan diri, sekalak si
erkiniteken perlu ntah pe harus ngendesken dirina man kai si ietehna ras si i uekenna i bas ia
erkiniteken. Emakana selaku kalak si erkiniteken man Tuhan, harus lebe kita meteh kerna ise kin
Tuhan si isembah kita e, tek kita man baNa ras si endesken diri ntah pe kegeluhenta man baNa.
Alu kata si deban, i bas kegeluhenta si eteh kuga arusna kita ndalanisa, e me si sentudu ras
peratenNa. Subuk kegeluhenta e i bas situasi si bagi ukur ras si la bagi ukurta. I bas si bagi
ukurta e, si eteh IA ngenda si ngaturkensa, bage pe i bas si la bagi ukurta e, si eteh maka IA
ngenca inganta mindo gegeh, kepentaren ras penampat. Guna si e mari si pebagesi pengangkanta
kerna si e i bas teks oratenta.

II. Uraian Teks

Ogenta, nuriken kerna Rasul Paulus si nuriken sekalak tokoh e me Abraham, si jadi
usihen i bas ia ngayuken (merespon) pendilo Dibata. Ituriken Paulus me maka kiniteken
Abraham man Dibata ngenda si erbahansa ia ngasup ngayuken pendilo Dibata e. Kebenaren
Abraham i lebe-lebe Dibata erkiteken kinitekenna (Ay.6). Ipersingetti Paulus pe maka si tek man
Dibata si isembah Abraham, kesusuren Abraham kap ia. Bage me pe kerina kalak si labo kalak
Jahudi, kiniteken man Jesus erbahanca kita ngaloken keterkelinen (bdk. Ay.7-8). Engkai maka
perlu iakap Paulus iturikenna kerna si e? Eme erkiteken paksa si e lit perpulungen Epesus si
nadingken Kristus ras mulihken ia ku kiniteken dibata-dibata si gel-gel (Ep. 1:6 & 4:8-11).
Kotbahta, teks enda lit i bas bagin perikop si batang belinna “Pertoton pengakun dosa”
(Ay. 6-37). Lit 3 hal si jadi inti i bas perikop enda, eme : Pertama, lit piga-piga pengakun bangsa
e, bahwa 1). Dibata kap si nepa langit ras doni ras si milih Abraham jadi ninina ras mereken
padan man bana, 2). Dibata enggo nuduhken kuasaNa i lebe-lebe Firaun arah tanda kuasa si
mbelin ras mbebasken bangsa Israel arah perbudaken i Mesir, 3). Dibata mbelah lawit segelahna
banci erdalan bangsaNa, janah si ngayakisa gedap i bas lau si mbages, 4). Dibata mimpin
bangsaNa suari alu embun, ras berngi iterangina dalan salu api, 5). Dibata mereken undang-
undang si mehuli kempak bangsaNa, 6). Dibata ncukupken kebutuhen bangsaNa i bas perdalinen
ku taneh Kanaan, 7). Dibata mereken taneh Kanaan man bangsaNa. (Bdk. Ay.6-15) Kedua,
bahwa nenek moyang bangsa Israel ras bangsa Israel e sendiri erbahan dosa, e me la patuh
ngikutken undang-undang Tuhan, bangsa e memberontak, ibunuhna nabi-nabi si mereken
pertenget man bana segelahna mulih bangsa e man Tuhan, bahkan bangsa e ngombangi Dibata
alu mesangat (Ay.26). Emaka i bas teks kotbahta ay. 27-31, nuriken uga mbelinna perkuah ate
Dibata man bangsaNa Israel. Aminna gia bangsa e mulih-ulih erbahan dosa, meganjang ukurna
nulak undang-undang si ibereken Dibata, la ibegikenna persinget si ibereken Dibata arah nabi-
nabiNa, la kel e erbahansa Dibata nadingken ntah ngkernepken bangsaNa, tapi tetap isehkenNa
perkuah ateNa si mbelin, sebab Dibata e melias dingen perkuah.
Invocationta, nuriken kerna Tuhan nehken kataNa man Jakub waktu ia i bas perdalanen
ku rumah mamana Laban. Lit kebiaren ras kearun ate i bas Jakub arah seninana Esau si ersura-
sura munuh ia, sebab enggo itipuna bapana Isak alu muat pasu-pasu si arusna man Esau. E maka
reh Tuhan nehken padanNa man Jakub, tetap ia ikawaliNa ras la pernah itadingkenNa ia.
Bageme keleng ate Tuhan nandangi kalak si erkiniteken man baNa.

III. Aplikasi
1. Kerina kita manusia pasti pernah ngelakoken si la ngena ate Dibata. Tapi si jadi
penungkunen, nggit nge kita lalap i bas kubang dosa? Payo memang adina ninta Dibata e
melias dingen dem perkuah ate, tapi harus nge si inget bahwa batas kesabaren Dibata e
enggo i tetapken eme sebatas kita nggeluh denga, ras si eteh pe labo lit jelma si meteh
kerna ndigan idilo Dibata. Banci jadi pagi, bulan si reh, tahun si reh, ras seterusna. Ertina
ula sia-siaken kesempaten si ibereken Dibata man banta. Jera dingen robah lah kita, arah
perukurenta, pengerananta ras perbahanenta si mungkin sedekah enda si pakeken guna si la
ngena ate Dibata. Emaka nina Jesus rusur i bas pelayanenNa, “dosandu enggo ialemi,
olanai bahan si la ngena ate Dibata”
2. I bas kita ndalani kegeluhenta tentu erbage-bage situasi pasti si dalani, subuk situasi si bagi
ukur ras si la bagi ukurta. I bas si bagi ukurta e, si eteh maka Dibata ngenda si ngaturkensa,
ras si kataken bujur man baNa. Si pakekenlah pasu-pasu si ialoken kita arah Dibata jadi
pasu-pasu ka kita man kalak si deban. Bage pe sebalikna, i bas situasi si la bagi ukurta
kegeluhenta e, si eteh maka Dibata ngenca inganta mindo gegeh ras penampat. I bas kita
mindo penampat man baNa e, perlu kel si turihi mulihi kegeluhen si la bagi ukurta e rehna
erkiteken kai, adi kin memang e rehna erkiteken megati kita ngelakoken si la ngena ate
Tuhan, e la banci lang jera ras robahlah kita lebe, segelahna si aloken perkuah ateNa. Di
kune pe la kal terantusi kita ija nari rehna perbebenta e, siakaplah maka e ate Dibata nguji
kesetian kinitekenta man baNa. Alu kinitekenta man baNa me dat kita gegeh ras serpang
pulah arah perbeben si nderpa kegeluhenta.