PASAMBAHAN MANGANANGAHKAN ADAT / KAIN BALIPEK

Perumpamaan :
Tuan Mudo sebagai Si Pangka (Tuan Rumah)
Sutan Basa sebagai Si Alek (Tamu)
===================================

SI PANGKA : *(Sutan Basa).!

SI ALEK : Lai, *(Tuan Mudo)
SI PANGKA : Buah parundiangan ditibokan ka bakeh *(sutan)
SI ALEK : Sabalun kato bajawek, gayuang basambuik
Dek ambo duduak ba nan tuo
Baiyo ambo, basaba *(tuan).
SI PANGKA : Ambo pakai sipaik mananti

SI ALEK BAIYO JO NAN TUO/ NINIAK MAMAK

SI ALEK : Laluanlah kato baliau, *(tuan).

SI PANGKA : Yo, Ma *(sutan)
SI ALEK : Lai, *(tuan)
SI PANGKA : Sambah manyambah dipulangkan kapado Allah
Salawaik jo salam dipuhunkan ka bakeh nabi,
Buah parundiangan ditibokan ka bakeh sutan.
A yolah nan ka manjadi buah parundiangan di ambo ka bakeh *(sutan)

(**) Ka ateh taambun jati, kabawah takasiak bulan

Balayia gubalo maso, batahun gubalo musim
Aia tanang pasia tanggalam, karang tak ado nan balonggok
Ombak taduah galombang sunyi, angina elok lai salasai
Kapa balayia di nan tanang, sananglah hati si juru mudi

Galah taantak pado tabiang, tibo di tabiang maharullah,

Kan iyo baitu
Barundiang di alua patuik bakato basaji bana
Inti sari parundiangan ambo ka bakeh sutan

Dijalan duo tarantang, partamu jalan syarak kaduo jalan adaik

Jikoknyo di jalan syarak, lah dianta ka surau bagonjong satu
Manjaweb ijab denga kabua, dihadapan sasi nan barampek
Dipati dengan doa, diikek jo kumanyan, alah banamo samparono

1
 Jikoknyo sapanjang adaik nan ditangah rumah,
Didulang nan batatiang , Dikain nan balipek, diameh nan bapuro
Nan tarlatak ditangah rumah, di hadapan si marapulai

Digadang nan bakabasaran, ditinggi nan bakatinggiran

Iyo malam samalam kini, iyo nak ditarimo tando suko
Sakian buah parundiangan ambo anta, anta sampai ka bakeh
*(sutan)
SI ALEK : Sampai *(tuan)
SI PANGKA : Sakiro alah *(sutan)
SI ALEK : Dikumbalikan buah parundiangan ka bakeh *(tuan)
SI PANGKA : Sabuik *(sutan)
SI ALEK : Sambah manyambah dipulangkan kapado Allah
Salawaik jo salam dipuhunkan ka bakeh nabi,
Buah parundiangan dikumbalikan ka bakeh *(tuan).
A yolah nan ka kumbalinyo di ambo ka bakeh *(tuan)
(**) Ka ateh taambun jati, kabawah takasiak bulan
Balayia gubalo maso, batahun gubalo musim
Aia tanang pasia tanggalam, karang tak ado nan balonggok
Ombak taduah galombang sunyi, angina elok lai salasai
Kapa balayia di nan tanang, sananglah hati si juru mudi
Galah taantak pado tabiang, tibo di tabiang maharullah,
Kan iyo baitu
Barundiang di alua patuik bakato basaji bana
Inti sari parundiangan *(tuan) ka bakeh ambo

Dijalan duo tarantang, partamu jalan syarak kaduo jalan adaik

Jikoknyo di jalan syarak, lah dianta ka surau bagonjong satu
Manjaweb ijab denga kabua, dihadapan sasi nan barampek
Dipati dengan doa, diikek jo kumanyan, alah banamo samparono

Jikoknyo sapanjang adaik nan ditangah rumah,

Didulang nan batatiang , Dikain nan balipek, diameh nan bapuro
Nan tarlatak ditangah rumah, di hadapan si marapulai

Digadang nan bakabasaran, ditinggi nan bakatinggiran

Iyo malam samalam kini, iyo nak ditarimo tando suko
Mangko lalunyo *(tuan).?

2
SI PANGKA : Sabananyo *(sutan)
SI ALEK : Sapanjang buah parundiangan *(tuan) nan ka tangah.
Alah di adaik nan bapakai, dicupak nan baisi.
Tapi sungguah samantang nan bak nan tun
Nan rajo kato mupakaik, nan bana kato baiyo
Ambo bao kato jo mupakaik, basaba *(tuan) mananti
SI PANGKA : Sampai *(sutan).?
SI ALEK : Dibilang alah *(tuan)
SI PANGKA : Aratinyo, Sapanjang buah parundiangan ambo nan ka tangah.
Alah di adaik nan bapakai, dicupak nan baisi.
Tapi sungguah samantang nan bak nan tun
Nan rajo kato mupakaik, nan bana kato baiyo
*(sutan) ka mambao kato jo mupakaik, Manjapuik an ka buah bari nyo
mananti ambo sakutiko. Kan baantun bana *(sutan).?
SI ALEK : Sabananyo *(tuan)
SI PANGKA : Samulo kato taranta ka bakeh *(sutan)
Supayo barek nak bakisa ka nan ringan
Jauah nak bakisa ka nan ampia
Bao lah kato jo maupakaik
Ambo pakai sipaik mananti, *(sutan)
SI ALEK : Ambo ka mambao kato jo mupakaik,
*(tuan) mananti lai ka basaba.?
SI PANGKA : Sakiro – kiro.!

SI ALEK BAIYO JO NAN TUO/ NINIAK MAMAK

SI ALEK : Yo Ma.. *(Tuan).!

SI PANGKA : Lai, *(Sutan).
SI ALEK : Di hari sabanta cako,
*(Tuan) manauang manuruik undang, Mananti manuruik adaik
Ambo mampaiyokan kato, Mampalengongkan bunyi
Ka bakeh niniak mamak sarato dunsanak nan basamo
Jiko di baliau nan sado nan tun, Bulek lah aia ka pambuluah
Bulek kato ka mupakaik, Taranta ka bakeh ambo
Di ambo maantaan ka bakeh *(tuan)
Alah ka rancak ka di anta.?
SI PANGKA : Nan dijapuik bana *(sutan)

3
SI ALEK : Aa lah ka buah barinyo di ambo ka bakeh *(tuan)
Satantangan di adaik sutan nan ka tangah
Lah tapaek ditiang panjang, lah taimpik di sandi laweh,
Indak dapek dibandiang lai, lah ka batarimo suko kato baliau
Ikolah ka namo buah jo barinyo.
SI PANGKA : Sampai *(sutan)
SI ALEK : Sakiro sampai *(tuan)
SI PANGKA : Di hari sabanta cako, Ambo Mananti, *(sutan) baiyo
Kini lah dapek buah jo bari nyo taranta ka bakeh *(sutan)
Di *(sutan) mangumbalikan ka bakeh ambo.
Aa lah ka buah barinyo di *(sutan) ka bakeh ambo
Satantangan di adaik kami nan ka tangah
Lah tapaek ditiang panjang, lah taimpik di sandi laweh,
Indak dapek dibandiang lai, lah ka batarimo suko kato baliau
Kan baitu bana buah lalunyo *(sutan).?
SI ALEK : Sabananyo *(tuan)
SI PANGKA : Ndak lai sabuah kandak buliah, pintak lah bapalakuan
Lah sanang kironyo hati
SI ALEK : Baa nan parundiangan kito *(tuan).?
SI PANGKA : Nan dijapuik sapatah lai *(sutan)
SI ALEK : Sabuik *(tuan)
SI PANGKA : Yo maa *(sutan).!
SI ALEK : Lai *(tuan)
SI PANGKA : Aa lah kajapuiknyo di ambo ka bakeh *(sutan)
Surian di lading panjang, ureknyo tumpu batumpu
Kumanyan lah kami panggang, mintak doa salamaik ka tuangku
Ikolah ka japuiknyo di ambo *(sutan).!
SI ALEK : Sampai *(tuan)
SI PANGKA : Sakiro alah *(sutan)
SI ALEK : Di buah parundiangan *(tuan) indak ka diulang ulang panjang
Ka jaweknyo sajo ambo adoan*(tuan)
SI PANGKA : Sabuik *(sutan)
SI ALEK : Basawah sapiriang salek, ditundo nak rang mandiangin
Mandoa kami si Alek, Si Pangka sato ma amin

4
(**) Batang 2:
Maagak di hari sahari kini, Ari baiak angin pun tanang ,
tadiri alam minangkabau , Sadang dilingkuang awan biru ,
mulo tadapek dalam undang ,Takarang dalam kitab tambo

Rancak mangaji dari alih mambilang dari asano

Santano iduik diateh dunia , mamakai undang nan duo parkaro
Partamu undang di lauik, kaduo undang di daraik

Jokok nyo undang di lauik , marapek biduak jo pandayuang

Nakodoh duduak di haluan, tau di angin na bakisa
Jaleh di badai ka manimpo, pacik kamudi surang surang

Jokonyo undang di darat, maantak bajak maayun pangkua

Baniah sawah turun ka sawah baniah ladang turun ka ladang
Mangko dibilang bilang arino ditiok tiok pakan no
Lah sampai bilangan ari lah tibo bilangan musim
Nyato tasarah ka nan punyo
Urang nan arif lagi budiman, tau di ereang dengan gendeang
Pandai bamain baso jo basi,mangko bamain baliau ditaman nantun
Dicaliak batang nan lah gadang, disilau daun nan lah rimbun
Mangko tabik niaik jo naza, utang lah patuik dibayia kan

Mangko baiyo iyo jo adiak, batido tido jo kako

Sampai masuak barisan nan baibu, sarato sumando manyomando
Dapeklah kato kabulatan
Buleh lah buliah digolekkan picak lah buliah dilayangkan
Mangko dilayangkan pandang ka nan jauah, Tatukiak ka nan dakek
Nyato di ranah kampuang nangko, sadangnyo Allah bapambari,
Sasuai rueh jo buku, saiyo mangko manjadi

Mangko dicarilah hari nan baiak kutiko nan elok

Dijalan nan kalalu dilangkah nan kalalu diari nan sahari kini
Mangko dianta ka surau bagonjong satu
Manjaweb ijab denga kabua, dihadapan sasi nan barampek
Dipati dengan doa, diikek jo kumanyan, alah banamo samparono

Jikoknyo sapanjang adaik nan ditangah rumah,

Didulang nan batatiang , Dikain nan balipek, diameh nan bapuro
Nan tarlatak ditangah rumah, di hadapan si marapulai

5
Digadang nan bakabasaran, ditinggi nan bakatinggiran
Iyo malam samalam kini, iyo nak mintak ditarimo suko
Sakian buah parundiangan ambo anta,
anta sampai ka bakeh *(sutan)