Partording Ni Acara Ulang Tahun ke-71 Ny. Hutapea Br.

Tampubolon
Senin, 05 Juli 2021; 17.00 WIB
Ditanganna siamun do ganjang ni umur, jala dihambirangna do hamoraon dohot hamuliaon.
(Poda 3:16)

I. Partangiangan
1. Marende B.E. No. 15 : 1 + 4
1
Aut na saribu hali ganda saringar ni soarangki.
Naengnasa gogo bahenonhu mamuji Debatantai.
Paboa las ni rohangki, hinorhon ni pambaenNa i.
4
Mauliate ma rohangku di ho o Debata tongtong.
  Dibaen sude denggan basaMu, naung nilehonMu di au on.  
  Ai dipatongon Ho tongtong sude na ringkot di au on.

2. Votum – Introitus :
Ket : P = Paragenda; S = Sude.
P : Marhitehite goar ni Debata Ama, dohot goar ni Anakna Tuhan Jesus Kristus
dohot goar ni Tondi Parbadia.
S : Amen
P : Puji hamu ma Jahowa, baritahon hamu ma goarNa i. Pabotohon hamu
ditongatonga ni angka bangso pambahenanNa i.
P : Endehon hamu ma Ibana, palu hamu ma parhinaloan umpuji Ibana.
S : Jahowa do partanobatoanhu dohot haporusanhu, jala sipalua ahu, Debatangku.
Sitiopanhu, marhaposan tu Ibana do ahu, lombulombungku dohot tanduk ni
partuaonku, haporusanhu.
P : Tunggulhon hamu ma goarNa na badia i, marlas ni roha ma angka na
mangalului Jahowa.
S : Puji ma Jahowa ale tondingku, jala unang tung halupahon denggan ni basaNa
sudena.
P : Jahowa do Debatanta, sar tu liat portibion do angka uhumNa.
S : Haleluya
P : Martangiang ma hita: Ale Debata parasiroha na sumurung, tung so hasigatan do
angka dalanMu, jala tung so habilangan do asiasiM di ngolunami. Nunga dilehon
Ho umur na ganjang tu Ny. Hutapea/ Br. Tampubolon gonap umurna 71 taon.
Dilehon Ho do angka basabasa dohot sude pasupasuM. Pinuji ma Ho Tuhan siala
denggan ni basaM na mangaramoti dohot mangiringiringi ibana saleleng 71
taon on. Tung diparmudumudu Ho do ibana jala talup marlas ni roha. Sapala
naung diasii Ho ibana, tung parorat ma ibana asa tongtong mangolu dibagasan
asi ni rohaM. Pasupasu hami keluarga nang sisolhotna, ro di sude na pungu di
son asa Ho na tongtong hupuji hami, dipasahat hami tangiang pamujionnami on
di bagasan goar ni AnakMu Tuhan Jesus Kristus Tuhannami. Amen.
3. Marenda B.E. No. 753 : 1-2
1
Dipardalanan Jesus di jolongku, holong ni tanganMi manogu au.
Nang di ngolungku Ho do sombaonhu, tung sonang mardalan raphon au.
Reff : Huboto do tangkas panoguonMu, diiringiring Ho do langkangki.
Sahat ro di ujung ni pardalanhu, togu ma au jonok tu lambungMi.

4. Manjaha Turpuk; Psalmen 23 : 1-6 “Pujipujian di Panarihon ni Debata”

P : Jahowa do siparmahan ahu, ndang tagamon hurangan ahu.
S : Dipatongon do ahu tu jampalan angka na lomak, ditogutogu do ahu di lambung
ni aek hasonangan.
P : Dipasabam do rohangku, ditogu do ahu di dalan hatigoran, ala ni goarNa i.
S : Ai nang pe mardalan ahu di rura linggoman ni hamatean, ndang huhabiari
parmaraan, ai Ho do mandongani ahu tungkotMu dohot batahiM mangapuli
ahu.
P : Ho do manutup meja dijolongku maradophon angka musungku, dimiahi Ho do
ulungku, suksuk do panginumanhu.
S : Tongon tahe denggan basa dohot asi ni roha mangihutihut ahu saleleng ahu
mangolu, jala dung mulak ahu masuhanku ma bagas ni Jahowa salelenglelengna.
P : Martua do angka na manangihon hata ni Debata, jala na umpeopsa.
S : Amen.

5. Marende B.E. No. 116 : 1

1
Ditompa Ho do au, sondangi rohangkon,
Tung basabasaMi sude na di au on.
Gomgomi pamatangku, naeng Ho do oloanku, 
Sai lehon ma gogongku, LomoM naeng ulaonku,
Urupi tatap au tutu, Panompa na burju.

6. Renungan di Panogunoguon ni Debata :

P : Di na tahalashon ari sadari on, tarlumobi di gok ni las ni roha ni Inang S. Br.
Tampubolon na marulang tahun sadari on, lam patar do di hita pangaramotion ni
Debata di sandok pardalanan ni ngoluna. I do umbahen na didok Debata:
S :   Marende ma Ahu nuaeng taringot tu hasianku, sada ende ni haholonganku
taringot tu porlak anggurna: Marporlak anggur do hasianku di punsu ni sada dolok na
napu. (Jes. 5: 1)
P :   Jala dipangkuri, jala dijomputi angka batu sian i, jala disuanhon lopok na
denggan tu si, jala dipauli sada tungkup di tongatongana, jala dihali sada pangilangan di
bagasan, paimahon parbue na tonggi (Jes. 5: 2a). 
Na Ulang Tahun : Nunga dibasabasahon Ho tu au hangoluan dohot asi ni roha, jala
panatapMu mangaramoti hosangku. (Job 10: 12).
S : (Mangendehon Lagu Rohani: Ndang Ala Ni Hagogoonki)
Dang ala ni hagogoonki, boi ahu mardalan di ngolugkon
Aut unang ho na dilambungki, tung so boi ahu songon on.....
Ho do hagogoon manungkoli ahu, hubereng bohim laos martangiang ahu
Mangido pangurupion di ahu, sai tiop tanganku sai togu ma ahu
Ai ho do Tuhan pargogo di ahu.....
 P : Matua di  halak  natuatua  do  luluan habisuhon, jala halak sigodang
umur panungkunan poda. (Job 12: 12).
Na Ulang Tahun:  On do las ni rohangku na umbolon: Molo hubege, diparangehon
angka anakkonku hasintongan i. (3 Joh. 1: 4).
P : Ummarga do i sian angka mutiha, jala sandok arta hasoloan ni roham, ndang
tarpatudos tu si. (Poda 3: 15).

7. Marende B.E. No. 826 : 3

3
Gohi au Tuhan marhite HataMi,
Gohi au Tuhan marhite HataMi.
Asa tang jala matoras au, marhite HataMi,
Gohi au Tuhan marhite HataMi.

8. Jamita (Pdt. B. Parapat, S.Th)

9. Marende B.E. No. 723 : 1

1
Tu joloM o Tuhan sahat ma diringkon, pangke ma au hombar tu lomoM
Molo ndang Ho Tuhan maringanan di au, diringkon ndang mararga be i.
Tung pogos pe dison, manang sonang tahe marsigantung tu Ho sasude.
Holan Ho do huihuthon ndang be diringkon, togutogu ma tu na ture.

10. Tangiang Pangondianon

11. Marende B.E. No. 754 : 1-3 (PP)

1
Gok las ni roha do au di ngolungkon, di ngolungkon, di ngolungkon.
Gok las ni roha do au di ngolungkon, tongtong di rohangkon.
Mauliate gok las ni roha maringan holongMi Tuhan di au,
Mauliate gok las ni roha, maringan holongMi Tuhan di au.
2
Mardame jala sonang do ngolungkon, di rohangkon, di rohangkon.
Mardame jala sonang do ngolungkon, tongtong di rohangkon.
Mauliate gok las ni roha maringan holongMi Tuhan di au,
Mauliate gok las ni roha, maringan holongMi Tuhan di au.

3
Gok do holong ni Jesus di ngolungkon, di ngolungkon, di ngolungkon.
Gok do holong ni Jesus di ngolungkon, tongtong di rohangkon.
Mauliate gok las ni roha maringan holongMi Tuhan di au,
Mauliate gok las ni roha, maringan holongMi Tuhan di au.

12. Tangiang Penutup + Pasupasu

II. Acara Ulangtahun

1. Peniupan Lilin dan Pemotongan Kue
2. Mandok Hata