TONA NI SINODE GODANG HKBP PA-66-HON

Mandapothon nahinaholongan:
Sude Ruas dohot Parhalado ni HKBP
Di :
Ingananna be.

Asi ni roha ma di hamu dohot dame sian Debata Amanta, dohot sian AnakNa Jesus Kristus Tuhanta i.
Amen.
Tapuji ma Tuhanta Jesus Kristus, Raja ni Huria i, na sai marsihohot mangaramoti dohot mamasumasu
huriaNa di nasa ragam ni panghobasionna i. Di bagasan pangaramotionNa i do nang pardalan ni
Sinode Godang HKBP pa-66-hon di parhutaan Seminarium Sipoholon Tapanuli Utara di bagasan ruhut
ni hahipason na marpardomuan tu Covid-19, sinondangan ni Tema: “Masiurupan ma hamu
mamorsan angka na dokdok i, i ma dalan mangaradoti patik ni Kristus” (Galatia 6:2) dohot
Subtema: “Marhite Aturan dohot Paraturan na dumenggan dohot Sentralisasi Parhepengon, HKBP
marhiras ni roha pahinsathon panghobasionna di partingkian digitalisasi”. Marhite Tema dohot
Subtema on, dihirim do asa lam masiurupan hita di ragam ni angka ulaon parhuriaon i.
Dipungka do Sinode i marhite partangiangan dohot Ulaon Na Badia manogu huhut pataruhon sude
parsinode mandohotisa di bagasan tangiang dohot tondi parhahamaranggion manotophon angka
haputusan na mansai arga, jala na mansai balga panghorhonna tu pardalan ni panghobasion ni HKBP
tu jolo ni ari on.
Tahalashon do nang haroro ni angka panggomgomi na tangkas mangalehon panghirimon dohot
pamingkirion tu sude parsinode marhite hata huhuasi pinasahatnasida anggiat sisada urdot huria dohot
panggomgomi paturehon panahit sosial na masa na boi manegai ngolu ni masyarakat dohot bangsonta,
songon i asa masiurupan paturehon hahipason dohot parngoluon na lam tu hinsatna. Songon i dohot
haroro ni Kapolda Sumut na manosohon hinaringkot ni parsidohoton ni HKBP mangurupi patulushon
angka ulaon pinatupa ni pamarenta, manjaga hademahon ni bangsonta, huhut lam marsitutu
pataridahon harentaon ni sude ruas nang parhalado di sude inganan.
Tarida do parhinsat ni panghobasion ni HKBP sian Barita Jujur Taon na pinaandar ni Ompui Ephorus.
Lam martopi do usaho dohot parsitutuon ni Hurianta manggohi tanggungjawabta tu Dana Pensiun
HKBP. Nunga dipapungu hurianta lobi sian Rp. 121 Milliar laho manggarar utang tu Dana Pensiun.
Ingkon luluanta dope Rp. 7,7 Milliarnari mangalunasi utangta i. Ditotophon parsinode do asa marhusor
ma Dana Pensiun Manfaat Pasti (DPMP) gabe Dana Pensiun Iuran Pasti (DPIP). Mauliate ma
dipasahat Sinode Godang tu sude ruas dohot parhalado ni hurianta na dohot mangurupi Dana Pensiunta
i. Angkup ni i, di hamamasa ni pandemi Covid-19 i lam tu hinsatna do hatauon ni hurianta mamahe
teknologi informasi (IT) laho pehembanghon panghobasion; parsitutuon ni sude ruas dohot parhalado
manumpahi dalan patureturehon angka arta ni HKBP; songon i nang parsidohoton ni HKBP di angka
ulaon Oikumenis.
Diparungkilhon parsinode do nang angka na masa di sandok portibi on, na pinarungkilhon ni Sidang
Raya Huria Saportibi, i ma Porang Ukraina dohot angka porang di angka inganan na asing.
Diparungkilhon parsinode do nang angka isu publik termasuk kerusakan lingkungan hidup, tanah adat,
pelecehan dan kekerasan seksual. Hombar tu panindangion ni haporseaonta, ingkon parsidohot do ruas
dohot parhalado ni hurianta mangotapi angka kerusakan lingkungan, pelecehan dan kekerasan seksual.
Diparsirangguthon do nang lalo na masa di Tapanuli Utara na manegai torop bagas dohot gareja.
Ditangianghon parsinode do angka korban asa margogo, laos dihamauliatehon do nang angka
pangurupion sian angka hurianta, na mangurupi angka korban i hehe sian parungkilon bolon i.
Bagas do dihatai di Sinode i dalan pasauthon Sentralisasi Parhepengon HKBP dung jolo dipatupa
angka panghataion na bagas di ganup tirket. Ditotophon Sinode Godang do balga ni situhukon ni huria
tu program sentralisasi i, i ma 55 % sian potensi parhepengon ni ganup huria tu Pusat laho manuhuk
program Ressort, Distrik dohot Hatopan, songon i nang manuhuk parbalanjoon ni sude pangula ni
HKBP na pinabangkit ni Ephorus. Jala 45 % nari ma tading di huria, sipangkeon tu program
panghobasion ni huria i. Nunga nania lelengna dihasiholi Hurianta hasasaut ni sentralisasi on ala
tahirim marhite sentralisasi parhepengon on lam hinsat panghobasion ni Hurianta, mangalehon dalan tu
sude huria dohot pangulana patupa angka inovasi dohot kreasi, laos mangotapi angka hamaolon na
marpardomuan tu mutasi pelayan dohot Dana Pensiun.

Dung mamolus panigation na tangkas di tirket Huria, Resort dohot Distrik, ditotophon Sinode
Godangta do Amandemen IV Aturan Peraturan HKBP 2002, padengganhon angka na marpardomuan
tu haruason tu Sinode Godang 2024 dohot Sentralisasi Parhepengon. Songon i na marpardomuan tu
pamaheon ni teknologi di panghobasion ni huria. Pangkeonta ma Amandemen Aturan na imbaru on
mamungka sian 1 Januari 2023.
Sai diurupi, dipargogoi, jala dipasupasu Tuhanta ma sude ruas nang parhalado ni HKBP patulushon
angka ulaon na tau pahothon haporseaon nang pahinsathon ngolu ni sandok HKBP.
Taingot ma hata ni Tuhanta di Jeremia 29:11 na mandok: “Ai nunga tangkas Huboto sangkap angka
na Husangkapi taringot tu hamu, ninna Jahowa, sangkap hasonangan do tahe ndada tu
hamagoan, asa Ahu mangalehon tu hamu ujung na hinalungunhonmuna”.

Seminarium Sipoholon, 27 Oktober 2022

Tabe mardongan tangiang,
Atas goar ni sude parsinode,
Ephorus HKBP,

Pdt. Dr. Robinson Butarbutar