1|Page

Pekan Doa/Pekan Doa GBKP Wari III Tahun 2017

Invocatio : “Adi sada Ring-ring suin, kerina ring-ring si deban pe ikut nggejapkenca. Janah adi sada
ring-ring ipehaga, kerina ring-ring si deban ikut ermeriah” (I Korinti 12:26).

Renungen : Mazmur 133:1-3

Tema : “Kemalemen Ate Ibas Persadan”.

I. Kata Perlebe

Pustaka Si Badia menekanken kerna pentingna kiniersadan ibas kegeluhenta; ibas jabu, sangkep
nggeluh, ingan pendahinta, bage pe itep-tep perpulungenta. Tuhan Yesus nggo ertoto guna kiniersadan
ajar-ajarNa ras kiniersadan kalak si tek man Tuhan Yesus / perpulungenNa (Yoh. 17:1-26). Ibas
ndahiken dahin Tuhan (Marturia, Koinonia, Diakonia) kiniersadan tetap jadi penekanen; bagi Yesus
ngutus 70 kalak ajar-ajarNa ku kuta-kuta ibahanNa dua-dua kalak gelah banci arih-arih si sampat-
sampaten.

Kegeluhen perjabun pe itekanken kel kiniersadan, bagi padan perjabun e; ibas susah ntah senang,
ibas sehat ntah sakit, bage pe ibas ceda ate ntah ermeriah ukur tetap ersada, pala Dibata nirangkenca alu
kematen (Kej. 2:18, Mat. 19:6). Ibas perpulungen pe kiniersadan sangat penting. Keberhasilen
pelayanen ras perpulungen e lit nanamna man kerina anggota-anggota perpulungen, ibas perpulungen e
megegeh kiniersadanna. Ola sibelasken rusur kiniersadan ibas perpulungen tapi la ngasup kita erasada
ras nggeluh erbana-bana. Dibata mperdiateken kiniersadan perpulungen e, bagi pujin Dibata kerna
kiniersadan perpulungen Semirna (Ketangkasen 2:9).

Sangkep nggeluh ibas kalak Karo (Kalimbubu, senina, ras anak beru) nuduhken penting kel
kiniersadan ibas kalak Karo gelah nggeluh banci arih-arih/runggu muat si mehuli ras ingan sisampat-
sampaten. Labo selamana kita kalimbubu, tapi sekali kita jadi senina ntah anak beru. Si penting ibas
sangkep nggeluh e sidahiken tanggung-jawabta sebagai kalimbubu, senina ntah anak beru gelah kerina
dahin-dahin kegeluhen ibas suka-duka banci mehuli.

II. Isi

Mazmur enda merupaken syair kerukunen kekeluargan umat Allah1. Enda terjadi ibas kinersadan
perjumpaan bangsa Israel si sangana ziarah ku Jerusalem.

“Andiko ulina ras senangna” (Indonesia: Sungguh alangkah baikya dan indahnya), menunjukken
takjub kerna kehabaten adi terjalin perseninan ras keersadan arih anak-anak Tuhan (ay 1). Kerinduan
ras kemalemen ate man kiniersadan umat Tuhan teridah ibas perdalanen ziarah enda. Tentuna lit
tantangen si mbelin menciptaken keersadaan enda, tapi harus tetap iusahaken guna kiniersadaan e.
Keersadan enda terjadi ibas kerina umat Tuhan ertedeh ate ndalanken penembahenna ibas ziarah ku
Jerusalem

Pemazmur ngandingken pasu-pasu Dibata nangdangi kiniersadan e ibas 2 cara:

Sipemena, bagi minak wangi ibas penahbisen imam (ay 2). Minak pe nggambarken keriahen
(Maz. 23:5; 104:15), keharuman/merim (Kid. 1:3), minak urapan imam lambang mpebadiaken (Kel.
30:22-33). Kelimpahen minak urapan (ay 2b,c) nggambarken Dibata mereken pasu-pasuNa si simpar
kubas kiniersadan umatNa ngerayaken Paskah ku Jerusalem (Luk. 2:41-42).

Sipeduaken, kiniersadan e iandingken bagi embun si menyegarken, si mengendap i deleng

Hermon nusur ku deleng Sion. Deleng Hermon i kerajan utaras ras Sion i Jerusalem2. Malerna embun i

1
Tafsiran Masa Kini Edisi 2, Jakarta: YKBK 1989, hal 271
2
Ibid, hal 272
2|Page

Deleng Hermon ku Sion enda merupaken mujizat, bali ras persekutuan e merupaken mujizat ilahi.
Kiniersadan e hanya ibas persadan ras Kristus Yesus (Ef. 2:11-22). Kubas kiniersadan e me Dibata
ermeriah ukur nehken pasu-pasuNa (ay. 3). Jadi kiniersadan merupaken hal si harus ilakoken anak-
anak Tuhan, sabab e me si mereken kemalemen ate; janah ije me icucurken Dibata pasu-pasuNa.

III. Pointer-pointer Renungen

 Tantangen kubas kiniersadan, e me litna sifat si la mehuli ibas manusia si man benenken;
diantarana e me: perubat-rubat, e me kujapa pe rusur maba perubaten. Kemungkinen enda labo
isadari si pelakuna, sabab lit nge tole ibassa sifat si la mehuli e me merasa ia akapna rusur si
payona (membenarken diri sendiri). Sifat ACC (anceng, cian ras cikurak), sifat si enda nggo me
urak kel kenca kita jadi kalak Kristen; tapi mekatep lit denga tongkeh-tongkehna. Melala denga
nge sifat-sifat si la mehuli tantangen kubas kiniersada e, murah megelut, perampus, ngukurken
dirina saja, la siperkuanen, rsd.
 Kegeluhen ibas kiniersadan si mehuli e me nggeluh ersada ras erdame, kegeluhen si nggit
berbagi ras temanta ibas keadan kegeluhenta, la saja ibas kepiceten si inanami kita tapi pe ibas
keriahenta (dat pasu-pasu) ikut temanta ngenanamisa (invocatio). Kalak si ndatken pasu-pasu e
igejabna min maka ia jadi saluren pasu-pasu man kalak si deban. Nggit memaafken, la erbalas,
solider man teman, rsd.
 Kemalemen ate ibas persadan (tema), teridah ras ternanami ibas ggitna perpulungen saling
mperdiateken ras sisampat-sampaten. Reh kubas persadan (perpulungen) e jadi ketedehen ateta,
labo kewajipen. Melala kemajun-kemajun icapai perpulungen e sabab enteguh persadanna ras
idemi Dibata pasu-pasuNa man kerina anak-anak Tuhan si lit ibas persadan e.