PASAMBAHAN MINTAK SIPATAN

TIM ALUA PASAMBAHAN JORONG SITAKUAK

Sipangka : Yoo maa nyo sutan.

Sialek : Yoo Ambo sutan.

Sipangka : Ka sutan sambah sapatah.

Sialek : Manitahlah,,

Sipangka : Walaupun sutan surang nan taimbaukan gala tabilangkan tuah, nan
baangkekkan tangan basusunkan jari baaturkan rila dengan maaf. Akan
tetapi nan manjadi niat ati jo bathin iyolah kapado alek kaminan salirik
duduak ditapi sabanja barih ditangah, indak basibak jo basisiah, bukan
bahinggo jo babateh, dilingkuang sambah kasamonyo. Apolah nan ka
manjadi buah parsambahan ambo. Bacarai carai tak baragiah, baumpuak
umpuak tak babagi, pihak dek kami sipangkalan nan mananai
malatak’an pakarjaan d rumah nan ko, alah saujo lah salapeh, alah
satapak sapijak’an, lah saunjuak sabarikan. Yaitu nan ka manjadi
sambungan lidah polongan asok pusek jalo pupunan ikan, yoo tatapek di
badan diri ambo. baa to nyo kini, jikok maliek ateh rupo, jikok basiang
ateh tumbuah, tumbuah sarupo iko kini, lah tarabik di angan angan, lah
tasingik di kiro kiro, ado nan taragak nan takana. Kok ditahan jadi
panyakik, disimpan manyeso bathin, di ganggam apo ka gunonyo. Kini
ko parantian lah bakandak, kok kato lah nak manyabuik, rundiang lah
nak katangah. Sipaik batanyo ambo kabakeh sutan, kok buhua nak kami
urak diansua mambukak bungkuih, lalu dikaka dirapakkan, alah ko
dalam adat nan baitu, sakian sambah ka bakeh sutan.

Sialek :sapanjang panitahan sutan cako, nan tatumpah kapado alek, tarembai ka
diri ambo. Kok diagak dikanang kanang ditimbang sahabi patuik, tutua
nan lamak lamak manih, lamak nan bagai pisang masak, manih bak
santan jo tambuli, indak bacacek jo bacata. Ambo manyemba ujuang
rundiang sabab baa lah dek baitu, diulang indak taulang, dikirim jaik
kok lapeh, ditikam jajak kok cukua. Apolah manjadi buah rundiangan
sutan, pihak di sipokok sipangkalan, ado nan taragak takana, nan taisik
isik di hati, takilan di mato. Kini ko kato lah nak manyabuik, kok
rundiang lah nak mangatangahkan, alah ka patuik nan baitu, kan baitu
tanyo sutan? (sabananyo). Dek kilek lah barapi rapi, dek patuih lah
badantang dantang ka hujan juo mah kironyo. Nyampang kok cucua dari
langik, bumi lah suko manampuangnyo. Sakian sambah kabakeh sutan.
 Kapalo Kaji dan jawaban

Pasambahan Alam Takambang Jorong Sitakuak

Sipangka : Bismillahirrohmanirrohim. Taratak asa nagari babukik ba koto tenggai

bajalan balabuah tagak, ka mudiak simpang ka musajik malandai ka ikua
koto sinan marawa bapancangkan. Sungguahpun ambo manitah kini
bukanlah urang cadiak pandai, dek patuah ka niniak mamak, dek taat ka
imam khatik, maantakan niat jo sangajo dari sipokok sipangkalan.
Assalamualaikum kasah sahija salangkari, batang campago rang
patahkan, adat limbago dinagari, tuah pidato disambahkan, mako
diparsambahkanlah syah alam, syah Muhammad syah bagindo
rasulullah, nan manjunjuang undang nan mangkuto, kiriman rajo tigo
jurai, iyolah rajo dari makah, balahan rajo balua ruhun, sapiahan rajo
banua cino, nan tingga d pulau panco nangko daulat alam minangkabau.
Minangkabau bapaga adat, adat bapaga budi baso, balingka sopan jo
santun, alingka raso jo pareso sarato leloh basitinah. Badabuah ombak
mamacah , badabuah lalu katapi, taruih manyasak kapaserek, nan kodoh
mati tatembak, dibunuah palimo japun, badiah sadatuih duo datak.
Pangulu banyak nan batuah, tuanku banyak nan karamaik, dubalang
banyak nan sati, jo simpuah ambo mamintak, jo maaf baribu ampun,
tabiak kapado urang banyak. Mangko nyampang kok takirah jo takirai
ataupun sorong jo lompatan, gawa jo gewai kok basuo, tampan taratik
kok nyo kurang. Jo salam gawa ambo japuik, jo rila gewai ambo jalang,
ampun bamaaf bapuhunkan salam takzim pamanuhi. Kato adat kato
pituah, pituah rajo nan baduo, pegangan manti jo dubalang, pidoman tau
cadiak pandai. Tan sano kaki salah langkah ataupun muluik sumbang
kato, ambo nan usah diutangi manitah tu bana alum pandai. Kalau
sahandak sahandainyo, kambang bungo sarato tangkai, tabang buruang
sarato sayok, ikan baranang jo radainyo. Tapi baa lah mangatoan,
barambuih angin di malako, manuju bukik nan landai, janiah langik
 bagai dibasuah, hari nan tarang tarang bendang, tan tuah pulang bakudo.
Tipak di badan diri ambo, kok galak nyato dek jujai, kok pai karano
suruah, tibo di mulia punyo urang cilako di badan diri tagah dek patuah
ka nan tuo. Amaba’du adopun kemudian daripado itu. (Masuk inti
pembahasan/ ujuang rundiang)

Sialek :Batanun kulinan suto, sajalan ragi jo banang, suri dimano talataknyo,
layang malayang sambah tibo, timpo batimpo salam datang, titah ka
ambo taantaknyo. Mandanga imbauan sutan cako, gumanta sagalo
batang tubuah, bakipeh paluah ka dado, bakaja darah ka muko, apolah
sabab dek baitu. Pihak kapado badan ambo, ibaraik layang layang nan
jolong sudah, kalangkapan alum lai cukuik, bingkai lamah batang
maliuak, banang singkek taraju senjang, angin limbubu nan ka dihadang.
Basuo bak pituah sutan juo, baguru ka padang data, dapeklah ruso
balang kaki, dihalau ka tangah padang. Baguru kapalang aja, baru baraja
guru mati, disilau surek surek ilang. Bagoncang bumi jo langik,
barombak lauik sailan, bakumpa karang katapi, kok karam ambo tantang
itu. Akan tetapi sesudah ditimbang makna kato, dipaham makna ragi,
nyatolah kato wajib dijawab nan gayuang wajib disambuik. Adopun
titah sutan cako ........