BAHAN SERMON

HKBP RESSORT LINTONGNIHUTA

Minggu, 8 Oktober 2023
Topik : Dihalomohon Jahowa do Uhum Dohot Hatigoran
Tuhan Menghendaki Keadilan dan Kebenaran
Ev : Jesaya 5 : 1 – 7

Pamuhai
Molo tapamanat di turpuk on, dipatudoshon do Debata nampunasa “Porlak Anggur” di
inganan na napu. Jala Debata do na mangula di Porlak Aggur i. Naeng do dipamanat sian turpuk
on taringot tu kualitas ni Parbue ni Anggur i tudoshon bangso Israel i. Bangso Israel ima bangso
nadihaholongi Debata jala nasida ma porlak anggur ni Debata. Diparhatutu Debata do nasida
bangso ni Debata jala dipapulik nasida sian bangso na asing. Disuanhon do nasida ima tano na
adong di punsu ni buhit tano na mansai uli jala napu. Molo taida muse nuaeng di Turpuk on,
dipataridahon Panurirang Jesaya do sian parnipionna/penglihatan rumang ni joujouna tu Debata
ala dietongdo jumonok ibana tu Debata didok ibana hasianku (kekasihku). Dipatubegehon si
Jesaya do di ende di turpuk on songon namarumpama ibana tu Debata songon parDebataonna
maradophon Debata. Antong songondia ma panorangion ni turpuk on?

Hatorangan ni Turpuk
Ayat 1-2 Nubuatan/Bagabaga ni si Jesaya di endena on taringot tu parmudumuduon ni
Debata tu bangso Israel. Mansai malo do si Jesaya on patupahon endeendena songon na
marserita ibana diganup hatorangan ni endenai. Didok ibana “hasianku nampuna porlak anggur”
di sada dolok na napu, dipangkuri, dijomputi batu (naolo manegai/manghopit suan suanan), jala
dungi disuan ma lopok (benih) na denggan, dungi muse dipature ma tungkkup di tongatongana,
jala dihurak sada lubang inganan pamorosan ni anggur i, hape dung tingkina manggotil asom
parbuena. Hasianku ima panjouon nisi Jesaya tu Debata, nampuna porlak Anggur i. Tongtong do
diparhatopot si Jesaya na mangula do Debata. Jala patuduhon pangajarion na mangolu do Debata
sumarihon angka jadijadianNa. Namanjadihon na so adong gabe adong (Creatio ex nihilo). Ibarat
Debata i songon “Pangula”/Petani” na manuan, jala paunehon suansuananna marhite sipanganon,
maniram, jala sude petani manghirim diparbue na denggan. Hape dung ro tingki manggotil
ndang songon nanihirim ni Debata parbuena i, gabe asom nangpe sian boni na dumenggan
disuan i. Nga maralo be nadidokna “molo sinuan nadenggan na denggan do na tubu”. Hape dung
ditomba Debata jolma i tumiru rupana do tudos tu pangalahona, jala didok do “dungi denggan di
ida Debata” hape madabu do jolma i tu Dosa, gabe marparbuehon na so denggan. Boni na
denggan do disuan, alai gabe asom do parbuena. Gabe tubu do pamunuan, pangalakkupon,
hosom, elat ni roha, marbadai dohot angka ragam ni dosa. Dipatupa jala diparade Debata do sude
angka na ringkot diangka nasinuanan nai asa denggan parbuena. Alai boasa gabe asom hape
denggan do disuan, disiram do laos boni na denggan do boni na. Molo songonido pambahenan ni
Debata boasa boi gabe madabu jolma naung tinompaNa doshon rupa dohot pangalahoNa i
tubagasan dosa? Adong dosa ala dioloi jolma i do hata ni si bolis i jala ndang marpangoloi tu
hata ni Debata. Ndang diulahon be HataNa, gabe dituntun lomona, lomo ni rohana ma diihuthon
jolma naparjolo ndangbe lomo ni roha ni Debata.
Ayat 3-4: Ayat tolu mandok “Antong hamu isi ni Jerusalem, jala hamu bao sian Juda, ua
uhum hamu ma Ahu dohot porlak anggurHu,” turpuk on manggombarhon nadiparsalahon do
Debata alani parulaon ni nasida. Adong parsalisian ditongatonga ni nasida maradophon Debata.
Alai patardo angka uhum na adong di Debata jala sintong. Ido umbahen dipasahat Debata do
haputusan ni parsalisian i tu panimbangon ni roha (hati nurani) ni bangso i. Di parpudi didok
“boasa hupaimaima parbue na tonggi hape na asom do parbuena? Songoni ma sungkunsungkun
ni Debata sian nahinirim nirohana tu angka bangsoNa songon i nang tu hita. Lapatanna ndang
naso denggan disuan, ditambori do, jala boni na denggan alai ndung manggotil asom parbuena.
Na nihalomohon Debata ima parbue na denggan di ngolunta, marpabuehon natonggi, natumabo,
unang na asom parbuena daion ni Debata.
Ayat 5-6: Didabu ma uhum tu nasida jala uhum na sintong do didabu tu nasida alani
pangalaho ni nasida naso sintong i. Ndang adongbe tawar-menawar dinalaho manesa angka
hajahaton jala pasohon panguhuman i. Didok di ayat 5 “….. pabotohononku ma tu hamu
sibahenonku tu porlak anggurHu” na boi taida sian ayat on ima lehonon ma uhum tu nasida ala
sasintongna ndang marlapatan be nasida. Jempekna ndang be gabe porlak anggur porlaki alai
gabe halongonan nama. Ndang dihalomohon Debata hau anggur i marparbuehon na asom.
Nangpe Debata namanompa jala mangula i alai didok do “umpatonku ma handangna, asa suda
digagat binatang lohaonku ma paritna, asa diluntaki bahenonku ma ibana gabe halongonan
(gersang) dungi dirantingi, dipangkuri asa tubuan suga dohot sihupi jala dohononhu angka
ombun, asa unang mangalehon udan tu ibana”. Na taida sian i ima ndang gabe bangso na pinillit
be bangso i alai gabe dos do nasida songon bangso na asing. Ndang be dibagasan pangaramotion
be nasida songon bangso ni Debata. Dibagasan uhumNa ndang be lehonon ni Debata angka
pasupasuna tu angka naung leleng sai manjalo pasupasu alai ndang marparbue.
Ayat 7: Dipillit Debata do anggur na marhasurungan i, ima bangso Israel dohot baoa na
sian Juda. Didok bagabaga ni Debata marhite ende nisi Jesaya on, alai ingkon adong do
suansuanan hasudunganna. Aha do na nidokna sian ayat 7 on ima dipaima Debata uhum dohot
hasintongan sian bangso i. On ma sasintongna parbue ni angka bangso naung pinillit ni Debata
alai baliksa do na pinatupa ni bangso i. Sai dipaimaima uhum, hape pangarupaon do na ro,
dipaimaima hatigoran hape angguhangguk do naro. Sude angka naniula ni nasida diulahon
marhite angka parulaon naso ture ndang marhite uhum dohot hatigoran.

Panutup
Sai marlobilobi do basabasa ni Debata tu angka bangso namangihuthon Ibana, ima
bangso halomoanNa i. bangso halomoanNa i tung so jadi do dao sian Ibana. Molo halomoan na
do hita, ndang dao Debata sian hita alai molo holang hita jala ndang taulahon hasintongan dohot
uhumna i dos mahita tu anggur namarparbuehon parbue na asom i. Lapatanna naeng nian
tongtong ngolu na denggan na mangulahon lomoniroha ni Debata ngolu ni angka jolma. Jala ido
ngolu nasintong, molo gabe tongtong tahalomohon songon nanihalomohon ni Debata i ima uhum
dohot hatigoran, marparbuehon natonggi jala gabe pasupasu tu ganup jolma. Suangsongon i nang
hita natibus ni Jesus Kristus nunga gabe bangsoNa hita, naeng ma nian mamparbuehon parbue na
denggan hita dibagasan ngolunta mardapohon Debata. Nungga dipullih hita gabe bangsona
marhite Jesus Kristus songon na didok Jesus “Ndada hamu mamillit Ahu; Ahu do mamillit hamu
jala hupadiri hamu, asa laho hamu marparbue, jala asa mian parbuemuna i; asa dilehon tu hamu
nasa sipangidoonmuna sian Ama i marhitehite Goarhu.