KEBAKTIAN MINGGU RUMAH TANGGA

GKPS SA-RESORT TELADAN-MEDAN

Minggu, 29 Maret 2020
Minggu Judika : Luluhon Ahu Ham Naibata
1. VOTUM-INTROITUS-TONGGO
Ibagas goran ni Naibata Bapa pakon Tuhan Jesus Kristus ampa Tonduy Napansing,
Sitompa langit pakon tanoh on. Amen
Jahowa na mambahen hapintoron, anjaha na pasintongkon uhum bani halak na hona dorun
Martonggo ma hita,
Ham Tuhan paridop ni uhur anjaha parpintor, Tarima kasih ma Bamu, ai ipaluah janah
ipatorsa Ham do hanami humbani hakahouon ampa tahi-tahi ni parjahat. Goki Ham ma
uhur nami marhitei TonguyMu Napansing in, ase Ia ma mangajari hanami, laho
mangahapkon banggal ni sitaronon ni AnakMu mangkopkop janah mamintori hanami.
Luluhon Ham hanami bani haganup goluhnami, ai Ham tumang do haporusannami ronsi
sadokah ni dokahni. Marhitei-hitei Jesus Kristus Tuhan nami, jalo Ham tonggo nami on.
Amen
2. MANDODING HALELUYA NO 2:1+3
Puji Jahowa ale Tonduyhu, Puji ma Ia Naibatamin
Paima bois ope bohalhu, sai pujionku layakNi in
Sitompa daging tonduy pe, ningon ipuji do hape, Haleluya-haleluya
Martuah halak na niondingan, ni Naibata Jahowa in
Na tong toguh marhaporsayaon, bai Jesus Kristus Tuhanta in
Ai Naibata hasomanmin, seng anjai hurang tuahmin, Haleluya-haleluya
3. HASASAPAN NI DOUSA
Martonggo ma hita, sopotkon hita ma dousanta bani Tuhan Naibata!
Ham Tuhan Naibata Bapanami, Pardear layak anjaha parholong ni uhur hubani haganupan
jolma. Domma ihatahon Ham ase totap ma hanami marhasadaon, manggoluh ibagas damei
ampa marsihaholongan. Hape gati do hanami manggoluh ampa mambahen na so
iharosuhkon Ham. Hurang sirsir do hanami paingatkon hasoman. Gati do
pambahenannami, parsahapnami mambobai hasoman hubani na hurang dear. Gati hanami
mamakei hasoman padaskon sura-sura ni uhurnami tumang. Ambah ni ai gati lupa hanami
bani tanggung jawabnami itongah-tongah ni keluarga ampa rumah tangganami bei. Halani
in ma ase roh hanami ibagas unduk pakon toruh ni uhur hu lobeiMu mansopotkon
dousanami in. Tompa Ham uhur na bayu bannami, ase ulang inunut hanami mardousa
dompak Ham age dompak hasomannami jolma. Ipindo hanami on huBamu, ibagas goran
ni AnakMu Jesus Kristus Tuhannami. Amen
Tangar hita ma Hata ni Naibata Bagah-bagah pasal hasasapan ni dousa
Idop ni uhur ni Naibata do na so ra marpunsa, seng marnarotap holong ni ateiNi, mulak
ratah do ai siap sogod, banggal do habonaroanMu.
 Hasangapon ma bani Naibata ibabou. Amen
4. MANDODING HALELUYA NO 299:1
Domma ihopkop Tuhanku tonduyhu, ase maluah tonduyhu tongtong
Domma isasap Tuhanku dousangku, ase manggoluh tonduyhu tongtong
Malas uhurhu, megah uhurhu lao pasangapkon Tuhan bai goluhkon
Nai ma hapeni holongNi ateiNi, hita pe patut marholong tongtong
5. HATA HAPORSAYAON
Saksihon hita ma haporsayaonta in songon na sinaksihon ni haganup halak na porsaya bani sab
tanoh on! Ahu porsaya bani Naibata Bapa, ………………Amen.
6. TONGGO PANGAPITION (SYAFAAT)
7. MANDODING HALELUYA NO.310:1+3
Ge daoh ponop openi ujung ni dalanankin, Tuhan do manogu ahu bani pardalanankin
Bahen ham au pambalosi, bani ganup rosuhMu, Lang be sangsi janah gobir, sai totap porsaya au
Rapkon Bapa in do ahu, ‘ge mamolus na golap, Pitah Ia hubalosi halani holongNi in
Ge pe lang huidah nuan, gok ni malas uhur in, Pos uhurhu bani Tuhan, jaloonku use in
8. AMBILAN 2 Petrus 1:1-9
Igambarhon songon bonih, iarapkon do ase bertumbuh, berkembang anjaha marbuah. Na
imaksud bertumbuh aima “manggoluh” anjaha mengalami hamajuon na lambin roh dearni.
Sonaima haporsayaon in maningon mengalami pertumbuhan janah marbuah maronjolan bani
hata ni Naibata.
Bani bona ni ambilan on, tangkas do isobut Ap. Petrus : “hubani sagala na porsaya na dob
manjalo haporsayaon dos songon na jinalonami”. Lang marsibanggali, atap marsieteki janah
lang marsidearan haporsayaon in halani saguru bani idop ni uhur ni Naibata do in, dos artini
rup manjalo anjaha dapotan do haganupan. Ase tegas do isobut Petrus dos songon na
jinalonami. Ase porini adong pe perbedaan, sadalan pakon na isobut ambilan on, sedo bonihni
na marbeda tapi pertumbuhanni do na mambahen ase marbeda beda. Pasal on domma tangkas
ipatorang Jesus bani Markus 4:4-7 marhitei Limbaga pasal panabur. Adong do bonih na
madabuh hubani dalan, hu tanoh na marbatu, hu parhupi-hupian, ampa bani tanoh na madear.
Haporsayaon harus mengalami pertumbuhan bani goluh ni na porsaya. Sonaha do ase boi
lambin martambah haporsayaon in? Adong dua unsur na isobut, aima:
• Hagogohon/kuasa (ayat 3). Halak na dob manjalo haporsayaon igoran do marga na pinilih ni
Naibata, harajaon hamalimon, bangsa na mapansing, bangsa ni Naibata sandiri. Halak na
sirsir mangambilankon dear ni hauhuron ni Naibata marhitei na dob mandilo hita humbani
na golap hubani na lihar (1 Petrus 2:9).
• Bagah-bagah/janji (ayat 4). Halani bagah-bagah ni Naibata gabe ihira halak na porsaya ma
dirini manggoluh bani Naibata (Rom 6:11). Seng nunuton ni naporsaya in be mardousa bani
goluhni ai domma iain hita gabe anak bagah-bagah (anak-anak perjanjian).
Na dua unsur on ma gabe jaminan bani goluh ni na dob manjalo haporsayaon laho
pabanggalhon haporsayaonni marhitei na padaohkon dirini humbani sagala hajahaton na lang
iharosuhkon Naibata anjaha terjadi ma pertumbuhan iman na dear bani halak na porsaya.
Dousa ampa hajahaton mambahen maseda pertumbuhan iman halani seng sadalan in pakon na
ihaporluhon ni haporsayaonta bani Naibata ampa Jesus Kristus. Pondok hatahonon sebagai
konsekuensi na dob ijalo hita haporsayaon in, maningon ipadaoh hita do dirinta humbani
segala macam bentuk dosa ampa hajahaton ibagas goluhta.
Tapi maningon bertumbuh do hita mangusihi goluh ni Kristus. Prinsip on sekaligus gabe
sinjata banta ase boi maporus humbani hamagouan na idunia on. Tongon domma ibuka jolma
in “pintu dousa” halani hisap-hisap na idunia on, anjaha lang be tarelakkon pangkorhon ni
dousa in. Tapi marhitei haporsayaon gabe adong kekuatan laho menutup kembali haganup
horja-horja na lang iharosuhkon Naibata. Dob ijalo hita pangarusion in, goluhta lang boi “soh”
(diam), tapi iojur ase :
• Ringgas pataridahkon dear ni parlahou ibagas haporsayaon. Haporsayaon maningon
bergerak, berbuat ase lambin igoki hita goluhta ibagas horja na madear bani Naibata ampa
bani hasoman.
• Marhapentaron ibagas parlahou na madear. Haganup horja na madear ihorjahon ma ibagas
na marhapentaran (dalam kebajikan). Halani ai ituntut do goluh ni na porsaya ase
marhapentaron, sebab hapentaron termasuk unsur penting ibagas haporsayaon. Hapentaron
na imaksud ijon aima :
- Panrajaion diri ibagas hapentaron. Pitah na Naibata do na boi mambere kemampuan ase
adong banta panrajaion diri. Janah hal ai boi terjadi anggo sirsir hita laho pabagaskon
hapentaron (pengetahuan) pasal Naibata marhitei na sirsir manangihon sora ni Tonduy
Napansing na mangajri hita.
- Hasabaron ibagas panrajaion diri. Artini adong kesanggupan laho manjolom toguh
marhitei na sirsir mamorsan, ampa mampartahankon haporsayaon porini maningon
mandompakkon bagei-bagei ni sitaronon ampa paruntolon. Sabar bani hamarsikon golgol
bani tonggo. Lang urah mandolei, konsisten anjaha manongtong laho mandalankon hata
ni Naibata.
- Hadaulaton ibagas hasabaron. Perilaku na patalarhon pongkut ni uhur laho manggoluh
ibagas na setia anjaha taat bani Naibata. Hadaulaton aima sebuah sikap na itujuhon hubani
Naibata marhitei na sirsir mandalankon hataNi. Ase goluh ni halak na marhadaulaton
mempengaruhi haganup aspek ni pargoluhanni, tindakanni, parsahapni, ampa pingkiranni
pataridahkon hasatiaanni bani Naibata.
- Holong ni uhur bani hasoman ibagas hadaulaton. Nini bani Galatia 6:10, ..ase horjahon
hita ma na madear dompak haganup halak. Hataridahan ni na marhaporsayaon lang pitah
mampangkorhon dear ni parsaoranni pakon Naibata tapi dihut do age hubani hasoman
marhitei na sirsir pataridahkon holong bani hasoman na legan.
In ma bukti haporsayaon na bertumbuh bani goluh ni halak kristen anjaha na pataridahkon
tanda-tanda haluahon na dob jinaloni marhitei Jesus Kristus. Haganup horja na madear lambin
mampargogohi hita laho mananda Jesus Kristus Tuhan janah Sipaluah. Horja na madear gabe
buah ni haporsayaon ampa panandaion na sintong pasal Tuhan. Ai do ase nini ambilan on,
anggo seng jumpah ai bani jolma, hatahonon ma sidea na mapitung janah na parpangidah na
sompit. Ai seng ididah anjaha lupa do sidea bani na dob paborsihkon dousa-dousani hinan, in
ma Tuhanta Jesus Kristus.
Renungan
1. Domma ijalo hita pengenalan akan Tuhan, halani ai maningon terjadi do banta
Pertumbuhan iman ase ulang suam-suam kuku haporsayonta. Tahan bani sagala tantangan
tarlobih bani perkembangan hamajuon ni jaman na torus meningkat. Torus ma hita
bergerak marhitei sagala horja na madear na iharosuhkon Tuhan, ase boi hita maluah
marhitei mangajamkon holong ampa idop ni uhurni Tuhanta.
2. Na idompakkon hita parpudi on aima parrohni naborit covid-19 na mambahen sangat
terganggu hita halani domma berdampak bani haganup aspek ni pargoluhanta. Korban
domma buei, na matei, Suspect (na domma hona virus) , ODP (orang dalam pemantauan),
PDP (orang dalam pengawasan). Haganupan in mambahen lambin maruntol anjaha
manaron do hita bani panorang parpudi on. Idesak situasi in do hita ase marubah, demi
kesehatanta. Social distancing (jaga jarak sosial), physical distancing (jaga jarak fisik),
mamakei APD (alat pelindung diri) pakon buei nari ope seruan na legan. Serius tumang do
persolan on parpudi on janah lang ope nabotoh antigan do salpu sitaronon on. Hata ni Tuhan
sadarion mangojur hita manggoluh ibagas haporsayaon janah marhapentaran ibagas
hapintoron ni Naibata. In do na paluahkon hita termasuk bani na mandompakkon sitaronon
na i dunia on. Ase adong gogohta janah lang gabe mandolei halani na masa on. Sitaronon
pardagingon na marlambin-lambin boi do mambahen terganggu psikis, depresi, putus
harapan. Tapi marhitei na ijolom hita haporsayaonta sai daoh ma sonai ai hun tongah-
tongahta. Agepe situasi on lang songon na ibagas uhurta tapi bahen hita ma na masa on
laho patoguhkon haporsayaonta. Selamat minggu Judika, Tuhan ma manluluhon hita.
Amen
9. GALANGAN (Iondoskon hu Gereja ibagas Amplop)
Paima iondoskon hita galanganta, tangar hita ma lobei hata ni Naibata na gabe onjolan banta laho
manggalang, aima na tarsurat bani Heber 13:16 Mambahen na madear ampa na marsibere-bere, ulang
ma halupahon nasiam ai, ai galangan na sonai do iaharosuhkon Naibata. Sonari ondoskon hita ma
galanganta.
10. TONGGO GALANGAN, PANUTUP – PASU-PASU
Martonggo ma hita mangondoskon galanganta bani Naibata
Ham Tuhan Naibata, Bapanami, pardear layak janah na unjah hubannami. Tarimakasih
ma hatahononnami hu Bamu, halani tongtong do ipasu-pasu Ham goluh nami. Domma
ihasomani Ham horjanami das hubani sadarion. Sonari, ibagas malas ni uhur roh do
hanami mangondoskon buah ni horja na dob pinasu-pasuMu in gabe galangan
hatarimakasihon pakon puji-pujiannami hu Bamu. On pe sai jalo Ham ma galangannami
on, bahen hasangapon ni goran-Mu janah mambahen lambin marhataridahan harajaonMu
i dunia on. Ibagas goran ni Anak-Mu, Jesus Kristus Tuhannami, jalo Ham ma tonggonami
on. Amen
Riap ma hita martonggo marhitei tonggo na niajarhon ni Tuhan Jesus Kristus hubanta!
Ham Bapanami na inagori atas. …………….Amen
Jalo hita ma pasu-pasu humbani Tuhan Naibata
Ipasu-pasu anjaha iparorot Tuhan Naibata ma hita, Isondangkon Tuhan Naibata ma
bohiNi hubanta janah maidop ma uhurNi mangidah hita. Idompakkon Tuhan Naibata
ma bohiNi hubanta, janah ipasorap ma dameiNi bani tonduyta bei. Amen.