mahakota amminawang I rawangang parentana Jayalangkara. Naanjo Jayalangkara tau lambusuk pakmaik na adelek ri sikamma bonena buttana, siagang ri patarintina, ri anrong kamananna ri passarikbattanganna. Ka patampulo banngi patampulo allo kutadeng anne ammaka tamanganre na tamannginung ampalaki ri Allahu Taala na nisareang ri minasanna. Takbangka erok nibuno anakna. Apa salanna anakku na nipakama. “Lekbaki nakanamo karaenga “Taena salanna, naiajia anak cilaka antu anaknu, teak naturungang, cilaka, taena tanibunona antu anaknu, la niapai anak karrasaka, anak cilakaya.” Lekbaki numerami anronna antu Jayalangkara nanakna ri karaenga, “punna taena tanibunona anakku bajikangngangi passibunoak ka ammantang bawanjak pakrisik pakmaik, taena parekparekanna sallang takubunona antu kalengku”. Lekbaki nilanngerek kana kammana anjo ri karaenga, nabattuimi pikkirang karaenga angkana : “Punna kamma anjo, bajikanngammi nipelak siagang anronna.” Apaji na nisuro kiokmo paradana mantria siagang tau jaia. Naklampamo salampalampana, kira-kira lalangang tallu ngallo tallu banngi. Na nakanamo paradana mantria : “E, Tuang Puttiri, “ Anrinnimako kuboli siagang Jayalangkara I rawanganna pokok kayulompoa.” Na mammoterekma paradana mantria siagang tau jaia. Siapa sallona battumi ri pakrasanganga. Tanrusukmi mange ri karaenga annyomba angkana, “Battumi paradana mantria, ampabattu passuroanna karaenga, “Lekbaki nakanamo karaenga, “Salamakmintu tassala balaya ri pakrasanganga siagang ri nakke apapa ia kau ngaseng. Na mammaliammo pole karaenga mange ri ammakna I Mukakdang. Lekbaki anjo Jayalangkara siagang ammakna, ammantammi i lalang ri romang lantanga, nipilari ri paradanamantria. Na niakmo ri nawa-nawanna angkana, “Anne empoangku majai tau anngassengi anrinni.” Lekbaki naallemi Jayalangkara na nakalawing naaklampa. Kira-kira lalangang tuju allo tuju banngi. Na anjo leang batua tamakamakai tangkasakna I lalang siagang lapparakna. Na makjappamo ri leang rua sipakanakkang. Lekbaki, nakanamo pakmaikna, “Anrinnimak bajik ammantang. Taenamo kunibuntuluk ri tau ri pakrasanganna buraknengku. Kodia niak ija ripakmaikna lassuro boyai anakna. Taenamo kunibuntuluk, ka kupilarimi empoang napelakku paradanamantria. “Lekbaki nabattuimi poso ammakna Jayalangkara ri pakjappaya. Na padongkokmi anakna ri tompokna batua. Na manngarruk tommo Jayalangkara, sabak taena jeknekna susunna ammakna. Na nakanamo bundana : “E, anakku, lakuapamako anak, ka tena jeknek susungku ka sampulomi anrua allonna tanapanaungi kanre battangku, sikamma tommi tanapanaungi jeknek kallongku.” Lekbaki, nabattui seng poso siagang sipuruk ammakna Jayalangkara. Lekbaki, manngarrukmi seng Jayalangkara. Niallemi ri bundana nikalawing. Na mangarruk tommo bundana. Na naerammo anakna mange akboya jeknek ri leanga. Lekbaki nitaktaderammi ri Allahu Taala ammuntuluk I lalang ri leanga batu lompo. Naerammi anakna mange ri tompokna anjo batu lompoa napatinrotinro. Napatarami limanna maknganro ri Allahu Taala angkana : “O, karaengku, I Kauji karaeg malammorok, I Kauji karaeng manngamaseang, I Kau tonji anngassengi atan-Nu mapaksrisika.” Na tikring battumo panngamaseangna Allahu Taala ri atanna sakbaraka nasabak kamatuanna Jayalangkara, nattimbukburukmo jekneka anjoreng ri sepekna batua. Na naallemo ammakna Jayalangkara anjo jekneka na nainung. Nassaumo turerena, na bassorok tommo annginungi anjo jekneka. Iami nakanre, ia tommi nainung anjo ammakna. Jayalangkara I lalang ri leanga. Na naallemo anakna napasusu. Mammantang tommi anjoreng ri ampikna batua, jayalangkara siagang ammakna. Na salleang pilak lompo-lompo, lairilarimi, carakdekmi akkare-karena. Salleang assuluk antamami ri leanga akkarekarena. Lekbaki sekre allo nassuluk ri leanna makkare-karena, na sibuntulukmo anak macang, anak arassasa, naagang akkare-karena. Kammami anjo panggaukanna allo-allo. Na punna karuemmo antamami ri ammakna anngerang rappo-rappo kayu. Na punnna barikbasa, massing battu ngasengi seng. Anak olokolokaji nakana sangkammanna. Kammami anjo tunggunna gaukna akkarena siagang macang, arassasa, marrak, garuda, darek, jonga. Siagang ri maraengannaya pole. Sikammamianne rolo na ri bokopa seng nampa nisambungi