LITURGI

AGENDA TUTUP BATANG

DOHOT
PABORHAT BANGKE NI
dr. MARINGAN EMRY HUTAPEA
(Op.ni si Immanuel doli)

RABU, 19 APRIL 2023

DI
Jl.S.M.Raja No.92-A Medan Wijk Teladan
HKBP TELADAN
RESSORT MEDAN – I TELADAN
Jl.Sederhana No.11 Teladan Medan
01. MARENDE, No. 334 : 1 + 2. Bl. 186.
1. Nasa jolma ingkon mate, ingkon mago sibuk i;
Na mangolu ingkon mate, asa tung denggan sude;
Daging on do gabe bangke, jala ingkon do malangke;
Asa sogot bangkit i. tu hasangaponNa i.
2. I pe ndang be juaonku roha ni Debatangki;
Lehononku do hosangku ndang be marsak au disi;
Ai di bugang ni Jesusku dapot au hangoluanku;
Ala hamamate ni do tarapul rohangki.

02. VOTUM INTROITUS :

U : Rim ma hita jongjong
Marhitehite goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia. Amen.
Didok Tuhanta Jesus Kristus : Ahu do haheheon dohot Hangoluan;
na mangolu do na porsea di Ahu nang pe mate ibana, jala ganup na
mangolu jala na porsea di Ahu, na so tupa mate ibana saleleng ni lelengna.
H: Mangendehon : No.334 : 3. Bl. 186
Jesus Kristus nunga mate, alani mangolu au;
Singkop tua diparade, i pe las rohangku lao;
Manadingkon pardagangan, mandapothon hasonangan;
Mandapothon Jesuski, ai malungun au tusi.

U: Martangiang ma hita :
Ale Tuhan Debata, Amanami na di banua ginjang! Na so marmula na
so marujung do Ho, ai na so olo suda do angka taonMu, alai lam moru jala
lam suda do bohalnami di tano on, jala hatop do hami laho salpu sian
hasiangan on. Songon i do nang dongannami on, naung jinouMi tu ari na so
olo suda i, nunga salpu sude ngoluna di tano on, jala nunga ditinggalhon
saluhut arta na olo buruk i.
Sai paingot ma hami taringot tu hasusuda ni bohalnami, asa hobas
hami laho masuk tu inganan na pinaradeM, jala asa unang tarsonggot hami,
molo ro Ho manjou hami. Sai pahot ma haporseaonnami tu Ho, asa marhiras
ni roha hami maninggalhon inganan pardangolan on.
Angkup ni i apuli ma roha ni na marsak dison, i ma angka dongan ni
na mate on, angka tondongna, angka alealena ro di sude angka na solhot tu
ibana, asa unang mandele nasida ala ni sitaonon on.
 Sai taiti jala togu ma roha ni hami on tu Ho, asa lam malungun
rohanami di inganan na sonang di lambungMu, ala ni AnakMu Tuhan Jesus
Kristus Tuhannami, Amen. Hundul ma hamu.

03. MARENDE, No. 353: 1 + 5 Bl.37.

1. Di surgo hasonangan i, inganan na dumenggan i;
Tusi naeng laho muli au, asa rap dohot Jesus au.

5 Ndang parmianan tano on, sai surgo i do na tongtong;

Ai rura partangisan on, di ginjang sonang rohangkon.

04. INGOT ARI HAMAMATEM :

U: Hita angka na hinaholongan !
Nunga salpu ngolu ni Amanta: dr. MARINGAN EMRY HUTAPEA
( Op. ni si Immanuel doli )on sian tongatonganta.

Dipasunggulhon i do nuaeng tu hita Hata ni Debata na mandok:

Martingki be do luhutna na tinompa. Martiti be do huhut nasa sangkap-
sangkap ni hasiangan on. Martiti be do na tubu dohot na mate.

H: Nasa jolma ingkon mate, ingkon mago sibuk i. Na mangolu ingkon mate
asa tung denggan muse.

U : Ai on do huboto hami :Di na tanggal parlapelapeannami sian tano on,

adong ma di hami inganan na sian Debata, bagas na so pinauli ni tangan,
na mian saleleng ni lelengna di banua ginjang i.

H: Ai di banuaginjang do sambulonta. Sian i do tapaimaima Tuhan Jesus

Kristus i. PaubaonNa do dagingta na lea on, gabe doshon dagingNa na
sangapi, hombar tu hagogoonNa i, ai tarpatunduksa do saluhutna tu Ibana.

U: Sude hita naung tardidi tu bagasan Goar ni Kristus Jesus, tu bagasan

hamamateNa do hita tardidi, jala gabe sangkambona rap dohot Ibana.
Anggo nunga sangkambona hita rap dohot Ibana, di na mate i hita dohot
Ibana, suang songon i ma hita nang taringot tu haheheon.
Molo naung mate hita rap dohot Kristus, dihaporseai rohanta rap mango-
lu ma hita dohot Ibana.

H: Ia mangolu pe hita, mangolu di Tuhan i do. Jala molo mate pe hita, mate di
Tuhan i do. Asa, mangolu manang mate pe hita, tong do di Tuhanta i hita.
 Na mandapothon Tuhan i do hita tu hangoluan, dung jolo tabolus
hamatean i.

U: On pe hamu angka donganku na hinaholongan !

Marsihohot jala so mubauba ma hamu, jala lam sumurung ma tongtong di
bagasan ulaon ni Tuhan i, ai diboto hamu do : Ndang magopo halojaon-
muna di bagasan Tuhan i. Di Ibana ma hasangapon saleleng ni lelengna.
H: A m e n.

05. MARENDE, No. 535 : 1 Bl.183

1. Hamatean parhitean lao manopot Jesuski?
Dohot au ingkon mamolus asa sahat au tusi;
Nang pe pinadaodao dompak hamatean i;
Lam jonok do hapengani, langkangki tu ajalhi.

06. J A M I T A : Pdt.Robert Silaban, M.Th

07. MARENDE, BE. No. 335: 1 – 2 BL. 50

(Tingki melayat/mamereng parpudi tu keluarga dohot natorop)
1 Loas au, asa lao tu Jesusku tu na dao,
Ai malungun do rohangku, mandapothon Debatangku,
Asa di lambungNa au, asa di lambungNa au.

2 Jesuski, sondang i, sitorusi ombun i,

O Andigan ro tingkingku, asa borhat ma tondingku,
Lao marnida bohiMi? Lao marnida bohiMi?

3 Sungkot ni denggan ni ende ni suruan i,

Aut marhabonghabong ahu, tongkin on dope au laho,
Tu banua ginjang i, tu banua ginjang i.

08. PASUPASU MANUTUP BATANG : ( ditutup ma batang)

09. HATA BORHATBORHAT TU KELUARGA – Pasahathon Surat sian Huria tu

HKBP Laguboti Kota Ressort Laguboti Kota.

“ Diapuli Tuhanta ma Pomparan tinading ni amanta na monding on, jala

dihorasi di na pataruhon tu bonapasogit Laguboti, nang di na mulak muse
tu Medan on.”