BAHAN SERMON MINGGU ESTOMIHI 27 PEBRUARI 2022

EV: JESAYA 55:10-13

‘’NDANG MULAK BOTI HATA NI DEBATA’’

I. PATUJOLO

Turpuk on masuk tu Horong Deutero-Jesaya di na tongon nasida tarbuang dope, laho patoguhon
roha ni bangso i. Ditongatonga ni ngolu na pesimis ro Panurirang Jesaya mamboan barita: ‘na ro ma
Tuhan i laho paluahon nasida, mamboan mulak tu huta Jerusalem laho mamungka ngolu na imbaru.
Alani i ditogihon ma bangso i asa mangalului Jahowa, jala marhapourusan holan tu Jahowa, ai holan
Debata sambing do hagogoon dohot partanobatoan na tuk paluahon nasida. Unang mangasahon
gogo dohot pingkiran sambing. Sangkap ni Debata i ingkon saut do laho paluahon nasida, molo
unduk nasida di bagasan haporseaon dohot pos ni roha tu Debata, ai holan Debata sambing do
partanobatoan, laos i ma joujou ni Minggu Estomihi.

II. HATORANGAN:
a. Turpuk on marhite Panurirang Jesaya pabotohon: aha naung gabe sangkap ni Debata,
haputusanNa naung haruar sian Ibana marhite Hata-Na ingkon manjadi do. Na di gombarhon
songon hadadabu ni udan dohot ambolas sian langit, na mangalehon hangoluan tu saluhut
na tinompa. Songon i ma hata ni Debata mangalehon hangoluan tu jolma: tangihon hamu
ma asa mangolu tondimuna i! (ayat 3). Alani i asa dapotan hangoluan hita ingkon lehononta
do rohanta laho manjangkon hataNa. Tujuan ni Hata ni Debata dison laho paboahon songon
dia panghorhon ni hata ni Debata na luar biasa di angka jolma na olo manjalo Hata ni
Debata. Jala molo taulahon Hata-Na i saut jala tulus do angka na tasangkapi.
I ma na ditegashon Panurirang Jesaya paboa aha pe na disangkapi Debata, aha pe na
nihatahonNa manjado do, jala marhasil ndang adong na siasia. Hata ni Debata

b. Las ni roha ala ni HataNa na boi paimbaruhon gabe lam tu dengganna lam tu ulina na
digombarhon marhite gombaran: Singkat ni tadatada tubu ma sampinur, singkat ni latong
( bulungna manghorhon gatalgatal molo dijama) tubu ma bunga na hushus. sude na i songon
partanda patuduhon sangkapNa laho paluahon. Sian i boi idaonta ndang adong na mustahil
anggo di Debata, semuanya sangat mungkin Dia lakukan. Na boi do hita memahami bahwa
sangkap ni Debata, maol do antusan ni jolma, alai diujungna idaonta ma nang pe sipata
suhar dirohanta pambahenan ni Debata alai marujung tu olopolop dohot las ni roha do.
Songon pengalaman ni bangso i, diujungna boi marnida jala manghatindanghon na dengaan
do anggo sangkap ni Debata, jala holan na porsea do na boi marnida i. anggo na so porsea
ndang mampu marnida pambahenan ni Debata di ujungna, ala ndang porsea tu huasoNa jadi
sai jotjot mangasahon gogo dohot pingkiranNa sambing.

III. PANIMPULI
Hata ni Debata, marhuaso paimbaruhon, na manghorhon perubahan na balga di angka na
tinobusNa, haburukon boi digantihon dohot haulion, hapaeton (tadatada dohot latong B.
Indonesia: Semak duri dan kecubung) boi digantihon dohot na tonggi (na digombarhon
dohot sampinur dohot bunga na hushus). I ma na masa di ngolu ni angka na porsea tu Hata
ni Debata, na satia paimahon hasasaut ni bagabaga ni Debata, na so mandele paimahon alus
sian Debata. Na porsea di Hatana na mandok: ganup hataNa na haruar sian Ibana ndang
mulak boti, alai mangula , manjadi tu na tinongosNa.
Antong manguduti ngolunta, disituasi na taadopi, angka dia pe na mambahen hita
raguragu di Hata-Na, dipatogu ma rohanta, jala satia hita paimahon hasasaut ni HataNa i.
taambolonghon ma roha na ragu-ragu sian hita, asa gabe benget hita paimahon
bagabagaNa. Dung i idaonta hasasaut ni BagabagaNa i dingolunta. Amen