Partingkian na nilehon niTuhan tontu na umdenggan

Ibagasan Barita Nauli sadarion, ngolu ni si Hana boi gabe tiruan di hita. Hana sahalak
panurirang, nunga mabalu jala nunga matua. Hatop hian imana mabalu, holan pitu taon do imana
rap dohot parsinuanna. Sai jotjot do nasida marpuasa jala martangiang mangoloi hata ni Debata,
arian dohot borngin. Isi ni tangiang na, i ma, asa ro ma sipalua paluahon Israel, tarlumobi
Jerusalem sian penjajahan halak Romawi di tikki i.

Songon naung i ramalhon, Sipalua ro do mangalehon hatiuron di hagolapon ni bangso Israel.

Dang marisuang parjuangan dohot sude tangiang ni si Hana. Di ari parpudi di uju ni ngoluna,
imana boi pajumpa dohot sipalua, di tingki Jesus, i pasahat hu joro ni Debata songon hasomalan
ni bangso Jahudi mangelohon anak na siangkangan hu Debata. Ulaonon porlu situtu saturut hu
Haruaron 13:15, anak siangkangan gabe ugasan ni Debata napaluahon bangso Jahudi di tingki
sude anak siangkangan ni halak Mesir, ibunuh di tingki borngin paskah.

Alani las ni rohana, ibana mamaritahon Jesus tu sude jolma. Las si tutu rohana jala sude
halojaonna dang marisuang.

Damang dainang, dohot sude naposo bulung..

Marhite naung di hilala ni si Hana, adong dua onjolan ni jamita sadarion. Naparjolo, sude
parjuangan na diramoti Tuhan dang laho marisuang. Debata dang manjanjihon parbue tu sude
usaha, alai lasni roha tu sude jolma na tutu si tutu mangulahon ulaonna.

Sungkun-sungkun tu hita, boha do pamototta aha na ta parjuanghon, iramoti Debata?

Asa i pasu-pasu Debata, aha na taparjuanghon ikkon tutu bonar jala dang holan naeng
mangauhon tu dirinta sandiri. Songon Barita Nauli nakking, Hana manangianghon haluaon hu
bangso Israel, dang holan haluanon ni dirina sandiri. Molo na i ulahahon i rumar, umpamana
adong OMK na olo manangko, pasti do dang i pasu-pasu Tuhan.

OMK Stasi Sinaga Uruk nunga marjuang saleleng sabulan on paradehon natal on. Manghorhon
las ni roha manang dang, sude, i tontuhon dirinta sandiri do. Molo hita marjuang asa denggan
sude pasti do i manghorhon las ni roha alai molo hita marjuang holan asa patar dirinta, idok
rohangku dang manghorhon las ni roha i.

Umpamana molo adong marjuang manortor, marende, maruning-uningan, dohot lan naasing alai
holan asa i puji natorop, idok rohangku dang gok las ni rohanta sadarion. Alai molo adong
marjuang, marende, maruning-uningan dohot lan naasing asa OMK Stasi Sinaga Uruk lam
denggan jala lam maju, isi ma idok rohakku gok las ni rohanta. Molo tujuanta hamajuon ni
OMK, idok roha, hodok, tikki naung tapangke, sipata adong do ra namarsihansitan roha ibagas
latihan, sude i gabe manghorhon las ni roha molo ibagas rohanta, taulahon on asa OMK Stasi
Sinaga Uruk lam marsaringar hu sandok portibion.

Ra penampilan annon un jago do sian tikki latihan na parpudi manang unjago latihan na parpudi
sian penampilan annon, on dang pala gabe masalah di hita. I sude dang mangorui penampilan
muna secara fisik (adong namarkabaya, adong namarjas, adong natebal make up na). Na porlu
hamu nunga marjuang mangalehon diri humonghop OMK Sinaga Uruk on.

Paduahon, Partingkian na nilehon ni Tuhan tontu na umdenggan. Na so ngolngolan do si Hana

martangiang martaon-taon? Manang na so heado sungkun-sungkun rohana taringot hu sude
pangidoanna tu Tuhan i? Idok rohangku si Hana tongtong do porsea na pasauton ni Debata do
sude tangiang na i. Di umurna na pa ualu puluhon (80) Tuhan pasauthon tangiang na.
Hasabamon ni si Hana marparbue. Nian si Hana naeng do hatop rohana mamereng si Palua i, alai
Debata patulushon tangiang na di tingki na dumenggan i Debata.

Ra molo tangiangta dang i pasaut Debata, olo do hita mandele! Hana gabe teladan di hita na laho
torus martangiang paimahon tikki nadenggan sian Debata. Ibagasan tangiang ta, tongtong ma
nian lomo ni roha ni Debata na saut dang lomo ni rohanta asa boi hita marlas ni roha ibagasan asi
dohot holong ni Debata.

Taon 2021 (dua ribu dua puluh sada) tongkin nari naeng bolusonta na ma jala masuk hita hu taon
2022 (dua ribu dua puluh dua). Ta halashon taon naimbaru marhite tangiang jala tongtong
tahalashon basa-basa ni Debata na dilehon tu hita ganup marsada-sada salelengon.