DIPINTORI HINORHON NI HAPORSEAON

(Dibenarkan Karena Iman)

Minggu Reminiscere, 05 Maret 2023
(Rom 4:1-5, 13-17)
I. Patujolo
Boasa ingkon dipintori marhite haporseaon ndada marhite ulaon ni jolma? Naeng baritahononta; Ai
ingkon patar hatigoran ni Tuhan i apala nuaeng nang sogot tu saluhut jolma (Rom 3:26). Ai holan Debata
sambing do na boi mamintori saluhut jolma naporsea tu Jesus Kristus. Asa ndang tarbahen jolma hape
paburnang diri di adopan ni dongan jolma tarlumobi di adopan ni Debata. Ia malua hita, holan ala na
pinintoran ni Tuhan i do.
Didok di Rom 3:9-20, ai saluhut jolma nunga madabu tu hajahaton jala ginonggoman ni dosa.
Targoar do saluhut jolma namardosa, jala dang adong namarroha, manang nauso-uso di Debata. Tung
saluhut do ndang dapot pujion di adopan ni Tuhan i. Tapamanat ma bindu 3 dohot 4! Molo dihatahon
apostel Paulus di bindu 3 i, taringot saluhut jolma na di portibi on nunga mardosa, jala saluhut jolma dang
margogo paluahon dirina sian hamagoan. Hamagoan do upa tinuhor ni dosa (Rom 6:23) alani i ingkon
hamagoan hian nama ujung ni hajolmaon.
II. Hatorangan Ni Turpuk
Di turpuk jamita on ditaringoti apostel Paulus si Abraham, gabe sada bukti do i; haru si Abraham
ompu dohot ama ni naporsea i, dipintori marhite haporseaon. Ai nang pe tardok si Abraham ama manang
ompu ni naporsea, ndang jumpang si Abraham hapintoran molo sian ulaonna sambing, ai mardosa do
nang si Abraham.
Nang di ayat 5 didok do i; Sipintori na jahat. Ido umbahen dihatahon apostel Paulus tu halak Jahudi
na di Rom taringot tu si Abraham. Sahalak na mansai sangap, jala ompu nasida, hape ndang tarbahen
pintor so holan ala ni haporseaonna. Ima dihatahon apostel Paulus asa tarjalo nasida paboa ndang ala uli
ni ulaon manang alani Patik i be, manang alani parsunaton, umbahen malua hita, tung holan alani
haporseaon dohot basa-basa ni Tuhan i do.
Sian turpuk jamita, adong lima hal na porlu tatangkasi:
1. Abraham Ompu Pardagingon ni Jahudi, jala Ompu Partondion ni saluhut jolma (ayat 1-2)
Di ayat 1 didok, “Abraham, amanta i, taringot tu daging”, dipatorang do ompu nasida do si Abraham
mangihuthon pardagingon. Jala tung jotjot do halak Jahudi paburnang diri paboa nasida pomparan ni si
Abraham. Nian ndang apala sala i, alai gabe so marimpola do i ala sai paburnang diri nasida marhitehon
daging ndada alani partondion manang haporseaonna. Sai didok do nasida pomparan ni Abraham alai
ndang mangantusi nasida taringot tu haporseaon na sintong na di bagasan ni Abraham. Gabe jotjotan ma
mangasahon angka na dapot idaon ni simalolong i ma dipaburnang laos madabu tu ginjang ni roha.
Ido umbahen dipaingot apostel Paulus; ai molo holan ama pardagingon sambing do si Abraham,
gabe so manghorhon do haporseaon ni Abraham dohot padan ni Debata na di ibana tu angka bangso na di
portibi on nang tu hita nuaeng, ai ompu ni halak Jahudi do ibana di pardagingon i. Antong ompu ni
saluhut naporsea do ibana mangihuthon haporseaon partondion i ndada ala ni pardagingon.
2. Porsea Gabe Manghorhon Hasintongan (ayat 3)
Dihatahon apostel Paulus do angka na masa di si Abraham najolo, uju ndang dope marianakhon
ibana. Dihatahon i muse asa tarjalo ni halak Jahudi na di Rom paboa marhite haporseaon ni si Abraham
do taruli ibana gabe bangso nabolon, ndada holan ala torop ni anakna sian pardagingon. Di ayat 3 i
martudu sian 1 Musa 15:6; uju manghatai marpadan Debata tu si Abraham, baga-baga ni Debata
mandok marpinompari ma ibana. Ndang saut di si Abraham baga-baga i ianggo sian alani gogona ai
naung suda gogo do ibana, jala ripena si Sara na hol do. Mangasahon marhaporseaon do ibana mameop
padan na sian Tuhan i. Dihaporseai si Abraham do hata ni Tuhan i, gabe dietong Tuhan ma i hasintongan.
Jala nang pe so masa dope hatiha i, alai gabe sintong do i masa. Ima haporseaon namanghorhon, ndada
alani uli ni ulaonna mangoloi Patik i. Laos songoni do hita dipintori Debata, ndada alani pambahenanta,
tung alani basa ni Tuhan i do.
3. Asi ni Roha do Parpintoran ndada Upa (ayat 4-5)
 Ditihai apostel Paulus do angka parrohaon ni jolma di Rom, asa nian manontong martoruk ni roha.
Dietong Jahudi do ianggo hapintoran naung jinalo ni si Abraham ima silehon-lehon sian asi ni roha ni
Debata dohot hinorhon ni angka ulaon na denggan binahen ni si Abraham. Hape, ndang songoni, holan
ala basabasa ni Tuhan i!
Molo didok ndang alani ulaon nadenggan hita dipintori, i do tutu diparhatopot haporseaonta. Alai
ndang diambati hata ni Kristus jolma laho mangulahon na denggan huhut ndang maralo hataNa i
maradophon angka ulaon na denggan. Apala tahe hinorhon ni namarhaporseaon do hita gabe tarbahen
mangulahon nadenggan maradophon dongan jolma. Jadi ditihai apostel Paulus ima anggapan na mandok;
si Abraham dipintori ala ni ulaonna na denggan i. Dipintori Debata do jolma uju pardosa, parjahat dope
jolma i asa ima dalan ni Debata manogihon jolma tu hangoluan di bagasan haporseaon (ay. 4-5)
Di ayat 6-8, nang si Daud pe dihatahon do; martua do halak na gabe pintor dirajumi Debata, so sian
parulaonna, jala disesai Debata angka dosa dohot hajahatonna. Martua ma halak, anggo so dijujur Tuhan i
dosana tu ibana! Antong ndada upa naso tarjua hinorhon ni ulaon hape rajuman parpintoran i alai tung
basa-basa ni Debata do tu hita saluhut jolma.
4. Baga-baga ni Debata na tu si Abraham, Dilehon dohot nang tu Pomparanna (ayat 13-16)
Di ayat 16 dipatorang apostel Paulus do paboa rap manghaporseai do nasida, ia padan ni Debata
dipatulus marhite si Abraham. Nang tu angka bangso sileban (non Jahudi), digogohi Tuhan i do padanNa,
ai dijangkon do bangso naleban naung porsea gabe huria ni Kristus. Antong saluhut bangsa do gabe
pomparan ni si Abraham marhite haporseaon i. Patar ma disi padan ni Tuhan i namandok teaon ni si
Abraham do tano I, ala gabe ama ibana di sandok bangso na di tano on marhite haporseaon.
Ndada alani Patik umbahen dilehon Debata baga-baga (padan) tu si Abraham dohot pomparanna asa
manean tano i, alai tung alani haporseaonna do. Ai molo mangihuthon Patik ibana manghirim asa manean
tano on, marisuang do haporseaon i. Ai dihatahon do di ayat 15; “Ai dihorhon patik i do rimas; alai anggo
soada patik, laos so adong do pangalaosion.”Alai ndang namandok; sala Patik i, umbahen ndang
manghorhon pasu-pasu Patik i alai ala dang margogo jolma mangulahon hata ni Patik i.
5. Di bagasan Jesus Kristus do hita Dipintori jala Dapot Hangoluan
Mangihuthon Rom 3: 22-25 naung ginohan ni Jesus i do patik i, Ibana do singkatta manaon upa
ni dosa. Alani i, ganup jolma namarhaporseaon tu Jesus Kristus, dipintori hinorhon ni haporseaonna. Jala
dung dipintori, mardame ma hita jolma dohot Debata marhitehite Jesus Kristus. Laos marhitehite Ibana
do saut masuk hita tu asi ni roha nabolon i dohot hangoluan namanontong i.

III. Panimpuli
1) Marroha mauliate ma hita di adopan ni Tuhanta Jesus ala ni balga ni asi ni roha dohot basa-basaNa
namamintori hita uju gabe pardosa dope hita. Ido dalan ni Tuhan i manjou jala manogu-nogu hita tu
hangoluan di bagasan haporseaon dohot hatiuron.
2) Unang ma hita paburnang diri, di adopan ni jolma tarlumobi maradophon Debata, ai nang hita pe
dang tapangasahon hita gogonta, pingkiran nang uli ni ulaonta ianggo tung paluahon hita sian
hamagoaan ala ni dosa i. Ai upa tinuhor ni dosa do ianggo hamatean (hamagoan), alai basa-basa ni
Debata do hangoluan. Ido da na itahalashon, gabe marria ni roha hita mangihuthon jala
manghaporseai Tuhan Jesus.
3) Manontong ma hita mangasahon haporseaon, ai anak ni si Abraham do nang hita. Si Abraham do
ama jala ompu ni naporsea, ai sahat do baga-baga ni Tuhan i nang tu saluhut hita.
4) Tapelehon/ tapasahat ma dirinta tu Tuhan i gabe naposoNa, marhaburjuon mangula ulaon nadenggan
tanada mauliate ni rohanta tu Ibana bahen hasangaponNa. Unang be olo hita parhatobanon ni sibolis i
gabe siula hajahaton. Alai muba ma rohanta jala mangadop tu Tuhan i, ai nang Jesus pe dipelehon
do diriNa bahen hangoluanta, pola tarsilang jala durus mudarNa asa dapot parpintoran hita.
5) Di Minggunta Remincere sadari on, namarlapatan “Sai ingot ma ale Jahowa denggan ni basaM”,
songoni do hita manghaporseai Tuhanta Jesus. Mangido di denggan ni basaNa sambing asa dapotan
parpintoran hita. Martangiang do hita; “Sai ingot ma hami ala ni denggan basaM”, ndang alani
parulaonta naung denggan.
 MANOMBA DEBATA SIAN NASA ROHA
(Menyembah Allah dengan Sepenuh Hati)
Minggu Okuli, 12 Maret 2023
(Psalmen 95: 1-11 )
I. Patujolo
Kitab Psalmen, i ma sada kitab puji-pujion dohot parsombaon tu Debata. Na tama endehonon halak
na porsea, patuduhon parsombaon dohot pamujionta tu Jahowa disiala saluhut angka pambahenanNa di
ngolun ni jolma sahat tu sadari on. Ragam do naung tabolus di hasiangan on alai tung na so hea
dipasombu Jahowa hita punjung mangadopi dohot mamolus saluhutna i. Turpuk jamita minggu on
manaringot parsombaonta tu Jahowa, Debata na sun badia. Parsombaon na songon dia do na ditaringoti
turpuk jamita on? Ai ndang na saluhut parsombaon hape gabe dihalomohon Jahowa sian hita?

II. Hatorangan Ni Turpuk

Turpuk jamita on ima ende ni parpsalmen na masoarahon panjouon asa marsomba tu Jahowa Debata.
Dipanghilalahon parpsalmen on do gogo manang huaso ni Debata nang pangaramotion ni Debata di
ngoluna. Di ayat 1-2 disosohon do asa mangendehon Jahowa jala mangolophon Partanobatoan ni hatuaon.
Marende ima ulaon na pabotohon na di bagasan rohana marhite nada asa halak na mambege, mamboto
jala mangantusi dia do lapatan manang tona na dipasahat marhite ende i. Mangendehon Jahowa jala
mangolophon partanobatoan ni hatuaon ima sada panindangion na mansai bagas taringot parsaoran jala
panandaionna tu Jahowa, Debatana. Hata mangendehon Jahowa ingkon do hata na haruar sian ateatena
jala na manghatindanghon pandonganion ni Jahowa di ngoluna. Jala marhite i halak na mambege manang
na manangihon hata ni ende i mangantusi tona ni hata ni ende i jala marhite i lam ditanda nasida ma
Jahowa, Debata.
Aha do alana umbahen parpsalmen mangolophon Jahowa? Diparhatopot parpsalmen do taringot
huaso dohot gogo ni Jahowa, Debata na dihaporseana. Di ayat 3-5 dibaritahon do ulaon ni Jahowa,
Debata na manompa saluhut nasa na denggan sian na so adong gabe adong. Jahowa do nampuna saluhut
jala na mangatasi angka debata na adong di portibi on. Torop do angka debata na di portibi on tarlumobi
uju panurat ni turpuk on na ganup bangso adong do debatana jala bangso i mambahen debatana hombar tu
na ringkot di bidang ni ngolunasida. Molo bidang partanian adong ma debata na hombar tusi, songon i do
di bidang na asing. Jala dibahen nasida do debata i hombar tu na dihaporluhon nasida. Alai anggo Jahowa
ima Debata na so ditompa tangan ni jolma jala Debata na so dibahen hombar tu pingkiran ni jolma.
Jahowa, Debata do nampuna jolma i dohot na tinompana, jala sude debata na dibahen angka jolma adong
di toruNa. Guru di Jahowa do punsu ni angka dolok na marpardomuan tu inganan ni angka panombaon
sude angka bangso tu debatana. Tutu ma Jahowa do Debata Pargogo na so hatudosan, jala Ibana do Raja
nasa na tinompaNa, jala guru tu Ibana do saluhutna.
Molo songon i do gogo ni Jahowa, Debata mansai tama ma hita manungkap dohot marsomba,
marsinggang tu jolo ni Debata. Ibana do Debatanta jala hita ma bangso pinarmahanNa, jala birubiru ni
tanganNa. Sadari on, aut ditangihon nian soaraNa i! Hata “sadari on” paboahon unang be marnalemba,
unang be gok sidalian, unang be mandok haduan ma i, manang jolo adong tingki. Sadari on, ima
partingkian saonari (segera) manangihon pangontangna, manangihon panjounNa marhite saluhut hata
dohot pambahenanNa. Parmahan na di tanganna adong tungkot dohot linsinglinsing asa sude angka na
pinarmahanNa ndang adong na mandao manang lari sian na dihalomohon ni Jahowa. Ndang dihalomohon
Jahowa angka na pinarmahanNa mago alai sai dilului jala diajar do angka na pinarmahanNa i asa hot jala
mian di panggomgomanNa. Nang pe mansai maol do diantusi torop jolma taringot Jahowa na gabe
parmahan di ngoluna di ragam na masa di ngoluna.
Parpsalmen paingothon angka pangalaho ni halak Heber/ Israel na mansai tangkang uju di Meriba
songon ari uju masa pangunjunan di halongonan. Pangalaho na masa di Meriba boi do i taida di 2 Musa
17:1-7 na manggombarhon parange na so mandok mauliate di sude pambahenan ni Jahowa di
ngolunasida. Parange na so adong pos ni roha di pandonganion dohot panarihonon ni Jahowa di ngoluna.
Sai jotjot do roha biar, holso dohot parange na sai marungutungut. Parange ni hatoban na so mananda
haluaon jala ndang mangalapati pandonganion manang parmahanion ni Jahowa ni ngoluna. Parange ni
hatoban na mansai tonggi di parhatobanon na marhapatean tu hamagoan, jala ndang sahat tu hapatean ni
tano na niuarihon Jahowa tu nasida. Dang adong na sahat sundut na haluar sian parhatobanon ni Misir
hinorhon ni pangalaho manang parange nasida na sai marungutungut jala ndang adong roha na unduk tu
Jahowa asing ni si Josua dohot si Kaleb (ida 4 Musa 14 : 29-30). Hinorhon ni ungutungut jala ganggu ni
roha boi do mambahen jolma i ndang be tangkas manghilalahon pangaramotion dohot panarihonon ni
Jahowa di ngoluna. Laos tubu ma parange na holan menuntut.

III. Panimpuli
1. Asa sai tongtong hita marhatopothon gogo manang huaso ni Jahowa na mangatasi saluhutna.
Debata na so ditompa pingkiran ni jolma, alai Debata na manompa jolma.
2. Itahangoluhon ma pangaramotion dohot panarihon ni Jahowa di ngolunta. Molo aut sugari boi
itabilangi sude pambahenan dohot panarihon ni Jahowa Debata di ngolunta, ra ndang hasuhatan
jala ndang tarhabilangan saluhutna. Ndang tarasam sude denggan basa ni Jahowa. Molo songon i,
tama ma nian hibul dirinta manomba Ibana. Marsomba tu Jahowa ndang boi malua i sian
mamelehon hibul dirina gabe ampuna ni Debata, jala mangudut tu parange na unduk di hata ni
Debata.
3. Mansai tonggi dame do panghilalan molo boi dipanghilalahon pandonganion dohot panarihon ni
Jahowa di ngolunta. Disarihon do ngolunta boi marhosa saonari, dohot ragam pasupasu ni
Jahowa. Antong, boasa be adong mian holso, hatahuton mandalanhon ngolu, jala na sai jotjot
menuntut na boi mambahen hita ndang sahat tu inganan na naung niuarihon ni Jahowa marhite
Jesus Kristus tu angka na satia.
4. Minggu Okuli ima minggu na manjou hita asa mangaranap tu Jahowa Debata (ida Psalmen 121).
Mangaranap tu Jahowa tontu adong na ditundalhon. Aha do na ringkot ditundalhon uju
mangaranap hita tu Jahowa. Ima bangkobangko na jat, parmusuon, neang ni roha, hadatuon,
parungutunguton, hansit ni roha, dohot angka saluhut ulaon na so dihalomohon ni Jahowa.
5. Mangaranap tu Jahowa ingkon do sian nasa roha. Marhite panatapon i adong ma parsombaon.
Manatap tu Jahowa, Debata na badia jala pargogo na so hatudosan. Sian Jahowa do ro
pangurupion dohot haluaon tu hita. Halak na sai tongtong mangaranap tu Jahowa ima halak na
marposniroha tu Jahowa, manghirim di angka pambahenanNa na denggan i, marhasatiaon
mangulahon na denggan dohot mangurupi angka na gale nang na hurangan. Dapotan gogo dohot
tua ma ganup jolma na sai mangaranap tu Jahowa di ngoluna.
 MARLAS NI ROHA ALANI HAPORSEAON
(Bersukacita Karena Percaya)
Minggu Letare, 19 Maret 2023
(Johannes 9 : 35-41)
I. Patujolo
Marnida do nian alai dang marroha, hira ima kondisi na masa di turpuk on. Torop do nang nuaeng
masa songon on. Mata pardagingonna marnida alai anggo tondina ndang marnida, ala mate do
haporseaonna. Dipabali angka natorop i halak Jahudi dohot angka siboto surat na paihutihut Jesus do
sahalak na mapitung na masihol manjanghon hamamalum sian Jesus. Dampak ni ketidakjujuran i dohot
pangiburuon na sai balga gabe so diantusi nasida be tujuan ni na mangihuthon Jesus. Dilabeli nasida do
dirina songon parmahan na denggan jala daulat roha alai mago anggo birubiruna.

II. Hatorangan Ni Turpuk

Dibuhai do turpuk on sian pangajarion ni Jesus, sogo ni roha ni halak Farise marnida Jesus. Topet di
ari Sabat tongon diungka Jesus simalolong ni sahalak na mapitung marhite gambo. Laos gambo ima
dibahen nasida manungkun Jesus, hira na mandok: laos gambo ma baenon laho pamalumhon na
marsahit? Dia dalanni gambo baenon tu mata. Ala so tarjalona Jesus. Beama carana on gabe halak ni
Debata Ibana? Dang soal setuju manang so setuju nasida, alai boi nihilala ala ni sogo ni rohana do. Masa
ma perdebatan hatiha i halak Farise dohot angka na mangihuthon Jesus.
Adong do pemahaman di halak Jahudi molo na mapitung tubu diangga gabe dosa na balga. Ai gabe
mabiar do natorasna marnida halak Jahudi (22), gabe mardos ni roha ma angka Jahudi ingkon pabalionna
sian huria, tarlumobi angka na mamparhatopothon Kristus. Gabe sai dibulli nasida do na mapitung i
mandok: “Pasangap ma Debata! Huboto hami do, pardosa Halak i”. Pandohan on songon na umbadia
nasida sian na mapitung i, songon na memaksa asa unang dibela na mapitung i Jesus. Gabe dibege jala
dialusi Jesus do perdebatan nasida i huhut ma dibela na mapitung i. Situasi on ma na didok: “lempar batu
sembunyi tangan.” Manutupi hahuranganna, dibulli donganna. Mandok parmahan na denggan nasida
didirina, alai dipabali do angka birubiruna. Sarupa ma i tu torop masa na parpudion, manutupi dosana,
pola dibunu ajudanna. So mararga dibahen ulaonna nang mudar ni jolma i asa unang diboto jalak na
ibana do sumber ni dosa i, diumpanhon ma donganna.
Torangna dipatandahon Jesus ma diriNa Anak ni jolma i. Gabe lam bagasma panandaion ni na
mapitung i taringot tu Jesus. Andorang so jumpang nunga diboto ibana ai panurirang do Jesus (ay. 17),
dungi didok muse “na sinuru ni Jahowa” (ay. 33). Di turpuk on dipatuduhon Jesus ma diriNa “anak ni
Jolma” (ay. 35-37). Pembelaan ni Jesus on ma mambahen na mapitung on lam tang mananda Jesus. Nian
dang piga halak na boi songon pengalaman ni ibana. Justru godangan dope namananda Jesus holan
sebatas ala hinaringkotna, so tuk marnida tujuan ni Jesus ro paluahon ibana. So tuk haporseaonna porsea
boasa pola ro Jesus dilehon kesempatan boi jumpang dohot Jesus. Holan sian pingkiran dohot
panghilalaanna dibahen laho mananda Jesus. Gabe sai dipakoras ma rohana ndang tarjalo rohana Jesus.
Sai ditulak ibana do haroro ni Jesus sipalua i jala masuk tu horong ni halak Jahudi dohot Farise na
manghasogohon Jesus, gabe diambati haporseaonna jonok tu haluaon i. Nian boi doi alasan i, dang adong
na hot parrohaon di portibion, na deba lam dipajonok alai lam torop muse na manghasogohon, bahkan
lam dipadao dirina sian haluaonna, manghasogohon Jesus.
Tangkas do disungkun Jesus na mapitung i, mandok:”na porsea do ho di anak ni jolma i?”. Mulana
i, dang dope jelas panandaion i, gabe dialusi: “Ai ise do i, Tuhan, asa huhaporseai ibana”. Dungi
dipagomos Jesus ma roha ni na mapitung i mandok: “Na niidam, na mangkatai dohot ho, I ma Ibana.
Sian on ndang apala dipatorang na mapitung on. Alai tontu dibalos ibana do gomos Jesus patuduhon
haporseaonna: Na porsea do ahu, ale Tuhan! Laos disomba ma Jesus. Pandohan on rupani patuduhon
respek ni na mapitung on na tung gomos do las nirohana, intor dipatuduhon ibana do bukti ni
haporseaonna. Berbeda sian na torop i, sai dipaihutihut Jesus, sai olo mandok parmahan na denggan, sai
ringgas mandok porsea jala mananda Jesus alai dang tarida rupani ‘Bukti ni haporseaonna’. Godangan ma
i holan mandok, hape dang disosoi rohana, ngoluna ro manghaol Jesus.
 Hamubaon ni roha ni na maoitung i do mamboan ibana malum jala dapotan las ni roha. Ai boi ibana
jumpang dohot raja ni Hamalumon i. Awalna na mapitung alai rohana marnida do di Jesus. Ndada holan
simalolong dipamalum alai dohot do rohana dipangolu. Roha na marnida ima haimbaruon na umbalga
jala nyata. Porsea do ibana di Anak ni jolma i ima Sipalua. Petunjuk ma i ai torop dope jolma simalolong
ni pamatangna na marnida alai rohana dang mangolu. Sangat beresiko do roha na songon i. Naeng
idaonna jala naeng malum, naeng paluaona alai dang diungkap rohana jala dang dilehon rohana tu Jesus,
dang dilului rohana haluaonna. Tu angka halak na magopu, na mago, na mmapitung do ro Jesus i. Sian on
taida na gagal do halak Farise dohot Jahudi marnida holong ni Jesus i. Ndang diboto nasida na ro Jesus tu
angka na lilu na masihol jumpang dohot Ibana. Daniel 7 dohot Psalm 2 didok na marhuaso do Anak ni
Jolma i mangalehon hamalumon dohot haluaobe sidegedegean ni patna. Dilehon Jesus do tu angka na
porsea tu Ibana roha na marnida jala sadar ala ni dosana na sai laon gabe sundat ibana pajumpang dohot
Jesus haluaon i. Istilah dosa dison disejajarhon dohot kebutaan, kebutaan mata partondion lumobi. Sadar
na holan Jesus do na tuk pamalumhon simalolongna, ndada holan sebatas simalolong ni dagingna,
naumbalga pamaluhon simalolong partondionna, ima roha na magopu na sai laon. Gabe marnida do
angka na mapitung, na sadar botul mangharinghothon haroro ni Jesus.
Sipata olo do jumpang hita dongan na so barani marsaor dong donganna jolma ala perbedaan status
sosial, ekonomi, kedudukan bahkan jabatan. Dibagasanna adong ma i hinorhon ni perbedaan agama dohot
marga, gabe so sarobang gabe so saulaon. Artina nunga tung maol situtu tubu las ni roha di angka
punguan sisongon i. Hape dia ma? Hatiha molo so disadari jolma i perbedaan status i, gabe tarsirang do
nasida sian holong ni Jesus, gabe mardosa ma nasida, ai so marroha. Ai so marnida simalolong
partondionna nang pe marnida simalolong pardagingonna. Artina dang adong be holong molo so adong
roha. Ai mapitung do tutu panghilalaanna, dang sadar Jesus do na ringkot di ngoluna, maila ibana
pajumpang dohot Jesus ala umbiar mida angka pengaruh ni angka raja dohot petinggi ni portibion.

Torop dope di pudian ni ari on na mangambati donganna na ro tu Jesus, gabe pangambat hangoluan.
Kebutaan rohani ma goarni on na gagal marnida hamuliaon ni Kristus i, gagal mangantusi dalan
hasintongan jala na badia, ala nafsu jala holan pingkiranna dibahen mananda haluaon i. Gok pamaloson,
kelicikan dohot parmainanon (skenario). Ndang ditanda ibana na Tuhan i do tujuan ni ngoluna, hape sai
dipajolo egoisna dohot pandanganna dibahen memahami Jesus. Sai manontong ma ibana mian di
hadosaon. Sotung ma hita mangantusi na marlaok dosa alai dang tatanda hadirionta na marhagaleon, dang
tau hita na ringkot di haluaon, ai sai saguru di dirionta hita mareoteot. Gabe sai tading hita di habusukon
dohot kecemaran, hape sai songon na mengemis. Ndanga dong perubahan, ndang hamubaon, kan nga
susa be. Ummansit dope angka halak sisongon i, nga mapitung simalolong ni dagingna alai laos mapitung
muse simalolong ni rohana. Taingot ma tong: “Angka na mariluilu laho manabur, marolopolop do sogot
laho manggotil. Mardalandalan pe ibana huhut tangis pausungusung boni sisaburhononhon, ro do ibana
sogot marolopolop mangusung angka tibalanna. (Psalm 126:5-6).

III. Panimpuli
Sai unang ma adong sian hita songon horong ni halak Farise dohot Jahudi,na gabe penghambat di
haroro ni jolma i tu Jesus. Bahkan na sai olo mambulli molo lam ringgas donganna mandohoti ulaon
partondion. Na lumea sian na lea do anggo jolma sisongon i. Mengemis di haluaon i jala ditanda do Jesus
alai gabe mangiburu molo ro rap dohot nasida kelompok na berbeda status dohot nasida. Gabe dang
manghorhon hamamalum. Ai rope haluaon i holan tu angka na ro tu Jesus do i na ro sian roha na magopu,
tertekan alai huhut sadar di hagaleonna. Jala ingkon tau ibana dang adong haluaonna dina asing so holan
dibahasan Jesus. Baliksa, songon dia do sikapta songon na porsea molo taida sai adong dongan na
dikucilhon ala perbedaan status?
 Beha ma tutu padomuhon na berbeda status, apalagi songon dia ma caranta mambege poda/sipaingot
manang parguruan sian status/levelta na tumoru sian hita. Yakin tung na maol situtu do i. Alai naeng
patuduhonon ni Jesus tu hita bukti ni holong i, ndang tarihot ibana tu status dohot level ni jolma i. Sandok
tu angka na magopu na ro tu ibana do. Unang ma songon halak Farise i hita gabe sai tadok donganta
rendahan, gabe sai monang di pandohan hape dang tarida di bukti ni holongta. Nian nunga atar tumorop
halak na bahkan berlomba menang debat alai dang monang patuduhon bukti ni holongna. Selesai ma, asa
boi marlas ni roha, pagomos ma haporseaonta Jesus alai tumangka ma tatanda ibana haluaon i.Unang be
sai menganggab tumoru dongan mi, alai bersediama gabe dalan haluaon songon Jesus, songon tanda ni
minggu, Letare na marlapatan marlas ni roha.
 ULAHON MA HATIGORAN DOHOT HASINTONGAN
(Lakukanlah Keadilan dan Kebenaran)
Minggu Judika, 26 Maret 2023
(Hesekiel 45 : 9-17)
I. Patujolo
Hesekiel marharoroan sian hata heber yekhezqe’l na marlapatan Debata na mampargogoi.
Hesekiel sandiri anak ni sahalak malim na tading jala mangkobasi di Jerusalem (1:3). Si Hesekiel dohot
do tarbuang tu Babel rap dohot panurirang Daniel (Dan 9:2). Di Babel, Hesekiel ditanda natorop, jolma ni
Debata na manurirangi (14:14, 28:3). Mangoli do si Hesekiel songon halak Jahudi na asing na
dihabuangan, na maringanan di topi sunge Kebar (1:1, 3:15-24, bnd. Psal 137:1). Jala panjouonna gabe
panurirang dijalo ibana hatiha ditano habuangan Babel do di sunge kebar. Buku Hesekiel marisi 48 bindu
jala adong 1273 ayat. Diperkirahon digurithon hira-hira taon 590-570 sM di Jehuda dohot di Babel. Jala
ondolan ni buku Hesekiel ima: Panguhuman jala hamuliaon ni Debata, rimas jala holong ni Debata.

II. Hatorangan Ni Turpuk

Adong piga-piga hal naboi ni sagi dibagasan turpuk jamitanta di minggu on, ima :
1. Tangung-Jawab Tohonan Ni Angka Induk (ay 9)
Turpuk on secara khusus tu angka induk, molo dihata heber dipangke hata nesie yisrael na marlapatan
pangeran Israel. Jadi hata nesie manang induk patoranghon huaso manang tohonan na adong di sasahalak
jolma laho mangatur angka na di toruna. Jotjot diulahon angka induk uhum manang penyalah-gunaan
kekuasaan. Didok Debata dihata heber enough na marlapatan paholang ma angka ulaon si songoni. Molo
tarajumi tahe, tohonan induk marharoroan sian Debata do, alai boasa parulaonna justru pataridahon
parange haportibion isarana pangarupaon dohot hamagoan, boasa dipangke tohonan induk i gabe
manosak, mangonjar angka bangso ni Debata sian partalianna. Turpuk on mangido ingkon adong ma
reformasi diangka ulaon ni induk tu hasintonganna ima mangulahon uhum (Ibr:tsedaqah) dohot hatigoran
(Ibr : mishpat).
2. Sintong Ma Angka Timbangan Pelean Muna (10-17)
Ia dihalak Israel dimasa Heskiel sistem pelean tu Debata ima parsampuluan, jala aturan i diulahon
malim di bagas joro dibagasan legatimasi ni angka induk harajaon Israel. Artina ndada holan hepeng na
gabe pelean ni halak Jahudi kuno di bagas joro, dipasahat do eme, miak, anak ni birubiru, na gabe pelean
situtungon, pelean pardosaon, pelean hamulitaeon, pelean pardengganan. Molo angka induk nunga papeol
uhum, tontu ditoruna pe ingkon lam peol do. Asa i do reformasi i ingkon parjolo do masa sian ginjang
dungi mangihut ma tutoru. Diulaon bagas joro pe nunga dang sintong be angka timbangan, ampang dohot
poting. Artina, nunga jotjot masa angka timbangan na manipu hatiha i di Israel sahat tu angka timbangan
pasahathon ragam pelean tu Debata di bagas joro i. Asai do di turpuk on diulahi Debata muse paturehon
angka pelean ni bangso i naung somal margabus bangso i diangka peleanna.

III. Panimpuli
Goar ni minggu ima Judika, na dibuat sian Psalmen 43:1 na mandok elohim shaphaten i na
marlapatan luluhon au ale Jahowa. Jala dihata Latin didok judicum napatoranghon uhum na sintong.
Adong pandohan hata Batak na mandok: ‘Molo litok aek ditoruan, tingkiron ma tu julu. Arti ni pandohan
i patoranghon adong penyebab utama di angka na masa, molo dipature masalah sian penyebab utama
gabe tio ma saluhutna. Ahama penyebab utama? Ima ulaon partondion ni jolma. Molo nunga litok
spritualitas ni jolma i, mangkorhon ma i tu halitokon di sude parulaonna, mulai sian parumah -tanggaon,
pansarian ni ngolu si ganup ari, sahat tu angka parsaoran paralealeon, gok gabus. Dos do i songon
hansitan ipon; olo do mangontak hansitna sahat tu simanjujung jala olo gabe demam. Dang na malum
sahiti molo na ta inum obat hansit ulu manang demam, alai holan ta inum obat hansit ipon tor malum do
sude sahit i nang ulu manang demam. Suang songoni ma, molo nunga ture partondionta, nunga somal ta
ulahon tsedeq (hatigoran) dohot mishpat (hasintongan) dipartondionta, mangkorhon gabe sintong ma sude
parulaonta siganup ari.