Psalmen 145: 17 – 21

Marsihohot di Bagasan Poda ni Jesus Kristus

I. Patujolo
Hata “Psalmen” di bagasan bahasa Gorik (Yunani) didok ma “Psalmos manang Psalmoi”, jala di
bagasan bahasa Heber (Ibrani) didok “Mizmor” na marlapatan ende manang pujipujian. Buku Psalmen
somalna marisihon angka tangiang, ende pujipujian, pangajarion dohot lan na asing na marpardomuan tu
angka pengalaman ni sasahalak (parpsalmen), manang pengalaman ni bangso Israel sandiri.
Asa ummura pangantusionta mangantusi Psalmen 145 on, mansai denggan tapabahir tu 3 turpuk, i
ma:
1. Ayat 1-7: i ma ende Pujipujian tu Debata di na mangarajumi denggan basaNa.
2. Ayat 8-13: Ojahan ni pamujion tu Debata i ma Partalup jala Parasiroha do Jahowa, dohot
hamuliaonNa.
3. 14-21: angka rumang ni Denggan basaNa dohot pangaramotionNa di ngolu ni jolma.
Digoari do turpuk on mazmur pujian yang monumental, songon pangarimpunan ni sandok
panghatindanghonon sian pengalaman ni ngoluna mananda Debata. Sada sian sia (9) bindu na mamangke
akrostik (mangihuthon abjad Ibrani) do ianggo Psalmen 145 on (asing ni i, i ma: Psalmen 9, 10, 25, 34,
37, 111, 112, 119). Laos hombar tu hasomalan ni Jahudi, diendehon ma turpuk on dua hali ombas
manogot dohot sahali ombas borngin. Pamujion i dipasahat disiala hagogoon dohot habasaon ni Debata.

II. Hatorangan ni Turpuk

Ay. 17. Debata na bonar jala na basa di saluhut dalanNa. Sisada ihot do holong ni Debata
dohot hasintonganNa. Pamujion ni parPsalmen borhat sian hadirion ni Debata. Ia Debatanta i i ma Debata
na tigor, na bonar (tsaddiq- adil), jala pardenggan basa. Saluhut pasupasu naung jinalo ni ganup halak na
marharoroan sian Debata Pardengganbasa i do, disiala dihaholongi Ibana do ganup hita. Tigor do ianggo
dalan nang uhumNa, diuhum Ibana do angka na mardosa na so olo paubahon roha. Lobi sian i nian nunga
dipatandahon Ibana na tuk do asi ni rohaNa manesa nasa dosa ni jolma. Alani habonaron dohot
hasintonganNa do umbahen pola AnakNa na sasada i, i ma Kristus ro tu portibion laho manesa dosa.
Ndada holan parpsalmen na manghatindanghon hadirion ni Debata, manang ise pe talup do mamuji Ibana
na borhat sian panandaon dohot pengalaman iman, isara ni si Musa. Didok si Musa di pamujionNa, “Tau
partanobatoan do Jahowa, na so hasurahan di pambahenanNa, ai na tigor do luhut dalanNa, sihaposan do
Debata, ndang adong hageduhonNa, na tigor jala na bonar do Ibana. Ndada holan jolma diramoti jala
diparmudu Debata, sude tahe angka jadijadianNa. Ditompa, dipasupasu, marpinompari, diramoti, i ma na
binahen ni Debata.
Ay. 18-19. Panoguon tu Asi ni rohaNa. Tangkas do didok, “... manjou Ibana di bagasan
hasintongan ... .” Asa nian ingkon dibagasan hasintongan ma tutu hita manjou goar ni Debata, unang ma
di bagasan neang ni roha, ganggu, dohot langgus ni roha. Molo pe didok turpuk on donok do Debata di na
manjou goarNa, ndada gabe mandao Debata di angka na so manjou goarNa. Debata na immanen do
Ibana. Dilehon do tu ganup halak kebebasan manjou goarNa uju ro arsak nang las ni roha, di ganup
partingkian, di sude inganan, nang saluhut panggulmiton ni ngolu ni jolma i.
Ganup halak ditogihon do mananda jala manghilalahon asi ni rohaNa na balga i, asa tongtong
manghabiari Ibana. Manghabiari lapatanna dibagasan haunduhon di na laho mangihuthon, mangulahon
parsuruon hombar tu hataNa. Asa jumpangan hita di haluaon di tingki godang parungkilon na mambahen
hita songon jolma na dibagasan hurungan. Tontu holan Ibana do na rade umbege anggukangguk ini na
dangol i.
Ay. 20. Dijagai do na manghaholongi Ibana. Dia ma hataridaan ni na manghaholongi Debata?
Pasangaponna ma Debata, pujionNa jala haholonganNa marhite na marsihohot tu HataNa. Tutu godang
do angka tontangan di na mangoloi Debata. Boi do gabe dipasiding, diela, dilele humaliang hita. Alai
sada jaminan dipasahat turpuk on, diondingi Debata do parpsalmen jala siaphononNa angka parjahat i.
Ndang kompromi Debata tu angka parjahat saleleng ndang olo manadingkon dalanna na jahat.
Ay. 21. Marsihohot Mamuji Debata. Di sude partingkian ma nian pamujion tu Debata, unang
martiti manang marsanggasangga. Dipaujung parpsalmen turpuk on dohot sada pangondolhonon:
parsihohotanna mamuji Debata. Tung aha pe na masa di ngolu ni jolma, ingkon ma hot dipaujung
dibagasan pamujion tu Debata. Jala ditogihon sude na marhosa mamuji Debata ro di saleleng ni lelengna.
Asa molo na marsihohot, sai na lehononna do pamanganna mambaritahon denggan basa ni Jahowa.

III. Sipahusorhusoron
1. Sahat do uhum i molo tadatdati mardosa. Ala Debata na bonar do Ibana na pasahat uhum tu angka
parjahat. Alai gok do holongNa molo mulak hita sian angka dalan na roa. Sai tapasiding ma angka
hajahaton jala tajangkon ma dalan hamubaon ni roha.
2. Tapuji jala tajou ma goarna dibagasan roha na marsitutu, pos ni roha dohot di bagasan
hasintongan. Asa pamujionta pe, ndada holan alani formalitas, neang ni roha, dohot langgus ni
roha.
3. Godang do angka haporsuhon. Ise do pangasahononta? Jotjot do tapatujolo ro tu angka ale-ale,
keluarga, sisolhot, manang patujolo pingkiranta be, maradu lupa hita ro tu Debata. Hape holan
ibana do na rade tumangihon angguanggukta (BE No. 161:1).
Pdt Ririn Mayer Lina
Sinurat