PIDATO

“KONCINA MATEKNEA SIAGANG MASUNGGUA”

Assaalamu’alaikum Warahmatullahi Wabarakatuh…

Tau nipakalakbiritta ngaseng tim juri, tunipakalakbiritta guru-guru porea ri Jeneponto,

Tunipakalakbiritta panitia, tunipakalakbiritta Bapak/ibu niaka ri tampaka anne, siagang agang-
agangku ngaseng bentenna, parammatanna pakrasanganga.

Tabe’ Kareng, arengku…. Battu ri UPT SMPN……

Sannak rannuku nasabak nisareak wattu ammenteng ri dallekang malakbiritta ngaseng erokak
lampabattuangki angkanayya “Koncina Mateknea siagang Masunggua”

Hamdan Wasyukron lillah

Mmae maki massing sukkuruk nakimammuji tamattappuk mange ri Karaeng Allah Ta’ala lanri
nasareta buku magassing, tubu masalewangang, ati maciknong, siagang panngai erok, naki niak
akrampungang ri tampaka anne. Poro appilanngeri, appinaknak kana mabajik mappassumangak.

Natena poeng kittakkaluppa angkirinngangi sallang pappassalamak mange ri nakbita nakbi

Muhammad SAW nasabak ia nakbi anngerangki battu ri sassang makkapuka mange ri singarak
kabuyu-buyua kamma-kamma anne.

Matekne siagang masunggu? Inai anrinni erok matekne siagang masunggu tallasakna? Nakke.
Kipatanngori nakipattojeng kalengta. Erokak matekne siagang masunggu tallasakku. Yaa,
kupattantumi tau niaka i lalang mae anrinni tau erok ngaseng matekne masunggu tallasakna.
Mingka, ammake mingka, teai nikana subakangtaji erok mingka akkareso paki antu
nakirurungang pannganro-nganroang mange ri Karaeng Allahu Ta'ala. Jari antekamma anjo
tawwa batena matekne siagang masunggu tallasaka? Assingkammaji punna erokki antamak ri
ballak natakkonci. Iyamianjo niakpa konci nitakgalak nampa kulle tassungke.

Tau niaka ilalang mae akrannu-rannu…

Koncina mateknea siagang masunggua, makasekrena iamiantu barani gauk anngalle passalak.
Niak tau angkanai, nakana punna baraniki anngalle passalak, anjoengmi nigappa nikerokia.
Makarua iyamiantu akkareso paki. Nasabak, pakkaresoanga tena napassalasa wasseleka.....

Siagang poeng teaki tinggi nawa-nawa, takkulleai sallak nikayao iareka tena ninrapik. Sitojeng-
tojenna tenaja nasala punna jai nawa-nawanta iareka jai nikeroki. Mingka, iya tommo nikullea
iareka natutukia kalengta. Anngapana kamanjo? Nasabak punna tinggi nawa-nawanta, jai tongi
pikkirang siagang mallakaji nipakalompo tena nakikkareso.

Anjomi, nantama konci makaappak iamiantu teaki lompoi mallak-mallak, kammayyami mallak-
mallakki assalasa. Injomi kupaua sumpaeng appaka koncina anjari pokokna. Na punna mallakki,
iangasenna anjo nikerokia tenana tenananjari iami sabak nakisassak lalang nasabak mallakki
punna assalasaki. Mallakki tena nipakalakbirikki, siagang mallakki punna tena niakmatu-matu.

Tau niakana ilalang mae akrannu-rannu….

Jari bajik niassenna, pokokna anjo koncina mateknea siagang masunggua iamiantu katojengang
iareka nipassumatai, nasabak punna nipassumataimi aknassami panggaukanta sannging mabajik.
Punna nipassumataimi gauk-gaukanga attantumi anjarina. Mingka biasaki allanngerek nakana
taua “punna nipassumatai tong mami pale natena nanjari nanipai, Allah Ta’ala angkaerokangi
nasabak gitte Tena pakkulleta passanngalinna Karaeng Allah Ta’ala appattantu”. Mingka teaiki
bodoi pikkirangta nasabak niak tong angkanai “akkaresopaki nakingguppa”.

Punna erokki tekne na sunggu tallasatta, akkareso memang maki ri rungkata ri gassing-
gassingangta ri kagassing-gassinganta, nasabak punna toa maki naki nampa erok akkareso
takkulleami batang kalengta nampapi nisassalak kalengta. Iyaminjo akkaresoki siagang tanjengki
mange ri Allah Ta’ala kammayyami kigaukangi passuroanna nakililiangi pappisangkana.
Nasabak, na nai-naina anggaukangi parentana Alla Ta’ala teknemintu na sunggu tallasakna.
Mingka nanai-naina todok tena nanagaukangi passuroanna Allah Ta’ala manna tunggeng ulu ri
bangkeng attallasak jaki intu mingka attallasak pare bonto jaki. Battuanna anjo, tena nakbarakka
tallasakta.

Jari kupalak ngaseng mange ri katte tau rungka-rungkayya, kammaya agang-agangku, sumangak
memang maki akkareso, akkaresomintu arenna punna kipattojeng-tojengi sikolanta, attojeng-
tojengki appilajarak na maraengannaya pole. Dasi na dasi sollanna matekne siagang masunggu
tallasakta ammuko membara, nakipakateknei tau toa malakbiritta.

Sikammaminjo kupabattuangki, nakutongkokmo anne pappaungku mange ri katte ngaseng

kareng, lakbi na kuranna kipammopporang mamiak. Salamakki to pada salamak

Wabillahi taufiq wahidayah...

Wassalamu’alaikum warahmatullahi Wabarakatuh