PARTORDING NI PARMINGGUON

PENTAKOSTA I
PARNINGOTAN ARI HASASAOR NI TONDI PARBADIA

Ev. Rom 8:8 – 11 Ep. Johannes 7: 37 – 39a.

TOPIK :
MANGOLU DI BAGASAN TONDI NI DEBATA

HURIA KRISTEN BATAK PROTESTAN

MINGGU, 5 JUNI 2022

01. Marende BE. HKBP No. 462:1-3. “Ale Tondi Parbadia” BL.311.
 Ale Tondi Porbadia, sai songgopi hami on.
Rohanami ma paria lao mamuji Ho tongtong.
Ho tongtong, Ho tongtong, lao mamuji Ho tongtong.
 Debata ni hangoluan, lehon hangoluan i.
Sunggul sian partangisan saluhut na mate i.
Saluhut, saluhut, saluhut na mate i.
…Musik…
 (Jongjong) ApiMi sai lam pagalak, sondang di na holom i.
Asa las, tiur ma halak. Lam pita huriaMi. Lam pita, lam pita.

02. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano
on. Amen. Songon on ninna Tuhan Jahowa: LehononHu tu hamu roha
na imbaru dohot tondi na imbaru tu bagasan ateatemuna, jala
unsatonHu do roha batu sian dagingmuna, jala lehononHu tu hamu roha
na marpangHilalaan. Jala lehononHu ma TondingKu tu bagasan
ateatemuna, Ahu do mambahensa, asa marparange hamu di bagasan
angka PatikHu, angka uhumHu pe radotanmuna jala patupaonmuna do.
Haleluya!

H: (Mangendehon BE. HKBP No. 852) Haleluya, Haleluya, Haleluya!

U : Martangiang ma hita ! Ale Tuhan Debata, Amanami! Ho do

manondangi jala mangajari roha ni angka na porsea di HataM
marhitehite Tondi Parbadia. Sai buhai ma rohanami asa ture
parrohaonnami marhitehite TondiMi, asa tongtong gok dame rohanami
manghalashon hagogoonNa i marhitehite Tuhan Jesus Kristus
Tuhannami. Amen.
(Hundul)

1
03. Marende BE. HKBP No. 253:1+3. “Ale Debatangki” BL. 209

 Ale Debatangki lam jonok rohangki, jonok tu Ho.

Ima na sai tongtong, sangkap ni rohangkon, jonok tu Ho.
Nang beha panoguM di au on naposoM,
Asa lam jonok do jonok tu Ho, jonok tu Ho.

 Ale Debatangki, lam jonok rohangki, taiti gogo.

Asa tung sonang au, ala basaM tu au, taiti gogo.
Ai songon pulut i dosa di rohangki.
Asa tung lam gogo, taiti tu Ho, taiti tu Ho.
04. PATIK:
U : Tatangihon ma Patik ni Debata di Pesta Parjolo Parningotan Ari
Hasasaor ni Tondi Parbadia sadari on, i ma na tarsurat di Psalmen
2:11. Oloi hamu ma Jahowa dohot biar ni roha, jala marolopolop ma
hamu, huhut angka hitir! Antong rap mangido gogo ma hita sian
Tuhan Debata!
H : Ale Tuhan Debata, sai pargogoi ma hami mangulahon na hombar
tu PatikMi. Amen.
05. Marende BE. HKBP No. 109:1-2. “Sai songgopi hami on” BL. 78.
 Sai songgopi hami on ale Tondi Parbadia.
Sai ajari ma tongtong hami on huhut paria.
Martangiang tu Tuhanta asa tongtong oloanNa.
(Jongjong)
 Tondi hasangapon i sai ingani rohanami.
Pargogoi ma hami be maralohon dosanami
Asa tung malua hami sian hadosaonnami.

06. MANOPOTI DOSA:

U : Tatopoti ma dosanta, martangiang ma hita! Ale Tuhan Debata,
Amanami na di banua ginjang! Ho do na patupahon hasesaan ni dosa
di hami halak na dangol on marhitehite Anak haholongan ni rohaM.

2
 H : Sai asi ma rohaM di hami, angka na mangarsakhon dosanami. Sai
sahapi ma tu bagasan rohanami hasesaan ni dosanami i.
U : Lehon ma tu hami TondiM na badia i, asa unang ganggu rohanami di
asi ni rohaM, alai asa hot rohanami marhaporseaon laho
manggotaphon nasa dosa dohot roha portibi on, asa hupasahat hami
dirinami tu Ho, gabe pelean na mangolu jala na badia marhitehite
Tuhan Jesus Kristus Tuhannami. Amen
Bagabaga ni Debata taringot tu hasesaan ni dosanta: Ise be
mangaluhon angka na pinillit ni Debata? Debata do na mamintori. Ise
do na mandabu uhum hamagoan? Kristus Jesus do naung mate; alai
ndada holan i, naung mulak mangolu do, jala di siamun ni Debata do
Ibana mangondihon hita. Hasangapon ma di Debata na di ginjang!
H : Amen.
(Hundul)
07. Marende BE. HKBP No. 699:1-2. “Singkop do asi ni rohaM” BL.699.
 Singkop do asi ni rohaM tu au na dangol on.
Na lilu ahu na hinan nuaeng jumpang do.
 Di na hutanda dosangki, gok biar rohangki.
Alai ala ni asiMi, mardame rohangki.

08. E P I S T E L :
U : Tatangihon ma hata ni Debata turpuk Epistel, ima na tarsurat di
Johannes 7:37-39a. Dung i di ari pesta na parpudi na sumangap i,
jongjong ma Jesus disi, dipagogo ma soaraNa mandok: Molo adong
na mauas, tu Ahu ma ibana ro minum!
H : Songon na nidok ni Surat i: Angka batang aek na mangolu do
mabaor sian na porsea di Ahu.

3
 U : Alai taringot tu Tondi i do didok hata ondeng, i ma sijaloon ni angka
na gabe porsea di Ibana. Ido sahatna. Martua do angka na
tumangihon Hata ni Debata jala na umpeopsa.
H : Amen.
09. Marende BE HKBP No. 116:1+3. “Ditompa Ho do au” BL.243.
 Di tompa Ho do au, sondangi rohangkon.
Tung basa-basaMi sude na di au on.
Gomgomi pamatanghu, naeng Ho do oloanhu
Sai lehon ma gogongku, lomoM naeng ulaonhu.
Urupi, tatap au tutu, Panompa na burju.
(Jongjong)
 Tu TondiMi Tuhan hulehon diringkon.
Sai tong ma dirajai sandok pamatanghon.
Ibana hutangihon, sai saut au ditogihon;
Tu ngolu partondion, manahan di ujian.
O Tondi Parbadia i, sai Ho ma Rajangki.

10. MANGHATINDANGHON HAPORSEAON :

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H : Ahu porsea di Debata Jahowa…..d.u.
(Hundul)
11. TINGTING
12. Marende BE HKBP No. 104:1… “Bongoti ma rohangku” BL. 155.
 Bongoti ma rohangku, ingani ma au on.
O Tondi Debatangku, pasonang rohangkon.
Na marhabangsa Ho raphon Debata Ama,
Nang Jesus pe AnakNa, naeng pujionhu Ho.
 Antong panghilalahon tu ahu gogoMi.
GogoM na paluahon au sian dosangki.
Urasi rohangkon, paias ma tondingku,
Ai naeng do oloanhu na nidokMi tongtong.
4
 …Musik…
 Ndang dung marhatigoran pardosa au hian.
Ndang dung marhasonangan na mate au hian.
Di pandidion i dibonom Ho dosangku
Tu mudar ni Tuhanhu, ias au ala nii.
 O Tondi Sipodahon tangiang na sintong.
Ho do na tinangihon ni Ama i tongtong.
Ajari ma au on mandok pangidoanhu,
Sian sandok rohangku tangihon hatangkon.
…Musik…
 Silehon las ni roha, palas ma rohangki.
Pahehe au paboa au niapulanMi.
Jotjot ditopot Ho angka na marsitaonon,
Silehon hasonangan tu na tungki do Ho.
 Usehon tu rohangku Holong ni rohaMi
Padenggan ma hatangku tu dongan sasude
Asi rohaM padao ma bada, halatean
Patimbul hadamean na roa i palao.
…Musik…
 Baen gok haporseaon ma rohanami be.
PanumpakMi gandahon tu artanami pe.
Pabali tondi i na olo manundati,
Na olo mangarsahi rohaM na denggan i.
 Pagirgir rohanami mangalo dosa i.
Tambai ma gogonami di pangunjunan i.
Dongani hami on mangalo musunami
Sai unang olo hami saor tu portibi on
…Musik…
13. JAMITA: Rom 8 : 8 – 11.
14. Marende BE. HKBP No. 640:1….. “Haholongan sian ginjang” BL. 640.
(Pelean na marboho tu Ulaon Zending HKBP)
 Haholongan sian ginjang las ni roha na hot i.
Tumpal ni asi ni roha sai bongoti rohangki.
Jesus na gok asi roha dohot haholongon i.
5
 Baen malua baen martua hami natahutan i.
 Lehon tondi haholongon tu parroha na bojok.
Bagabaga hadameon sahat baen tu hami on.
Jesus Alpha nang Omega bona ni haporseaon.
Sai padao ma angka dosa, sai palua hami on.
…Musik…
 Sipalua na sun gogo lehon tu au ngoluMi.
Ro ma Ho sai marsihohot mangingani joroMi.
Asa Ho husomba hami raphon pardisurgo i.
Rap mamuji mangoloi Ho di hasangaponMi.
 Sai pasingkop tinompaMu, lam pita baen hami on.
Haluaon na sumurung lehon ma tu hami on.
Boan hami tu na uli di banua ginjang i.
Paima Ho pujiannami salelenglelengna i.
…Musik…
15. Tangiang Pelean, Pangujungi dohot Pasupasu : (Jongjong)
U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.

H : (Mangendehon) BE. HKBP No. 204 : 2 “Ndang Tadingkononhu

Ho” BL. 73
 Nasa nanilehonMi, tondi ro di pamatanghu
Hosa dohot gogongki, ro di saluhut artanghu
Hupasahat i tu Ho, na so unsatonhu do.

U: Ale Tuhan Debata, Amanami! Na so tarasam do godang ni

silehonlehonMu di hami. TondiM na badia i dilehon Ho tu hami jolma,
6
sumonggopi hami na lea on. Na ummarga i do dilehon Ho tu hami, jala
gumodang do i sian portibi on dohot sian pangisina sude. On pe,
mauliate ma rohanami jala pujionnami ma Ho alani sude habalgaon
dohot hamuliaonMu, naung pinapatarMu tu hami. Sai lehon ma Tondi
Parbadia i tu huriaM, angka na olo mangihuthon Tuhan Jesus Kristus,
Tuhannami asa diajari, dirajai, dipatiur, diparbadiai jala dipatongtong
hami mian di Barita Nauli i. Ale tondi parbadia! Sai pasada ma huriaM
na pinapungupunguM i, asa masijaloan jala masihaholongan songon
angka ruas ni daging ni Tuhan Jesus Kristus na badia i. Sondangi jala
patiur ma hami, asa hutanda hami angka dosa na balga dohot na metmet
sipasidingonnami. Sai buas ma ho manesa dosanami, asa lam badia jala
imbaru hami ganup ari, asa tarbahen hami saor di bagasan Huria na
badia, na sasada i. Sai ondihon jala padomu hami tu Ama i asa pos
rohanami mandok: Amanami di bagasan Tuhan Jesus Kristus. Sai
tambai silehonlehon tu Huria, asa lam ganda torop ni angka Parbarita na
Uli dohot pangajari dohot parasiroha, na mamaritahon habalgaonMu di
portibi on. Sai sondangi jala pasupasu sude parpunguan ni halak Kristen
di gareja, di parsikolaan, nang di bagasna be, asa tau nasida saor tu
parpunguan sogot. Sai sungguli angka na tarpodom, jala pargogoi
angka na gale. Sai songgoti ma angka na neang dohot na tangkang
marroha, asa ditinggalhon nasida hajahatonna be. Sai parrohai angka na
bojok roha, jala apuli angka na marsak dohot na dangol i, asa unang
diruparupa portibi on angka na mangoloi Ho. Sai tatap ma angka na
targogot dohot na pinaburuburu ni halak ala ni haporseaon di Tuhan
Jesus, sai ajari nasida maralus jala mian ma Ho di bagasan nasida. Sai
ramoti ma pingkiran ni angka panggomgomi, panguhum dohot angka
raja, asa tigor uhumnasida, jala asa dihabiari nasida ari paruhuman
sogot. Sai patogu haporseaonnami, asa tongtong huingot hami, naung
sesa dosanami, jala boanonMu hami tu hangoluan sogot. Sai sungguli
panghirimon na mangolu di hami, asa pos rohanami, nang malangke
daging on, pangoluonMu do muse asa masuk hami marnida Debata
Ama marhitehite Tuhan Jesus Kristus, Tuhannami. Amen.
7
 Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa tu
hami! Unang hami togihon tu pangunjunan! Palua ma hami sian
pangago!

H : (Mangendehon BE. HKBP No. 841)

 Ai Ho do nampuna harajaon, dohot hagogoon
Ro di hasangapon, saleleng ni leleng na, Amen.
U : Tangiang Pasupasu
H : (Mangendehon BE. HKBP No. 845)
Amen, Amen, Amen.

========
PRAESES, PANGULA GOK TINGKI, DOHOT PARHALADO
SE-HKBP DISTRIK XIX BEKASI
Mengucapkan
“SELAMAT ARI MINGGU PENTAKOSTA”
Tuhan Yesus Memberkati