Liturgi 1

Prolog Liturgi 1 : Saluhut do ditompa debata langit, tano, dohot nasa isina. Saluhut
do ditompa Debata angka suansuanan, pahanpahanan, dungi jolma. Saluhutna i
manjadi do  marhite sian hapistaran dohot hagogoon ni Debata di bagasan huasoNa
na badia i.  Nuaeng tabege ma pangantusion na sintong taringot tu panompaon
ni Debata. Tabege ma liturgi naparjolo.

Liturgi I. no1 ( Gita Hutagalung)

Mansai uli saluhut na tinompa ni Debata, angka dolok dohot rura, angka suansuanan na
ratarata, saluhutna i patuduhon hinauli ni panompaon ni Debata, tung na so hadodoan do
parbinotoanNa. Boha do ulaning i? Songon dia do dibahen Debata manompa nasa na adong
i? Sian dia do bahan manang alat ni Debata laho manompa saluhutna i?
Liturgi I. no 2 ( Belliam Hutagalung)
Ia panompaon na pinatupa ni Debata songon on do i. Ndada marhitehite alat manang ulaula
Debata manompa, ai ndada songon pande Debata manompa nasa na adong, alai lobi sian i do.
Holan marhite hataNa sambing do. Molo didok Debata jadi ma ho na tiur:, jadi do. Songon i
do sude. Sandok molo didok Debata jadi, manjadi ma songon na nidokNa i.
Liturgi I. no 3 ( Esra Tampubolon)

I do tutu, tung halongangan do panompaon ni Debata, ai ndang sian na adong Debata

manompa, alai sian naso adong do gabe adong. Ndang adong naso tarpatupa Debata. Angka
dia ma na tinompaNai?
Di mula ni mulana ditompa Debata ma langit dohot tano. Ditompa ma muse na tiur. Digoar
Debata ma na tiur i arian, jala dibahen Debata ma parsirangan ni na tiur sian na holom, goar
ni na holom i borngin.
Liturgi I. no 4 ( Samuel Sitohang )

Di ari paduahon ditompa Debata ma hajanghajang di parsitongaan ni angka aek, bahen

parsirangan ni aek tu aek. Di ari patoluhon ditompa Debata ma tano manang darat asa tarida
na mahiang. Jala parpunguan ni angka ek, digoari laut. Jadi dipantubuhon tano i ma 
duhutduhut dohot suansuanan na marparbue tudos tu mansamna. 
Liturgi I. no 5 ( Sari Pardede)
Di ari paopathon, ditompa Debata ma panondang di hajanghajang ni langit asa disondangi
tano on. Di ari palimahon, ditompa Debata ma angka dengke dohot nasa na marhosa, angka
na manjirir di bagasan aek, ro di na sa pidong na martongatonga langit na masiboan
mansamna.
Liturgi I. no 6 ( Joi Sinaga)
Di ari paonomhon, ditompa Debata ma jolma tumiru rupaNa, tudos tu pangalahoNa, baoa
dohot boruboru nasida ditompa, asa dirajai sandok tano on. Dungi diida Debata ma sude na
tinompaNa i nunga denggan situtu.
Liturgi I. no 7 ( Nadiah Pardede)
Alai dung ditompa Debata nasa na adong, didok Bibel i, maradian do Ibana di ari papituhon.
Songon dia do lapatan nii? Ai naung maradian do Debata sahat tu nuaeng? Manang ndang
adong be ulaon ni Debata dung panompaon i?
Liturgi I. no 8 ( Jonathan Rajagukguk)
Ndang songon i lapatan nii. Bege hamu asa hupatorang. Dung sun ditompa Debata nasa na
adong, maradian do Ibana tutu sian nasa ulaon panompaon, alai ndang maradian Ibana sian
ulaonNa, torus do Debata mangulahon angka na denggan na ringkot di ngolunta, dipasupasu
do hita saluhutna. Tapuji jala tapasangap ma Debata naung manompa hita dohot na ringkot di
hita jala dipasingkop do marhite pasupasuNa di ngolunta. Antong taendehon ma pujipujian di
Debata, sian .

Liturgi 2

Prolog liturgi II : Diginjang ni roha i do marhabangsa sibolis I, laho mangelaela jolma i

asa  tangkang jala mangalaosi Patik ni Debata, panghorhonna gabe uhumon ni Debata
ma. Saonari tabege ma liturgi na paduahon.

Liturgi II. no 1 ( Miranda Saragih)

Mansai sonang jala denggan do inganan ni jolma na parjolo i dibahen Debata di porlak Eden
i. Ndang adong na hurang, singkop do sude diparade Debata di jolma na tinompaNa i.
Liturgi II. no 2 ( Dia Hutagalung)
Nuaeng tabege ma mula ni dosa dohot pangonai na tu jolma na parjolo i. Didok di Bibelta i ;
ulok do na paotootohon jolma i gabe dibuat jala dipangan si Hawa parbue ni hau i, laos
dilehon tu si Adam.
Liturgi II. no 3 ( Putri Hutabarat)
Ia pabue ni hau i, i ma parbue ni hau na diparsitongaan ni porlak i, na so boi jama on jala
panganon. Didok Debata do : unang pangan hamu sian i, jala unang jama hamu, asa unang
mate hamu. Alai tung mansai bisuk do sibolis mangelaela jolma i asa manundali Debata.
Disuanhon sibolis ma roha diri tu jolma i gabe pia matana marnida, laos dipangan, gabe
mardosa ma.
Liturgi II. no 4 ( Jeki Pandiangan)
Alai anggo nuaeng ndang adong be songon ulok dohot parbue ni hau songon na tarsurat i.
Alai, panginona ni dosa i do di hajolmaon sahat tu tingki on, na mambahen uhuman ni
Debata. Ia gombaran ni parbue ni hau na di parsitongaan ni porlak Eden i nuaeng, i ma :
hisaphisap maang hinagiot ni pardagingon na sai tongtong mangalaosi Patik, aturan dohot
Hata ni Debata.

Liturgi II. no 5 ( wankypley Hutabarat)

Alai tandap do parulaon ni daging, i ma : parmainanon, hahodaron, pargadombuson,
hasipelebeguon, hadatuon, parmusuon, parbadaan, pangiburuon, lessem, teal, rimas,
ungutungut dohot angka na so tama diadopan ni Debata.
Liturgi II. no 6 (Bobi Siburian)
Ia si Hawa gambaran nuaeng ima : angka parompuan manang ina na so jolo marpanungkun tu
si Adam, sinondukna i. Atik pe naung pinadomu ni Debata nasida jala nunga diaturhon baoa i
do ulu di rumatangga, songon Kristus, Ulu ni Huria i.
Liturgi II. no 7 ( Daddy Hutabarat)

Dibahen i ndang denggan molo so jolo masisungkunan laho mambuat haputusan di

rumatangga, ai i do bossir hasesega ni keluarga. Songon i do ngolu ni marhuria, ingkon
sungkunon jala niundukhon do angka aturan ni huria hombar tu lomo ni roha ni Debata.
Liturgi II. no 8 ( Hilbert Pardede)
Nang si Adam pe mardosa do, ai diloas ibana do si Hawa pulik gabe mura dihusipi angka
sibolis. Sai tongtong ma marsada ni roha ama dohot ina jala rap mangula asa ndada mura
dipalindaklindak angka parjahat na laho manegai parrumatanggaon. Rap renta ma ama dohot
ina dohot iananghonna tu gareja, asa unang diunjuni sibolis i. Amen.

Liturgi 3

Prolog liturgi III : Ragam cara dibahen sibolis i laho mangago jolma i, alai ndang
dipasombu Debata songon i masa sahat tu ujungna, ai Parasiroha godang do Ibana,
alani i diparbagabaga do laho paluahon jolma i sian dosa.

Liturgi III.no 1 ( Darma Manurung)

Anggo ninna rohanta nian pintor diuhum Debata ma jolma i saleleng ni lelengna ala nunga
mardosa; alai ndang songon i sangkap ni rohaNa, ai so tardodo holong dohot asi ni rohaNa i.
dilehon dope tingki parasian laho paubahon roha.
Liturgi III.no 2 ( Jantulus Simanungkalit)
Songon sintong na mangolu Ahu, ninna Jahowa; tung so lomo do rohangKu mida hamatean
ni parjahat, na lomo do rohangKu mida hamumulak ni parjahat i tumadinghon dalanna, asa
mangolu ibana.
Liturgi III.no 3 ( Lady Siburian)
Parasiroha jala Pardenggan basa do Jahowa,lambat tarrimas jala parasiroha godang. Ndang
dibahen tu hita hombar tu angka dosanta, jala ndang dibaloshon tu hita hombar tu angka
hajahatonta. Songon asi mi roha ni amaama mida angka anakna, asi ni roha ni Debata di
angka na manghabiari Ibana.

Liturgi III.no 4 ( Idris Pardede)

Ro ma hamu tu Ahu, asa mangolu tondimuna, ninna Jahowa. Tung sura rara dosamuna
songon abit bunga dapdap, bontar do bahenonKu songon itak, nang pe rara songon abit
hasumba gabe songon hapas do muse.
Liturgi III.no 5 ( Dina Sitohang)
Songon on do Hata ni Jahowa : nunga pola hupasisi angka pangalaosim songon ombun, jala
songon ombun manorop angka dosam. Sai mulak ma ho tu ahu, ai Ho do sipalua ahu.
Liturgi III.no 6 ( Jody Tampubolon)
Ai songon on do ni rohaNa mida portibi on, pola do AnakNa na sasada I dilehon, asa unang
mago ganup na porsea di Ibana asa hangoluan na hot ro di saleleng ni lelengna di Ibana.
Liturgi III.no 7 ( Talita Saragih)
Molo tongtong do hita mangolu di bagasan Hata ni Debata, pos ma rohanta, sai na donganan
ni Debata do hita laho mangalo hisaphisap ni daging dohot maninggalhon dosanta.
Liturgi III.no 8 ( Viktor Simanungkalit)
Antong rap ma hita manjanghon Sipalua i, taungkap ma rohanta asa bongot Raja i di rohanta.
Lam marsihohot ma hita umbege, mangguruhon dohot mangulahon hataNa jala dapotan upa
ma hita di haroroNa i. Amen

Liturgi 4

Prolog liturgi IV : Lam dipatuduhon Debata do tu jolma i, holong dohot asi

nirohaNa, diparbaga do haroro ni Sipalua laho paluahon jolma I sian ihotihot ni sibolis
i.

Liturgi IV. no 1 ( Ertika Sitompul)

Nunga mandate roha ni bangso paimahon haluaon sian Debata, ai tarbuang do bangso Israel
ala ni dosana, masihol bangso Israel mulak tu bona pasogitna tu huta Jerusalem, asa sumuang
muse marsaor nasida di Bagasjoro. Sai hira na ditadinghon Debata do panghilalaan nasida,
alanii maimaima do bangso i di haroro ni Mesias Sipalua i.
Liturgi IV. no 2 ( Rosni Hutabarat)
Ro do Hata mi Debata tu Panurirang Jesaya mandok ; apuli, apuli hamu ma bangsoKi, ninna
Debatamuna. Hata apulapul ma dok hamu tu roha ni isi ni Jerusalem, jala jouhon hamu ma tu
nasida Nunga marujung parungkilonna, ai nunga salose dosana i, ai nunga dijalo sian tangan
ni Jahowa silompit dua singkat ni saluhut dosana.
Liturgi IV. no 3 ( Romiana Hutabarat)
Ro do Hata ni Debata tu panurirang Jesaya mandok : tung sura rara dosamuna songon abit
bunga dapdap, bontar do bahenonku songon itak; nangpe rara songon abit hasumba, gabe
songon hapas do muse. Di ari na sasada i sogot, uli jala marmulia tunas ni Jahowa, gabe
huhut uli parbue ni tano i di angka na malua sian Israel.
Liturgi IV.no 4 ( Nanda Hutabarat)
Ai ndada pingkiranKu, pingkiranmuna i, jala ndada dalanmuna angka dalanKu, ninna
Jahowa. Tagan diparpiar ni muruk-Ku Hutabunihon do bohingKu satongkin maradophon ho,
alai marhitehite denggan basa saleleng ni lelengna asianKu ho, ninna Jahowa sipalua ho.
Liturgi IV. no 5 ( Emelia Pardede)
Alai anggo ho huta Betlehem Eprata, mametmethu do ho nian anggo tung pola jujuron tu
angka huta marriburibu di Juda, hape sian ho do haroroan ni na gabe panggomgomi ni Israel,
jala angka haroroanna sian na hinan, sian angka ari na robi salelenglelengna.
Liturgi IV. no 6 ( Rani Hutabarat)
Ida ma, gabegabean ma sada na marbaju jala tumubuhon sada anak, jala bahenonna goarna :
Immanuel. Hehe ma ho, marsinondang ma ho, ai na ro ma panondangmu, jala hamuliaon ni
Jahowa binsar di atasmu. Alani pauli hamu dalan ni Jahowa, patigor hamu di adaran dalan
balobung ni Debata. Ingkon gohan do nasa rura, jala parejeton nasa dolokdolok dohot
buntulbuntul, jala gabe na hornop do na marnangkok tuat, jala gabe rura tanggurung ni dolok.
Liturgi IV. no 7 ( Lena Simanungkalit)
Ai nunga tubu di hita sada posoposo, dilehon tu hita sada Anak, pamper tu abaraNado sogot
harajaon, jala bahenonna goarNa : Sipartahi halongangan, siulubalang ni Debata, Ama
saleleng ni lelengna, Raja Hadameon.
Liturgi IV. no 8 ( Dian Saragih)
Alai jongjong anggo Ibana, jala marmahan mangasahon gogo ni Jahowa, marhitehite
hamuliaon ni goar ni Jahowa Debatana; jadi maringan ma nasida, ai timbul ma ibana disi ro
di angka ujung ni tano on. Amen.

Liturgi 5

Prolog liturgi V : Nunga jumpang tingkina hombar tu bagabaga ni Debata taringot

Sipalua, natinubuhon ni si Maria, na gabegabean sian Tondi Porbadia di huta
Betlehem.
Liturgi V.no 1 ( Yoan Situmorang)
Dungi ro ma uju i parenta sian Kesar Agustus, ingkon suraton nasa jolma di gomgomanna.
Pamilangan parjolo ma i, uju digomgomi si Kirenius tano Siria.

Liturgi V.no 2 (Irfan )

Jadi borhat ma sasude, asa disurati, ganup tu bona ni pinasana. Borhat ma nang si Josep dohot
si Maria, na sian Galilea, sian Nazareth, nangkok tu luat Judea tu huta ni si Daud na margoar
Betlehem, ala sian pomparan jala marga ni si Daud ibana.
Pasurathon dirina rap dohot si Maria, oroanna i naung gabegabean. Jadi din a disini nasida,
gok ma ari ni hangoluanna.
Liturgi V.no 3 ( Dhea Manurung)
Ditubuhon ma anak buhabajuna, diborhos ma, dipeakhon ma tu bagasan panggagatan, ala so
adong inganan na asing di parmianannasida. Jadi adong ma marborngin di lading na disini
angka parmahan, mangingani pinahan nasida. Jadi didapothon sada Surusuruan ma nasida,
jala marsinondang ma sangap ni Tuhan i humaliang nasida, gabe mabiar situtu ma.
Liturgi V.no 4 ( Immanuel Siburian)
Alai didok Surusuruan i ma tu nasida ; unang mabiar hamu, ai barita halalas ni roha godang
do huboan tu hamuna, parsaulian ni sandok bangso i. ai naung tubu do di hamu saborngin on,
di huta ni si Daud, Sipalua i, i ma Kristus Tuhan i. on ma partinandaan di hamu: posoposo do
dapotonmuna, na binorhos peak di panggagatan.
Liturgi V.no 5 ( Krisna Sitohang)
Hansitna i tutu na tinaon ni si Josep i, tarlumobi ma si Maria naung gabegabean, alai ingkon
oloan nasida ma parenta ni Kesar, jala mardalan mansai dao jala maol situtu sidalanan i.
Boasa ingkon songon i?
Liturgi V.no 6 ( Badiaman Hutagalung)
Ai toho do i hansit, alai unang alo tu haporseaonta, molo ingkon songon i sitaonon ni si Josep
dohot si Maria. Ai laos disi do sangkap hatuaon ni Debata. Dipardalanan na tu Betlehem i do
masa hasasaut ni bagabagaNa marhite hatutubu ni Jesus, Tuhan Sipalua hita.
Liturgi V.no 7 ( Sonia Hutabarat )
Sasintongna mansai maol do siat tu pingkiran jala ndang tarjalo roha. Hape laos songon i do
dibahen Debata dalanNa jala hurang tarjalo roha do, boasa diinganan na lea hatutubu ni
Sipalua i, di bara ni pinahan.
Liturgi V.no 8 ( Harrisa Hutabarat)
 songon timbo ni angka langit sian tano on, songon ido tumimbo angka dalanKu sian
dalanmuna i, jala angka pingkiranKu sian pingkiranmuna i, ninna Jahowa. Alani unang
manigor maralo tu rohanta, molo pe songon i dalan dibahen Debata. Nang di pardalanan
ngolunta on pe, molo masa pangunjunan dohot parungkilon, unang pintor mandele, atik dalan
ni Debata doi laho mambahen hasonangan di hita. Tapuji ma goarNa na marmulia i. Amen

Liturgi 6

Prolog liturgi VI :  Nunga ro rajanta Sipalua I, ndada holan hita dipalua, alai dohot do
nang portibi on. Sude ma na san a manggulmit, nasa ulu ni tot marsombat  Ibana, Raja
Hadameon i.

Liturgi VI. no 1 ( Riwandi Aritonang)

Puji ma Jahowa ale todingku, jala nasa rohangku dibagasan mamuji goarNa na badia i. Ibana
manesa dosam sudena. Ibana pamalum angka sahitmu sudena, Ibana paluahon ngolum sian
hamagoan, Ibana martumpalhon denggan basa dohot asi ni roha.
Liturgi VI. no 2 ( vivi Hutabarat)

Puji ma Jahowa ale tondingku, dipamahap do rohangku marhitehite denggan basa, Ibana do
patupahon angka hatigoran, Ibana do pabotohonb angka dalanNa.
Liturgi VI. no 3 ( Wira Aritonang)
Puji ma Jahowa, hamu angka parrangan parbanuaginjang, na mangoloi angka parentaNa, na
sai tongtong tangi tu angka hataNa. Hamu angka naposoNa na mangulahon lomo ni rohaNa.
Liturgi VI. no 4 ( Widya Hutabarat)
Puji ma Jahowa, hamu ale angka na tinompaNa, di sude inganan ma hinarajaanNa. Puji ma
Jahowa, ale tondingku. Jahowa do nampuna sude portibi on dohot nasa isina.
Liturgi VI. no 5 ( Lastiar Pardede)
Ibana do nampuna portibi on dohot nasa na mangolu di bagasanna. Ai Ibana do paojakhon i
di bagasanni aek na bagas di toru ni tano on, jala pahothon i di atas ni laut angka na bagas i.
Liturgi VI. no 6 ( Friska Aritonang)
Puji ma tuhan i, Debata ni Israel, ala ditopot bangsoNa jala dipatupa haluaonna. Dipatindang
do di hita tanduk hluaon, di bagas ni si Daud naposoNa i. Hombar tu na hinatahonNa marhite
soara ni angka panurirangNa na badia i sian na robi.
Liturgi VI. no 7 ( Deliana Sitohang)
Ari on do najinadihon ni Jahowa, marolopolop jala marlas ni roha ma hita disi. Iale Jahowa
sai manumpak ma Ho! Iale Jahowa sai Ho ma mambahen manjadi! Pinasupasu ma na ro
marhitehite goar ni Tuhan i.

Liturgi VI. no 8 ( Leo Pandiangan)

Beta ma hita saluhutna mamuji Goar ni Jahowa na marmulia I, ai Parasiroha bolon jala
Pardenggan basa, hamoraon dohot hasangapon dohot hagabeon na salelenglelengna dilehon
tu hita. Amen

Liturgi 8

Prolog liturgi VII :  Nuaeng begeonta ma hatorangan na dumasip taringot tu Jesus

Sipalua i.  Ibana do Sipalua naung ro tu Portibi on, manaluhon dosa dohot hamatean
asa malua jala mamora saluhut angka na porsea di Ibana.
   
Liturgi VII. no 1 (Roy Hutabarat )
Dung i toropan do nasida na gabe porsea ala ni Hata ni Jesus. Gabe didok nasida ma tu
boruboru i; ndang be ala ni pandokmi, umbahen na porsea hami; ai nunga hubege jala
hutanda hami sandiri, Ibana do tutu Sipalua portibi on.
Liturgi VII. no 2 (Viktor)
Dung i ninna si Petrus  dohot angka apostel i ma mangalusi : Ingkon oloan do iba di Debata
asa di jolma. Dipahehe Debata ni angka amanta do Jesus, napinusamuna, uju digantung hamu
Ibana tu hau. Tu siamunNa do dipabankit Debata Ibana gabe Partogi jala Sipalua, laho
mangalehon tu halak Israel hamubaon ni roha dohot hasesaan ni dosa.
Liturgi VII. no 3 ( Dicky Sitohang)
Mandok mauliate ma hamu di Ama i, naung patauhon hamu, manjalo tohap na di baqgasan
hatiuron i, siteanon ni angka na badia i. Ai nunga diroro hita sian gomgoman haholoman i,
jala dipaunsat hita tu bagasan harajaon ni Anak, haholongan ni rohaNa.
Liturgi VII. no 4 ( Pardo Hutabarat)
Di bagasan Ibana do adong di hita haluaon i, i ma hasesaan ni angka dosanta. Ibana do suman
ni Debata na so tarida i ; na parjolo tubu sian nasa na tinompa dohot andorang so haojak ni
tano on.
Liturgi VII. no 5 ( Wilson Hutagalung)
marhite sian ibana do ditompa saluhutna, na di banuaginjang dohot na di banua tonga on, na
tarida dohot na so tarida i, angka habangsa, angka harajaon, angka gomgoman, angka
parhuasoon, saluhutna i do ditompa marhitehite Ibana, jala marhapatean tu Ibana.
Liturgi VII. no 6 ( Samuel Pardede)
Jala di jolo ni saluhutna do Ibana, jala saluhutna Ii do hot di bagasan Ibana. Ibana do ulu ni
pamatang i, i ma huria i. Ibana do parmulaan, naung parjolo tubu sian angka na mate, asa
Ibana parjolo din a saluhutna. Ai ditontuhon Debata do naeng maringanan di bagasan Ibana
sandok hagogokna i.

Liturgi VII. no 7 (Johan)

Nang sian Jesus Kristus, sitindangi haposan i, na parjolo tubu sian angka na mate sigomgom
angka raja ni tano on! Ibana do manghaholongi hita jala dipalua hita sian angka dosanta
marhitehite mudarNa na badia i.
Liturgi VII. no 8 ( Mel Pardede)
Dijadihon do hita gabe harajaon hamalimon ni Debata, AmaNa i. Di Ibana ma hasangapon
dohot hagogoon ro di salelenglelengna. Ida ma, na ro ma Ibana di bagasan ombun! Idaon ni
nasa mata do Ibana, nang angka naung manullang  Ibana, gabe mangangguhi be ma saluhut
bangso ni tano on mida Ibana. I ma tutu. Amen.