BAHAN SERMON MINGGU XVI DUNG TRINITATIS

MINGGU, 24 SEPTEMBER 2023

DIPASUANG JAHOWA HINADENGGAN NI NGOLU NI JOLMA I
(TUHAN MEMULIHKAN KEHIDUPAN UMATNYA)
1 MUSA 8: 15- 22

I. PATUJOLO
Turpuk jamita on ima manaringoti hamomoru ni aek na susmar (surutnya air bah). Barita aek
na sumar on dilatarbelakangi mai ala naung diida Jahowa lam deak hajahaton ni angka jolma,
jala sai na jat nama sude dipingkiran dohot roha ni nasida. Marnida i, lungun do roha ni
Jahowa jala laos dirippashon ma angka na jinadihonNa i. Alai asi do roha ni Jahowa marnida
si Noak ima jolma na bonar jala na daulat marroha. Dipatupa Ibana do bagabaga haluaon tu si
Noak marhite na mambahen parau na marbilut asa boi inganan ni anakna dohot jolmana
dohot angka na pinabotohon ni Debata tu ibana. Dung sidung paraui songon na pinabotohon
ni Jahowa, bongot ma nasida tu parau i, jala ro ma aek na sumar 40 ari 40 borngin. Marhite
haluaon na pinatupa ni Debata tu si Noak on dipasuang Jahowa do hinadenggan ni ngolu ni
jolma i. Tangkas mai tarida di turpuk on ima taringot tu haruruar ni Noak sian parau jala
marpadan do Debata tu ibana ndang be ulahanNa be manorui tano i ala ni jolma.
II. HATORANGAN NI TURPUK
Ayat 15-19: haruruar ni si Noak sian parau i. Haruruar ni si Noak sian parau ima tona ni
Debata sandiri tu ibana. Ala naeng patupaon ni Debata m a sangkap na imbaru tu jolma na
tinompaNa di hasasalpu ni aek na sumar i. Dibagasan panjouon ni Debata do nasida asa
haruar sian parau i jala dibagasan pangoloion do anggo si Noak. Lapatanna ndang bertindak
sendiri si Noak di namasa i, alai saluhutna mardalan songon na pinabotohon ni Debata sandiri
do. Boi ma berengonta hadirion ni si Noak na mangoloi di hata ni Deabata. Marhite i dapotan
asi ni roha ni Jahowa do ibana, dongan saripena, ianakhonna, dohot tolu parumaenna di
adopan ni Debata di hamamasa ni aek na sumar i . Ganup tingki dipanghulingi Debata do hita
marhite angka pasupasuNa naung tajalo i dohot pangaramotionNa. Marhite saluhut naung
tajalo i tarjou do hita gabe pasupasu tu dongan jolma. Mangulahon na denggan songon na
hinalomohon ni rohaNa jala pasidinghon angka na jat sian roha nang pingkiran. Unang
bertindak sendiri manang mangasahon pingkiran, alai tinggil ma manangihon hataNa manang
joujou ni Debata.
Ayat 20: dipaojak si Noak langgatan tu Jahowa. Dung haruar nasida sian parau i, lam
tangkas ma dihilala si Noak dohot dongan saripena asi ni roha ni Jahowa. Dibahen i mandok
mauliate do ibana tu Debata marhite na paulihon sada langgatan. Jala dibuat ma sian nasa
pelean situtungon pelehononna di langgatan i. Ragam na masa na diadopi ni si Noak uju di
bagas parau dope nasida, tarpaima do ibana andigan ma haruar sian parau i. Alai dibagasan
na paimahon i, marhite asi ni roha ni Debata tu ibana dipanghulingi Debata ma ibana.
Songoni ma nang hita, marragam do angka naung tabolus di ngolunta siganup ari.
Tapanghilalahon do las ni roha, nang dohot angka arsak ni roha, jut ni roha, pandelean, sahit,
dla. Na tarpaima do hita ruar sian angka situasi sisongoni jala sipata sai sungkunsungkun roha
andigan do tatapon ni Debata na masa di ngolunta. Alai nang pe songon i rumang ni ngolu na
tabolus, ingon do hita mandok mauliate tu Ibana. Ala dibagasan na paimahon i, sai
pataridahononNa do asi ni rohaNa dohot huasoNa. Ai Ibana do haroroan ni ngolu jala marhite
asi ni rohaNa i ma lam tangkas ma nian hita mandok maulite tu Ibana.
Ayat 21-22: Padan ni Debata tu si Noak. Ndang manontong rimas ni Debata ala holong ni
rohaNa na manontong mida angka na tinompaNa. Dibahen Debata ma padan tu si Noak
“ndang ulahanNa be manorui tano on ala ni jolma” jala saleleng adong tano on, ndang jadi
mansohot saburon dohot gotilon, nang songon dia pe ariari. Alani mangolu dope hita sahat tu
nuaeng dibagasan padanNa i umbahen na boi hita manabur jala manggotil sian tano na taula.
Ima tanda molo sahat tu tingki on dipatudu Debata do holongNa tu hita. Alani naeng ma hita
patuduhon holong ni rohanta na manontong tu Ibana jala tarida ma i sian parsitutuonta
manghaporseai Ibana saleleng hita mangolu.
III. PANIMPULI
Sian barita on idaonta ma mutiha na arga siboanonta tu jamita:
1. Manghamauliatehon pangaramotion ni Debata. Marragam do angka na masa naung
tabolus dohot angka naeng sibolusonta dope di portibi on. Alai ingkon do
parhatopotonta na tongtong do ta jalo pasupasu sian Debata. Mandok mauliate ma hita
di saluhut pandonganion ni Debata dohot pangaramotion ni Debata di ngolunta
siganupari marhite nasa na adong di ngolunta on.
2. Manangihon joujou ni Tuhan na sahat tu hita. Ganup na porsea di Tuhan i ingkon do
tinggil sipareonta umbege joujou ni Debata. Ganup ari do hita dipanghulingi Debata
asa unang tumangian hita di joujou ni portibion asa tu joujou ni Debata. Dijou Debata
do hita laho manganhon parbue ni pasupasu na pinasahatna di hita di ngolu siganup
ari.
3. Ingot ma padan ni Jahowa tu ho. Na mangolu do hita di bagasan padan asi ni roha ni
Debata. Jala tongtong ma tahatindanghon i ganup ari. Ndang hea lupa Tuhanta i laho
manghaholongi hita. Alani i naeng ma manongtong holong ni rohanta tu Debata jala
tarida parsitutuonta mangahaporseai Ibana saleleng mangolu hita. Sai taingot ma
padan ni Debata tu hita.
4. Kristus Jesus do haluaon dohot hangoluan di hita. Disuru Debata AnakNa Jesus
Krisrus tu portibi on asa malua hita sian haholomon tu hatiuron i. Ndang adong
haluaon na asing ia so holan marhite Jesus anak ni Debata. Marhite Ibana ma hita
dapotan hangoluon nasaleleng ni lelengna. Tapatuduhon ma parsitutuonta laho
manghaporseai Jesus haluaonta. Molo alani godang ni dosanta dohot pangalaosionta
di patik ni Debata nunga mago hita. Alai Debata parasiroha do Tuhanta i. Ibana do
umboto nataula jala mamintori hita. Tutu dang dihalomohon Debata hadosaonta alai
hamubaon ni roha do dipangido. Marhite Jesus dipatuduhon Debata ma
pamintorionna tu hita jolma pardosa on. Dipalua Debata do hita ndada alani pintorta
dohot habadiaonta alai holan ala asi ni roha ni Debata sambing do.