PARTORDING NI PARMINGGUON

DI MINGGU REMINISCERE
SAI INGOT MA ANGKA DENGGAN NI BASAM
(Psalmen 25 : 6)

EV. Rom 4: 13-25 EP. Psalmen 22: 23-31

TOPIK:
DITATAP DEBATA DO
NGOLU NI HALAK NA PORSEA

HURIA KRISTEN BATAK PROTESTAN

Minggu, 28 Pebruari 2021
01. PAMUHAI :
U : Horas ma di hita saluhutna ruas ni huria ni Tuhanta na hinaholongan!
Na marpungu do hita muse sadarion di Minggu REMINISCERE.
Lapatanna : Sai ingot ma, ale Jahowa, angka denggan ni basaM dohot asi
ni rohaM, ai sian na robi do angka i.
R : Hupuji hami ma Ho ale Tuhan Pardenggan basa jala Parasi roha
saleleng ni lelengna.
U : Pardenggan basa jala Parasini roha do tutu Tuhan Debatanta i, DITATAP
DEBATA DO NGOLU NI NA PORSEA di Ibana. Tapuji ma Ibana, tasomba
Tuhan i, pangiar ma soarami.
02. Marende BE No. 26 : 1 - 2 Dame nimMu ale Jesus
 Dame nimMu ale Jesus, lehononMu di bangsoM.
TondiM i do na patulus hataM i tu naposoM.
Dangol hami jala pogos, ndang tarbaen parhaladoM;
Tondi parbadia tongos, margogoihon hami on.
-------Musik/Jongjong------
 Ale Tondi Sipardame sai bongoti hami be
Sai pasada rohanami, gok parbue baen sude.
Lam patinggil pinggolnami, tumangihon dasdasMi,
Asa ganda ringgasnami pararathon hataM i.

03. VOTUM – INTROITUS – TANGIANG:

U : Marhitehite Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia, na tumompa langit dohot tano
on. Amen. Sai ingot ma, ale Jahowa, angka denggan ni basaM dohot asi
ni rohaM, ai sian narobi do angka i. Asa unang marsuraksurak angka
musungku mida ahu. Ale Debatangku, marhaposan tu Ho do ahu, sai
unang paila ahu. Haleluya
R : (Mangendehon): Haleluya, Haleluya, Haleluya!
U : Martangiang ma hita! Ale Tuhan Debata, Amanami na di banua
ginjang, Parasiroha na sumurung! Na mandok mauliate ma hami tu Ho
sian nasa rohanami, ala dilehon Ho AnakMu na sasada i tu hamatean
humophop hami, asa unang mago na porsea di Ibana, alai asa hangoluan
na saleleng ni lelengna di nasida. Tatap ma hami, ale Amanami di
bagasan AnakMu Tuhan Jesus Kristus, na gabe habadiaon dohot
1
 hatigoran di hami. Sai sesa ma dosanami saluhut ala ni pelean na sun
denggan, na pinelehonNa i humophop hami. Sai paeleng ma pinggolMu
tu tangiangnami jala asi ma rohaM di hami marhitehite AnakMu, Tuhan
Jesus Kristus, Tuhannami. Amen. (Hundul)
04. Marende BE No. 205 : 2-3 “ALE JESUS TUHANNAMI” BL. 90
 Ale Jesus Tuhannami bereng hami na dison
PinarmahanMi do hami saluhutna na dison
Sai asi rohaM di hami sai pangolu hami on
 Ale Jesus, togu hami asa unang mago be
Manang ise sian hami sai porsea ma sude
Sai na hot di Ho ma hami dao ma jea sasude

05. PATIK:
U : Tajaha ma Patik ni Debata di Minggu REMINISCERE Sadari on, i ma na
tarsurat di Patik pa V-X! Songonon ma didok : Patik Palimahon
Ingkon pasangaphonmu do natorasmu asa martua ho, jala leleng
mangolu di tano na nilehon ni Jahowa Debatam di ho!
R : Patik Paonomhon Unang ho mamunu!
U : Patik Papituhon Unang ho mangalangkup!
R : Patik Paualuhon Unang ho manangko!
U : Patik Pasiahon Unang ho olo manghatindanghon hata na so tutu
maralohon dongan jolma!
R : Patik Pasampuluhon Ndang jadi haliangan ni rohan bagas ni
donganmu, ndang jadi haliangan ni roham dongan saripe ni donganmu,
manang naposona baoa manang naposona boruboru, manang lombuna
manang hodana, manang dia pe ugasan ni donganmu!
U : Antong rap mangido gogo ma hita sian Tuhan Debata!
R : Ale Tuhan Debata, sai pargogoi ma hami mangulahon na hombar tu
PatikMi! Amen.
06. Marende BE No. 673 : 1 - 2 “ADONG DO SADA MUAL” BL. 673
 Adong do sada mual i na sian Tuhan i
Durus sian bugangNa i di hau parsilang i
Di hau parsilang i, di hau parsilang i
Durus sian bugangNa i di hau parsilang i
----Jongjong-----
 Parjahat na di lambungMi taruli sian i
Nang au pardosa songon i ias diburi i
2
 Ias diburi i, ias diburi i
Nang au pardosa songon i, ias diburi i

07. MANOPOTI DOSA:

U : Tatopoti ma dosanta na godang i tu adopan ni Debata, Martangiang ma
hita! Ale Tuhan Debata, Pargogo na so hatudosan, Parasiroha na
sumurung, Ama ni Tuhan Jesus Kristus Sipangolu hami! Hami, halak
pardosa na dangol on ro tu jolo ni habangsa habadiaonMi manopoti jala
manganggukhon dosanami.
(tingki na hohom . . : Musik ........BE No. 678 : 1)
U : Mansai jotjot huarsahi hami Ho marhitehtie pingkiran dohot hata dohot
pambahenannami na roa i. ndang huhaholongi hami Ho sian nasa
rohanami dohot nasa ateatenami dohot nasa tondinami dohot nasa
gogonami; nang dongannami, ndang doshon dirinami hubahen hami.
R : Ale Tuhannami, huhilala hami do hurang ni pambahenannami di
adopanMu, hape sai ditatap Ho do hami di hasiangan on, sai
dipatongon Ho do angka na denggan tu parngoluonnami, alai tung
so tarpauba hami dope parrohaonnami na humurang i. Ale Tuhan
sai ingot ma angka denggan ni basaM dohot asi ni rohaM di hami.
U : Dibahen i tama do rimasanMu jala uhumanMu hami tu hamatean
saleleng ni lelengna i. Alai na maporus ma hami nuaeng tu asi ni rohaM
na godang i mangido sian nasa rohanami hasesaan ni dosanami
saluhutna.
R : Ale Tuhannami, sai marasi ni roha ma Ho tu hami. Huhilala hami do
saluhut hamaolon na dokdok na masa di parngoluonnami, jala hutanda
hami do hadirionnami na so tarbahen manahan di angka hasusaan i.
Tartait do hami jotjotan tu bagasan dosa, tatap ma hami angka na porsea
di Ho. Ale Tuhan, sai ingot ma asi ni rohaM dohot denggan ni basaM di
hami.
U : Sai urupi ma hami paubahon rohanami ala ni Tuhan Jesus Kristus, Anak
haholongan ni RohaM, Sipangoluhami dohot ala ni GoarMu na badia i.
Ale Tuhan, sai asi ma rohaM di hami halak na dangol on! Amen.

R : Mangendehon : BE. 678 : 1 + 3 PAUBA ROHAM TU JAHOWA BL. 678

 Pauba roham tu Jahowa, pauba roham tu Debata

Pauba roham tu Jahowa, pauba roham tu Debata
3
  Sai radoti ma hatigoran, sai radoti haholongon i
Sai radoti ma hatigoran, sai radoti haholongon i
U : Bagabaga ni Debata Taringot tu hasesaan ni dosanta : Satongkin do
Hutadingkon ho, alai papungupunguonHu ma ho muse marhitehite
angka asi ni roha godang! Tagan di parpiar ni murukHu Hutabunihon
bohingKu satongkin maradophon ho, alai marhitehite dengganbasa
salelenglelengna asianHu ho, ninna Jahowa Sipalua ho. Hasangapon ma
di Debata na di ginjang!
R : Amen.
----Hundul-----
08. Marende BE No. 177 : 1 “NDADA TARHATAHON” BL.147
 Ndada tarhatahon hahoholong ni
Roha ni Tuhanta di pardosa i
Marsak do rohaNa mida jolma i
Na so olo unduk di hataNa i
09. E P I S T E L :
U : Hata ni Debata turpuk Epistel di Minggu Reminiscere sadari on, tarsurat
di Psalmen 22 : 23 - 31 Sai jamitahononku ma goarMu tu angka
hahanggingku, jala pujionku ma Ho di tongatonga ni huria, na marluhut
i.
R: Puji ma Jahowa, hamu ale angka na manghabiari Ibana, sude
pinompar ni si Jakkob pasangaphon Ibana, jala sude pinompar ni
Israel manghormat Ibana!
U: Ai ndang lea rohaNa manang marbiasbias mida pardangolan ni na
dangol, jala ndang ditabunihon bohiNa maradophon ibana, jala
ditangihon do anggukna i tu Ibana.
R: Asa Ho do haroroan ni pujipujianku di tongatonga ni huria na ria i,
gararonhu ma angka bagabagangku di jolo ni angka na
mangkabiari Ibana.
U: Sai mangan do sogot angka na dangol i jala butongan, ingkon
mamujimuji Jahowa do angka na usouso di Ibana, sai huminsa do
rohamuna salelenglelengna.

4
 R: Ingoton ni isi ni liat portibi on ma i, gabe mulak ma nasida tu
Jahowa, jala marsomba tu joloM do sogot sude angka marga ni
parbegu.
U: Ai Jahowa do nampuna harajaon, jala panggomgom di angka parbegu.
R: Mangan jala marsomba do sogot sude angka na gok na hum di tano
on, marsinggang tu joloNa do sogot sude angka na marsingkor ro di
na mate gasing.
U: Sai adong do pinompar ni manisia, na mangoloi Ibana, angka na
manaringoti Tuhan i tu pinomparna sogot. Ima sahatna. Martua do
angka na tumangihon Hata ni Debata jala na umpeopsa. Amen.
10. Marende BE No. 769 : 1,2 “TU DEBATA DO PANGHIRIMON”
 Tu Debata do panghirimonhi, di tano laut nang awangawang i
Ibana do haposanhi, tongtong do diramoti langkangki
Torop pe mara manahopi au Debatangki do sumarihon au
Pos rohangki, sonang do au, Ibana do na mandongani au
-------Jongjong------
 Amporik i nang bungabunga i, ro di sude na tinompaNa i
Na metmet nang na balga i, Ibana do na marmuduhon i
Torop pe mara manahopi au, Debatangki do sumarihon au
Pos rohangki, sonang do au, Ibana do na mandongani au
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok:
R : Ahu Porsea…..
-----Hundul-----
12. TINGTING + TANGIANG PANGONDIANON
13. Marende BE No. 772 : 1 - - - “TUHANHU DO PATURE DALANHI” (P. Ia, Ib)
 Tuhanku do pature dalanki
Tuhanku do patiur langkangki
Sian nasa rohangki, hupasahat ngolungki
Tuhanku do patiur langkangki
 Tuhanku do pature dalanki
Tuhanku do patiur langkangki
Hulului do Tuhanki, surut ma na holom i
Tuhanku do patiur langkangki
5
 ------Musik------
 Tuhanku do pature dalanki
Tuhanku do patiur langkangki
Hupasahat diringki tu tangan ni Tuhanki
Tuhanku do patiur langkangki
14. JAMITA: ROM 4: 13-25
15. Marende BE No. 770 : 1 - - - “TU DEBATAMI” (P.II: Pusat)
 Tu Debatami na sun gogo i, sai maporus ma ho ganup ari
Di tanganNa do ho molo musu ro, tung na sonang di ampuanNa ho
Di tanganNa do ho molo musu ro, tung na sonang di ampuanNa ho
 Tung sun hinagogo ni Tuhan i, ingot ma Debatam do manghophop
Nang ponjot rohami, ndang na leleng i, tongkin nai pujionmu Tuhan i
Nang ponjot rohami, ndang na leleng i, tongkin nai pujionmu Tuhan i
------Musik-----
 Soara ni olopolopna i, marsaringar di angka partigor
Lan do gogo disi mambaen monang i, paima sahat sude tu Surgo i
Lan do gogo disi mambaen monang i, paima sahat sude tu Surgo i

16. PANGUJUNGI:
U : Mauliate ma di Tuhanta na mangalehon HataNa di hita di Minggu sadari
on, asa tung tangkas taboto, marhite sian hatigoran na sian haporseaon
i do ro bagabaga tu si Abraham. Ai aut angka siradoti patik i gabe
panean, ndang marguna haporseaon i, jadi pesan ma bagabaga i.
R : Ale Tuhan Debata Sitompa hami, sai papos ma rohanami laho
manghaporsea i Ho, ai di tatap Ho do ngolu ni angka na porsea di
Ho.
U : Na manongtong do denggan basa dohot asi ni roha ni Debata di angka
na porsea di Ibana. Dibahen i, di na mardalan hita di ragam ni hamaolon
na tabolus di portibi on. Naeng unang ganggu rohanta, di bagabaga ni
Debatanta, sai na ingotonNa do mangalehon tu hita asi ni rohaNa dohot
denggan ni basaNa, ai ditatap Debata do angka na porsea di Ibana.

R : (Mangendehon BE. 25 : 2 “ HATAMI ALE TUHANKU” BL. 181

 Ale Jesus sai matahon, sai ramoti ma au on
Asa hot haporseaon di bagasan rohangkon

6
 Sai paringgas ma rohangku mangoloi di hataMi
Asa mauas di podaMu songon si Maria i
U : Tapasahat ma peleanta tu harajaon ni Debata, martangiang ma
hita! Ale Debata, Amanami na di banua ginjang! Ho do haroroan ni
saluhut silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai
jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga
ni huriaM dohot di portibi on. Buhai ma rohanami marhitehite TondiM,
asa lam hutanda hami godang ni silehonlehonMi tu hami, asa lam girgir
hami mandok mauliate tu Ho, marhitehite Jesus Kristus Tuhannami.
AMEN
R : (Mangendehon) BE No. 204 : 2 “NDANG TADINGKONONHU HO”
BL. 73
 Nasa na nilehonMi, tondi ro di pamatanghu.
Hosa dohot gogongki, ro di saluhut artanghu.
Hupasahat i tu Ho, na so unsatonhu do.
U : Ale Amanami na di banua ginajang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon na
di banua ginjang! Lehon ma tu hami sadari on hangoluan siapari! Sesa
ma dosanami songon panesanami di dosa ni dongan na mardosa tu
hami! Unang hami togihon tu pangunjunan! Palua ma hami sian
pangago!
R : (Mangendehon):
 Ai Ho do nampuna harajaon, dohot hagogoon.
Ro di hasangapon, saleleng ni lelengna, Amen
U : Pasupasu !
R : (Mangendehon) Amen, Amen, Amen.