SAIRANG PASTOR BIAL KṬP KUM 50-NA (GOLDEN JUBILEE) LAWMPUINA LEH A

CHANCHIN KA LO HRIAT VE TLANGPUI TE

Upa C.Lalzawnga, Sakawrtuichhun.

THUHMA:

Sairang Pastor Bial KṬP hruaitute bengvarna leh min duhsakna chungah te hian a
hmasa in lawmthu ka sawi e.

KṬP Golden Jubilee (Kum 50-na) 2022, Bial KṬP Conference huna lawm an tum thu te,
min rawn hrilh bawk a, tling lo taka Sairang Pastor Bial KṬP Leader hmasa ber ka lo
nih ve na te vangin thuziak (article) lo buatsaih  tura min rawn sawmna avangin ka
lawm em em rualin thuziak mi ka nih loh vang te erawh chuan thiam lo tih inhre reng
chungin tawite tal chu han ziak ve ka tum a ni e.

SAIRANG PASTOR BIAL KṬP LO DIN ṬAN DAN HAN SAWI HMASA ILA:-

Kum 1972 khan Dawrpui Vengthar, Pastor Bial KṬP Conference Tanhril Kohhran Biak
inah kan hmanga;Hemi ṭum hian Sairang Pastor Bial Thar KṬP chu a lo ding ve chho ta
a; Dawrpui Vengthar Bial KṬP leh Sairang Bial KṬP hruaitu ve ve tur te chu thlanna
hun neih zui nghal a ni.

He Conference hunah hian Dawrpui Vengthar Bial KṬP Leader atan chuan Pu
Zairemthanga,(L): Upa a nih hma hunlai a mi chu thlan niin; Ex-Minister te a ni tih kan
hre ṭheuh awm e.

Sairang Pastor Bial KṬP Leader hmasa ber atan kei tling lo tak Pu C.Lalzawnga, hi
thlan ka ni bawk a. He Conference hun ah hian Dawrpui Vengthar Bialin indanna
Minute Bu te, leh Bial Sum atam zawkte chu min hlan bawk a, huphurh tak leh hreh
ang reng tak chung siin Sairang Pastor Bial thar ah Bial KṬP in hma kan han la ve chho
ṭan ta a ni.

Sairang Pastor Bial KṬP Committee in Bial ṭan lak dan tur kawng hrang hrangte chu
ngaihtuah zui nghalin Pathian pawhin mal a sawm ṭhin hle mai, Bial KṬP te chuan
hlim tlang tak leh nung tak maiin rawngbawlna te pawh kan nei ve fo ṭhin a ni.

Pathian Fak hla phuahtu/ siamtu'n Ka Lungngaih lawm a chan tirin a lo tih ang deuh
hlek khan Dawrpui Vengthar Bial KṬP kan ngai ta bik hauh lo mai le. Tin, khang hunlai
khan kan Bial te chu kan inpumkhatna te a ṭha in kan inpawh ṭha em em a: Hruaitute
kan inpumkhatna a tha hle bawk a. Branch KṬP tin te nen Pathian thu leh hla ah te,
Thlarau Thianghlim pawlna awmpuina te dawng telin kan hlim tlang
em em ṭhin. A hunlai te kha chuan nuam pawh kan ti tlang ve ṭhin hle mai.

Bial KṬP Conference kan neih ṭum ten thu leh hlaah te kan tui em em mai ṭhin a kan
lam nasa thin khawp mai a, mitthlaah a la cham reng mai. Kan inngaiin kan inthlahlel
tawn em em ṭhin.

BIAL KTP RAWNGBAWLNA TLANGPUI TE I LO SAWI ILA:-

Central KṬP Hruaitute nen kan inpawh tawn ṭha em em a; Anmahni kan sawmnate
chu min rawn tih hlawhtlin sak ṭhinin; Anmahni pawhin nuam an ti ve hle ṭhin.
Sairang Bial ah khan Bial Conference inkar hunah te Special Programme Bial Huap te
chu neih ṭhin niin; A hlawk kan ti tlang hle ṭhin. Zaithiam (Singer/Soloist) Lalthannguri
Tochhawng te, Vanlalzapi te chu zaia rawngbawl turin kan sawm tel ve fo ṭhin a;
Ṭhalai te thinlung leh beng pawh an ti tlai hle ṭhin. Conference ang deuh tho hian Bial
chhung Branch KṬP te kan kal ṭha thei hle bawka hlawk te pawh kan ti tlangin hma
pawh kan sawn phahin kan inhre ṭhin.

Kan hunlaia Central KṬP Hruaitute kan sawm ṭhin chhan te chu :-

1) Leadership Training

2) Music Training

3) KṬP in tuai tharna (retreat) hun neih te

4) Crusade neih ṭhin te hi an ni e.

Tin, Branch intlawh tawnna te neih ṭhin a ni.

Sairang Pastor Bial KṬP Conference Sakawrtuichhun Kohhran Biak In ah kan neih
ṭumin Rev. Dr. Vanlalnghaka, Shillong Speaker atan kan ruai a; a tlangval lai a la ni;
Branch tin aṭangin kan kal ṭha hlawm hle nghe nghe a ni. A hunlai chuan Speaker lar
leh thusawi thiam tak a ni bawk a, kan hlawkpui tlang hle a ni.

Sairang ah te, Tanhril ah te, Sakawrtuichhun ah te, Sihhmui ah te, Dinthar ah te,
Nghalchawm ah te Conference kan hman ṭhin ṭum pawh khan Zaipawl nen Palai kal
pawh kan ṭha tlang thei ṭhin hle mai a kan hlim tlang thin khawp mai, a lunglen thlak
takzet a ni e. Bial KṬP Conference Sihhmuia kan neih ṭum te khan Tlawngah field trip
te neiin intihhlimna te nen hun kan hmang a, vawkte talhin ruai te hial pawh kan
ṭheh a,  kan tlaiin kan hlim tlang hle mai a; Tun hnuah hian mimal tak pawhin khang
hunlai te pawh kha a lunglen thlak ka ti khawp mai. Sairang Pastor Bial KṬP kum
1972-1982 hun chhung kum 10 zet hunah te khan rawngbawlpuite ṭawiawm na-in
Bial KṬP hruaitu rawngbawl hna te ka lo chelh ve hun chhung kha sawi tur tam tak
pawh a awm rualin sawichhuah vek sen erawh a ni lo e.

Pathian khawngaihna, hruaina leh ṭanpuina ka dawn zawng zawng ṭhin ah te khan
lawmawm ka tiin Pathian hnenah pawh lawmthu ka sawi a ni.

Mimal tak pawhin hlawkna min pein Pathian rinna leh a rawngbawlna kawngah te
Sairang Pastor Bial KṬP a kan rawngbawl ṭhin na te khan hma sawnna leh puitlinna
kawngah min hruaiin hma pawh ka sawn phah hle mai a. Ka theihnghilh ngai tawh
hauh loh tur zinga mi a ni e.

Sairang Pastor Bial KṬP chungah leh Pathian khawngaihna ka dawn chungah te hian
lawmthu ka sawi bawk e.

Kan hunlaia Sairang Pastor Bial KṬP khan Central KṬP General Conference ah te pawh
Bial hminga item te leh lan ve na te pawh kan nei ve tawh ṭhin. Chunga kan tel tawh
na te chu :- Sangkhumi, solo(zai), Laldineni Sairangte,Recitation leh J.Lalrinmawii,
(Recitation) Sakawrtuichhun te khan hun te an nei ve tawh ṭhinin;Palaite’n thiam an
ti hle ṭhin a, Sairang Pastor Bial KṬP te hi kan duai lo ṭhin tawh hle a ni.

Aw le, kan thu tlangkawmna tur nei tawh mai ila a ṭha awm e.

Tun hun thleng maia Sairang Pastor Bial KṬP te hmasawn zel theiin a la kal a ni, tih ka
lo hriat hian ka lawm tak meuh a ni e. Kum 50-na (Golden Jubilee) thleng thei te a,
Pathianin Bial Hruaitute leh Bial chhung member te a la hruai zel a ni, tih kan han
hriat ve te hian lawmawm kan ti lehzual hle a, faktlak kan LALPA leh PATHIAN ngei
chuan chawimawina leh ropuina chang zel rawh se.

Sairang Pastor Bial KṬP te kan LALPA ISUA KRISTA taksa siam puitlina a awma
Kohhran Kutke atana ṭangkai tak lo ni zel se, tih hi duhsakna sang ber nen ka hlan tel
nawn leh bawk e.

KṬP Thupui innghahna    :    Ephesi 2:10

    “Thil tha ti atan Krista Isuaah chuan siama awmin ama kut chhuak kan ni si a; chu
thil tha tih chu kan awmna turin Pathianin a buatsaih lawk a ni.” He KṬP thupui
innghahna thu te hi hmang ṭangkai tlat zel ila, Pathian tana thil ṭha tih ngah deuh
deuh zel tur-in ṭan la sauh sauh ila, thlen chin aṭanga hmasawn zel turin Sairang
Pastor Bial KṬP, Pathianin hruai zel rawh se.

 A thil tumte    :   

    1)    Isua Krista rinna leh amah anna kawnga thalaite hruai.
    2)    Kohhran kutke ni tura thalaite buatsaih.
    3)    Kohhran hnathawh tihpuitlin.
    4)    Krista Chanchin |ha puan darh.

KṬP thiltum leh innghahna thu te hi a ṭha in a pawimawh tel em em reng bawk e.

Rawngbawl tura Chhandam kan nih avang te in heng KṬP thil tum (4) te hi en chung
zela hma lam pana ke pen zel pawh a va pawimawh dawn em!?