ACARA NATAL KELUARGA

HKBP LAPAN – LAPAN RESSORT KEBUN

KELAPA
DISTRIK XXV JAMBI
Pangaradeon:
 Tagan so dipungka acara, diparade ma lilin manang na piga jala dipillit ma na
pagalakhonsa di acara no.5
 Ditodo hian ma na manguluhon acara dohot manguluhon tangiang pangondianon asa
denggan diparade.
 Diparade ma inganan ni pelean
1. Marende BE No. 57: 1 + 3 “Nunga Jumpang Muse”
 Nunga jumpang muse ari pesta i, Hatutubu ni Tuhanta Jesus i. Tuat do Ibana sian
surgo i, mebat tu hita on. Hasangapon di Debata, Dame dame ma di jolma. Las ni
roha ni Debata hajolmaon muse.
 Sombanami ma di Ho, na tubu on, Ho siboan dame tu portibi on! Sai pasaorhon
ma tu rohanami on, dameM i o Jesus! Hasangapon di Debata, Damedame ma di
jolma, Las ni roha ni Debata hajolmaon muse.

2. Tangiang Mamuhai Parpunguan (U=Uluan; Kel=Keluarga)

U : Tapungka ma Partangiangan Natal Keluarganta on dibagasan Goar ni Debata
Ama dohot Goar ni AnakNa Tuhan Jesus Kristus dohot Goar ni Tondi Parbadia.
Amen. Gabe daging ma hata i jala maringanan ditongatonga ni hita.
Kel : Ale Tuhan! Sai sondangi ma rohanami, jala dameMi mangingani hami.
U : Alai manang piga na manjangkon Ibana, tusi do dilehon huaso asa gabe anak ni
Debata nasida angka na porsea di GoarNa.
Kel : Sai ingani ma rohanami ale Tuhan asa gok dame ma bagasnami, luatnami nang
bangsonami pe.
U : Martangiang ma hita: Ale Tuhan Debata Amanami na di banua ginjang. Na
mandok mauliate do hami tu Ho sian nasa rohanami, ala disuru Ho do AnakMu
Tuhan Jesus Kristus ro tu portibi on laho paluahon hami sian dosa dohot
hamagoan. Tung diasii Ho do hami na lea on marhite na marsuru AnakMu na
sasada i, i ma Jesus Kristus Tuhannami, asa porsea hami jala manjalo hangoluan
na saleleng ni lelengna, sipapataronmu tu tongatonganami. Hupangido hami sai
patiur jala rajai ma rohanami marhitehite Tondi Parbadia i, asa unang hu
rohanami mida hametmetonNa i. Ale Tuhan! Immanuel do GoarMu. Ido
huhaporseai hami, tung Ho do na mandongani hami, jala tung
ditongatonganami do Ho. Ho naung manogu hami sian haholomon tu hatiuron,
 dipadomu Ho do hami gabe saor muse tu Ho. Sai jalo ma pamujionnami on
bahen hasangapon di GoarMu. Amen

3. Marende BE No. 62 : 1 – 2 “Halalas Ni Roha Godang”

♫ Halalas ni roha godang, na hubaritahon on: Nunga tubu Sipalua di hita jolma on.
Reff: Hasangapon di Debata, laos dame, dame, dame ma di jolma. Lomo ni roha
ni Debata do hita jolma on.
♫ Ai saborngin on do binsar bintang di na holom i, Sumondangi hagolapon na di
rohanta i. Reff. Hasangapon di Debata…

4. Liturgi Keluarga
4.1. Liturgi ni angka dakdanak/parsingkola, anggota keluarga i ma parjolo
4.2. Barita Hatutubu ni Tuhan Jesus Kristus (Liturgi Responsoria)
(Lukas 2 : 1 – 14)
U : Dung i ro ma uju i parenta sian Kesar Augustus, ingkon suratan nasa jolma di
gomgomanna.
Kel : Pamilangon parjolo ma i, uju di gomgomi si Kirenius tano Siria.
U : Jadi borhat ma sasude asa disurati ganup tu bona ni pinasana.
Kel : Borhat ma nang si Josep, na sian Galilea, sian Nasaret, nangkok tu luat
Judea, tu huta ni si Daud, na margoar Betlehem, ala sian pomparan jala
marga ni si Daud ibana.
U : Pasurathon dirina rap dohot si Maria, oroanna i, naung gabegabean.
Kel : Jadi di na disini nasida, gok ma ari ni hangoluanna.
U : Ditubuhon ma anak buhabajuna, diborhos ma, dipeakhon ma tu bagasan
panggagatan, ala so adong inganan na asing di parmianannasida.
Kel : Jadi adong ma marborngin di ladang na disini angka parmahan, mangingani
pinahannasida.
U : Jadi didapothon sada surusuruan ma nasida, jadi marsinondang ma sangap ni
Tuhan i humaliang nasida, gabe mabiar situtu ma.
Kel : Alai didok surusuruan i ma tu nasida: unang mabiar hamu; ai barita halalas
ni roha godang do huboan tu hamuna, parsaulian ni sandok bangso i.
U : Ai naung tubu do di hamu saborngin on, di huta ni si Daud, Sipalua i, i ma
Kristus, Tuhan i!
Kel : On ma partinandaan di hamu: Posopso do dapotonmuna, na binorhos peak
di panggagatan.
U : Jadi tompu ma adong dongan ni surusuruan i torop angka parangan
parbanuaginjang, dipuji nasida do Debata mandok:
 Kel : "Hasangapon ma di Debata di ginjang, dame ma di tano on, di angka jolma
halomoan i". Amen

5. Marende BE NO. 54 : 1 + 3 “Sonang Ni Borginna i” (Pagalak lilin)

 Sonang ni borginna i, uju ro Jesus i, Sonang modom do halak sude.
Holan dua na dungo dope, mangingani AnakNa, Jesus Tuhanta i.
 Godang ni tua disi, di na ro Jesus i, tung malua pardosa muse, sian
hamagoanna sude, ala ro Sipangolu, Jesus Tuhanta i.

6. RENUNGAN NATAL: Mateus 1 : 23

“Ida hamu ma, gabegabean do na marbaju i, tubuan Anak ma ibana; jala bahenon do
Goarna Immanuel, lapatanna: Donganta ma Debata”

Selamat Natal ma di hita saluhutna!

Immanuel, lapatanna: Donganta ma Debata. Molo didok: “Donganta ma
Debata” sambolus pangantusionna di pingkiranta mandok: Na so donganta hinan do
Debata? Na alo ni jolma i hinan do Debata? I do ra na ro tu rohanta. Tutu ndang
taralo manang ise Debata, ndang tuk gogo ni portibi on patunduk Ibana. Agia saluhut
jolma hehe maralohon Ibana, tung so tarpatunduk manang ise do ianggo Debata.
Gariada Ibana do na marhuaso patundukhon sandok portibi on ro di pangisina.
Immanuel: Donganta ma Debata. Madabu do jolma na parjolo i tu uhuman ni
Debata, hona toru ni Debata do portibi on, susa do diahap jolma i di bagasan
ngoluna, gariada tahe hamatean nama jambar ni jolma i. Saluhutna i ala dialo jolma i
na pinatikhon ni Debata, dioloi jolma na parjolo i elaela ni sibolis i, gabe ditundalhon
jolma i Debata. Dialo jolma i lomo ni roha ni Debata, diulahon sogo ni rohaNa. Ido
umbahen tarrimas Debata mida jolma na tinompana i, gabe dihonahon ma uhuman.
Alai asi do roha ni Debata di saluhut jolma na tinompaNa i, ndang diloas mago
boti jolma i. Marulakloni do disuru Debata angka naposoNa, angka panurirang laho
manogihon jolma i asa mulak tu Debata, asa ditanda hatigoran ni Debata. Alai nda
tung manigor olo jolma i manadingkon dalan hamagoan i. Gabe lam susa ma diahap
jolma i, songon birubiru na lilu ganup masitondong dalanna be. Na parpudi di suru
Debata ma AnakNa tu portibi on (ro ma Debata tu portibi on marrupahon jolma)
digoari ma Ibana: Immanuel, lapatanna: Donganta ma Debata. Ro Ibana tu
tongatonga ni portibi on, mian di tongatonganta ma Ibana, gabe jolma Ibana di
tongatonga ni jolma na mardangol i.
Donganta ma Debata: “Dongan” lapatanna; ndang dao sian hita, ndang holang
sian hita. Diboto Ibana sude taringot tu hita, dihilala Ibana na masa di hita. Na uju i
ala ni dosa i, nunga tung mansai dao jolma i sian Debata, nunga adong rura na
mansai bagas parholanganta. Ndang hadodoan jala ndang tardapothon manang ise
 Ibana. Di hata na asing didok: transenden. Berada pada kejauhan, melampaui apa
yang terlihat, dianggap begitu jauh, berjarak dan mustahil dipahami manusia.
Songoni ma Debata ndang haantusan jala ndang hadodoan ni jolma i be.
Alai nuaeng, nunga gabe Immanuel Ibana, nunga tung di tongatonganta Ibana.
Immanuel: Imanen; Immanere = Tinggal di dalam. Sungguh dekat dengan diri kita.
Immanere (Immanensi) maralo tu hata “Transenden”. Transenden lapatanna, jauh,
tidak terhampiri. Immanuel; Imanen lapatanna; tung jonok di tongatonganta. Jadi
Debatanta i, ima Debata na mansai jonok di tongatonganta, na manghilalahon
pardangolanta. Jala naeng buatonna ma pardangolanta, ampe tu Ibana ma
pinsangpinsang dohot uhuman na patut aeonta. Ibana ma na mangusung sude
parungkilon dohot haporsuhon na taae. Asa ndada holan ro boti Ibana tu portibi on,
alai na ingkon taononNa do nang hamatean na so sian salana laho manobus hita sian
hamagoan i. Ido pusuk jambu ni haroro ni Jesus; Immanuel tu tongatonganta. Ida ma
godangna i angka hasusaan, parsahiton, hamaolon na taadopi saleleleng na sataon
on. Alai didongani do hita sahat ro di ari las ni roha, ari Pesta hatutubu ni Jesus
Sipalua i. Sai unang be sirang hita sian Ibana, lam tapajonok ma tu Tuhan i,
marringgas ni roha ma hita martangiang mamuji Ibana ganup ari. Antong sai Debata
ma mandongani hita nang laho manalpuhon taon 2022 on. Selamat ari Natal ma di
hita. Amen.

7. Marende BE N0. 616 : 1 “Uli Na i Di Borngin Na Badai”

 Ulina i di borngin na badia, humirdophirdop do bintang disi. Di borngin i do tubu
Sipalua, di panggagatan di Betlehem i. Portibi on dangol gok haholomon,
marnida sondang ni Tuhanta i. Reff: Ulina i, marende do suruan. Di borngin i do
tubu Kristus i. Di borngin i do tubu Kristus i.

8. Tangiang Pangondianon

9. Marende BE No. 52 : 1 – 2 “Hatuaon Do” (Papungu Pelean)

 Hatuaon do las ni roha do hatutubu ni Jesus i. ;;Mago do jolma ro ma Tuhanta, las
be, las be ma rohanta i;; (2x)
 Hatuaon do las ni roha do hatutubu ni Jesus i. ;;Domu do hita tu Debatanta, las
be, las be ma rohanta i;; (2x)

10. Tangiang Ale Amanami + Amen – Amen – Amen

11. Marsijalangan – Pasahathon Selamat Ari Natal