Liturgi I (T.

jawa)
Lit. I.1. Ulini bunga-bungai, tongam ni dolok
dohot tombak na ratarata I, lambaok nai
suara ni angka pidong na marenderende I,
songkal na suara nu ronggur I. atahe dohot
do angka parngongos ni alogo na lambok i.
ise do manompa i sude?

Lit. I.2. Ima Na pistar sian naumpistar,

Nagumogo sian nagogo. Ibana na
ginoaranna so hatudosan, ima debata naung
adong dimula ni mulana. Ditompa ngka i
marhite na gok huaso. Didok “jadi ma ho”
gabe manjadi songon i.

Lit. I.3. Dimula ni mulana ditompa Debata

langit dohot tano on. Dung i tarulang ma
tano i gabe halongonan jala holom di atas
lung I, dungi mangareapreap ma Tondi ni
Debata di atas ni angka aek. Dung i
mangkuling ma Debata ninna: Jadi ma ho
na tiur! Jadi tiur ma tutu.

Lit. I.4. Nunga denggan na tiur i diida Debata,

jadi dibahen Debata ma parsirangan ni na
tiur sian na holom. Dung i digoar Debata
ma na tiur i arian, goar ni na holom i
borngin.
Lit.I.5. Asa sun ma langit dohot tano on ro
diisina sudena. Jadi dung sun dibahen
Debata jadijadianna i diari papituhon,
maradian ma Ibana sian nasa ulaonna, na
binahenNai. Dung i dipasupasu Debata ma
ari papituhon i jala diparbadia i.

Lit.I. 6. Tung naso targombarhon roha dohot

angka pingkiranta do hinadenggan ni
saluhut naung tinompa ni Debata. Ai ninna
si Musa do di bukuna na parjolo i: “Dungi
ditilik Debata ma sude natinompaNa i, jadi
nunga denggan situtu”. Sonang
sohariboriboan do sasude, soada na hurang;
menak huhut mardame do nasida di angka
parsaoran nasida siganup ari, soadong
panghurangi ni nasada tu na sada di angka
naung tartompa i. Sude angka
hajanghajang ni langit i pe tung denggan do
marartur huhut mansiboan hinaulina na tau
palashon rohanta be.

Lit.I.7. Dung i dipungka Debata Jahowa ma

sada porlak di Eden jala tusi ma dibahen
jolma na jinadihonna i. dung i
dipantubuhan ma sian tano i nasa hau, ro di
hau hangoluan na diparsitongaan ni porlak
I, nang hau parbinotoan ni na denggan
dohot na roa.
Lit.I.8. Dung i tarlalap ma modom ma si Adam
dibahen Debata Jahowa, jadi dienet ma
sada sian rusukna, jala dilangkophon sibuk
tu pambuatanna i. dung i debata Jahowa
rusuk na binuatnai sian si Adam, bahen
boruboru, jala ditogu Ibana tu si Adam.

Liturgi II (Marjanji)
Lit. II.1. Dung madabu jolma na parjolo i tu
bagasan dosa, manigor ditubuhon do roha
biar. Masa pangampinion ni diri, hatop
mansalahon dongan, tubu tihatiha, lam dao
ma hasonangan, alai biar na ma tongtong
mangihutihut ngolunta.

Lit. II.2. Dosa i ma hape mula ni singkam

mabarbar, gotap ma parsaoran ni jolma
dohot Debata alani elaela ni sibolis
pangago i asa mangalaosi hata ni Debata.
Matostos ma nang tali holong na mangihoti
nasida dibagasan hamuliaon na saleleng on.
Anggo saonari, songon hakim tu terdakwa
nama parjumpangan ni jolma i dohot
Debata di porlak eden i sahat tu tingki on.
Bagas na i hadadabu ni jolma i tu dosa, ai
dijangkon do elaela ni sibolis i.
Lit.II.3. Ai angkal bisuk do dibaen manait roha ni
hita jolma asa mangoloi di hatana tu nasa
pangalaosion. Dipaula do ibana songon na
mardenggan basa, tudos tu jolma na uli lagu
jala parholong roha, hape sasintongna rohana
babiat panoro do na mangaliluhon jala
mamolgak. Sorta do ibana tu ganup baoa dohot
boruboru na unduk di hatana, huhut didok:
ndang na tutu hamu mate, alai gabe doshon
Debata hamu umboto na denggan dohot na roa.

Lit.II.4. Ida hamu ma angka dongan, nunga

mangararati dosa i di portibion, tu dia nama
hita ? Suman tu gurasa ni api do tahe nasa
dosa; na boi manutung angka tombak na
mansai bidang jala uli. Ujungna gabe
turanggong, suman tu parbeguan. Laos songon
i do dosai, boi manggalahi api sian banua toru
laho mangarotonghon angka luat na niinganan
ni jolma.

Lit.II.5. Antong tudia do sude jolma parjahat angka

naung hinaratan ni dosa naung rarat i? Ai
nunga mamungka sian ompunta si Adam
dosai, sahat tu si Kain; sahat muse tu tingki
aek na sumar, tu tingki ni tungkup Babel, sahat
muse tu tingkinta sinuaeng on. Bagasnai jala
boratnai antong panjorat ni sibolisi di jolma i
marhite dosa na pinararatna di portibion.
Lit.II.6. On ma ingot hamu angka dongan, nang
pe mangararati dosa i songon api diri sian
sundut tu sundut ni hajolmaon, ai dang
diparade Debata api narokko laho
pasiaksiak jolma i. Alai tung diparade
Debata pe api narokko, api na so ra mintop
i, tu sibolis dohot tu jolma naso olo muba
rohana sian dosa i sambing do i. Antong,
taparangehon jala taparbuehon ma na tama
tanda naung muba rohanta sian dosa i.

Lit.II.7. Jala taingot huhut tapeop ma muse na

nidok ni Apostel Petrus, “torang ma
rohamuna, dungo ma hamu; ai na maotaot
do alomuna sibolisi songon babiat na
marauang mangalului sibondutonna.
Gomos ma hamu mangalo ibana
marhitehite haporseaon. Ingot hamu ma,
ndang tarbaen so songgop angka
haporsuhon sisongon i nang tu angka haha
anggimuna na di portibion.
 Liturgi III (T.Jawa)
Lit. III.1. Ianggo hasusaan sai na boluson ni hita
jolma do saleleng di tano on alani dosa i.
Alai molo sian asi ni roha ni Debata hita
mamereng sihirimon i, tandaonta ma i
dibagasan haporseaonta be. Ai diajari
Debata do anak haholongan ni rohaNa;
ndang songon uhuman i di panghilalaanta,
alai sangkap ni Tuhanta do i laho papitahon
haporseaonta do dalan manghaholongi
Debata.

Lit.III.2. Antong ndada lomo roha ni Debata,

jolma i susa di ngoluna be. Hape tung
mansai torop do jolma marujung dibagasan
hasusaan. Nunga marsundut-sundut torop
ni bangso di portibi on; jala mansai torop
do i naung pesan dibaen angka hasusaan.
Beha do ujung ni i ?

Lit. III.3. Tabereng muse do di tingkinta on,

mansai torop dope na mabiar, ala mamereng
na hurang di angka na ringkot laho
pasidingkon hasusaan dohot hamatean.
Hape.., hape laos tading di hasusaan dohot
hapogoson do na deba, nang pe sai mangasa
gogo laho pasidingkon hasusaan i. Beha do ia
taringot tusi ? Naso dijalo do parbue ni
pangajarion na sian holong ni Tuhanta i ?
Lit.III.4. Tongtong do ndang hasigatan roha ni
hita jolma hapistaran dohot habisuhon ni
Debata. Ndang hasuhatan angka dalanNa.
Jala ndang habogasan angka bogasNa.
Jotjot do ndang haantusan hita angka na
masa di ngolunta, nang pe targoar hita
angka na pistar jala na bisuk marroha di
roha ni deba dongan jolma. Alai molo
tahaporseai hataNa, urupanNa ma hita
mangantusi angka na masa laho papos
rohanta tu panogunoguonNa di ngolunta be.

Lit. III.5. Nang pe manggosagosa sibolis di tano

on marhite ragam ni angka hasusaan dohot
sitaonon, pola torop angka na mandele ala
sitaonon naso mansadi. Alai ndang dung
tarlambat Debatanta mangalehon
pangurupionNa, nang pe malelengku di
roha ni jolma. Tung sude tingki do diatur
dohot dirajai Debata. Di tanganNa do
hagogok ni nasa tingki.

Lit. III.6. Sai tu Jahowa ma pasahat

parsorionmi, jadi Ibana ma pangoluhon ho,
ndang tagamon loasonNa partigor i
humasusa ro di salelenglelengna ( Psalmen
55:23).
 Lit.III.7. Sai marhaposan tu Jahowa ma ho jala
ulahon na denggan; inganhon ma tano i jala
radoti haburjuon. Jala halomohon Jahowa, jadi
lehononna ma tu ho pinangido ni roham.

Lit.III.8. Pasahat ma dalanmu tu Jahowa jala haposi

Ibana, asa Ibana paturehon. Jadi paulloponna
ma hatigoranmu, songon hatiuron dohot
hapintoronmi songon tingkos ni ari.

Liturgi IV (Marjanji)
Lit.IV.1. Ndang loason ni Debata jolma i gabe
mandele, ndang dihalomohon Debata jolma i
mago. Ai atik pe hona uhum jolma i dibahen
Debata alai ihut do holong dohot asi ni rohaNa
dipataridahon.

Lit. IV.2. Dung i sai ro ma hamu, asa mardabudabu

hita, ninna Jahowa. Tung sura rara dosamuna
songon abit bunga dapdap, bontar do
bahenonku songon itak; nang pe rara songon
abit hasumba, gabe songon hapas do muse.
Molo ringgas hamu tumangihon dohot
mangihuthon, sai panganonmuna do
hinadenggan ni gogo ni tano i. Alai molo
manjua hamu jala mangalo, sai na panganon ni
podang do hamu sogot, ai pamangan ni Jahowa
do palumbahon. ( Jes 1 : 18 – 20 ).
Lit.IV.3. Satakkarisap lelengna hutadingkon ho alai
papungupunguonku do ho muse marhitehite
angka asi ni roha godang! Tagan di parpiar ni
murukku hutabunihon bohingku satongkin
maradophon ho, alai marhitehite denggan basa
salelenglelengna asianku ho, ninna Jahowa
Sipalua ho. Ai munsat pe angka dolok, jala
humuntal angka robean, alai anggo asiasingku na
so tupa munsat sian ho, jala padan ni
hadameonku na so tupa humordit, ninna Jahowa
siasii ho.

Lit.IV.4. Ai songon dao ni langit sian tano on do

gogo ni asi ni rohana di angka na mangkabiari
Ibana. Songon dao ni habinsaran sian
hasundutan dipadao Ibana sian hita angka
pangalaosintai. Songon asi ni amaama tu angka
anakna asi ni roha ni Jahowa di angka na
mangkabiari Ibana.

Lit.IV.5. Dok ma tu nasida: Songon sintongna

mangolu Ahu, ninna Tuhan Jahowa, tung na so
lomo do rohangKu mida hamatean ni halak
parjahat i, so ingkon mida hamumulak ni parjahat
i tumadingkon dalanna i nian, asa mangolu ibana.
Antong sai mulak ma hamu tumadingkon
dalanmuna angka na jahat i! Boasa tung tagonan
mate hamu, ala pinompar ni Israel ?
Lit.IV.6. Luluanku ma na mago i, jala mulak
boanonku na tardempar i, jala lilitanku do
na mabugang i, jala pargogoanku do na
marsahit i; alai anggo na mokmok i dohot
na gogo i siaphononku do, ahu sandiri tahe
marmahansa marhitehite uhum. (Hesekiel
34 : 16)

Lit.IV.7. Nunga pasingki ari, martungkar bulan,

marganti taon, nunga pola mariburibu
sundut, marganti angka raja dohot partogi,
suang songoni nang angka panurirang
nunga ngolngolan bangso i paimahon
bagabaga I, andigan do ulaning ro na
pinarbagabaga i?

Lit.IV.8. Saribu taon dijolma, doshon sadari doi

ianggo di Debata. Na tutu situtu do do
Tuhan I, ndang hea margabus, sude na
nidokNa dipasaut do. Laos apala Tuhan i
sandiri ma mangalehon sada tanda di hamu:
Idama, gabegabean ma sada namarbaju, jala
tumubuhon sada anak, jala bahenonna ma
goarna Immanuel.

Liturgi V (T.jawa)
Lit.V.1. Luk 2:1-4
Lit.V.2. Luk 2:5-7
Lit.V.3. Luk 2:8-9
Lit.V.4. Luk 2:10-12
Lit.V.5. Luk 2:13-14
Lit.V.6. Luk 2:15-17
Lit.V.7. Luk 2:18-20
Liturgi VI (Pansurnapitu)
Lit.VI.1. Joh 4:40-43
Lit.VI.2. Ul. Ap. 5:29-31
Lit.VI.3. Kol 1:14-16
Lit.VI.4. Kol 1:17-20
Lit.VI.5. Pangk. 1:5-7

Liturgi VII (Marjanji)

Lit.VII.1. Ipe hamu angka na hinaholongan,
beta ma tapararat ma barita hangoluan i tu
sandok portibion. Nunga marribu taon
naung dipaborhat Tuhanta angka parbarita
na uli tu sandok liat portibi on. Alai laos
torop dope na manjua dohot naso dung
umbegesa, ima angka sundut na marganti
sorin di hajolmaon i.

Lit.VII.2. Dung i toropan do nasida na gabe

porsea ala ni hata ni Jesus. Gabe didok
nasida ma tu boruboru i: Ndang be ala ni
pandokmi, umbahen na porsea hami; ai
nunga hubege jala hutanda hami sandiri,
Ibana do tutu Sipalua portibi on.
Lit.VII.3. Dung i ninna si Petrus dohot angka
apostel i ma mangalusi: Ingkon oloan do
iba di Debata asa di jolma! Dipahehe
Debata ni angka amanta do Jesus, na
pinusamuna, uju digantung hamu Ibana tu
hau. Tu siamunna do dipabangkit Debata
Ibana gabe Partogi jala Sipalua, laho
mangalehon tu halak Israel hamubaon ni
roha dohot hasesaan ni dosa.

Lit.VII.4. Di bagasan Ibana do adong di hita

haluaon i, i ma hasesaan ni angka dosa.
Ibana do suman ni Debata na so tarida i; na
parjolo tubu sian nasa na tinompa.

Lit. VII.5. Ai marhite sian Ibana do ditompa

saluhutna, na di banua ginjang dohot na di
tano on, na tarida dohot na so tarida i,
angka habangsa, angka harajaon, angka
gomgoman, angka parhuasoon; saluhutna i
do ditompa marhitehite Ibana, jala
marhapatean tu Ibana. Jala di jolo ni
saluhutna do Ibana, jala saluhutna i do hot
di bagasan Ibana.

Lit.VII.6. Ibana do ulu ni daging i, i ma huria i.

Ibana do parmulaan, naung parjolo tubu
sian angka na mate, asa Ibana parjolo di na
saluhutna. Ai ditontuhon Debata do, naeng
 ma maringanan di bagasan Ibana sandok
hagogokna i!

Lit.VII.7. Laos marhite sian Ibana do

padengganonna tu dirina saluhutna i, nang
angka na di tano, nang angka na di banua
ginjang, dung dipatupa dame marhitehite
mudar na sian silangna i, marhitehite Ibana.

Lit.VII.8. Ida ma, na ro ma Ibana di bagasan

ombun! Idaon ni nasa mata do Ibana, nang
angka naung manullang Ibana, gabe
mangangguhi be ma saluhut bangso ni tano
on mida Ibana. I ma tutu. AMEN.

Liturgi VIII (T. Jawa)

Lit. VIII. 1. Hamu angka dongan, dung lam
matua danging, lam tamba umur, alai lam
moru do gogo, hurang parnidaan dohot
parbinegean, hahipason pe songoni,
muramura dimasuki sahit, sipanganon
naeng tabo, hape pansarian so adong. Sude
do sai nipingkiran, alai dang tarulahon be,
sai naposo dohot gelleng ma nisalahon,
hape iba do nasala. Jotjot sai piningkiran
songon haposoon i boi sude ulaon.

Lit. VIII.2. Ima da, tung mansai toho do na

nidokmi, dung lam matua iba, jotjot do
 nihilala dang marlapatan be ngoluniba, sai
nisarita ma angka ianakhon. Nidok ma
dang dianturehon iba na matua on, hape
nian sasintongna arga do iba dihilala
nasidabe. Ai narepot do nasida mangula
angka ulaonna be laho sumarihon angka
anakhonna dohot laho paurus-urus iba
angka naung lam suda gogo on.

Lit. VIII.3. Jotjot do niuhuman angka ianakhon

dung lam matua iba. Dang adong be gogo
dohot na boi patupaon di ngoluon, alai sai
dihirim roha dope ingkon leleng iba
mangolu nang pe naung diingani sahit
pamatang. Ubat nama balanjo, susa ma
angka ianakhon. Molo hurang hatop ro
mangurus iba, ni dok ma naso lomo roha ni
ianakhoni be mangolu iba. Mardosa ma iba,
mardosa ma dohot angka ianakhon.

Lit. VIII.4. Tung godang do dosa, pangunjunan

pe, mangarsaki hita paima mate. Naso
tarhatahon hamagoan i, aut so tubu Jesus
Sipalua i. Sai tarapul ahu Tuhan, dibaen
Ho. Tua na tumimbul, dame jumpang do.

Lit. VIII.5. Tung tuani ma ro Jesus Tuhanku

manobus au. Atik pe dang mararga au di
rohangku, anggo di TuhanKu arga do au, ai
 dohot do au hinokhopNa. Alani, hibul ma
ahu, Jesus di Ho, sonang rohangku tarapul
do. Mian diau ma baen hataMi, paima das
au tu lambungMi.

Lit.VIII.6. Na jolo tung na loja do langkangki di

son. Marsahit do rohangku dibaen portibi
on. Tarhirim au, ai salpu luhut di tano on,
paima ro Tuhankinon manjou na sorat on.
Na salpu doi, na salpu do i, dang di jujur
dosangku tu au.

Lit.VIII.7. O donganki na mago, ndang sonang

rohami. Sai dilului ho dame, hape so dapot
i. Tu ho dijouhon Jesus, na holong roha i :
Di Au sambing ma dapot ho paradiananmi.
Alani i, Ingkon Ho sai oloanku, Sipangolu
au Tuhanku, sian nasa rohangkon.

Lit.VIII.8. Ho ma di au, di Ho ma au, hot ma

parsaoranta. Unang dao Ho sian au, ale
Sipangolu. Sian Ho sambing do ro dame
dohot gogo. O Tuhan Jesus, Ho do
ngolungku, Au pinangolu ni mudarMi.
Angka na loja, angka na sorat, boi
maradian di lambungMi. Sai pujionku Ho,
Tuhanki. Di sitaononku, parungkilonku,
tangkas hubege dijouhon Ho: Hatop ma ho
ro.