SERMON MINGGU XIII DUNG TRINITATIS, 29 AGUSTUS 2021

TOPIK: DIBOTO DEBATA DO NA DI ROHAM (Markus 7:17-23)

Patujolo
Mansai fanatik do halak Parise dohot Sibotosurat di kesalehan na bersifat lahiriah (pardagingon). Sada
na gabe kebiasaan nasida ima "mamuri tangan" andorang so marsipanganon. Dihaporseai nasida, mamboan
haramunon jala mardosa do molo so marburi tangan nasida andorang so marsipanganon. Dipinsang Jesus do
fanatisme nasida na sala i, ala menyesatkan do pola pikir na songon i tu angka natorop. Jesus mandok, hata na
haruar sian pamangan ni jolma ido na mambahen gabe ramun ngolu ni jolma i (ay. 15).
Hatorangan
Aha do na naeng taparsiajari sian pangajarion ni Jesus di turpuk on? Ndang sipanganon na mambahen
gabe ramun ngolu ni jolma alai sude na roa na haruar sian roha nang pingkiran ni jolma i do na mangaramuni
jolma. Nang pe marsipanganon jolma ndang jolo marburi tanganna, ndang i na manontuhon habadiaon ni jolma
di Debata. Toho do ingkon ias tanganta molo naeng marsipanganon, alai hombar tu kesehatan ni jolma do i,
ndang hombar tu habadiaon ni jolma. Habadiaon ni jolma ndang ditontuhon marhite na marburi tangan, jala
ndang ditontuhon sipanganon na masuk tu pamangan ni jolma i. Ndang persoalan di Debata manang mamuri
tangan jolma molo naeng marsipanganon; manang sipanganon na songon dia na masuk tu pamangan jolma i, ai
so manang bongot si panganon i tu bagasan rohana; tu butuha do i laho, dung i bolong do i muse di inganan na
soding, asa gabe las do saluhutna sipanganon i (ay. 19). Alai angka na roa manang na denggan na ruar sian roha
ni jolma, ido na mangaramuni jolma i (pingkiran na jahat, parmainanon, panangkoon, pamunuon,
pangalangkupon, pangahution, hajahaton, pangansion, pargadombuson, panorgangon, panginsahion, ginjang
dohot neang ni roha: ay.20-22).
Diajari Jesus do angka na porsea mangantusi, na so kesalehan lahiriah na tarida di ruar sambing na
manontuhon habadiaon ni jolma di Debata. Justru berbahaya do na songoni ala gabe membentuk karakter
kemunafikan di jolo ni jolma. Diida Jesus do karakter ni angka halak Parise dohot Sibotosurat na
menyelewengkan pangajarion ni ugamo Jahudi hatiha i. Gabe bergeser (muba) do pemahaman nasida di angka
patik na nijalo nasida sian Debata, gabe holan songon aturan na mamuri tangan, gendi dohot hudon (Mark.7:4).
Mansai tajom do pinsangpinsang ni Jesus tu halak Parise dohot Sibotosurat hatiha i, asa unang
menyesatkan pangajarion nasida tu angka natorop. Barani do Jesus mangalo pangajariaon na menyesatkan
angka natorop hatiha i. Ndang penampilan parduru na diida Debata, songon na tarsurat di 1Samuel 16:7:
"Unang ho mamereng tu rupana, manang tu tongam di dagingna, ai nunga hubolongkon anggo ibana, ai ndada
marguru tu parnidaan ni jolma; ianggo jolma rupa do na niidana, alai anggo Jahowa roha di bagasan do na
niidana." Kemurnian manang habadiaon ni jolma ndang ditontuhon haiason parduru manang rupa ni jolma, alai
aha na adong di bagasan roha dohot pingkiran ni jolma ido na manontuhon ias manang ndang jolma i di adopan
ni Debata. Dosa na mian di bagasan roha nang pingkiran ni jolma ido na mangaramuni jolma i. Molo sega do
roha ni jolma i alani dosa, gabe songon aek naung ramun do roha ni jolma i mangaramuni ngoluna.
Boasa na haruar sian "roha" ni jolma na mangaramuni ngolu ni jolma i? Roha ni jolma ido pusat
kepribadian na manontuhon sude tindakan na denggan manang na roa. Sian roha ni jolma do sumber
haramunon, roha ni jolma do na menggerakkan ngoluna mangulahon na denggan manang na jat. Parsiajaran do
tu hita na nidok ni Jesus, asa manat hita di pangajarion na idaon sintong sian duru hape sasintongna ndang
bersumber sian hata Debata, bahkan justru maralo tu hata ni Debata. Adong do halak na mandok "unang
martangiang di tonga borngin ala di tonga borngin do sibolis mangula, gabe sibolis ma na manangihon tangiang
ni jolma," ninna ajaran i. Mansai menyesatkan do ajaran si songoni, hira na so marhuaso Debata di ganup
tingki, arian nang borngin pe. Ai marhuaso do Debata manaluhon sibolis! Ndang mungkin ndang dibege Debata
tangiang ni angka na porsea molo martangiang di tonga borngin pe i. Jala ndang holan di tonga borngin sibolis
mangula, ganup tingki do sibolis berusaha mangganggu roha ni jolma asa madabu tu dosa. Ai halak na
marminggu manogot ni ari pe, olo do digugai sibolis gabe ndang olo manangihon hata ni Debata di tingki
marminggu di gareja. Di gareja pe, manogot nang borngin mangula do sibolis sai manggugai roha ni jolma.
Alani ingkon manat do hita di angka ajaran-ajaran na idaon hira sintong hape menyesatkan. Godang dope angka
ajaran na menyesatkan pola pikirta. Ingkon manat do hita jala unang taihuthon ajaran-ajaran na menyesatkan na
mambahen lilu haporseaonta.
Na mangihut naeng taida sian turpuk on, Debata marnida roha ni jolma. Tarsurat do tong di Jeremia
17:10a, "Ahu Jahowa do Sidodo roha." Jala di Psalmen 44:22 didok: "Tung so sisiran Debata i?Ai Ibana do
tumanda angka sibunian ni roha." Jala di Rom 3:10 disurathon sasintongna cenderung na jahat do roha ni jolma,
bahkan jotjot ndang diantusi jolma i situasi ni rohana, ala nunga madabu tu bagasan dosa. Lapatanna, jolma i
sandiri pe jotjot ndang mangantusi aha na adong di bagasan rohana, ala nunga mangolu di bagasan dosa.
Songon na tarsurat di Jeremia17:9, "Tung na angkal situtu do roha ni jolma, jala na ganggu, tung ise ma na tuk
mandodoisa?" Jala di Kronika 28:9 tarsurat do: "Ai disulingkit Jahowa do nasa roha di bagasan, jala diantusi do
nasa sangkapsangkap ni roha; molo dilului ho Ibana sai jumpang ho do Ibana; alai molo tung tadingkononmu
Ibana, bolongkononna ma ho ro di salelenglelengna." Holan Debata do na mamboto aha na buni di bagasan roha
ni jolma, jala holan Ibana na mangantusi roha ni jolma i. Ala di bagasan roha ni jolma do mian Debata, diida
Ibana do na roa manang na sintong na adong di bagasan roha ni ganup jolma. Holan Debata do na boi mandodo
roha parbagasan ni jolma. Ndang adong boi tabunihonon ni jolma angka di bagasan rohana, ai disulingkit
Debata do bagas tu ganup roha ni jolma i. Manang aha pe na dipingkiri jolma di bagasan rohana diboto Debata
do. Alani ndang boi jolma margabus tu Debata, ai diboto Debata do sude na di bagasan rohana. Godang do
jolma manabunihon na di bagasan rohana tu donganna jolma, alani do gabe adong jolma na munafik (berpura-
pura), hira na burju idaon hape parjahat na sumalin; manang hira parjahat idaon hape jolma na burju. Alai molo
Debata diboto do sude na tapingkiri dohot na adong di bagasan rohanta be, ala Ibana do na manompa hita jala
huasoNa na so terbatas boi menembus roha nang pingkiran ni jolma.
Panimpuli
Antong molo diida Debata rohanta be, naeng ma gabe halak na jujur hita di adopanNa nang dongan
jolma. Unang gabe si pangalensem hita, ai so adong gunana, ala diboto Debata do saluhut na buni di bagasan
rohanta be. Jala molo taboto, Debata mamboto roha ni jolma, tontu ingkon berusaha do hita asa angka na
denggan tubu di bagasan rohanta na hombar tu lomo ni roha ni Debata. Naeng taoloi panogunoguon ni Tondi
Parbadia di bagasan rohanta, didok di Galatia 5:16, "Alai on do hudok: Marguru tu Tondi í ma hamu
marparange; unang pasaut hamu hisaphisap ni daging!" Naeng unduk rohanta tu panogunoguon ni Tondi
Parbadia, ai holan Tondi Parbadia do na boi patundukon sude sangkapsangkap ni daging na roa na maralo tu
lomo ni roha ni Debata. Asa sude na tapingkiri, na tacitacitahon, na tarencanahon di bagasan rohanta hombar tu
haporseaonta tu Debata. Molo unduk hita tu panogunoguon ni Tondi Parbadia, mamingkiri angka na roa. Jala na
taulahon pe angka denggan, ndang be angka na roa, ido disurathon di Pilippi 4:8, "Angkup nii, ale angka
dongan, pingkiri hamu ma nasa parange na sintong, na daulat, na tigor, na bontor, na uli, na denggan begeon ro
di sude na targoar haburjuon, na tau pujipujian"
Ingkon tajaga rohanta marhite hata ni Debata asa unang disegai sibolis, ai sai berusaha do sibolis manegai roha
ni jolma asa mangulahon na jahat. Angka halak na so olo manjaga rohana, sai tubu do di bagasan rohana
keinginan mangulahon na jahat, manangko, mangalangkup, mamunu, margabus, dna. Angka i do na patubuhon
dosa songon na didok Jesus di turpuk on. Asa naeng tajaga rohanta marhite na ungkap hita martangiang,
mandok di bagasan rohanta songon na tarsurat di Psalmen 26:2,"Uji ma ahu, ale Jahowa, jala sulingkit
rohangkon, sai lala ma angka piangki dohot rohangki." Asa disulingkit Debata rohanta songon na tarsurat di
Psalmen 139:23-24,"Sulingkit ma ahu, ale Debata, jala tanda rohangki, uji ma ahu jala tanda angka pingkiranki.
Jala ida, manang tung adong lapang haporsuhon di bagasan ahu, jala togu ahu di dalan salelenglelengna."
Ingkon barani hita mandompakhon rohanta tu Debata asa disulingkit rohanta, asa sian nasa rohanta mamuji
Ibana marhite pamanganta nang parangenta. Sai diparbisuhi Debata ma hita mangoloi hataNa marhite na
manjaga rohanta be. Amen.