ACARA PARTANGIANGAN

BONA TAON

Punguan Sirait Namora Mingor Medan

Minggu, 28 Januari 2024
Di Bagas ni Kel. B. Sirait/ br. Nainggolan
Jl. Amal Sunggal - Medan
I. Sude parhobas mangarade.
II. Ibadah (U: Uluan/Liturgis H: Huria/ Jemaat S: Semua )
U: Selamat Taon Baru ma di hita saluhutna! Hamuna dongan sapunguan
Sirait Namora Mingor Medan, tama do hita mandok mauliate tu
Jahowa sadarion, ai dipapungu asi ni rohaNa do hita laho
manghalashon denggan basaNa na patariparhon hita tu taon 2024 on.
Beta hamu ma taendehon sangap ni Jahowa, jala tasomba ma Kristus
partanobatoan ni hatuaonta.
H: Ria ma hita manghalashon hatuaon naung tajalo i naung patariparhon hita tu
taon naimbaru on. Taolophon ma Ibana marhitehite puji-pujian dohot unduk
serep ni rohanta. Beta hamu ma taendehon ma Jahowa, taolophon ma GoarNa
na Badia i.
U: Antong, taparade ma dirinta asa tasomba Tuhanta dibagasan dame
dohot las ni roha. Tabaritahon ma hata on: “Nunga taripar hita tutu tu
taon 2024 on, ala ni denggan basaNa sambing do i!” Asa saluhut jolma
taruli di las ni roha naung pinarade ni Tuhanta Jesus Kristus.
Andorang so tapungka parsaoranta, jumolo ma hita martangiang
dibagasan rohanta be, martangiang ma hita....…Amen.
01. Marende BE. 754 “Gok Las ni Roha do Au”
1. Gok las ni roha do au di ngolungkon di ngolungkon di ngolungkon
Gok las ni roha do au dingolungkon tongtong di rohangkon
Mauliate gok las ni roha maringan holongMi
Tuhan di au mauliate gok las ni roha
Maringan holongMi Tuhan di au.
2. Mardame jala sonang do ngolungkon, dirohangkon, dirohangkon.
Mardame jala sonang do ngolungkon tongtong dirohangkon.
Mauliate ……….............
02. VOTUM – INTROITUS – TANGIANG
U: Marhitehite Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia, na tumompa langit dohot tano
on.
H: Amen
U: Marolopolop tu Debata ma ho, ale sandok tano on, endehon hamu ma
hamuliaon ni GoarNa, marmulia ma bahen hamu puji-pujianNa.
H: Pinuji ma Debata Jahowa, sasadasa do mambahen halongangan.
U: Ai dipataripar do hita sahat tu tao naimbaruon dibagasan Dame dohot
Las ni Roha.
H: Pinuji ma Debata Jahowa, sasadasa do mambahen halongangan.
U: Beta hita manungkap dohot marsomba, marsinggang ma hita tu jolo ni
Jahowa Sitompa hita, ai Ibana do Debatanta jala hita bangso na
pinarmahanNa. Pajojor hamu ma di tongatonga ni angka sipelebegu
hamuliaonNa i, di tongatonga ni saluhut bangso angka na binahenNa
i. Haleluya.
H: (Mangendehon) BE.853 Haleluya (12X)
Haleluya, Haleluya, Haleluya,Haleluya, Haleluya, Haleluya,
Haleluya, Haleluya, Haleluya,Haleluya, Haleluya, Haleluya.
U: Martangiang ma hita: Ale Tuhan Debata Amanami na di Banua
ginjang, Ama ni Jesus Kristus Tuhannami. Sai pinuji ma goarMu na
badia i, ala naung dipataripar ho hami Punguan Sirait Namora Mingor
Medan, sahat tu taon 2024 on. Ditogutogu Ho do hami sian taon na
buruk tu taon naimbaru on, marhitehite Denggan ni BasaM parbarita
na Uli, na ro tu tano Batak. Dipadomu Ho do hami, na holang hian sian
Ho, gabe saor muse tu Ho. Gok halalas ni roha do hami ala ni i, di na
nijouM hami laho manghaporseai Ho, asa dapotan hangoluan na
salelenglelengna hami sude ruas ni Punguan Sirait Namora Mingor
Medan on. Sai jalo ma hamauliateon ni rohanami, marhitehite AnakMu
Tuhan Jesus Kristus Tuhannami. Amen!
03. Marende BE. 743 “O Tuhan Togu-togu Ma Au”
1. O Tuhan togu-togu ma au,tu dalan lomo ni rohaMi,
Raphon Ho sonang mardalan au, nang rahis maol sidalananki,
TondiMi baen manggohi au on,Margogoihon au naposoMon,
Pasangap Ho dingolungkon,Paima sahat tu surgo au on.
2. Panghulingi ma au O Tuhan,Na rade tumangihon hataM,
Sai tumpahi ruasMu Tuhan,Na uasan nuaeng di hataM,
Sai patau ma au on naposoM,Manjou halak na dao sian Ho,
Ro di na so tumanda Ho,Muba gabe pangoloi di Ho.
04. MANOPOTI DOSA dohot BAGABAGA
U: Huria ni Tuhanta, ruas ni Punguan Sirait Namora Mingor Medan,
pungu do hita nuaeng di adopan ni Debata na Badia, dibagasan
unduk dohot serep ni roha, tatopoti ma dosanta di jolo ni Debata,
martangiang ma hita:
Ale Tuhan Debata, Amanami marhitehite AnakMu Tuhan Jesus
Kristus, naung ro manopot hami jolma pardosa tu portibi on. Na ro do
hami nuaeng tu adopanMu manolsoli dohot manopoti dosanami na
godang i. Na jotjot do huarsahi hami Ho marhitehite hata dohot
pambahenannami na so tama. Tama situtu do hami hona uhumMu ala
ni angka dosanami i. Na ro do hami nuaeng tu joloM mangasahon asi
 ni rohaM mangido tu Ho: sai unang paingotingot angka dosanami, sai
salpuhon ma saluhut dosanami i sian rohaM.
H: Ro do au nuaeng tu Ho sai palambas ma rohaM, Nunga pola mate Ho,
ala asi ni rohaM, jangkon au na dangol on, sai ulosi tondingkon
U: Ale Tuhan Debata, Parasi roha jala Partalup ni roha. Di pardalanan ni
ngolunami tung jotjot do huhalupahon hami mangasahon hagogoon
dohot huasoM, dirinami sandiri do sai hupangasahon hami. Gabe
jotjot do hami madabu tu ngolu na marungutungut molo so dapot na
tinembak ni rohanami jala molo masa tu hami parungkilon dohot
sitaonon gabe madabu do hami tu pandelean. Ale Tuhan asi ma rohaM
di hami na dangol on, sai marpangulahi ma rohaM di hagaleonnami.
H: (Mangendehon) BE.681 “Ale amang asi rohaM”
Ale Amang asi rohaM di au pardosa on, Unduk do rohangkon nuaeng
marsomba di joloM. Unang jujur unang jujur angka dosangki. Sai
salpuhon sai saluphon sian rohaMi.
U: Ale Tuhan Debata, Pargogo na so hatudosan, Amanami situtu di
bagasan AnakMu, Tuhan Jesus Kristus. Nunga dipatuduhon Ho
holong ni rohaM na so hadodoan i tu hami pardosa marhitehite na
disuru Ho AnakMu, Tuhan Jesus Kristus tu portibi on. Hape tung
jotjot situtu do hami ndang manghamauliatehon holong ni rohaMi
marhitehite pambahenan di ngolu siganup ari. Ndang gabe habaoran
ni pasupasuM hami tu dongannami jolma, ndang huhaholongi hami
dongannami doshon dirinami. Sai huendehon hami do “Burju naeng
lehononku di ho rohangkinon”... hape aha ma Tuhan na huula hami
holan di hata do i, ndang adong hupatuduhon hami
dipambahenannami, Ale Tuhan sai sundati ma torutoruM asa unang
mangonai be tu hami. Sai lehon ma di hami partingkian paubahon
roha jala sai pargogoi ma hami mangulahon na hombar tu lomo ni
rohaM saleleng ni portibi on do pe hami. Ale Tuhan sai asi ma rohaM
di hami, tangihon ma tangiangnami on. Tabege ma bagabaga ni Debata
taringot tu hasesaan ni dosanta: Songon sintong na mangolu Ahu,
ninna Tuhan Jahowa, tung na so lomo do rohangKu mida hamatean ni
parjahat, na lomo do rohangKu mida hamumulak ni parjahat i,
tumadingkon dalanna, asa mangolu ibana, Hasangapon ma di Debata
na di ginjang.
S: Amen.
05. Marende BE.672 “Tung Godang Situtu”
1. Tung godang situtu ulaonmu antong dipasahat Tuhanta tu ho
Ndang adong be tingkim marnalemba tahe
Ngolumi bahen tiruan tongtong
Reff. Sai patupa ma i ala ni Tuhan i, so mangkirim balosna tu ho.
Debata do marnida na niulami, manang na adong parbue ni i.
2. Ai lambok do soara ni Tuhanta i, ro ma ho las ma nang rohami,
Sai taingot tongtong hata ni Tuhan i, mangarahon jolma tu Tuhan i.
Reff. Sai patupa ………
06. Manjaha Epistel Jeremia 31 : 1 – 6
U : Di tingki ujungna i, ninna Jahowa, ahu gabe Debata ni saluhut marga
ni Israel jala nasida gabe bangsongku.
H : Songon on do hata ni Jahowa. Nunga dapotan asi ni roha di
halongonan bangso na malua sian podang. Laho ma ahu
manogihon Israel tu hasonangan ni rohana.
U : Nunga tibu hian diida rohangku Jahowa, ninna ibana do: Haholongon
salelenglelengna hubahen mangkaholongi ho, dibahen i hutogutogu ho
marhitehite asi ni roha.
H : Paulionku dope ho muse, asa tung tipak ho, ale boru Israel,
marjagarjagarhon arbabmu do ho muse jala ruar
marhalianghaliang rap dohot halak na marlas ni roha.
U : Ingkon pungkaonmu dope angka porlak anggur di dolok Samaria, laos
halak na umpungkasa manganhon parbuena.
H : Ai ro do ari sogot, joujou ma disi halak parjaga di dolok Epraim:
Beta ma hita, asa nangkok hita tu Sion mandapothon Jahowa
Debatanta!
U : Songon i do sahatna. Martua ma angka na tumangihon Hata ni Debata
jala na umpeopsa.
H + U : Amen.

07. Marende BE. 569 “O Debata tung Longang do Rohangku”

1. O Debata tung longang do rohangku, Molo hubereng na tinompaMi,
Saluhut bintang, hilap dohot ronggur, manghatindanghon hasangaponMi,
Marende au Tuhan mamuji Ho, O, Debata, sangap do Ho.
Marende au Tuhan mamuji Ho, O, Debata, sangap do Ho.
2. Molo huingot balga ni holongMu, Marhite Jesus na tarsilang i.
Anak sasadaMi O Debatangku, dilehon Ho manobus jolma i.
Marende au Tuhan mamuji Ho, O, Debata, sangap do Ho.
Marende au Tuhan mamuji Ho, O, Debata, sangap do Ho.
08. Tangiang Pangondianon (Doa Syafaat)
09. Marende BE.826 “Gohi au Tuhan”
1. Gohi au Tuhan marhite HataMi
Gohi au Tuhan marhite HataMi,
Songon hudon na rumar do au Tuhan di sumurMi,
Gohi au Tuhan marhite HataMi.
2. Gohi au Tuhan marhite HataMi
Gohi au Tuhan marhite HataMi
Asa tang jala matoras au marhite HataMi
Gohi au Tuhan marhite HataMi.

10. Jamita: Jeremia 29 : 11

Ai nunga tangkas huboto sangkap angka na husangkapi
taringot tu hamu, ninna Jahowa, sangkap hasonangan do
tahe ndada tu hamagoan, asa ahu mangalehon tu hamu
ujung na hinalungunhonmuna. Sebab Aku ini mengetahui
rancangan-rancangan apa yang ada pada-Ku mengenai kamu,
demikianlah firman TUHAN, yaitu rancangan damai sejahtera
dan bukan rancangan kecelakaan, untuk memberikan kepadamu
hari depan yang penuh harapan.

11. Marende BE. 848 “Dison adong huboan Tuhan”

(Huhut Papungu Pelean)
1. Dison adong huboan Tuhan,Parbue ni ngolungku na so tardok nian.
Sadia ma argana Tuhan molo sai ni rajuman sude denggan basaM?
Jalo ma Tuhan, sai las ma rohaM.
2. Huingot do hataM da, Tuhan, Ingkon sarihononhon anggim na metmetan;
Ampehon ma tanganMu sangkan,Itak na otik I unang suda nian,
Jalo ma Tuhan, sai las ma rohaM.

12. PARSURUON DI NGOLU SIGANUP ARI

U: Nunga tabuhai Taon 2024 on dohot Las ni Roha. Andorang so
mulak hita sian parpunguan Punguan Sirait Namora Mingor
Medan on, tama do hita marpadan tu Debata, i ma padan
mamaritahon Habalgaonna i na patariparhon hita tu taon on.
Taingot ma denggan basana na tu hita ganup marsadasada,
rumah tangga nang di keluarga besar Punguan Sirait Namora
Mingor Medan.
 H: Beta ma hita borhat mamaritahon habalgaon ni Tuhanta i na tu hita
dohot tu bangsonta.
U: Dung tapanghilalahon denggan basaNa na tu hita, tama ma
tahangoluhononta sudena i. Hita pe tabaritahon ma habalgaonna
marhite hata, parange dohot parngoluanta. Marhite Punguan
Sirait Namora Mingor Medan on tama do lam ringgas hita
marsomba tu Ibana jala lam tapatimbul Ibana di rohanta.
H: Dipatimbul rohangku do Tuhan i
U: Antong tajangkon ma Jesus tu bagasan rohanta be, asa unang
holan na marpesta hita Punguan Sirait Namora Mingor Medan,
alai naeng ma dohot di angka parange dohot ulaonta be.
H: Tuhan, suru ma hami mamaritahon habalgaon ni holongMi.
U: Mulak ma hita dibagasan Dame na sian Tuhanta i laho
mamaritahon HabalgaonNa. DongananNa do hita laho
mangulahon i sahat ro di ujungna. Pos ma rohanta. Borhat ma
hita dibagasan las ni roha na sian Tuhan i. Amen.
13. TANGIANG PELEAN - PASUPASU – AMEN (3X)
Pengurus Punguan Namora Mingor
Medan Na Humaliang
Mandok:
Selamat Tahun Baru Januari 2024
Tuhan Memberkati

HORAS, HORAS, HORAS!!!