menyambut mempelai pria (bareh kunyik)

Assalamu'alaikum

Kami manyapo marapulai tibo

Bismillah mulo disabuik

Alhamdulillah mairiangi

Jo bareh kuniang kami manyambuik

Tandonyo sajuak di dalam hati

Sarancak iko malah ladang

Lalang sahalai tak basuo

Sarancak iko urang nan datang

Gamang lah kami nak manyapo

Urang Matua manjua lapiak

Badagang inyo ka Ampek Angkek

Kok mandua mintak ditampiak

Kok janjang iyo mintak ditingkek

Langkah banamo si ganjua lalai

Bia bainsuik katibo juo

Lamo dinanti kinilah sampai

Tibo marapulai jo anak daro

Disonsong tari jo galombang

Sarato siriah dalam carano

Baitu adaik di ranah minang

Sampai kini baitu juo

Tantang marapulai jo anak daro

Konon disabuik rajo sahari

Karano itu marilak kito

Samo manyambuik tagak badiri

Kilek baliuang alah ka kaki

Kilek camin alah ka muko

Alah tabayang sanangnyo hati

Alah tasembai sajuaknyo raso

Putiah kapeh dapek diliek

Putiah hati bakaadaan

Di lahia galombang nan basilek

Di bathin tagak kasabaran

Sungguahpun balam nan mangirai

Barabah ilang dalam samak

Sungguahpun salam ka marapulai

Sambah tahunjam ka urang banyak

Limpapeh rumah nan gadang

Malangkah si ganjua lalai

Pado pai suruik nan labiah

Samuik tapijak indak mati

Alu tataruang patah tigo

Ditatiang carano basiriah pinang

Niaik manyonsong marapulai

Kandak balaku di nan buliah

Nan samo sanang di dalam hati

Nan samo sajuak di kiro-kiro

Janjurak bungo janjuri

Di lingkuang pulo bungo malati

Siriah galak pinang manari

Baitu bana sanangnyo hati

Siriah taaunjuak di carano

Sacabiak iyo mintak dikunyah

Pinang sagatok mintak dimakan

Dalam mukasuik nan dicinto

Manih nan lakek diujuang lidah

Paik nan luluih karangkuangan

Sarantang jalan ka anjalai

Urang bajalan malam hari

Tibo di lauik diranangi

Satantang nak daro jo marapulai

Saroman bulan jo matohari

Lah samo tarang manarangi

Baranang ranang urang mamukek

Sanang mamapeh di lautan

Ikan tapanciang ciek jo duo

Sasanang sanang urang maliek

Sananglah mandeh marasokan

Anak surang kinilah baduo

Jikoknyo buliah pintak jo pinto

Iyo juo bak bunyi pantun :

Jikok dapek kain baragi

Usahlah urang manyasahkan

Jikok dapek kawin sakali

Hanyo tambilang mamisahkan

Mudiak buayo bapasangan

Mudiak nan lalu ka Singkarak

Nan bak kasau jo bubuangan

Putiah pangarang baru rarak

Sambutan Pihak Pria

Assalamu'alaikum Wr.Wb

Sairiang balam jo barabah

Barabah juo tabang di muko

Sairiang salam nan jo sambah

Sambah kapado kaluarga anak pusako

Malatuih badia si tengga

Bunyi manggaga ka udaro

Takajuik kami mandanga

Anak pusako ka barumah tanggo

Si kaduik manjua lamang

Lamang dijua ka Muko-muko

Takajuik bacampua sanang

Sanang bacampua jo ati suko

Tandonyo hati nan suko

Lah datang kami basamo-samo

Di lurah urang lah mandaki

Di bukik urang lah manurun

Nan patah datang batungkek

Nan buto datang batuntun

Datang bukan sumbarang datang

Datang baradaik kato urang

Ditapiak bandua ditingkek janjang

Langkok jo siriah sarato pinang

Tumbuah di sarupo kini nangko

Rupolah samo dalam camin

Sayang nan indak ka babedo

Kasiah nan indak ka balain

Kok ringan kami sato manjinjiang

Kok barek kami sato mamikua

Indak kayu janjang dikapiang

Indak kapeh dibosai kasua

Putiah kapeh dapek diliek

Putiah hati bakaadaan

Pambaoan kami mintak dijawek

Gadang jo ketek dipatenggangkan

Kok satitiak tolong lauikkan

Kok sakapa tolong gunuangkan

Itulah sambah kami sampaikan

Talabiah takurang mohon maafkan

Wabillahi taufik wal hidayah

Wassalamu'alaikum Wr. Wb

Assalamualaikum mulo di sabuik

dimintak maaf sarato reda

kapado hadirin nan rami nangko

Kok indak tapuji ka nan patuik

Maklumlah sifat si manusia

Salah jo khilaf sarato lupo

Asyhadu alla ilaaha illallah

wa asyhadu anna muhammadar Rasulullah

Adat basandi syarak

Syarak basandi kitabullah

Hutang di kito mamakaikan

Batu sangka balantai batu

Batu diambiak ka asahan

Niaik lah lamo nak batamu

Kini lah baru kasampaian

Lai bana baparak dasun

Dasun satambo duo tambo

Bukan pantun sumbarang pantun

Pantun bareh kunik payerak i marapulai jo anak daro

Lah kambang bungo kinango

Tumbuah sabatang di halaman

Kambangnyo di hari sanjo

Alah mah datang anak daro

Tagak sabanta di halaman

Salamo babincang jo babicaro

Ramilah urang di dapue

Rami sarato jo janangnyo

Janang nan tau jo padapuran

Ambo lah tagak ka manabue

Barilah izin di nan tuo

Barilah maaf handai jo tolan

Aso duo tigo jo ampek

Ampek limo anam jo tujuah

Turun naiak babilangan

Raso ka hilang hilang dapek

Bak marabuik di tangan musuah

Katiko sadang batunangan

Manangih mangadu-dudu

Karano pisang satandan

Sajak ketek di kasuah ibu

Lah gadang nyo carikan junjungan

Rumah gadang di Batipuah

Tiangnyo batang Silundang

Baukia bamego mego

Hujan labek nantian taduah

Ribuik rayo nantian tanang

Nan mukasuik sampaian juo

Daun jirak buah janjuri

Bungonyo bungo kasumbo

Lah panek kami mananti

Anak daro talambek tibo

Anak daro di gajah tanang

Ka baruah jalan ka tiku

Mako anak daro talambek datang

Jalan bakelok bakeh lalu

Kandakuik di ateh tubo

Kanikie di ateh pambatang

Nan dijapuik alah tabao

Nan dinanti alah mah datang