SERMON PARHALADO HKBP RESORT KABANJAHE

2 MUSA 33:15-23
TOPIK: DEBATA HAROROAN NI PASUPASU
PATUJOLO
Molo taida 2 Musa 33:15-23 on, ndang adong hata pasupasu disi songon topik minggu on. Alai na gumodang
ima hata “asi ni roha (kasih karunia). Asi ni roha sian hata “Khen” di hata Heber na marlapatan “pambahenan ni
Debata tu jolma ndada ala pambahenan ni jolma i” boi ma didok di hata Indonesia “sikap tanpa pamrih oleh Allah
kepada manusia, perbuatan Allah menyatakan kasihNya tanpa disebabkan kebaikan manusia”. Jadi pasupasu na
didok di turpuk on ima asi ni roha ni Debata di jolma i marhite na tongtong mangalehon haluaon, pangaramotion jala
nasa na ringkot di pardalanan ni ngolu ni jolma i ndada ala ni pambahenan ni jolma na denggan alai ala ni holong ni
Debata do”.
Ido umbahen molo taparrohahon andorang so turpuk on di 2 Musa 32, bangso Israel na tangkang i,
patupahon ganaganaan ima lombu tuangan sian sere jala laos disomba nasida do i andorang di dolok Sinai dope si
Musa manjalo patik na 10. Tama nian rimasan ni Debata nasida alai marpangulahi do roha ni Debata laho mamboan
bangso i tu tano habaoran ni susu dohot situak ni loba (2 Musa 33:3). On ma asi ni roha ni Debata di jolma na
tongtong patupa haluaon tu portibi on. Sahali marpadan Debata tu bangsoNa ndang muba padan i sai na patupaon
ni debata do i. Tarlumobi ma i dibagasan Jesus Kristus na paluahon portibi on sian dosa songon na di Epistel tu ari
minggu di Rom 5:12-17.

HATORANGAN
1. Pasahat diri tu bagasan Asi ni roha ni Debata (ayat 15-16)
Di ayat 15 on udut ni panghataion ni Jahowa tu si Musa sian ayat 1-14 di 2 Musa 33 di na disuru Debata si Musa
mamboan bangso i tu tano na diuarihon Jahowa tu nasida. Alai dipangido si Musa do asa rap Debata dohot si Musa
nang bangso i molo mardalan nasida. Ido umbahen didok di ayat 15 “molo so tongtong bohiMi manguluhon hami,
unang nian togihon hami nangkok sian on”, ndada na mandok na so didongani Debata nasida mamungka sian Misir
dope alai patuduhon pos ni roha ni si Musa tu Debata. Ai tarida do ganggu ni roha ni si Musa dohot bangso i molo so
Debata dongan nasida. Ndang ditabunihon si Musa ganggu ni rohana di na didok “ai tung marhite sian aha ma dapot
tandaon, paboa naung jumpangan asi ni roha au maradophon Ho, ahu dohot parripem on, nda marhie sian na
didongananmu hami mardalan…? (ayat 16). Tarida do nadipatujolo si Musa dipardalananna rap dhot bangso I ima
Debata. Ai Debata do marsuru jala Debata do napasauthon I marhite pandonganionna di bangsoNa.
2. Asi ni Roha ni Debata di angka na porsea (ayat 17)
Alus ni Debata tarida di ayat 17 ima “napatupaon ni Debata do napindangido ni si Musa ala ni Asi Ni Roha ni Debata”.
dison tangkas do taingot “ala asi ni roha ni Jahowa do umbahen dipatupa pangidoan ni si Musa, ndada ala ni
pambahenan ni bangso i manang pambahenan ni si Musa”. Alai didok do nian disi “ala ditanda Jahowa si Musa”
lapatanna, diboto Debata do aha do nadihirim si Musa, diida Debata do haunduhon ni si Musa na mamboan bangso I
ruar sian Misir. Jadi asi ni roha ni Debata hape mian do di angka na unduk tu Debata ndada pola ala ni haunduhon I,
alai ala ni asi ni roha I do umbahen unduk tu Debata.
3. Manghasiholi marnida hamuliaon ni Debata (ayat 18)
Alai ndada holan sahat disi dipangido si Musa, sihol roha ni si Musa asa dipatuduhon Jahowa hamuliaonNa tu si
Musa. Aha do hamuliaon? Hamuliaon sian hata “kabod” di hata heber lapatanna “keberadaan Allah seperti yang
nyata dalam perbuatan-perbuatanNya yang besar dan ajaib”. Kemuliaan Allah meliputi “kekuasaan, keindahan,
kesemarakan, kedasyatan Allah”. Jadi didia do dapot i? ima di Debata sandiri. Jadi molo didok naeng marnida
hamuliaon ni Jahowa ima naeng marnida Jahowa. Ima sihol ni roha ni si Musa di turpuk on.
Ido umbahen di ayat 20 didok Jahowa “Ndang tarbahen ho anggo tung marnida apala Bohingkon, ai dang tarbahen
manang ise jolma hian marnida Ahu, laos mangolu ibana”. Jadi dang adong na boi marnida bohi ni Debata. nang pe
rupani di 2 Musa 33:11 didok “dung I mangkatai ma Jahowa dohot Musa adop bohi be, songon sada baoa na
manghatai dohot alealena”, ndada na bohi ni Jahowa dipatuduhon tu si Musa alai harosuon ni panghataion nasida i
do. Molo di ayat 9 didok ombun na marsijongjong do tuat di bagasan pintu ni undungundung parjumpanganna dohot
si Musa. Jadi dang adong na boi marnida Bohi ni Debata hatiha i, molo diida, sai na mate do na marnidasa.
4. Debata mamolushon hatuaonNa, marasi roha jala martalup ni roha (ayat 19)
Ndada bohiNa patuduhonon ni Debata tu si Musa alai didok di ayat 19 “ahu pabolushon saluhut hatuaonHu sian jolo
ni bohim, jala Ahu manjouhon goar ni Jahowa di adopanmu”. Molo didok “hatuaon” ima sian hata heber “tub”
lapatanna “kebaikan”. Di pambahenan ni Debata do Debata patuduhon diriNa. Ndada pola ingkon bohiNa idaon ni si
Musa alai boi idaon Ibana sian pambahenanNa.
Diuduti mandok “martalup ni roha tu angka natinalupan ni rohanku”. Martalup ni roha sian hata “khanan” lapatanna
“membungkuk, mengasihani, menurunkan perhatian dan kasih”.
Na parpudi di ayat on ima marasiroha tu naung niasian ni rohangku. Hata marasiniroha na dipangke dison ima
racham lapatanna “berbelas kasih, perasaan kasih”.
5. Jongjong mardonokhon Debata (ayat 21-23)
Asi ni roha ni Debata mangihut do tu haunduhon tu nadihatahon di Debata. diparbaga Debata do adong sada
hajongjongan mardonokhon Debata ingkon disi ma si Musa jongjong. Jadi mamols ma sian i, alai ianggo si Musa
dibahen Debata do tu bagasan sada rigat ni dolok batu laos dihunguphon tangganNa paima salpu Debata mamolus,
dung ditait Debata tanganNa idaon ni si Musa ma Debata sian pudi, ndada sian jolo manang bohi ni Debata.
Aha do lapatan ni ayat 21-23 on? Manontong do pangaramotion ni Debata di si Musa nang bangso i, jala dipangido
Debata haunduhon asa jongjong si Musa mardonokhon Debata. Ai sai rade do pangaramotion ni Debata jala sai rap
do Debata dohot nasida. Tung pe ndang boi bohi ni Debata diida nasida asa unang mate si Musa nang bangso i. Ai
hangoluan do dilehon Debata tu bangsoNa.

HOMBAR TU JAMITA
1. Masuk ma hita tu minggu invocavit lapatanna “jouonna ma Ahu jadi alusanku ma Ibana (Mazmur 91:15a)
jadi songon goarna invo: panggilan, cavit: ketentuan atau penyataan diarahaon ma hita di minggu invocavit
on manjouhon Debata, marhamubaon, jala marningot hinadenggan ni pambahenan ni Debata dibagasan Asi
ni rohaNa. Laos marsigantung ma hita songon si Musa tu debata na tuk mangaramoti ngolunta.
2. Songon topik Minggu “Debata haroroan ni Pasupasu” taingot ma pasupasu na didok dison ima asi ni rohaNa
ndada holan angka sipanganon, parabiton, manang na ringkot siganup ari, alai naeng taingot muse asi ni
rohaNa na paluahon hita tung pe mardosa hita. Songon bangso Israel na pinaluana sian parhatobanon ala ni
asi ni rohaNa, songoni do nang hita dibagasan Kristus Jesus malua sian hadosaon.
3. Tarida do hamuliaon ni Jahowa sian pambahenanNa. Ai tung sura masihol hita marnida bohi ni Debata taida
do I dibagasan Kristus, jala taida do I di bagasan pambahenanNa siganup ari dibagasan ngolunta. Jadi sai
ringgas ma hita mamilangmilangi pangaramotion ni Debata di ngolunta. Unang songon bangso na tangkang I,
na pintor manimbil ala so rap dohot si Musa nasida. Hape ganup tingki do diida jala diramoti Deata
bangsoNa.
4. Molo mangalangka hita dibagasan parsuruon ni Debata taingot ma pasahathon diri tu Debata songon pos ni
rohanta na so tupa hita mardalan molo so raphon Debata. ai dibagasan Debata do saut nasa
napinarbagabagaNa di ngolunta.

Songoni ma bahan sermon Evangelium. Saonari taida ma Epistel Roma 5:12-17 on. Sadalan do Evangelium dohot
Epistel manaringoti asi ni roha ni Debata dibagasan Kristus. Ai marhite si Adam masuk do dosa tu portibi on jala laos
marhite dosa i ro hamatean. Alai marhite Jesus Kristus do asi ni roha ni Debata dipasaut tu portibi on ima haluaon
sian dosa i. dibahen i diondolhon ma di ayat 17 “ai molo hamatean manggonggomi, binahen ni na sada ala ni
pangalaosionna i, nda lam manggonggomi huhut mangolu marhite Jesus na sada i ma antong nasida, angka naung
manjalo asi ni roha na tarlobi angkup ni basabasa ima hatogoran i? di hata Indonesia ummapit tu hata gorik ima
“sebab jika oleh dosa satu orang, maut telah berkuasa oleh satu orang itu, maka lebih benar lagi mereka, yang telah
menerima kelimpahan kasih karunia dan anugerah kebenaran, akan hidup dan berkuasa oleh satu orang yaitu Yesus
Kristus”.
Jadi, ndang adong na boi manirang hita sian Debata, ai Debata sandiri mamintori hita ala ni asi ni rohaNa. Jadi naeng
ma nian asi ni roha I na marhuaso manang manggonggomi di ngolunta unang be dosa. Ai sipata di ngolu i jolma sai
talpe dope na sai mangulahon dosa, sai hira na so boi salpu sada ari ia so patupa dosa. Hape nian jolma naung malua
do ibana. Tarlumobi ma dipartingkian na parpudi on, sai manginona do dosa i jala dang maila be mangulahon dosa
tung pe parhuria ibana, ai molo najolo olo do ditabunihon dosana, saonari laos dipataridahon nama. Nian dang
adong na denggan disi, nadenggan ima unang mangula dosa, ai Jesus do manggonggomi di ngolunta. Ai angka naung
malua do hita jala ndang be hatoban ni dosa. Ala arga do hita ditobus taargahon ma nang dirita marhite na unduk tu
panggonggomion ni Jesus Kristus di ngolunta.