MAHNI INTHUNUN -H.

ZOTHANPUIA Bible chang :Thufingte 25:28 Mahni rilru thunun zo lo mi chu Kawpui chim, kulh neilo ang a ni. Tita 2:13 Pathian ngaihsak lohna leh khawvel chaknate bansanin, tunlai khawvelah hian insum leh fel tak leh Pathian ngaihsakin kan awm tur a ni tih min zirtir a Ringtu nun hi nun awlsam a ni lova, mahni inthunun reng ngai NUN a ni a,kan in thlahdah palh hlek chuan sual a petek leh mai a awlsam em em a. Setana hian kan panna lai theuh hi zawngin min hel reng a, englaipawhin kan nun hi kan uluk a tul em em reng a ni. Eng kawngah te nge kan inthunun ang? 1. Kan hun hman danah:- Tunlai thalai tam tak chu zan lamah mut nachang kan hre lova, zingah lah thawh nachang kan hre hek suh, duh chen chen kan mu a, chaw ei dawnah nu leh paten mama, mami tho rawh chaw kan ei dawn tiin inthlahrung tak chungin min han kai thova, vin tak chungin ka ei peih lo ka mut a chhuak tia kan chhan thin te hian nu leh pate rilru nat dan tur ka ngaihtuah neuh neuh thin.Tunlaiah chuan kan hnathawh a inang tawh lova, zan lam hnathawk pawh kan tam tawh a, mahse a tam ber hi chuan thil tangkai kan ti ngai lo ang. Serial TV kan en a, eng reality TV show te maw, computer games khelh nan emaw, facebook ah thil pawimawh em em ni lem lo sawia zanlai dar tlemte thleng thleng a hun kan hmang hi a dik hlel deuh chuan ka hre thin. Heng zawng zawng ah hian ringtu chuan a tawk a hre tur a ni a, kan thlarau nunin a hlawkpui dawn lo a nih chuan kan kalsan ngam a tul khawp mai. Kan tawngkam hmanah:- Jak 3:8 Amaherawhchu lei hi tumahin an khawi ngam theilo a ni, thihna hlova khat, sual awm hle hle theilo a ni tih kan hmu a, kan nu leh pate kan unaute leh kan chenpui lakah hian kan tawngkam te hi kan thlahdah lutuk thin lo maw? Kan thiante leh kan rawngbawlpuite lakah te hian kan tawngkam kan fimkhur deuh thin chu a ngai khawp mai, tawng kan fimkhur loh lutuk chuan kohhran ang emaw, thalai ang emaw a kan rawngbawl hona a tichhe thei ani tih hriain, kan thusawi tur hi kan sawi hma hian I ngaihtuah nawn hmasa phawt thin teh ang u. Kan ei leh in ah :- Rom 14:21 I unau tlukna tur a nih chuan sa ei loh te, uain in loh te, thil engpawh tih loh a tha ani Ei tur tello chuan mihring kan dam khawchhuah theilo a, mahse ei puar lutuk erawh chu a tha chuang hauh lo, taksain a tawrh mai bakah inkhawmnaah te mutthluk a awl a, Zaipawl hla rem dawn phei chuan zai that a har a, tin, Bible in ei puar lutuk suh i lo pachhe hlauh dah ang e a ti a, kan ei leh in hi krista chanchintha nen a in mawi tur a ni. Zuk leh hmuamah:- Mizote hi zuk leh hmuam ti nasa ber hnam kan ni ti ila a sual tam kher awm love, kan taksa tana natna a thlen chu sawiloh kan thla khat zuk leh hmuam leina ringawt pawh hi belh khawm ila a tam hlawm ngawt ang, heng zawng zawng ai hian Pathian ram tan tlemte pawh pek belh ila, thlarau bo pakhat tal pawh man se vana kan lallukhum khum tur hi inthlahrung hauh lovin kan khum thei theuh ngei ang. Pathian ngaihsak naah:- Ringtu piangthar ni si bible chhiar peih hauh lo te, chaw ei dawnah bak tawngtai ngai miahlo te, TKP in fellowship an nei thin tih pawh hre miah lo, Sunday zing inkhawm chauh duhtawk kan tam ta lutuk hi in ngaihtuah chian a, Pathian kan ngaihsak hi a tul tak meuh asin. Mi lehkhathiam zirsang leh officer lian pawh ni mahila Pathian ngaihsak ngailo mi chu a nun a famkim ngailoin a nun in tlakchham a nei thin, chuvangin he khawvel hun hmawr tawh taka kan ringtu nun kawng zawh hi nitin mai kan en chian a, kawng engkimah mahni inthunun chunga kan kal hi a tulin a pawimawh takzet ani. Sam 73:28 Kei atan erawh zawng Pathian hnaih hi a tha a ni,Lalpa PATHIAN chu ka inhumhimnaah ka hmang a,A hnathawh zawng zawng thu chu ka hrilh theih nan

2.

3.

4.

5.