Pasambahan Ka Makan

Si Pangka
Tuan di muliakan tuan jo buah panitahan

Si Alek
Manitahlah sutan

Si Pangka
Yo ma tuan
Sungguahlah tuan surang nan disambah, sambah tajelo ka nan rapek maaf tasimpuah ka
nan banyak, wujuik nyo kapado niniak mamak, pangulu nan gadang basa batuah, nan
tinggi samo dianjuang nan gadang samo diamba, bila maulana jo tuanku, alim ulama jo
cadiak pandai, nan mudo arif budiman sarato nan tuo dalam kampuang tampek ambo
manibokan sambah.
Sambah nan ka ambo tibokan titah nan ka ambo antakan, maagak di hari nan daulu,
siriah bacabiak pinang bagatok, janji bakarang padan ba ukua, baa di hari sahari
nangko,

Padi si payang urang samaikan

dikaka jo ujuang jari,
Janji bakarang bamuliakan,
padan baukua badapak i.

Jalan nan jauah lah baturuik, labuah nan pasa lah batampuah, lah bararak sapanjang
jalan lah tibo di tangah laman, lah naiak ka rumah nangko, lah basalam bajawek
tangan, duduak nan banamo saamparan, tagak nan banamo saedaran, di rajo sadaulat
pangulu saundiko, manimbang sapanjang adat, mangaji sapanjang alua, jikok patuturan
baliau alah ciek jo duo, duo jo tigo alah banamo salasai,

Baguluang ombak di lautan

Nahkoda pacik kamudi
Dek arah samo tujuan
Samo manjajak tanah tapi

Ombak taduah galombang sunyi, kapa balaia anyolai, balaia manantang pulau, bajalan
manuju bateh, supayo balaia nak bapulau, bajalan nak babateh, gabak di hulu tando
ka hujan, cewang di langik tando ka paneh, duduak nak di paiyokan tagak nak di
paramuahkan, jamba nak mintak di parenai, sakian sambah jo titah di anta sampai ka
hadapan tuan.

Si Alek
Lah sampai sutan

Si Pangka
Sampai tuan

Si Alek
Yo ma sutan.
Sungguahlah tuan surang nan di sambah, sambah tajelo ka nan rapek maaf tasimpuah ka
nan banyak, wujuik nyo kapado niniak mamak, pangulu nan gadang basa batuah, nan
tinggi samo di anjuang nan gadang samo di amba, bila maulana jo tuanku, alim ulama
jo cadiak pandai, nan mudo arif budiman sarato nan tuo dalam kampuang tampek ambo
manibokan sambah.
Sambah nan ka ambo tibokan, titah nan ka ambo antakan, maagak di hari nan daulu,
siriah bacabiak pinang bagatok, janji bakarang padan ba ukua, baa di hari sahari
nangko padi si paying urang samaikan dikaka jo ujuang jari, janji bakarang
bamuliakan, padan baukua badapak i.
Jalan nan jauah lah baturuik, labuah nan pasa lah batampuah, lah bararak sapanjang
jalan lah tibo di tangah laman, lah naiak ka rumah nangko, lah basalam bajawek
tangan, duduak nan banamo saamparan, tagak nan banamo saedaran, di rajo sadaulat
pangulu saundiko, manimbang sapanjang adat, mangaji sapanjang alua, jikok patuturan
baliau alah ciek jo duo, duo jo tigo alah banamo salasai,

Baguluang ombak di lautan

Nahkoda pacik kamudi
Dek arah samo tujuan
Samo manjajak tanah tapi

Ombak taduah galombang sunyi, kapa balaia anyolai, balaia manantang pulau bajalan
manuju bateh, supayo balaia nak bapulau, bajalan nak babateh, gabak di hulu tando
ka hujan, cewang di langik tando ka paneh, duduak nak di paiyokan tagak nak di
paramuahkan, jamba nak mintak di parenai, sakian sambah jo titah di anta sampai ka
hadapan tuan. Kan baitu bana panitahan sutan

Si Pangka
Yo bana tuan

Si Alek
Sambah sutan sungguahlah bana, lai di cupak nan tatagak di ragi nan takambang, di
laia lah nyato tampak, di bulan lah nyato tarang, tapi samantangpun baitu, lamak
siriah lega carano, lamak kato lega bunyi, di paiokan kato, dipalegakan bunyi di
sabakan sutan jo panitahan, lai ko bana nan baitu sutan.

Si Pangka
Lah sampai tuan..

Si Alek
Sampai sutan

Si Pangka
Timpo batimpo salam tibo
Salo manyalo sambah datang
Nyato tasauah di limbago
Lai taracak dalam undang

Tapi samantangpun baitu, nan rajo kato mufakat nan bana kato saiyo, dibao kato jo
mufakat, disabakan ambo jo panitahan, lai koh iko di lingkuang adat lingka pusako
nan baitu sutan, kan baitu bana buah panitahan tuan.

Si Alek
Yo bana sutan

Si Pangka
Tibonolah dalam adat nan bapakai, di cupak nan baisi baolah kato jo mufakat saba
mananti ambo tuan.

Si Alek
Kato ka di bao jo mufakat kan lah saba sutan mananti

Si Pangka
Ambo nanti sakiro-kiro

Si Alek
Iyo ma sutan
Di ari nan cako sutan manauang manuruk undang, mananti manurut alua, ambo
mampaiokan kato mampalegakan bunyi pado baliau salingka duduak, lah dapek lo banam
sasuai paham nan saukua, ta anta ka hadapan ambo, ambo manta kahadapan sutan,
apolah nan ka jadi buah antanyo, sapanjang parmintaan sutan nan ka tangah, indak
gambuang lukah di aia, indak sasak bintang di langik, pintak buliah, kandak balaku,
lah ka baparenai kato baliau sutan.

Si Pangka
Lah sampai tuan

Si Alek
Sampai sutan

Si Pangka
Yo ma tuan
Dari nan cako ambo manauang manuruik undang, mananti manuruk alua, tuan mampaiokan
kato pado baliau salingka duduak, lah dapek lo aia nan janiah, sayak nan landai,
bana ta anta ka hadapan ambo, apo lah nan jadi buah antanyo, sapanjang parmintaan
ambo nan ka tangah, pintak buliah kandak balaku, lah ka baparenai kato baliau, kan
baitu bana buah panitahan tuan.

Si Alek
Yo bana sutan

Si Pangka
Yo ma tuan
Tibo no sapanjang parmintaan tuan nan katangah, itulah kato sabanano, tapi
samantang pun baitu,

Jariau kayu nan lampai

Ditarak usah di sibia
Kok patah ganti jo basi
Maimbau kami lah sampai
Mamintak ambo lah buliah
Lah sanang rasonyo hati tuan

Si Alek
Lah sampai sutan

Si Pangka
Sampai tuan

Si Alek
Tibonyo sapanjang panitahan sutan nan katangah itulah kato sabananyo, tapi
samantangpun baitu

Barabah tabang ka tiku

Maraok ka dalam padi
Di padi mangkono makan
Pintak buliah kandak balaku
Iyolah sanang rasonyo hati
Sadang rancak kito baranti sutan

Si Pangka
Baa parundiang an kito tuan

Si Alek
Baparantian kato sutan