BAHAN LITURGI NHKBP PARBUBU

THEMA:

SUB THEMA:

01. LITURGI I : PANOMPAON NI DEBATA DI PORTIBI ON

1. Sungkun mula ni hata, sise mula ni uhum, manungkun ma ahu tu hamu situan na torop, dia do
laklakna, dia do unokna, dia do hatana dia do nidokna parpunguonta dibagasan bodari on.
(Liturgi 1, Adi Tobing)

2. Marmula do ninna songon gondang, marbona songon udan, Debata do mula ni nasa na adong,
ibana do najumadihon saluhutna, ido nanaeng paboaon nami di tongatonga ni punguanta. (Liturgi
1, Delima Tobing)

3. Mauliate ma diboaboamuna, angka amang,inang , ala naung tangkas hita masirarian, diharoronta
dibagasan botari on. Alai asa haru tumangkas, denggan ma boaboahon hamu, songon dia do
alus ni nanidokmuna, Debata mula ni nasa na adong. (Liturgi 1, Meli Simanjuntak)

4. Ima da tutu, nuaeng pe tatangihon ma songon dia do tutu sintong ni barita na huboan hami
taringot tu panompaon i, tangkas ma paboaon nami: Di mula ni mulana ditompa Debata langit
dohot tano on. Dung i tarulang ma tano i gabe halongonan jala holom di atas lung i, dung i
mangareapreap ma Tondi ni Debata di atas ni angka aek. (Liturgi 1, Debora)

5. Dung i mangkuling ma Debata ninna: Jadi ma ho na tiur! Jadi tiur ma tutu.Nunga denggan na tiur
i diida Debata, jadi dibahen Debata ma parsirangan ni na tiur sian na holom. Dung i digoar
Debata ma na tiur i arian, goar ni na holom i borngin. Dung i bot ma ari, torang ma ari muse, i ma
ari parjolo. (Liturgi 1, Ame Ginting)

6. Asa tung tangkas ma taantusi jala tahaporseai, ia Debata di goar do Alpa dohot Omega.
Lapatanna bonana dohot ujungna, Debata nantuari, sadari on sahat ro di salerleng ni lelengna.Di
mulana i nunga adong hata i, jala saor tu Debata do hata I, ima na saor tu Debata di mulana i.
Saluhutna i marhite sian Hata i do umbahen na manjadi, jala ndang adong nanggo sada sian
naung jadi I, na so marhite sian I. (Liturgi 1, Ester Sinaga)

7. Ai marhite sian Ibana do ditompa saluhutna, na di banua ginjang dohot na di tano on, na tarida
dohot na so tarida i, angka habangsa, angka harajaon, angka gomgoman, angka parhuasoon;
saluhutna i do ditompa marhitehite Ibana, jala marhapatean tu Ibana. Dung i mangkuling muse
ma Debata: Tole ma, itatompa ma jolma, tumiru rupanta, tudos tu pangalahonta, asa dirajai
dengke angka na di laut, dohot pidong angka na martongatonga langit, dohot angka dorbia, ro di
sandok tano on nang sude gulokgulok, angka na manjirir di atas tano on. (Liturgi 1, Soni Siahaan)

8. I do tutu, angka na asing ditompa sian naso adong hian do, alai anggo Jolma I, sian tano do
dibuat Debata, dungi diombushon ma hosa hangoluan, gabe mangolu ma. I do laklakna, I do
unokna, I do Hatana ,I do nidokna, diharoronta dibagasan bodari on. (Liturgi 1, Yohana
Hutagalung)
02. LITURGI II : HADADABU NI JOLMA TUBAGASAN DOSA

1. Mulakulak songon na mangusa botohon do nuaeng sungkunsungkun nami: purpar pande dorpi
asa lam tu dimposna: Songon i uli hape jolmai, ditompa Debata, jala jolma i do tompaan
natumimbo sian najinadihon ni Debata, alai boasa loja hita sahat tu tingki on laho mangula angka
ulaonta. (Liturgi 2, Bontor Siahaan,)

2. Ndada simanukmanuk, sibontar andora, ndada sitodo turpuk siahut lomo ni roha: Nunga dituntun
jolma i rohana laho mangalaosi patik ni Debata, i do umbahen na loja jolma i jala hir hodokna
laho mangalului sipanganonna sian tano pambuatanna hian. (Liturgi 2, Rosa Tobing)

3. Mansai malo do sibolis i, mangela jolma na parjolo i, alai ulok do naumbisuk sian nasa na
manggulmit di ladang angka najinadihon ni Debata. Patut do hape didok ate angka dongan;
Risirisi hata ni jolma, lamot lamot hata ni begu. Mansai lambok begeon hata ni sibolis i mandok:
Ndang na tutu hamu mate. Soara na talhis, tu soara na marbobong, hata mansai manis hape
ujungnga maboan hamagoan. (Liturgi 2, Ezra Siahaan)

4. Alai, boha do dirohamuna ale angka dongan, holan ala dosa ni si Adam dohot si Hawa do
mambahen mangae hasusaan dohot uhum ni Debata hita ? au mandok, dang…! Dohot do hita
sandiri manambai ragam ni dosa I nuaeng marhitehite angka pangalahonta be. (Liturgi 2, Jones)

5. Ima da: tua na so taraithon, soro ni ari na so tarhoishon. Ramba ni sipoholon marduhutduhut
sitata, nuaeng sude jolma marsitaonon, ala mangalaosi di patik ni Debatanta. Morongorong do
hita ala dang tingkos be cuaca, ari lam mohop, dung i tompu udan so panagaman. Hape hita do
mambaen i marhite angka polusi udara, jala tatabai angka hau na di dolok alai dang taingot
manuan na imbaru muse. Songon I do nang haumanta, binong aek dang boi ulaon ala dang tiur-
tiur tabaen dalan dohot habuangan ni aek i. (Liturgi 2, Iman Siahaan)

6. Mago ma tutu hinauli ni jadijadian ni Debata i gok dosa do jolma i. Dao sian holong, alai holan
hosom, late, pangiburuon, parbadaan, i do dipaulaula. Di tongatonga ni na markeluarga pe jorbut
do dosai. Ianakkon tu natuatua na marbadai, na marhahamaranggi, mariboto tong marbadai,
dang boi pajumpang. Didia nama damei? (Liturgi 2, Johannes)

7. So holan i dongan, bangso pe marporang maralohon bangso na asing, bahkan di negaranta

sandiri masibunuaon do sama-sama hita, masibaen bom dohot terorna, songon na masa di Solo
dohot luat na asing. Na jumorbut dope angka dongan, di huria pe tong tubu parsalisian. Nda
sasintongan huria do mamboan dame? Hape, sama-sama ruasna pe olo marsoal. Aha ma
sidohononta? (Liturgi 2, Hansen Tobing)

8. Alai di hamu angka dongan, binolus Purbatua laho tu parsingkaman, halakna burju mar-Tuhan
ingkon dapotan pandaraman, laho pe ibana mangula sai na dao ma parmaraan, sai dapotna do
naniluluan jumpangna na jinalahan. (Liturgi 2, Purnama)

9. Ido gabe pos ni roha di hita angka dongan, nang pe naung dipatikhon Debata ingkon hir hodokta
mangalului sipanganonta ala ni dosa i, alai didok hata ni natuatua: Bona ni aek puli di dolok ni
sitapongan, sai roma pasupasu angka naummuli marhite angka ulaonta jala saut ro ma nang
panamotan. (Liturgi 2, Josua Hutagalung)

10. Mangula hita Jolma manabur boni i, alai anggo jadina di Debata do i,nasa uli basa ro sian
Debata, ipe Ibana puji huhut haposi ma. Antong taharinggashon ma mangula angka ulaonta jala
unang lupa hita martangiang asa suksuk pasupasuNa tu hita. (Liturgi 2, Ezra Tobing)
03. LITURGI III : BAGA-BAGA HALUAON SIAN DOSA
1. Ranting ni bulu duri jait masijaotan; Siankup ni Hata na uli, dia ma nuaeng sitaringotran?. Bona ni
aek Puli tu dolok ni Sitapongan, molo tung adong do boaboa na uli, tangkas ma hita
masipandohan! (Liturgi 3, Yanti)

2. Toho do nanidok muna i, sai marangkup do na uli, sai mardongan do na denggan, siangkup
songon na hundul sidonganna songon na mardalan, ia boa boa nami ima las ni roha nabinahen ni
Tuhanta di angka na olo paubahon rohana do: Ai didok: Ndang dihalomohon Debata hape
hamatean ni angka pardosa, alai mulak ma nian angka parjahat i tumadingkon dalanna asa
mangolu ibana. (Liturgi 3, Nando Simanjuntak)

3. Tinapu bulung siarum, bahen uram ni porapora, na hansit gabe malum, ala naung marbagabaga
Debata Jahowa. Ai tardok tarpatudos hita holong ni roha ni Tuhanta I, songon holong ni roha ni
natoras tu ianangkonna. Nang pe sai manuntun mangula na jahat ianangkon i, sai tong doi dianju
jala ditangiangkon asa muba rohana. (Liturgi 3, Grasella)

4. Dung songon i hansit ni partinaonan ni jolma na madabu tu dosa i dibereng Debata, gabe
tarsunggul ma rohaNa pasahathon angka bagabagaNa tu jolma i marhite PanurirangNa. Jala
pasupasuonku angka na mamasumasu ho, jala toruanku angka na mamburai ho, jala dapotan
pasupasu marhitehite ho saluhut angka bangso ni tano on. (Liturgi 3, Lestari Tobing)

5. Sai na idaonku do Ibana, alai ndang dope anggo nuaeng; sai na tataponku do Ibana, alai ndang
dope anggo tung jonok: Binsar do sogot sada bintang sian Jakkob jala hehe do sada tungkot
harajaon sian Israel; papatuonna ma angka luat ni Moab jala patunduhonna sandok pinompar ni
si Set.Ai nunga dipillit Jahowa, Debatam ibana sian saluhut angka margam, asa ibana jongjong
marulaon marhite sian Goar ni Jahowa, ibana dohot angka anakna saleleng mangolu. (Liturgi 3,
Rapika)

6. Apuli, apuli hamu bangsongki, ninna Debatamuna. * Hata apulapul ma dok hamu tu roha ni isi ni
Jerusalem, jala jouhon hamu ma tu nasida: Nunga marujung parungkilonna, ai nunga salese
dosana i, ai nunga dijalo sian tangan ni Jahowa * silompit dua singkat ni saluhut dosana.Songgop
do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu
halak na dangol, marsuru ahu pauliuli halak parroha na bojok, maningtingkon haluaon tu halak na
tarhurung dohot tu halak na tarrante buha ni hurungan. (Liturgi 3, Andre Tobing)

04. LITURGI IV : HARORO NI SIPALUA HASASAUT NI HARORO NAPINARBAGA-BAGA I

1. Pitu lili nami, paualu jugian nami, na uli ma tutu nipi nami, ai naeng jumpang ma tutu najinalahan
nami.Marbunga ma lasuna, dompak mata ni ari; atik na muba dope na pinarbaga, sinungkun ma
jolo sahali nari: Lasiak na rara, binahen tu panutuan , songon dia do baritana songon dia do
partubuNa. Ia hubege hami naeng tubu ninna raja Sipalua, songon dia do barita hatutubuNa i
tung tangkas ma hamu marboaboa: (Liturgi 4, Rukaya)

2. Ianggo hatutubu ni Jesus Kristus songon on do: Uju oroan ni si Josep i dope si Maria i,
gabegabean do ibana sian Tondi Parbadia, andorang so masipadonohan dope nasida. Ala
parroha na bonar si Josep, na mangoro si Maria, ndang adong rohana paurakkon nasida, gabe
ditahi rohana nama, naeng sirangkononna songon i. (Liturgi 4, Roy Simanjuntak)
 3. Alai di na songon i dope tahi ni rohana, diida ma di nipina surusuruan ni Tuhan i, na mandok tu
ibana: O Josep, anak ni si Daud, unang alang roham mangalap si Maria, gabe donganmu saripe
muse, ai na sian Tondi Parbadia do na naeng tubu di ibana.Tumubuhon Anak ma ibana; Jesus
do Goarna, bahenonmu, ai paluaonna do bangsona sian angka dosanasida be. Masa pe sudena
i, asa jumpang na hinatahon ni Tuhan i marhite sian panurirangna na mandok: Ida hamu ma,
gabegabean do na marbaju i, tubuan Anak ma ibana; jala bahenon do Goarna Immanuel,
lapatanna: Donganta ma Debata!" (Liturgi 4, Inka Siahaan)

4. Dung i ro ma uju i parenta sian Kesar Augustus, ingkon suratan nasa jolma di gomgomanna.
Pamilangon parjolo ma i, uju digomgomi si Kirenius tano Siria. Jadi borhat ma sasude, asa
disurati, ganup tu bona ni pinasana. Borhat ma nang si Josep, na sian Galilea, sian Nasaret,
nangkok tu luat Judea, tu huta ni si Daud, na margoar Betlehem, ala sian pomparan jala marga ni
si Daud ibana. (Liturgi 4, Remondo Tobing)

5. Pasurathon dirina rap dohot si Maria, oroanna i, naung gabegabean. Jadi di na disini nasida, gok
ma ari ni hangoluanna.Ditubuhon ma anak buhabajuna, diborhos ma, dipeakkon ma tu bagasan
panggagatan, ala so adong inganan na asing di parmianannasida.Jadi adong ma marborngin di
ladang na disini angka parmahan, mangingani pinahannasida. Jadi didapothon sada surusuruan
ma nasida, jala marsinondang ma sangap ni Tuhan i humaliang nasida, gabe mabiar situtu ma.
(Liturgi 4, Panahatan Siahaan)

6. Alai didok surusuruan i ma tu nasida: Unang mabiar hamu; ai barita halalas ni roha godang do
huboan tu hamuna, parsaulian ni sandok bangso i. Ai naung tubu do di hamu saborngin on, di
huta ni si Daud, Sipalua i, i ma Kristus, Tuhan i! On ma partinandaan di hamu: Posoposo do
dapotonmuna, na binorhos peak di panggagatan. (Liturgi 4, Monika Tobing)

7. Jala tompu ma adong dongan ni surusuruan i torop angka parangan parbanua ginjang, dipuji
nasida do Debata, mandok: Hasangapon ma di Debata di ginjang, dame ma di tano on, di
angka jolma halomoan i. Jala di na laho i angka surusuruan i sian nasida dompak ginjang,
masipandohan ma angka parmahan i: Beta ma hita tu Betlehem, taida ma na masa on, na
pinabotohon ni Tuhan i tu hita! (Liturgi 4, Desty Simatupang)

8. Jadi hatop ma nasida laho tusi, gabe jumpangsa si Maria dohot si Josep dohot Posoposo i, na
peak di panggagatan i. Asa dung diida, dibaritahon nasida ma boaboa, naung dihatahon tu
nasida taringot tu Dakdanak i. (Ria Wati)

05. LITURGI V : HARORO NI SIPALUA I GABE APUL-APUL TU ANGKA NAPORSEA)

1. Siborongborong do salpu ni Doloksanggul, nunga hita morongorong ala ni dosanta hape ro do
Tuhanta mangapul-apul. Antong tama do mar las ni roha hita dibagasan sadari on, ai Tuhan
Jesus naung ro tu portibi on, i do na gabe apulapul di Hita, i do sintuhu ni Pestanta dibagasna
tingki on. (Liturgi 5, Supri)

2. Pidong siboru tasik songgop tu gadugadu, ndang aeonta be angka na hansit ai nunga ro Tuhanta
mamboan hamamalum. Hamamalum ni angka sahitta ima hasesaan ni angka dosanta; Siala ni i
taingot ma hata ni Tuhan Jesus, na mandok: Unang datdati be mardosa, so tung songgop tu Ho
naumposi. (Liturgi 5, Jelita Tobing)

3. Jongjong di purbatua manatap tu tao toba, nunga dilehon Debata di hita tua sai unang be hita
mandatdati mardosa. Mabaor aek puli sian tano ni Simamora, Sai hot ma hita di Barita Nauli, asa
jumpangan hita di las ni roha. (Liturgi 5, )
4. Tuak na pang ma tu bagot sibalbalon, tung paet pe di tingki naung salpu alai tumonggina do
anggo pasupasu sian Tuhan. Marlas ni roha do hita di tingki on, ala naung ro Tuhanta parasi
roha, nunga dijangkon hita gabe anakhonna antong marparange ma hita di angka dalanNa.
(Liturgi 5, Daulat Siahaan)

5. Bona ni aek puli di dolok ni Sitapongan, nunga dilehon Tuhanta tutu di hita angka na uli, sai tong
ma tutu hita masihaholongan. Ai songon on do holong ni roha ni Debata di portibi on, pola do
Anakna na sasada i dilehon, asa unang mago ganup na porsea di Ibana, asa hangoluan na
salelenglelengna di ibana.Napuran ni Parsoburan tu gambir ni Sitapongan, tongtong ma hita tutu
sauduran jala tongtong ma masihaholongan. (Liturgi 5, Andes)

6. Tung sura huhatahon angka parhataan ni jolma nang surusuruan pe, anggo so parholong ni roha
ahu, naung songon hangsa do ahu na mangkulingkuling jala songon ogung na maruolol. ala tung
sura panurirangon di ahu, gabe huboto hasimoon sasudena ro di sandok parbinotoan, jala tung
sura parhaporseaon situtu ahu, pola tarpaunsat ahu dolok, doshon na soada ma ahu, anggo so
parholong ni roha ahu. (Liturgi 5, Josi)

7. Ai na so mangkaholongi donganna na niidana, tung songon dia ma haholonganna Debata na so

niidana? On do patik na tajalo sian Ibana: Na mangkaholongi Debata, i ma na mangkaholongi
nang donganna. Marroha holong ma hita, ala Ibana jumolo mangkaholongi hita!
Pargabus do halak na mandok: Holong rohana di Debata; hape dihosomi do donganna. (Yanti)

8. Tuat siputi nangkok sideak, ia i angka na ummuli, i ma tapareak. Dia do naummuli dipangido
Debata sian ngolum marhite haroroNa tu portibi on ? Pelehon ma dirim gabe pelean namangolu
diadopanNa songon parsombaonmu tu Tuhan i. Dolok ni Simalungun ma tu dolok ni Simamora.
Nunga salpu tutu angka na lungun, sai sude ma hita marlas ni roha. Hatuaon las ni roha do
hatutubu ni Jesus i, Mago do Jolma, ro ma Tuhanta, las be, las be ma rohanta i. (Musa)