TPAT SAEI

Bio, mnurut crito kuni bapak rekinjan tun panan uku temngoa crito Tpat
Saei yo lebeak kuang duei poloak taun gi sudo. Tpat yo brasal kuni daerah Lbong
gi gen ne Tpat Topos, tun gi diem nak Tpat Topos yo tojoak basoak. Kerno tobo
yo mraso cigei btah igei nak di, kemudian tojoak basoak yo bageak igei pa o mai
daerah Palik Talang Puding gi gen tpat ne Tpat Nangei Nakei. Sudo o tbageak igei
pa o mai daerah Lubuk Dien gi gen pnan ne Tpat Lubuk Jale. Akher ne, gi diem
nak Tpat Lubuk Jale yo terdirei pat basoak.

Bio nak Tpat Lubuk Jale yo ade lubuk (bioa tegnang lem), gi nak lemne
ade dikup kan bsisik mas bnatang pliaro gi snayang tun antaro pat basoak o gi
tegen Rio Mangak. Si o asoak gi paling piset antaro pat basoak o. Wakteu Rio
Mangak aleu brayak mai pnan gi agak oak kuni Tpat Lubuk Jale. Teak kerno usil
atau o jano ba sbab telu dangne tmakep kan kesnangne pakei jalei. Wakteu Rio
Mangak belek, tibo-tibo si kemleak kan kesnangne nak lubuk o cigei si ne.
Wakteu si lak tmanye ne ngen ketleu dangne o. Si kemleak ade jalei gi masi
leceak teplak talei nak das kiyuo. Mako segreba si temeu ketleu dangne, si lasung
tmanye naipe pnan kanne, awei yo na kecekne:

Rio Mangak : “udi bakan gi tmakep kan bsisik mas pliaroku nak lubuk o?”

Tleu Dangne : “coa, keme coa de tmakep kan o.” Jnawab ketleu dangne.

Tobo dang ne yo tep coa lak makeu uleak tobo o.

Rio Mangak : “Udi ba gi mak kan o, sbab uku kemleak jalei gi udi makei utuk
tmakep kan o gi leceak teplak nak das kiyuo o.”

Awei o ba tjijei bsaket antaro ketleu dangne ngen Rio Mangak. Clakone
bsaket o, Rio Mangak diem-diem mutuskan utuk aleu kuni Tpat Lubuk jale o. Si
aleu msoa pnan gi aman mnurut ne. Bio, si panuo kekea manuo hmanuone kuni
pueng, samei putea ne wakteu kuni pelweng sapei pelbeak. Sapei ba si nak korok
gi uyo tegen sadei Tumuk tpatne nak cugung titik ayak sapei pnan sadei Tumuk.
Kerno bilei bi pelbeak lak kelmen, si mutuskan utuk cigei mlanyut pmanuo ne.
Diem ba si abeak kdeu bulen ba nak di. Sbab o ba sadei o tengen sadei Tumuk,
kerno tumukne pmanuo tun gi pertamo demyem nak di.

Kiro-kiro kdeu bulen ba sudo si tinga nak di. Si peker igei utuk mesoa
pnan diem gi lebeak nyaman. Bgoyoba si kemleak-kemleak samei mem kemnyan
korok o kuni oak. Kenleakne ba ade kiyuo lei lekat gi ade nak arah tpat ne pnan
sadei an Pagar Jatei gi uyo nea pken kmis oleh tun masyarakat sadei Pagar Jatei
ngen skitarne. Dengen putusan bulet, aleu ba si mai pnan pun lei o trus si pun
mraso aman ngen nyaman. Tinga ba si nak di abeak kdeu taun.

Pado bilei o, si kemnek pun kiyuo lei o. Teak kebne, si o peker ngen mem
kemnyan igei utuk mesoa pnan diem gi lebeak nyamanne. Sudo tekleakne ba pnan
gi lbeak anek mnurutne gi pnan ne korok nak cugung gi uyo nak korok sadei tran
do dan uyo tengen tun Tpat Saei. Dikernokan si mraso pnan o aneh, aleu ba si mai
mini utuk mrayak pnan gi kenlakne o, sapei nak di si lasung mraso cocok ngen
nyaman tinga nak di. Cnubone ba tinga nak di, coa an o si lasung mulai menea
pnan diemne ngen ca o mulai makua mbentuk sgei pat gi tnulung tun iding-idding,
bio nak iding-iding di o agak deu tun diem di. Bio gen pnan gi lak cnakua o sudo
lem wakteu dbilei nyak. Oleh kerno o ba, Tpat yo tengen Tpat Saei (sudo dbilei)
mnea pnan yo sudo nak lem wakteu dbilei nyak.

Sudo abeak kdeu taun ba Rio Mangak diem nak Tpat Saei yo. Nyatone coa
si teu ktleu dangne kanyo o msoa asoak pisenne o. Trus, ngen tlitine tobo dangne
o. Ktauan knan pnan diem Rio Mangak, suang kuni tleu dangne o segre smusul
Rio Mangak mai Tpat Saei. Jijei, tinga ba gi suang o dangne gi smusul Rio
Mangak, coa an tun duei basoak yo bsamei. Tibo-tibo bae Rio Mangak ngen
dangne o smapei psen ngen tun iding-iding o “kaleu udi cigei kemleak uku igei
nak pio, ade tano bahwa uku bi aleu”, klang kdeu mnit ba sudo si smapei psen
atau bmanat o, tun deu o tsadar bahwa Rio Mangak o cigei tekleak igei. Nesoa-
nesoa tobo tun iding-idingo naipe pnan Rio Mangak ngen dangne tapi cigei dapet
temeu igei, nyatone tobo o benea-benei raib.

Mnurut crito mno o, ade gi madeak tano pninga Rio Mangak dan dangne o
brupo pekeine serto buk spanyang smilan. Sudo o ade kulo gi madeak kedwei
basoak o mrasang jijei imuo. Jijei gi knubua tun nak lem kubua Tpat Saei o uyo
Cuma pakei ngen buk Rio Mangak dan dangne.
 BURUNG BINANG

Tun gi bi mninga kerno perang mno o. Gen asli Burung Binang o ba

Hasan Basri, si coa ade bapak ngen inok. Si tumoa dong uku coa snako-snako
keno olon gis nak pinggang peak kanen yo, liwet si masuk awak uku kalo o. Crito
anak stamangku awei ngen uku. Si masuk awakku yo kerno gen si mareak dong
uku tembas imo nak korok kubuane utuk bumei. Liwet kete pekerku uku coa binei
mbersi arak pgas gi idup imun das kubuane. Oleh sbab o ba, arwah Hasan Basri
masuk awak uku tibo-tibo. Dong si masuk awak uku, si smapei kete ksal dan
mareakne terhadap uleak uku gi coa mbersih kubuane. Gi mnea si lebeak ksal igei
dong uku ngen pasoak-pasoak mem bo o, sbab dukut gi ade nak das kubua o
mileu ktunun. Trus sudo uku npasukne, tibo-tibo bae uku tedemem serto kuni
pingang ngut ujung kekea kanen uku traso gis ngen coa nam genrak abeak kdeu
bilei ba gi pado akherne sapei uyo kekea kanen uku jijei lebeak pnak kuni kekea
kiduo jijei uku ciket kaleu dong panuo. Isei kecek ruh Hasan Basri o awei yo na:

“coa ade bcao ngen adat istiadat udi yo, dong mengemem pnan o kubua
uku coa nbersih, buteu gi ade nak das kubua uku o pateak, buk uku
ktunun, sdangkan nak kubua yo Cuma ade buk spanyang smilan. Coa ade
awakku nak di, cubo udi tanye nak ipe awakku coa de si. Coa ade inok
ngen bapakne, Hasan Basri tuun smidang tojoak basoak.”

Trus snapeine kulo maipe pao tojoak basoak yo aleu, dio na:

1. Monok Mitur (mai ujung Ktaun)

2. Korek Api
3. Renung Nipis
4. Tlutu Agung
5. Kembang Batu
6. Burung Binang
7. Selindang Papan

Do o ba basoak-basoak Burung Binang, pao belek mai tbo dan pao belek
mai arah mini gi coa teu pnanne gi pasti. Coa ade awakne gi kten, tapi mno o ade
gi kemleak dan musik burung o tunne genne Li, sbab si ade tinga nak kapung
dawen kmukin ade bae burung o dong mingep nak arak pelpeak pisang. Tnakep
ngen neketne ba burung o. Jujur, coa ade musik burung o, ade uku snakitne bi o
ngen cao uku tnikemne kuni blakang samei si aleu. Pucone gen si mareak uku bi
mnea kubua serto bukne ktunun.
 Dong awak uku gi masih npasuk ruh burung binang o, stamangku tmanye
liwet kcekne awei yo na:

Stamangku : “jano ksaleak keme dan weipe caone keme masen ksaleak
yo?”

Ruh Burung Binang : “cao mbayar ksaleak udi yo ngen mduo nak kubua o
dong udi btook nak plabei o, trus dong mduo kdeu samei
mbo duo gi pertamo utuk uku (Hasan Basri).”

Dong o uku masih dmem, jijei mnurut crito stamangku dan tun gi mai took
o gen. Dong stamang uku mbaco ngen tujuan mbo duo mageak ruh Hasan Basri o,
tekjut sapei angi kcang nenien, sapei-sapei arak pun gen awei lak oboak, tobo gi
mai took o gritak kete-kete samei o arak payung anak titik-titik tbang kete, sudo o
slelawei gritak maleak samei tmutup arak lapen, mei, ngen arak pmuk leyenne
mai pnan gi aman amek. Sudo stamang uku madeak gen “rumanne duo ite
tnimone de gen”.
 BUTEU NGENYAN

Mno o, pasne nak sadei Pagar Jatei ade tun slawei baes gi genne Tri
Dayang Sakti. Si dong mlak ton nak datet adep umeakne gi kbetulan datetne o nak
pingi dalen litas tun. Ton gi nlakne o utuk smiap pgen pmuk nak bilei nikeakne gi
lak nlaksana kiro-kiro duwei mingeu igei.

Dong si sibuk ngen uleakne melek ton kunyeu msak rato samei jmago
beak nmuk monok ngen arak bnatang leyenne. Samei o nak iding awakne ade
bokoa iben. Coa sako-sako si tengua Si Pet Dileak gi mnyar jijei tun smanei
tuwei. Si Pet Dileak yo smapei maksudne utuk btanye, mnupang singeak tgoa,
samei lak minai menem sbab bi mraso payeak ngen aus sbab bi panuao aoak.
Lasung ba Si Pet Dileak madeak tujuanne awei yo:

Si Pet Dileak : “woi nak, dalen gi arah mini o maipe tmusne?”

Tapi slawei o tep bae dmalen uleakne nano. Manek lakeu slawei o wei o,
Si Pet Dileak mulai cigei as, lasung bae si smapei gi klak si madeak “Jijei nak, ko
akan slamone nak pio sbab jaang kecekku coa mujarab. Harus ko tmimo seomor
idup nu akan mlak to o ba. Au ba uku aleu. Jijei ba ko buteu gi mnunuk nak di
samei melek serta mapea ton bae slamone ko. Singpet dalen tenpoakku”.

Akherne, sudo Si Pet Dileak brakat aleu. Lasungba kecek Si Pet Dileak o
mengasei ngen slawei o, plan-plan kuni kekea bi bubeak jijei buteu. Slawei o
aweine lak tgak tapi cigei nam tgak igei. Mno o kmukin wakteu o tun nak sadei o
coa si kmukin sibuk mai bkebun atau o jano ba uleak nak luwea sadei. Trus sudo
oak Si Pet Dileak manuo pmanuone igei, sapei ba si nak sadei gi leyen agak oak
kuni sadei Pagar Jatei, btanye ba Si Pet Dileak ngen tun nak sadei o awei yo:

Si Pet Dileak : “Api gen calon ngenyan anak titik o e ngen-ngen arak alat
mninnanne o (bokoa iben serto leyen o) ?”

Masyarakat : “Do ba calon ngenyan gi dong mninan (smiyap lak nikeak)

genne Tri Dayang Sakti.”

Si Pet Dileak : “Oh, buleak ba nea sjrahne slawei o, pabilo perlu dan nam knai
gen ne skalian nak das awakne.”

Akherne, jijei ba calon ngenyan o buteu gi mbentuk mnunuk gi nlei gen

Buteu Ngenyan gi uyo ade nak sadei Pagar Jatei pasne nak pingia dalen mai pken
kmis uyo, agak mai punguk nak adep umeak bapak Sriwijaya Gi cet tunkorok o
mduo Ciwi.
 Mno o, crito sjarah o informan dapet kuni teak kanungne gi genne
Almarhum Bapak Amalia, beliau bi mninga umor sotos lmo poloak taun.
Almarhum ba gi mrawat Buteu Ngenyan yo smaso beliau gi idup.
 PMATANG PANYANG

Ade slawei baes omorne lmo blas taun genne Halimah. Slawei yo ade
maco lak mnea acara akad nikeak ngen agen nghatenne tleu mingeu igei. Slawei
yo aleu mileu inokne mai sadei Temiang utuk mak boloak pgen utuk mnea pane.
Sudo dapet boloak, aleuba tobo o belek panuo kekea samei min boloak nak baeu
(nusung). Hmanuo tobo o belek mlitas sadei Kruya, sadei Cuup, ngen mlitas
jamen titik nak sadei Tran Duwei uyo. Mno o, nak sadei o pasne nak adep SMPN
1 Pagar Jatei uyo, ade jamen titik.

Dong nak hmanuo mlitas sadei Kruya ade tun gi btanye ngen inokne o:

Tun Sadei o : “Api slawei baes o ucu?”

Inok : “Dio anakku pak, bu.”

Halimah : “Coa, dio coa si inokku tapi dio ucuku.” Tapi inokne diem bae.

Trus tobo o mlanyut hmanuone mlitas sadei Cuup, ade igei tun sadei o gi
btanye:

Tun Sadei O : “Alangke baes anak kumu yo, kuni ipe udi?”

Inok : “Dio anakku pak, bu.”

Halimah : “Dio iso si inokku, dio ucuku.”

Trus, inokne coa mak renyeng kemleak lakeu anakne. Tobo o mlanyut
hmanuone. Slanyutne sapei ba tobo o nak iding jamen titik gi panyang serto
lekatne lbeak kuang duwei meter. Inokne mutuskan utuk lebeak dete kuni anakne
utuk mnyebeang jamen o. Inokne lacea-lacea bae sapei mai dipoa jamen. Trus
gilia anakne gi mnyebeang, tapi wakteu gilia anak slaweine o nak tngeak-tngeak
jamen tkinatba (selup) kekeane mai lubang nak sla-sla kiyuo jamen. Tejpitba
kekeane nak jamen.

Dong slawei o saro melpas kekeane gi tejpit, akherne si minai tulung ngen
inokne, awei yo si madeakne:

Halimah : “Inok, tulungba tarik tangenku yo, sbab kekeaku tejpit.”

Inok : “Alangkene ko yo, baru uyo makeu uku yo Inoknu.”

Inokne kulo coa ade mraso gis atei igei, Inokne lak semlamat anakne ngen
cao lak ngen msoa tangen anakne o. Tapi Inokne coa dapet tmarik tangen anakne.
Trus Inokne belek mai umeak utuk mlei namen ngen agen aduk Halimah, awei yo
nadeakne:

Inok : “Woi anak, tulung ksoa anakku! Sbab si us nak jamen tapi pas
uku lak tmulung, Halimah coa kten igei. Kmukin bi monot nemin
aluo bioa.”

Sudo temngoak crito agen stuangne o, segreba smanei o aleu mai pnan
tjijei o utuk msoa Halimah. Abeak kdeu kean ba munar-manir nak bia leu o,
smanei o mesoa naipe panan Halimah. Akherne, usaho smanei o basea, tapi
smanei o tekjut nien dong kemleak awak Halimah kuni dado hngut ujung kekea bi
bubeak jijei mbetuk nagei tapi uleune gi masi uleu Halimah. Smanei yo lasung
smapei utuk majak Halimah belek, awei yo nadeakne:

Smanei : “Halimah, aroba ie belek mai umeak!”

Halimah : “Mohon maaf nien, uku coa nam belek igei sbab uku coa nam
igei mai daet. Belekba ko, kmin ba bokoa iben yo trus kadeakba
ngen Inokku awei yo ba critone. Kaleu ite coa jijei nikeak, uku
bharap ko kangepba Inok ngen ngesanakku awei keluargo nu
dewe.”

Akherne, belekba smanei o ngen beet atei mai umeak serto temmeu agen
stuangne o. Trus jemlas manat kuni Halimah ngen agen Stuanggne o.

Akibat slawei o jijei nagei nak aliran bio lei nak beak jamen titik o, mako
uyo tbentukba sawei gi panyang. Mno o, pnan o sudo bio lei jijei rawa gi panyang
serto ade tjijei magea tun skitar o gi laput nesep rawa o. Trus sudo kjadian o, nak
skliling rawa nelei tun sadei o kanang kunyeu coa muk tun igei. Tapi uyo pnan o
sudo jijei saweak tuan tun sadei skitar o.
Bahasa Rejang Terjemahan Makna
abeak sekiranya
adat istiadat adat istiadat
ade ada
akherne akhirnya
aleu pergi
aman aman
amek lebih
anak anak
angin angin
arah arah
arak peralatan
arwah arwah
awak tubuh
awei seperti
bae saja
bapak bapak
basoak saudara
bcaoa tata cara
belek pulang
bi o dahulu
bilei ba hari
binei berani
blakang belakang
bo o hutan itu
btook menanam padi
buk rambut
bumei berladang
Burung Binang Burung Binang
buteu batu
caone caranya
cerito cerita
ciket tidak sejajar
coa tidak
coa de si tidak ada
cubo coba
Cuma Cuma
das atas
dawen daun
dio na inilah
 dmem demam
do o ba itulah
dong sedang
dukut rumput
duo doa
gendrak digerakkan
genne namanya
gi yang
gis sakit
gritak repot
Hasan Basri Hasan Basri
idup hidup
igei lagi
imo hutan
inok ibu
ipe mana
isei isi
ite kita
jano apa
jijei jadi
jujur jujur
kaleu kalau
kalo o masa itu
kanen kanan
kapung kampung
kcang kencang
kdeu berapa
kecek katanya
kekea kaki
kembang batu bunga batu
keme kita
kemleak lihat
keno kena
kerno karena
kete semua
kiduo kiri
kmukin kemungkinan
korek api korek api
korok daerah
ksal kesal
 ksaleak kesalahan
kten nampak
ktunun kebakaran
kubuane kuburannya
kulo juga
kuni dari
lak ingin
lapen gulai
lebeak kemarin
leyenne lainnya
Li Li
liwet lewat
madeak mengatakan
mageak memberi
mai pergi
maipe kemana
maleak memindahkan
mareak marah
masen membayar
masuk masuk
mbaco membaca
mbayar membayar
mbersi membersihkan
mbo mengirim
mduo mendoakan
mei nasi
mem bakar
mengemem membakar
mileu ikut
mingep hinggap
mini kesana
mnea membuat
mninga meninggal
mno o dahulu
mnurut menurut
monok mitur ayam mitur
musik musik
na lah
nak tempat
nam bisa
 neket ne diikatnya
nenien sangat
ngen dan
ngut batas
npasukne dirasuki
o ba itulah
oboak tumbang
oleh sbab o oleh sebab itu
olon penyakit
pado pada
panuo berjalan
pao sebagian
pasoak-pasoak saudara-saudara
pasti pasti
payung payung
peak di sebelah
pekerku pikiranku
pelpeak sore
perang perang
pertamo pertama
petaek patah
pgas sampah
pingang pinggang
pisang pisang
plabei tempat
pmuk makanan
pnak kesal
pnan tempat
pucone masalahnya
pun pohon
renung nipis renung tipis
ruh ruh
rumanne kelihatannya
samei sama
sapei samapi
sbab sebab
sdangkan sedangkan
sebnea sebenarnya
serto serta
si dia
 slelawei para perempuan
slindang papan selindang papan
smapei menyampaikan
smidang
smilan sembilan
snakitne disakiti
snako-snako sangka
spanyang sepanjang
snapeine disampaikannya
stamangku menantuku
sudo sudah
tanye tanya
tbang terbang
tbo gunung
tedemem terdemam
tekjut terkejut
tembas menebang
terhadap terhadap
teu tahu
tibo-tibo tiba-tiba
tinga tingggal
titik-titik kecil-kecil
tlutu agung tlutu agung
tmutup ditutup
tnakep ditangkap
tnikemne ditikamnya
tnimunne ditimbunnya
tobo para
tojoak tujuh
traso terasa
trus terus
tujuan tujuan
tumoa datang
tun orang
tunne orangnya
tuun turun
udi kalian
ujung ujung
uku aku
uleak kerjaan
utuk untuk
uyo sekarang
weipe bagaimana
yo ini