FEHEDE FOKUBALOI BA MBONGI NI’AMONI’O MOROI KHO BPHMS BNKP

Nifosumange ba ni’omasi’ö fefu mbanua niha Keriso ba zi sagörö BNKP.

Nisuno Lowalangi ba wa’ebua dödö-Nia khöda fefu, me no talalöi ginötö wama’anö (Adife), ba no ofeta
ita ba ginötö wuawua dödö “Bongi Ni’amoni’ö”, ya’ia ba wanema’ö sangorifi andrö, So’aya ya’ita Yesu
Keriso, solohe fa’atulö ba fa’ohahau dödö ba gulidanö. Andrö ma’owai ami fefu “Ya’ahowu Mbongi
Ni’amoni’ö”.

Tuho wamalua Fanunu Fandru ba ndröfi andre, imane:

“YAMUFATÖRÖ DÖDÖMI FA’OHAHAU DÖDÖ ANDRÖ KHÖ KERISO.” (KOLOSE 3:15A)
Ba Daroma Li andre, tebotokhi ba dödöda wa Yesu Keriso andrö no “Razo Fa’atulö, solohe Fa’ohahau
dödö”, ba ena’ö tumbu IA ba dödöda zamösana ita, ba ena’ö Fa’ohahau Dödö andrö khö-Nia, zangonahia
tödöda, samatörö fa’aurida, ba si tobali afore ba wangawalö nifaluada ba wekoli ba gulidanö andre.
Modanedane ba Daroma Li andre, mafa’ema ba mbanua niha Keriso, awö khö ndra sohalöwö fefu:
1. Modanedane ba “Wa’ohahau Dödö” andre si no mangonahia tödöda, datafalua visi BNKP me imane:
“BNKP MÖI ENONI BA TOBALI HOWUHOWU.” Andrö matötöna wa fefu jemaat-resort lafa’anö
lala halöwö fa’a’enoni ba ndröfi 2018 sodanedane ba Program Umum Pelayanan BNKP, ba sifao
fanundreheni soroi mbanua niha Keriso.
2. Ena’ö fefu ndra awöma enoni, ta’osindruhugö wangai halöwö fa’a’enoni, ba wolohe fa’ohahau dödö
ba gulidanö. Ya tobali ita dumaduma ba zamati fefu. Matötöna göi khöndra awöma Fandrita, ena’ö ba
gotalua mbanua Niha Keriso so ita, ta’osindruhugö wohalöwö ba wolohe fa’ohahau dödö (Damai
Sejahtera), me no oya zamaheu ba samadögö famati mbanua niha keriso ba ginötö andre. Tekaoni ita
ba wanga’aro’ö fahasambua ba khö Keriso, I’onarai ba wongambatö, ba lingkungan, ba Jemaat, ba
Resort, ba sinode, b aba niha fefu.
3. Ena’ö dozi fongambatö (setiap keluarga) mohalöwö ba wamonga’eu Fa’ohahau Dödö andrö ba nösi
nomo. Mufalua ba böi mubato wamalua fasumangeta khö Lowalangi (Ibadah Keluarga) ero ba zahulö
awö ba zi bongi. Imane Taroma Li Lowalangi ba V Moze 6:6-9: “Taroma li andre, niwa’ögu khöu
ma’ökhö, ba ötanö ba dödöu. Ba öfahaö göi ndraonou ba da’ö, itörötörö liu, na yomo so’ö, ba he na ba
wekoli; na möí’ö mörö ba na maoso’ö. Ö’böbögö ba dete dangau, tandra, ba ba mbörö nikhumö,
amaedola mbala högö; ba ösura ba gehomo nomou, ba ba lagö mbawa göli khöu.”
4. Ena’ö göi mufonga’eu wa’ohahau dödö andrö soroi khö Yesu Keriso ba jemaat-jemaat. Na so watitisa
ba ginötö si lalö, töratöra me tefalua wanutuyu ira sohalöwö - ba moguna mufalua wangatulö,
sodanedane ba duho (tema) Natal ba ndröfi andre.
5. Ena’ö fa’ohahau dödö andrö khö Yesu Keriso, tafonga’eu ia ba gotalua wabanuasa, töratöra ba gotalua
soida Indonesia. Ba wehede ni’oroi’ö soroi ba PGI tefasugi ba dödöda wa so 5 ngawalö noro dödö
samasui ya’ita: (1) Fa’anumana, (2) Fa lö atulö (ketidak-adilan), (3) So ngasi samadaö somasi
wowu’ai danedane soida (Pancasila) faoma danedane zi sambua agama; (4) Fa’atekiko gulidanö, irege
alua molö, fa’aruru danö, fa’oköli nidanö, fa lö mo’otatua mbawa (cuaca), ba (5) Fökhö gulidanö
samakiko fa’auri, simane Narkoba, HIV-AIDS, Korupsi, Judi, ba tanö bö’önia. Ba da’e tekaoni ita ba
wolohe fa’ohahau dödö soroi Keriso.
6. Ba wamonga’eu tuho (Tema) Natal andre, ma’andrö khöda fefu, ena’ö ta’o’aurifagö wa’omasi, ba
tafalua halöwö fa’omasi ba niha fefu, ya’ia na mubali’ö “Sia’a halöwö Diakonia” ba jemaat-jemaat ba
BNKP. Datatörö tödöda Daroma Li Lowalangi:
1) Luka 4:18-19: ”No so khögu Geheha Zo’aya, me no iboyoini ndra’o, no ifatenge ndra’o, ba
wangombakha turia somuso dödö andrö, ba zi numana, ba wanuriagö fangefa ba nikuru, awö
wangila niha ba zagau’a, ba womolala nifakao, ba wangefa, ba wanuriagö döfi omasiö andrö khö
Zo’aya.”
2) Matai’o 25:45 Si ndruhu niŵa’ögu khömi, ndrege nilaumi ba dalifusögu andrö, fondrege zi
numana, ha niha ia, ba khögu no milao da’ö

3) Yakobo 1:27: Da’ö zi sökhi wamosumange Lowalangi, si lö si fabaya hadia ia, wamaigi
Lowalangi Ama: na möi ita mutolo zi lö ama, si lö ina, awö zi no mate donga ba wa’abu dödöra,
ba na tafaigi, fa bõi göna ita si ra ira’iö andrö, ba niha guli danö.
Simanö wehede ni’oroi soroi BPHMS BNKP, ba samuza tö ma’owai ami fefu “Ya’ahowu Mbongi
Ni’amoni’ö 25 Desember 2017, ba Ya’ahowu wamaondragö döfi sibohou 1 Januari 2018.”
Gunungsitoli, 1 Desember 2017
Badan Pekerja Haria Majelis Sinode
Ephorus Sekum Bendum

Pdt. Dr. Tuhoni Telaumbanua Pdt. Dorkas Orienti Daeli, MTh Pdt. H. Zega, STh