KAJADIA DANAU TALAGA

Nokaulu naria sangu boyar ri kente bulu bo bivi talinti ri sabingga kasoloana Donggala, ntode ri boya hai nipobiasa heira ane ritempo-tempona novia salia nadamba-damba sampe naeonaeo saena. Naupu konoa geira nosalia, tapi ntodea ri boya hi nasina nggaroke bo ledo nadota natulungi rona ntanina anu nasusa. Naria saeo nakava saito langgai kabilasa ri boya hai. Kabiasa hai nopakea natapa ntoto. Uatuna hai ntodea ri boya da mompaka gopa pangandea rapake riposalia. Kabilasa hai eva tona naarantai, apa polipana damo naleve. Ia nompakarapai saito langgai anu ranja sosambale japi. Pomperapina le nepeili, langgai anu ranja nosambale japi hai aga nepopalai. Pade kabilasa hai nompatunggai vai mombine anu ranja noriapu tovau. Ina dekeika yaku sakide pangandea apa naara mpu taiku. Vesia kabilasa hai nerapika pangendea. Ledo pangandea nikavana, kabilasa hai aga nikarausi mombine hai. Saito-saito tona ri boya hai nikarapaina, tapi ledoa naria saitoa nodekei pangandea. Ante kakodi rarana bo nalenge, kaupuna kabilasa hai nototoaka sou anu natuamo niponturoka saito tutua nene. Nene hai nosangaka i Ramla. Berimba ana? Karomu eva naarantai bo nalenge, neentayaka inene Ramlah. Nakana nene, tapi leria saitoa tona ri boya hi anu nadota nodekei sakide pangandea ka yaku, nesana Kabilasa hai. Mami vesiamo hai ntodea ri sii. Nipokonopa geira aga nompakasadia pangande posiala anu le nisani bara nuapa tujuna, panguli nene i Ramlah ntuli nodekei sasuraya pangandea ka kabilasa hai. Tarimakasi nene, kambana kabelo rara miu manggava pombalasina mabelopa, panguli Kabilasa hai ntuli nojoko suraya anu niduduaka inene hai. Kambelana karomu hi dako riumbana? Nekutana inene Ramlah. Yaku aga tona nolive-live dako ri kamatayona hilau ri kasoloana, panguli Kabilasa hai nesanaka pompekutana inene, tapi le nangulika sangana. Kaupuna nangande, Kabilasa hai nontudu inene Ramlah mesavi pombayu pae anu nadate eva sakaya. Mokuya tano yaku mesavi ri pombayu hi? nekutana inene. Domo masae ngena, boya hi rakakava mompahuku ntodea ri boya hie. Tapi dopame movie anu nepetuduka ntomaku, kana kusani ruru nemo-nemo nariapa tona nabelo ri boya hi ala rapaka salama. Tano mai aga inene saitona anu nabelo rarana, panguli Kabilasa hai. Pade Kabilasa hai nompalakamo no tingguli hilau ri boya riumbana ntodea nasiromu nompamula saliar naroa-roa. He ntodea, yaku madota mompaeva komiu pura. Pangane yaku nerapi pangandea, tapi leria saitoa komiu nompadekeina. Sisi ane mamala komiu mopaosu gie anuinijaloka ri tana hie kudekeika sanggoto bulava, panguli Kabilasa hai nongare ntuli nojoloka gie riara tan abo nompepeintaka sanggoto bulava. Nosimpago geira nompaosu gie hai.

Kateosu gie hai kapola-pola napundi uve daki ri bolo ntana valea gie nijaloka hai. Nasae-sae uve hai netambai kadeana nompayo uve boya hai sampe natala. Nene Ramlah anu riara pombayo pae nasama. Sisi valea boya hai najadimo rano anu natolelemo nosangaka Danau Talaga atau Danau Dampelas. Intje Makkah, Akhsan, SH dan Damayanti, Vita Brina, Dra. Pompeguru Bahasa Kaili Ledo Untuk SDN. PT Berkat Media Bersama, 2011. Publikasi oleh http://www.mfar-abdurrahim.blogspot.com