ACARA IBADAH

PARTANGIANGAN BONA TAON

Punguan Sinambela Boru Bere Ibabere
Se - Duri

Thema :
“MARHAPOSAN TU JAHOWA MA HITA MANDALANI
TAHUN BARU ON !”
(Poda 3 : 5)

Sabtu, 28 Januari 2023

Pukul 11.00 WIB

01. PROSESI PARHOBAS DOHOT JOUJOU MAMUJI DEBATA

(P : Paragenda; H : Huria; A : Ama; I : Ina; S : Sude)
P: Asi ni roha dohot dame sian Debata Amanta dohot sian Tuhan Jesus Kristus ma
mandongani hita di pardalanan ni ngolunta di taon on.
H: Asi ni roha dohot dame ni Debata ma tutu nang na mangaramoti ngolunta di taon
on.
P: Na marlas ni roha do hita sadari on, Hita Punguan Sinambela Boru Bere Ibabere Se -
Duri manghalashon pangaramotion ni Debata dipardalanan ni ngolunta. Asa, Artia
mula ni ari, Sipaha sada mula ni bulan; dipasupasu Tuhanta ma ulaonta sadari on,
manghorhon las ni roha di sude hita na sapunguan. Tubuan anak sipartahi dohot
boru na boi pangalualuan.
P: Nunga pungu hita nuaeng di inganan on, manghalashon denggan basa ni Debata na
mangaramoti ngolunta sian ari, bulan dohot taon naung salpu i, boi hita patupa
Pesta Partangiangan Bona Taon Punguan Sinambela Boru Bere Ibabere on di tingki
on. Antong dia ma sidohononta asa tung gok las ni rohanta di Pesta Bona Taon na
tapatupa sadari on?
P: Pinuji ma Debata, Ama ni Tuhanta Jesus Kristus, naung umpasupasuhon tu hita
ragam ni pasupasu partondion sian banua ginjang, di bagasan Kristus . Tapangke
ma ulaonta sadari on mamuji dohot pasangaphon Debata. Ibana ma tutu donganta
mandalani taon 2023 on, manghirim dipasupasu sipasahaton ni Tuhanta i tu hita.
P: I do tutu! Marparbue na uli ma di hita hata na mandok: Songon pege na
sangharimpang, tu ansimun sisada holbung. Rap mangangkat tu ginjang, rap
manimbung tu toru. Antong, di hita sude Punguan Sinambela Boru Bere Ibabere Se -
Duri na marlas ni roha di tingki on, dohot di hamu amang parmusik nami. Na
denggan situtu do mamuji Debata, mangendehon goarNa na badia i, mamaritahon
asi ni rohaNa manogotna i dohot hasintonganNa bornginna i. Manggora ma ho,
tu Tuhanta Debata Parasiroha jala Pardengganbasa i.
P: Manggora ma ho tu Tuhan Jesus Kristus, Sipalua i.

P: Manggora ma ho tu Tondi Parbadia, Pangapul, Siparorot tondi i.

P: Punguan na hinaholongan! Nunga dipapatar Jahowa holong ni rohaNa tu
hita, nunga saut tapatupa Pesta Bona Taon Punguan Sinambela Boru Bere
Ibabere sadari on, i ma dalan pahothon hasadaonta mangulahon holong ni
roha di sude Punguan Sinambela Boru Bere Ibabere. Tapuji jala tabaritahon ma
goarNa, taolophon ma hamuliaon ni goar ni Tuhanta i. Tinampul bulung bira,
 di toru hau toroptorop, nunga marpungu hita nuaeng mariaria, luhut ma hita
antong marolopolop.
P: Hamu angka dongan na hinaholongan! Ingkon gabe paniru ma hita di holong
ni roha ni Tuhanta i jala marlas ni roha di bagasan Ibana asa mamungka sian
ulaonta sadari on, marsaringar ma barita na uli na tau palashon rohanta
mandalani ariari ni ngolunta di taon 2023 on. Antong sian nasa rohanta,
tasombahon ma parbue ni haporseaon, panghirimon nang holong ni rohanta
tu Ibana, taelekhon ma tangiang pujipujianta tu Tuhanta Pardengganbasa i,
marende ma hita: Las rohangku lao mamuji Debata Parholong i......!
S: Mangendehon BE No. 565: 1 + 4 “Las rohangku lao mamuji”
1. Las rohangku lao mamuji Debata Parholong i, songon bunga na
mangerbang di nabinsar ari i. Arsak dosa haporsuhon mago di baen
asiMi. Las ni roha na manongtong lehon di au Tuhanki.
4. Rap ma hita mangendehon sangap di GoarNa i, tapangiar soaranta lao
mamuji Tuhan i. Sun do holong ni rohaNa na so marnamontok i. I do
pasadahon hita salelenglelengna i.

02. VOTUM – INTROITUS – TANGIANG:

P: Marhitehite Goar ni Debata Ama, AnakNa Tuhan Jesus Kristus dohot Tondi
Parbadia.
H: Amen.
P: Molo mardos ni roha manang dua sian hamu di tano on tumangiangkon
manang hata dia pe, jaloonmuna do i sian Damang na di banua ginjang i. Ai
anggo pungu dua manang tolu pe marhitehite goarHu, sai dongananKu do
nasida.
H: I ma tutu. Ditongatonganta do nuaeng Tuhanta mangaramoti hita, jala tadok
ma mauliate sian nasa rohanta, taolophon ma Ibana marhite las ni roha.
P: Martangiang ma hita! Ale Tuhan Debata, Amanami Parasiroha, togutogu ma
rohanami mangoloi Ho. Pargogoi jala patau ma hami togu marhaporseaon,
marpanghirimon dohot marholong ni roha. Patubu ma di hami roha na tau
manghilalahon hinadenggan ni na marhahamaranggi di Punguan Sinambela Boru
 Bere Ibabere di Duri on, asa tutu hami na hinophop ni AnakMu Tuhan Jesus
Kristus.
S: Asi ma rohaM, togu ma hami tu dalan hatuaon, asa taruli hami di basaM na
godang i, ala ni AnakMu Jesus Kristus Tuhannami. Amen.
P: Hamuna angka dongan! Nunga tapuji hamuliaon ni GoarNa marhite roha,
pamatang dohot tondinta. Antong, somba ma hita tu Jahowa marpahean na
marhadohoan, angka hitir ma hita maradophon Ibana ala hasongkalonNa i. Sai
jongjong ma hita di uluan manatapnatap dompak Tampahan. Sai jumpang ma
tutu di hita angka na ni luluan, jala dapot ma tutu angka na jinalahan.
H: Nunga saor Debata rap dohot hita. Sahala Patik Uhum, tondi do sipangajari.
Manumpak ma parsaoranta na di jolo, manghorasi ma nang parsaoranta na di
pudi. Asa disi sirungguk disi ma sitata, ia disi hita hundul dua tolu halak
marpungu, marende, martangiang disi ma saor jala sahap pasupasu sian
Tuhan.
P: Ima tutu. Sai jumpang ma di hita marhite Pesta Bona Taon Punguan Sinambela
Boru Bere Ibabere na tapatupa sadari on, songon pandohan na mandok:
Marsinemnem do urukuruk, marsilanlan aek Toba. Na metmet ro di na
magodang ndang marungutungut, laos huhut ma hita marlas ni roha.
P: Nuaeng pe di hamu damang, dainang ro di sude situan na torop. Debata do
mual ni las ni roha, dame dohot hatuaon. Ibana do haroroan ni pasupasu di
ngolunta. Antong, taihuthon jala taoloi ma Ibana sian unduk dohot serep ni
rohanta. Tatangihon jala taoloi ma HataNa, ta hendehon ma lagu Sian No. 691 :
Hupasahat ma tu Jesus saluhutna ngolungki......!
S: 1. Hupasahat ma tu Jesus saluhutna ngolungki, roha nang pambaenanku
saluhutna tingkingki. Reff. Hupasahat ma tu Jesus saluhutna diringki.
Hupasahat ma tu Jesus saluhutna ngolungki.
6. Mauliate ma rohangku ala naung hinophopMi, Pujionku ma goarMu,
salelenglelengna. Hupasahat ma tu Jesus.....!

03. PATIK NI DEBATA ASA MANGOLU DI BAGASAN HASADAON JALA

MASIHAHOLONGAN:
P: Hamuna angka dongan na hinaholongan, Didok Tuhanta Jesus: On do Patik na
nilehon ni Tuhan Jesus tu hita: Naeng ma masihaholongan hita, songon Ibana
na manghaholongi hita.
H: Sian Ibana do sandok daging i dipadomu jala martomu, tiniop ni sude urat-
urat pangurupi, gabe lam magodang daging i mangihuthon pangulaon ni
ganup ruas di bagianna be, pinauliuli di bagasan haholongon i.
P: Ima tutu. Ibana do na pasadahon hita di bagasan holong ni roha. Antong sian
nasa rohanta tahatindanghon ma pambahenan ni Debata na patupa
haluaonta:
H: Ai songon on do holong ni roha ni Debata di portibi on, pola do anakNa na
sasada i dilehon, asa unang mago ganup na porsea di Ibana, asa hangoluan
na salelenglelengna di ibana.
P: Ido tutu. Di bagasan tingki on tama do lam pahotonta hasadaonta jala tutu ma
hita masihaholongan songon hasadaon ni Pamatang ni Kristus di Punguan
Sinambela Boru Bere Ibabere on.
H: Lam marsitutu hita mandasdas angka dongan asa sude hehe manghapadothon
parsitutuon mangolu di bagasan las ni roha laho patulushon lomo ni roha ni
Tuhanta i.
S: Amen.

04. MARENDE NO. 70: 1 “NAUNG SALPU TAON NA BURUK I”

L: Hamuna angka dongan na hinaholongan ni Tuhan Jesus! Didok Hata ni Debata di
Psalm 32: 5: “Jadi pabotohonongku ma tu Ho dosangku jala ndang hu huphupi
salangku; ningku do: Topotangku ma angka pangalaosingku tu Jahowa, jadi
marpamuati do rohaM di utang ni dosangku.” Nuaeng tapajojor ma saluhutna
dosanta dung jolo taendehon: Naung salpu taon na buruk i!
S: 1. Naung salpu taon na buruk i, Ho ma hupuji Tuhanki/ Ai diramoti Ho tongtong
tondingku dohot dagingkon/ Ai diramoti Ho tongtong tondingku dohot
dagingkon/

05.TANGIANG MANOPOTI DOSA/BAGABAGA:

P: Hamu angka dongan na martangiang do hita na pungu on mangido
hasesaan ni dosa tu Tuhanta, na pasuangkon hita gabe anak
 haholonganNa. Tangiang Parpadanan ma on dompak hamubaon ni roha,
naeng tumogu i sian nasa las ni roha na di hasiangan on. Ai didok do: Togu
urat ni bulu, toguan urat ni padang. Togu jala hot hata ni uhum, toguan
hata ni padan.
P: Asa dengke ni sabulan tu tonggina tu tabona. Manang ise si ose padan, tu
rugina tu magona.
P: Antong, balintang ma pagabe, tumindangkon sitadoan. Arinta ma gabe jala
martua mamungka Pesta Bona Taon Punguan Sinambela Boru Bere Ibabere
sadari on, ala tutu jala burju hita tumundalhon hadosaon jala
masihaholongan.
P: Ale Tuhan Debata! Di tingki on, ro do hami tu adopanMu na badia i! Molo
marningot hami di HataM dohot bagabagaM na sumurung i, tama situtu do
hona uhum dohot rimasMu hami, ai jotjot do hulaosi hami PatikMu dohot
HataM na badia i. Ho ma ale Jahowa na manatap pardangolannami. Di boto
Ho do angka na masa di ngolunami. Ro do hami nuaeng tu adopanMu
mangido tu Ho: Paimbaru ma panghirimonnami jala pahot ma
haporseaonnami tu Ho. Sai sesa ma dosanami na godang i.
Pengurus ni Punguan:
Ale Tuhan! Di bona ni taon on, ro do hami tu adopanMu Nabadia i! Ro do
hami marsomba tu adopanMu na badia i. Laho patedekhon sude arsak ni
rohanami. Na manghirim do hami di hasesaan ni dosanami na godang i, jala
masihol situtu do hami di holongMu na so halompoan i. Huongkui hami do,
paboa mansai gale do hami pasauthon ulaonnami songon pengurus di
punguannami on, gabe jotjot gale punguannami manghatindangkon
hasintonganMu. Sai unang tulak hami ale Tuhan, sai sesa ma sude dosa
nang hahurangannami.
Angka Ama:
Ale Tuhan! Di bona ni taon on, ro do hami tu adopanMu Nabadia i!
Manopoti luhutna dosanami. Sai tatap ma pardangolan dohot
 hagaleonnami. Ndang huulahon hami ha-Ama-onnami hombar tu lomo ni
rohaM. Ndang hupatulus hami na tinonahon ni HataM Nabadia i di
tongatonga ni keluarganami nang di tongatonga ni punguannami on. Ala ni,
ro ma hami nuaeng tu adopanMu mangido hasesaan ni dosanami.
Angka Ina:
Ale Tuhan! Di tingki on, ro do hami tu adopanMu Nabadia i! Digodang ni
sipingkiran dohot sisarihonon ni rohanami di keluarga nang di
parsaorannami siganup ari, jotjot do gale hami, ndang huulahon hami ha-
Ina-onnami hombar tu lomo ni rohaM, ai jotjot do hulaosi hami PatikMu
dohot HataM na badia i. Hurang do hulehon hami rohanami patuduhon
holong ni rohanami tu Ho marhite punguannami on. Ale Jahowa sai tatap
ma pardangolannami, sai paimbaru ma panghirimonnami jala pahot
haporseaonnami tu Ho. Sai sesa ma dosanami na godang i.
Sude:
Ale Tuhan! Di tingki on, ro do hami tu adopanMu Nabadia i! Ro do hami tu
adopanMu manopoti dosanami. Mansai godang do pangalaosionnami
maradophon Ho nang maradophon dongannami jolma pe. Sai unang
paingotingot angka dosanami dohot pangalaosionnami di HataM Nabadia i.
Sai lehon ma roha na marsitutu di hami, laho pahothon parsaoran na
denggan mangoloi Ho marhite punguannami on. Asi ma rohaM di hami, sai
sesa ma dosanami.
P: Tajalo ma Hata ni Debata ojahan ni las ni rohanta manjangkon hasesaan ni
dosanta: Songon on do Hata ni Tuhan Jesus: Roma hamu tu Ahu, hamu
angka na loja jala na sorat, Hupasonang pe hamu. Buat hamu ma
augangKu tu hamu, guruhon hamu ma sian Ahu, ai na lambok do Ahu jala
na serep marroha, asa dapotan hasonangan tondimuna. Ai lambok do
augangKu jala neang do dohot na Hupaporsanhon. Hasangapon ma di
Debata na di banua ginjang.
S: Amen.
06. MARENDE NO. 753: 1 + 3 “DIPARDALANAN JESUS DIJOLONGKU”
1. Dipardalanan Jesus di jolongku, Holong ni tanganMi manogu au, nang
dingolungku Ho do sombaonku tung sonang mardalan raphon au. Reff.
Huboto do tangkas panoguonMu, di iringiring Ho do langkangki. Sahat ro di
ujung ni pardalanku, togu ma au jonok tu lambungMi.
3. Patogu ma Tuhan haporseaonku, asa polin tu Ho manghirim au. Tu surgo i
patulus pardalanku, TondiMi maringan ma di au. Huboto do......

07. MANJAHA EPISTEL : (Responsoria)

P: Epistel di Partangiangan Bona Taon di hita Punguan Sinambela Boru Bere
Ibabere ima sian Psalmen 40, 1 – 11 songon on ma didok disi: Ende sian si
Daud. Sai tong do huhaposi Jahowa, jadi dipaeleng Ibana dirina tu ahu, jala
ditangihon alualungku.
H: Jala dienet ahu tu ginjang sian godung halonongan, sian dore na pilhot, jala
dipajongjong tothu tu atas ni dolok batu, marsihohot langkalangkangku
dibahen.
P: Dung i dilehon muse ende na imbaru tubagasan pamanganku, pujipujian tu
Debatanta. Lan do na marnidasa, gabe mabiar nasida, jala marhaposan tu
Jahowa.
H: Martua ma baoa na mambahen Jahowa haposanna, jala na so olo marbalik
paihuthon siginjang roha i, angka na paulaula gabus.
P: Torop do angka halongangan dohot sangkapsangkap dibahen Ho
humongkop hami, ale Jahowa, Debatangku, ndang tarpajojor tu Ho, nang pe
naeng baritahononku jala paboaonku, ndang tarpajojor tahe dibahen
toropna.
H: Ndang lomo roham di pelean sipotongon dohot sipanganon, ditura Ho
pinggolhu duansa, ndang dipangido Ho pelean situtungon dohot pardosaon.
P: Jadi ningku ma: Ida ma, nunga ro ahu mamboan buku, na sinurat taringot tu
ahu.
 H: Dipangido rohangku do patupahon lomo ni roham, ale Debatangku, jala di
parsitongaan ni rohangku do patikmi.
P: Hubaritahon do hatigoran di luhutan na bolon i; ida ma, ndang hututup
bibirhu, diboto Ho do i, ale Jahowa.
H: Ndang hutabunihon hatigoranmu di bagasan rohangku; sai hupaboaboa do
hasintonganmu dohot hatuaonmi;
P: ndang huporso asi ni roham dohot habonaronmi tu luhutan na bolon. Ima
sahatna. Martua do na tumangihon hata ni Debata jala na umpeopsa. Amen.

08. MARENDE BE NO 518 : 1 “Marsinondang Dibaen Jesus "

1. Marsinondang dibaen Jesus asi ni rohaNa i
Jala hita do disuru, asa tapaboa i
Tapagalak palitonta, tapatiur dalan i
Ai torop dope na lilu, sai hatop ma mulak i

9. JAMITA :
(Poda 3 : 5 - 6 )
10. MARENDE NO 66:1- ”DEBATA BAEN DONGANMI” (PASAHAT PELEAN)
P: Hamuna angka dongan na sapunguan! Nunga tabege Hata ni Debata na
gabe hangoluanta, tahangoluhon jala tapatuduhon ma parbue ni pang-
hirimonta di pangaramotionNa di ngolunta. Antong, Bona ni aek puli di dolok
ni Sitapongan, nunga saut tapatupa Pesta Bona Taon Punguan Sinambela Boru
Bere Ibabere sadari on, gabe inganan pangalapan pasupasu ma Punguanta,
patiur nasa pansamotan. Asa, Marpudung ma palia, parasaran ni pidong na
dua. Sai siboan dame ma hita, huhut siboan tua ala naung tajangkon Hata ni
Tuhan.
P: Antong, Tapatuduhon ma tanda ni las ni rohanta manjangkon hataNa di
Pesta Syukuranta sadari on. Taendehonhon ma padan haporseaonta tu
Tuhanta, rap ma hita mangendehon emde 672 huhut papungu palean.
1. Tung godang situtu ulaonmu antong
Dipasahat Tuhanta tu ho
 Ndang adong be tingkim marnalemba tahe
Ngolumi bahen tiruan tongtong
Sai patupa ma i ala ni Tuhan i
So mangkirim balosna tu ho
Debata do marnida na niulami
Manang na adong parbue ni i

2. Ai lambok do soara ni Tuhanta i

Ro ma ho las ma nang rohami
Sai taingot tongtong hata ni Tuhan i
Mangarahon jolma tu Tuhan i
Sai patupa ma i ala ni Tuhan i
So mangkirim balosna tu ho
Debata do marnida na niulami
Manang na adong parbue ni i
11. PARSURUON MANGHANGOLUHON HATA NI DEBATA:
P: Hamuna angka dongan! Nunga gok las ni rohanta di Pesta Partangiangan Bona Taon
Punguan Sinambela Boru Bere Ibabere sadarion, asa tutu ma songon na nidok ni
hata i: Tinaba hau simartolu, bahen tiang ni sopo di balian; sai leleng ma hita mangolu
jala tongtong ma di ramoti Tuhan.
P: Marmutik ma simarlasuna, marbunga ma ia labu. Hata nauli dohot pasu-pasu ni
Tuhanta, boanonta ma i sahat martonga ni Jabu. Uli pe pinggan puti, Ulian do pinggan
pasu; Gabe ma anak naung mangoli dohot boru naung pinamuli, jala sai hot dapotan
pasupasu.

12. TANGIANG PELEAN - ALE AMANAMI - PASUPASU - AMEN 3X

13. ACARA PERAYAAN BONA TAON (DIATUR TERSENDIRI)

“Nunga mumpat talutuk,

nunga sesa da gadugadu.
 Nunga salpu taon naburuk,
nunga ro taon naimbaru.”
Horas tondi madingin, pir tondi matogu”
SELAMAT TAON BARU MA DI HITA SALUHUTNA
PUNGUAN PARDEDE SAKARETAJATI TANGERANG