THIL ȚHA TIH HUN: VAWIIN

Lal Solomona chuan, "Engkim tan hun ruat a awm a, van hnuaia thiltih zawng zawng tan hun remchang a
awm. Pian hun a awm a, thih hun a awm. Phun hun a awm a, thil phun phawi hun a awm, tiin a sawi a.
(Thuhriltu 3:1-2), Thil engkim hian a lehlam (opposite) an nei vek a. Hma lam a awm angin hnung lam a
awm a. Thil tih tur a awm chuan tih loh tur pawh a awm. Thil chhia a awm chuan a țha pawh a awm a.
Chatuan hmunah pawh vanram leh meidil a awm. Vawiina kan hun hman dan atang mihringten mahni
chhia leh țha hriatna hmanga a tawp hmun(goal) kan thlen hunah nimin lamah khan eng nge kan lo tih
țhin tih chuan vawiinah kan nun min pho lang țhin. Vawiin hun kan hman țhat chuan nimin tan par mawi
tak kan phun a, naktuk tan beiseina chi mawi tak kan tuh nghal zel ang.

Thu chu kan chhiar a, kan ngaithla a, kan sawi a. A hriat na na na chuan kan hre tam er ur mai. Kan hmuh
leh kan hriat zawng zawng hi zawm vek ta ila chuan fel famkim nih aiin kan buai letling viau ngei ang. A
țhen zawm loh neih te, a țhen chu nuna khung luh tlat te hi a lo țul si a. Kan nuna kan pai tur leh kan
paih tur thil erawh thliar hran thiam turin Pathianin keimahniah finna min pe țheuh a ni.

Kan tana thil țha tih hre reng chunga chu thil țha chu tih theih loh tlat nun pai ruk rengte hi chhut chian
chuan mahni inhremna nasa tak a tling ve tlat. Sual kan pumpelh luih theih erawh chuan mahniin kan
inchhuang ru hliah hliah a, thinlung a hlim veng veng leh lawi si. Buaipui tham ni ta chu thil țha lo a ni tih
kan hriat chian hmaa kan tihsual zawng zawng te kan harh chhuah huna insiam țhat vat kan tum lo țhin
hi a ni. Kang mei a chhuah hmaa inven fimkhur tluk a awm lo va. In a kan țantirh chiaha țhelh chu in pum
pui deuhthawa a kan hmaa țhelh aiin lukhawng a nei zawk tho a ni.

Tirhkoh Paula chuan fel famkim tawh reng inti ka ni lo va ti chungin kan tan zawm tur leh tih loh tur thil
tam tak min zirtir a. Kan fel famkim huna sawi leh tih atana kan khek chuan mite hmaa par chhuah hun
kan nei ngai lo ang. Thil țha tih hun chu thil țha a ni tih kan hriat ni(hun) chiah hi a ni. Naupan lai chuan
nu leh pa zirtirna leh aia upa zawk te, zirtirtute zirtirna kut hnuaia inzir tur kan ni a. A chhia leh a țha hi
thliar hran thiam turin min zirtirtu leh min hrilhtu kan mamawh. Chutianga an zirtirna kan zawm chu thil
țha tih kawnga rahbi bul ințanna chu a ni. A bul țanna a țhat chuan a tawp pawh a țha țhin.

Chinese thufing chuan, "Thinkung phun nana hun țha ber chu kum 20 liam ta kha a ni a. Hun țha ber
dawttu chu tun hi a ni", an ti a. Hun kan hman ral tawh zawng zawng kan chhui letin a rualrem par par
bik lo va. A changin kawng mam nuam tak niin, a chang chuan a khuar lai te, a pawng sang lai te, a
khawkrawk lai te pawh kan paltlang pheng phung maithei. Kan kawng zawha thil chiang em em mai chu
vawiinah hian chutiang hun chu kan kal pel vek tawh. Nimin tan kan hnutchhiah vek tawh. Ngaiin țap
lawm lawm mah ila koh kir theih a ni tawh lo. Hun hlui kan dawn let changin hlim leh lawm taka kawng
dik kan zawh chuan lung a tileng a. Thil țha lo, kawng dik lo hlira hun kan hman ral erawh chuan pawi ti
vawng vawnga inchhir ruknain min bawh bet chang a tam thin a ni.

Hun hlui liam tawh hnu kan dawn kir chang pawha lawm leh hlima lungkim taka kan nuih vur vur duh
dawn chuan vawiin(tun hun) hi țha taka kan hman a țul a ni.

John F. Kennedy chuan, "Inthlakna hi hringnun dan a ni. Hun hlui liam tawh hnu leh tun hun, vawiin
chauh thlir rengte chuan an hma hun an hloh ngei ngei ang," a ti a. Kan nuna thil țha lo te chu kan thlak
țhin tur a ni a. Inthlak thuta kawng țha lam zawh chu mi țhenkhat tan chuan thil harsa, tih theih loh tur
emaw tiin inthlak hreh deuh mah ila thil țha tih nana bul țan hun tha ber chu thil țha a ni tih kan hriat
hun, ni tina kan vawiin hi a ni tih hi hre nawn leh ang u.

Thil țha chu eng nge ni ta ang? Thil țha chu mahni nun hmasawnna tura inzirna, thlarau țhanlen nana
zirtirna, kan vela mite țanpuia an tana malsawmna thlentu nih, sual rawng kai lova tih tur țha kan hriat
zawng zawng kha thil țha chu a ni mai. Hetiang zawng zawng hi Bible-ah min zirtir vek a. Kriatian kan nih
chuan thil țha tih kawnga inzirna ber chu Bible chhiar tama, Pathian thu anga nun hman hi thil țha ber
chu a ni.Thil sual ti tura kawng țha lo kan zawh chuan sual hnehin kan awm a. Thil țha kan tih chuan sual
kan hneh zawk dawn a ni. Kan phak tawka thil țha tih nachang kan hriat chuan nun a hlim lo thei lo.
Chutiang ti tura kan nun kan hlan chuan mi tinin a hlawkna an chhar țhin. Chhungkua leh khawtlang tan
par mawi duhawm tak ka vultir dawn tihna a ni.

Thil țha tih nana hun țha ber chu kan pian phat ațanga nu leh pate zirtirna țha kawng zawh zel a ni a. Fa
țha leh duhawm, mahni intodelh thei, fa rohlu, mi puitling leh belhchian dawl kan nih theih nan ni tinin
kan inzir a țul. Mite hnena thil țha sem chhuah kan duh chuan kan nunah sem chhuah tlak rah duhawm
tak kan chhek khawl tam hmasak a tul a. Mi dang tana thil țha kan tih tam poh leh kan nuna chi duhawm
kan kui țiak nasa zel tihna a ni. Kan sem chhuah pawhin 'vahluk chhu sem' an sawi anga engkim neih
zawng zawng pek chhuah tur tihna ni lovin țanpui ngai te tanpuiin a țul hunah khawmuang lova pheikhai
zang tur tihna a ni. Luan chhuahna nei lo dil tui chu tui thianghlim tak a ni ngai lo.

Hringnun hi a tawi em em mai si a. Keh chhe hma tak, kal sual awl tak mai a ni a. Kan beisei leh thil
tumte tihlawhtling tur chuan hun remchang changa kan țhut mai mai chuan tihpuitlin hun a awm ngai lo
vang. Ni tin hi hun remchang ber chu a ni. Sual sim hun chu kan vawiin ni zel hi a ni a, mi tinin kan thih
hma loh vawiin hun hi kan hmachhawn zel dawn. Thil țha chu kan rilruin tih a chak zawng zawng ni lovin
hma sawnna kawnga lukhawng nei tur, a titu tana inchhirawm loh tur, a țha leh țha lo lam khaikhin
pawha a țha lamin khin rit(mark tam) tak a hmuh zawkna ngei chu, chu ngei chu thil țha chu a ni.
Nimin leh naktuk tan vawiinah eng nge kan tih ang? A țha lam kawng nge kan zawh dawn, tlak chhiat
tulh tulhna tur kawng zawk? Sem chhuah nachang hre ngai hauh lo tan vawiin atang hian pek chhuah
hun ni se, thu țha zirtirna dawngsawng țha peih lote tan vawiin ațang nun thlak țan ni se, hma lam hun
tan a tlem emaw, a tam emaw sum khawl nachang hre loten vawiin ațang tlem te tea khawl țan ni tawh
se, dik lo taka sumdawng țhin te tan vawiin ațang eizawnna dik hmangin sum zawn ni tawh se, lehkha
chhiar ngai lote tan vawiin ațang bul țan ni tawh rawh se. Kan tih atana țha, kan tih peih țhin lohte kha
kal chhet chhet pahin vawiin ațang thur chhuak zelin kan hun hlui tur hi mawi takin hnutchhiah hram i
tum zel ang u. "Pathian ring tawh te chuan thil țha ti zel turin ngaihtuah rawh se,"(Tita 3:8 ) tih thu
MMHIP thuvawn angin thil țha ti zel turin vawiin kan nun hi naktuk zel atan i inhlan zel ang u. Pathianin
hringfate he leia min dah chhan chu thil țha ti turin min siam a ni si a.

"Thil tha ti atan a siama awmin,

Ama kutchhuak kan ni si a;

Chu thil tha tih chu kan awmna turin,

Lalpa'n a buatsaih lawk a ni.

Kan vanglaini te hi a rei lovang,

He khawvela kan kan cham chhung hian;

Chuvangin vanglai hunte hmang thain,

Lalpa tan i thawk zel ang u."