PASAMBAHAN

Maanta Marapulai
Pasambahan Maanta Marapulai ini terdiri dari beberapa tulisan dari berbagai sumber, sebagai berikut :
Bagian I : MAANTA MARAPULAI nagarisitalang.wordpress.com
(Diedit dari Balerong Grup – Maanta Marapulai : red )
Bagian II : Pidato PasambahanPanitahan Maanta Marapulai
www.cimbuak.net
Bagian III : Pidato Pasambahan Adat, Ma-anta Marapulai
www.rangtalu.net
Bagian IV : pidato adat minang kabau "maantakan marapulai "

BAGIAN I
MAANTA MARAPULAI
ALEK
Angku Dt. Sinaro Nan Gamuak ?….
DT. Sinaro Nan Gamuak
Sampaikan Stan !….
ALEK
Tangan ba-angkek jari basusun, rila jo maaf dipuhunkan pado Angku ….
DT. Sinaro Nan Gamuak
Kapado Allah ….
ALEK
Mak St. Sari Alam ? …..
ST. Sari Alam
Manitahlah !…..
ALEK
Salam batibokan pado Mamak ….
ST. Sari Alam
Wa-alikum salaaam…..
ALEK
Maa-nyo St. Sinaro?…..
PANGKA
Sabuiklah ….
ALEK
Kasampurnaan sambah….. Walaupun kinitu Angku surang, baduo jo batigo sajo nan taimbaukan gala
talewakan tuah; nan ba-angkekkan tangan basusunkan jari ba-aturkan rila dengan maaf … Akan tetapi,
kamanolah ujuik-mungkasuiknyo, iyo kapado silang nan bapangka pakarajaan nan bapokok; ditampek
hujan barasah paneh bapuhun, urang nan manjinjiang tampuak-karajo diateh Rumah Gadang nangko.—-
Saluak ado detapun banyak
Babaju suto nak-rang Padang
Disasah dimalah diampaikan
Dilangkan nangkolah juo….
Datuak ado Stanpun banyak
Ragulah mato dek mamandang
Sambah dimano disampaikan
Iyo di Sutan nangkolah juo
A-yo maa nyo St. Sinaro?…….
PANGKA : Yooolah
ALEK
Jokok diagak dikanang-kanang.- Ditimbang sahabih patuik, manakua ambo kabumi, maningadah ambo
kalangik.—- Dek kito majilih-karapatan kini nangko, lah 4 ko-mah Adat nan bapakai.- Manolah 4 nan
bapakai : Partamu sambah-manyambah, kaduo baso jo basi, katigo siriah jo pinang, cukuik kaampek
minum-makan.—-
Satantang minum jo makan, iyolah bana kato urang: Elok lenggang dihari paneh, maradeso diparuik
kanyang, sinan tabukak kiro-kiro… kok makan lah tibo dinan sadang, kok minum lah tibo dinan sajuak.-
kini, aiya baransua
Jadi darah, nasi barensuik jadi dagiang, syukur nikmat pado Allah, puji di Sutan tatonggoknyo.—-
Sasuai bak undnag Sutan juo, baa-lah bunyi Undangnyo :
“Kok batanyo kan iyo salapeh urak, kok barundiang sasudah makan”.—- Mako, kinilah basuonyo
mungkin jo patuik, maso jo kutiko ambo kamatangahkan parundiangan kabakeh silang nan bapangka.-
Tembak ba-alamat cancang balandaskan, ka St. Bandaro juo muaronyo….
PANGKA
Yooolah….
ALEK
Apolah nan kamanjadi buah parundiangan ambo : cancang kan duo sagaragai Sutan, kapa nan duo
salabuahan.- Kok Adat alah tabatu-intan, kabawahnyo takasiak bulan. – Syarak alah taujudulah,
katehnyo taambun-jantan…. Saukua hukum sasuai, sadundun Adat jo Agamo, Adat kawi syaraklah lazim,
undang manuruik dibulakang.—-
Kini bakabek jo akad-nikah, babuhua-mati ijab kabul, babuhua-sintak jo bagian, katangga raso tak
mungkin, antah kok Allah manggarakkan.—–
Mako tasalanggarolah nikah-kawin antaro si Herman bin Mukhtar St. Maruhun, Suku Sikumbang
dibawah payuang Datuak Palindih; dengan Murniati binti Abdul Wahab kamanakan Sutan Parmato, suku
Jambak dikalupak Dt. Rajo Ameh.—-
Satantang dek diri marapulai; karano biaso pulai bapangkek naiak maninggikan ruweh jo buku, manusia
bapangkek turun maninggakan adat jo pusako; maso keteknyo dibari Bapak namo, lah gadang diagiah
mamak gala, kini bagala : Sutan Kulipah… Tolong maimbaukan dipasa nan rami, malewakan dilabuah nan
golong.—-
Maliyek luruih batujuan, mamandang adat bajukalo; kok luruih makanan tiliak, ballabeh manahan cubo,
bantuak dimakan siku-siku; bungka ganok manahan asah, hukum adia manahan bandiang, kato bana
manahan liyek, banamo japuik jo anta, basambia ara jo iriang…. Arak-iriang sapanjang jalan, dombak
dombai sapanjang labuah, aguang calemong jadi tapuang, sorak jo sorai jadi bungo.- Salatuih badia-
pusako, pusako Pangulu dinagari, masuak kakorong kampuang Sutan…. Masuuak kakorong-kampuang
Sutan, kinilah duduak ateh rumah, duduak diruang Rumah Gadang, dilingkungan niniak jo mamaak,
dimuko Ibu jo Bapo, sarato ipa denga bisan, cukuik-sarato mudo matah.—-
Adopun kamudian dari pado itu, sapihak dek kamiko nan datang; ado mamacik pitaruah jo amanah, alah
tasuruah tasarayo, dek mamak sabalah sinan; untuak mahanta-mairiangkan St. Kalipah, naik ka-ateh
rumah-tanggonyo; ko-mah lah tibo kami siko Stan, tibo sarato jo Adatnyo.- Mahanta sampai kateh
rumah, baulua-jawek amo jo Sutan, batumpu-tapak samo Mamak.—–
Jokok diliyek simarapulai, dicaliak anak-daronyo; nan bak parmato jo pangarang, bak cincin pulaang
kajari.- Surang ikan surang kulari, samo tapukek kaduonyo, surang bulan surang mantari, samo caredek
kaduonyo.—– Pandang-pandang malah dek Sutan, dalea dikasua kabasaran, dilingkuang andam baliak-
balah, langkok sarato pangiriangnyo, niniak mamak samo di dalam.- Mamakai baju balah-buluah, siba
batanti timba baliak, langan bakatak banang-makauh, salo manyalo banang ameh.- Bacawek bajambua-
suto, bapandiang mangko bapilin, takanak sakin-pangidam.- Lakek sarawa kipeh-duanggo, baturap duo
ditangah , elo maelo pisak turang, sajangka pucuak rabuangnyo.—- Silaulah pulo anak-daro; Nan bak
padi siranik-jintan, paneh tibo dilingkuik-lingkuik, hujan datang dikaka-kaka, sauleh haram kok diayam,
lah tandeh mangkodigaro.- disegehilah sianak-daro, dilakekkan baju suto baralun, nan baukia bagajah-
meno, salendang kain kapunuik, abuaknyo katua-barkatua.- Badapak subang dipipih, abuaknyo katua-
barkatua.- Badapak subang dipipih badariang galang ditangan, buatan tukang jolong pandai, kilek-
kumilek cahayonyo.—–
Salimbak nan dari pado itu: Dimaso sakarang iko kini, dimalam samalam nangko; nak kami latakkanlah
baban nan baju-juang, dibayiakan utang tapabuek; disampaikan pasan nan babaok, padolah badan
disesonyo.—- Yaitu: Adok kadiri Tan Kalipah: Nyampang kok tumbuah tangah rumah, kajadi Adat bijo-
baiak, katungkek pamani jalan, kakarih pamaga Adat, dalam adat baradat pulo …. Kok elok ratak
tangannyo, baolah manukuak jo manambah, bao manyisik jo mambilai, — Kok elok ratak lidahnyo:
Kusuik baolah manyalasai, karuah baolah manjaniahi.- Kamudiak nak sarantak galah, kailia nak
sarangkuah dayuang, bajalan samo mairiang, baiyua samo maisi.—- Apun baa-to hanyo lai, salampih nan
dari pado itu, ko-mah jinihnyo marapulai Stan: Raso manetek niro pinang, nan bak alu patah patigo,
musim pabilo kabataruak.- Nyato ibaraik padi salibu: Awak tumbuah musiim talampau, urek bagantuang
kajarami, rangkiang tinggi nan dihadang… Mohon ditarimo dek mamak urang disiko, iyo didalam tapak-
tangan, diganggam adat jo Pusako.—- Putiah kapeeh nak mancaliak Stan, putiah hati bakaadaan,
kaadaannyo: Kato bajawab gayuang basambuik sambah bakumbalikan sakito sambah pado Sutan…..
PANGKA
Lah sampai dek Sutan ? …..
ALEK
Sakiro-kiro
PANGKA
Salorong dibadan ambo kini, nan bak ibaraik urang mamanciang: Sadang dirintang aiya-ilia, dalam
dimabuak dek galombang, iyo dialun-alun buiah; tali tagang piapuang ilang kaiya disemba dek gurami….
Duduak takajuik tukang panciang, kaiya putuih bananglah kusuik.- Kini, manjalang banang kagumpalan,
kato dilatak dalam barih, bana disimpan kalimbago, diganjua rundiang jo mupakaik, mananti Sutan
Sakutiko?….
ALEK
Asahkan kandak lai kabuliah, pintak kok lai kabalaku, ia lamo jo lambek kami nanti, Stan….
PANGKA
St. Paarpatiah??…. Sambah bapulangkan.-
ALEK
Manitah Sutan.-
PANGKA
Laiya jo batin saukuran, isi kulik umpamo labiah, ganggam arek pagangan taguah, tibolah lukih
dilimbago.- Digiliang kato dipabuek, dapeklah run diang nan sabuah, diantakan kabakeh Sutan….
Apolaah nan kamanjadi buah antanyo, iyolah dihari sahari nangko, dimalam samalam kini :
Jokok disulam disuji-suji
Bakilin sangkuik kain banta
Jokok dikanang dikaji kaji
Disabuik asa jo muasa
Takalo maso dahulunyo, kutiko alun barabalun, bunga alun bijopun alun, niat tasimpan dalam hati, iyo
dihati ibu jo Bapo…
Nan jadi niat jo nasa dek balliau; dimintak sungguah pado Allah, mamuhun pado illahi, kironyo dapeklah
anak katurunan, diwarih nan kamanjawek, pusako nan kabatolong…..
Kok buliah anak laki-laki, ibaraik cincin dikalingking; kapanjapuik dagang nan jauah, kapanyonsong
panggilan tibo, pambangkik batang tarandam, palawan onjak dunia urang.- Kok buliah anak parampuan,
kaibarat bungo dilaman; limpapeh rumah nan gadang, sumarak anjuang paranginan, acang-acang dalam
nagari.—- Mako tiboleh maso kutikonyo, nan bak bida-bida urang kini, bak andai-andai rang dahulu;
Ditabang batang talantak
Dikuduang sambilan jari
Barakaik do’a jo pamintak
Masonyo Allah kamambari
Baruliahlah anak parampuan, sari laiya sari banamo, banamo si Murniati.- Lalu diinang jo diasuah,
dijunjuang bagaimangkuto, ditanai gumalo, pamenan pagi jo patang…..
Dibalikan subang jo galang
Baganto ameh balampih
Dari ketek kinilah gadang
Sampai manjadi anak gadih
Lalu ditunjuak diajari, dididik adat sopan-santun, sacaro urang basuami… Umua cukuik bilangan sudah,
kini baumua 17, siriahlah patuik naiak junjuang.- Mako tabiklah niat jo nasa, handak maminang jo
mangacak, mancarikan judu tunangannyo… Dipikia-pikia dalam hati, dipikia lalu dimanuangkan.-
Pandangan jauah dilayangkan, pandangan dakok ditukiakan, nampaklah urang nan sapadan.- Pandang
lakek patuiklah sudah, jatuah piliahan ka-nan surang, si Herman urang namokan, kini bagala St. Kalipah.-
Urang ba-asa balimbago, baso baiak roman katuju, muluik manih paramah pulo.- dek harok dinan
kabuliah, dek cameh dinan kaindak, mako ditingkeklah janjang rang sikumbang, ditapiak malah
banduanyo.- Mamintak kapado nan kabuliah, bakaua kapado nan kiramaik; makonyo Allah
manggarakkan, batamu ruweh jo buku, saukua batang kajunjuangan, pintak buliah kandak balaku,
disinan niaik dilansuangkan.—- Sapakaik sugalo mamak, sasuai pulo jo bako, saizin Datuak Panghulu;
dihadirkan sapiah-balahan, dihimpun korong jo kampuang.- Nan jauah dilapeh panggia, nan hampia
makanan imbau, lalu dijapuiklah simarapulai, japuik sarat jo adaiknyo.—-Alah basuluah mato hari,
bagalanggang mato rang banyak, kok alek lah sapanuah rummah, kok jamu lah salingkuang kampuang.-
Sananglah hati Niniak Mamak, panuahlah runggo hati bundo, mangucap syukur Ibu Bapo, dek utang alah
talansaikan.—- Maa-nyo St. Parpatiah ???…..
ALEK
Sampaikan Stan !….
PANGKA
Adopun pintak jo pinto Sutan cako: Iyolah mohon ditarimo marapulai, ditarimo ditapak-tangan
diganggam Adat jo Pusako, kan iyo Baitu panitahan Sutan?…..
ALEK
Yo bana….
PANGKA
Syukur kapado Allah….. Dek pihak kami sipangka, sukolah bana manarimo; batampuang jo tapak-tangan,
diganggam jari nan sapuluah; kok ndak cukuik jo tapak tangan, bumi jo langik ditadahkan….
ALEK
Alhamdulillah …..
PANGKA
Salorong kapado anak-daro, ibaraik rabuang jolong mambacuik ba-umua bilangan hari, gadang disiram
ambun-malam, batang gampa sambilu indak.- Urek alun mancakam tanah, pucuak alun mandapek
angin, antah pabilo kabasaga…. Tapi, untuang kok elok pamintonyo, dek masin lidah Tan Kalipah, dek
dingin tangan suaminya, talakik rabuang jadi batuang.- Nyo baurek-bagumpa gadang, nyo babatang
baruweh-ruweh, badaun rimbun jo rampak.- Tabiang diagak jan-nyo runtuah, lurah mamuji
kalinduangan.- Samantang tinggi diawan, pucuaknyo runduak kabumi, manyilau tanah nan
manggadangkan.—–
Salimbak nan dari pado itu: karano tasuruah diagamo, tasabuik di dalam Ayat, apolah garan bunyi Ayat:
“Wa-in syakartum, la-aziidannakum”….Barang siapo nan pandai basyukur mako nikmatnyo akan
ditambah-tambah.- Dek sabab karano itu, kok iyo syarak mangato Adat mamakai, mako mintak pulo dek
kami siko : Supayo cupak tatagak kito isi, limbago samo kito tuang, dilansaikan utang ka-agamo; ma-nyo
ruponyo: Mintak dibacokan Do’a-Salamat sarato Do’a-Kasyukuran; kadari sinan katumbuahnyo, kami
disiko ma-aminkan, sakitu sambah pado Sutan…..
ALEK
Maa-nyo St. Bandaro ?.-
PANGKA
Manitah Sutan ….
ALEK
Sapanjang panitahan Sutan tadi nan tatumpu kapado ombo untuak mambacokan doa syukur doa
salamaik, itulah kato sabananyo.- kok syarak nyato lah manyuruah, adat wajib mambaiyakan.- Tapi
sungguahpun nan baitu, sapihak dibadan diri ambo kiniko, dikatokan manih alun dapek malulua surang.-
Lamak lauak kan dikunyah-kunyah, lamak-kato dipakatokan.—- Ba-a sabab dek baitu: Sasuai bak undang
Sutan juo; Dek gunuang tapatan kabuik, disungai jalo bamain, kapandang barantang tali, kahutan
bakarek-kayu; tabiang ditingkek dengan janji, rimbo dialah jo mupakaik, tagak dek duduak dalam rapek,
limbago basidang dalam adat.- Supayo rantak nak-nyo saragam, baiak lenggang nak sahayun, suto jo
turak nak salasai, nak samo naiak ka-antakan, dielah kato jo mupakaik, mananti sutan agak sabanta…..
PANGKA
Asa kandak buliah pintak balaku, lambek sabanta ambo tunggu, Sutan…
ALEK
St. Bandaro ?…..
PANGKA
Sampaikan Sutan….
ALEK
Nak-nyo tarang nan bak hari, siang nan bak bulan, nak ambo titih sambah jo titah Sutan tadi….. Apo
garangan kabunyinyo, supaya cupak tatagak kito isi, limbago samo kito tuang, dilansaikan utang ka-
agamo…. Kan iyo baitu kajalehnyo Sutan???…..
PANGKA
Itu bana
ALEK
Ruponyo tantang mambacokan doa-ko, dek alek manjadi baban, dek pangka manjadi utang…. Adopun
dari-ma katumbuahnyo, indak basibak jo basisiah, indak bainggo jo babateh.- Sabab baa-lah dek baitu,
tapek bak undang Sutan juo: Kurang tukang binaso kayu, kurang cadiak binaso adat, kurang malin binaso
kitab.- Ba-a kalaluannyo bana: Samo kito sarahkan ka-ahlinyo, kami nan indak tau-pandai…. Sakitu
sambah pado Sutan Bandaro.-
PANGKA
Sampai Sutan ?.-
ALEK
Sampai
PANGKA
Dek alek manjadi baban, dek pangka manjadi utang.- Kato bana nan Sutan sabuik, jalan luruih nan Sutan
tampuah.- Namun samantangpun baitu, kami-ko pihak nan bakandak, Sutan pihak nan mambari….
Sakian sambah bakeh Sutan.-
ALEK
Jadilaah St. Bandaro ?.-
PANGKA
Yooooo…..
ALEK
Kok kabatulak-batundo baelo baunjun bana antaro kito baduo, nan utang kautang juo…. Supayo golek
nak tibo dinan data, insya Allah ka-ambo jalankan pintak jo pinto dari Sutan….Sungguahpun
katumbuahnyo dari ambo, tapi kok salaah basapo, sasek baulangkan, lupo bakanakan.-
PANGKA
Insya Allah Sutan ….. Asa-kan usah doa babisiak, kami simakkan dari siko.-
ALEK
Jadilah, kito mandoa basamo-samo:

BAGIAN II
PIDATO PASAMBAHAN
PANITAHAN MAANTA MARAPULAI

Adolah kaba nan dari rantau Pontianak, untuak rang rantau dima se barado sebagai mana biaso kami
maadokan suatu kegiatan adat untuk maanta marapulai, indak saroman bana jo nan dikampuang tapi
adolah mendakatinyo.

Satiok pertemuan adat daerah di Minangkabau biasanya menggunakan alur panitahan, yaitu pidato adat
yang diucapkan sewaktu duduk bermusyawarah bersama untuk menyetujui suatu maksud .

Masing masing nanti menyampaikan pidato tersebut kepada orang tua dikelompoknya sambil meminta
pendapat, setelah sambung menyambung kepada ninik mamak yang duduk, maka didapatlah kata
sepakat dan kesepakatan maksud kedua belah pihak

Mari kito simak dialognyo

Sutan Sinaro :
(Dari kaum laki laki) Manitah kapado niniak mamak kaum perempuan.....
Maa mak Datuak Putiah, kamanitah jo mamak...

Datuak putiah :
(Niniak mamak kaum perempuan) ...laiSutan Sinaro, manitah lah....

Sutan Sinaro:
Sungguah mak datuak nan disambah, tagah dek adat jo pusako, dek barih cupak jo gantang, batinnyo
kapado sagalo niniak jo mamak. Karajo nan bapokok, silang nan bapangka. Adopun panitahan nan
ditibokan pado mamak, pihak dikami nan datang, salangkah turun dari janjang, dari tanggo rumah
kampuang kami, barih tabantang kami turuik, labuah nan gadang kami tampauh masuak ka jorong
kampuang nangko. Kok tibo alah baduduakan, lah tarunjak siriah dicarano, tando lah sudah minum jo
makan. Pihak didiri marapulai, lah duduak diateh rumah. Dilingkuang niniak jo mamak, dihadapan ibu jo
bapak sarato ipa parabisan. Kok tumbuah ditangah rumah, kajadi adat bijo nan baiak, katungkek pamani
jalan, kakarih pamaga diri, kok elok ratak tangannyo, panjang bao pangarek, singkek bao kamauleh,
senteng bao kapambilai. Kok elok ratak lidahnyo, kusuik bao kamanyalasai, karuah dapek mampajaniah.
Tapi samantangpun baitu, pihak diri marapulai, raso manetek niro pinang, antah baraie antah tidak, nan
bak alu patah batimpo, musim pabilo kabaturak. Ibo nan bak padi salibu, awak tumbuah musim
talampau, urek tagantuang kajarami, rangkiang tinggi nan dicinto. Hanyo sabuah pintak kami supayo
ditarimo di mamak datuak elok elok, iyo didalam tapak tangan, ikolah sambah nan ditibokan ka mak
datuak

Datuak Putiah :
Lah sampai tu di sutan
Sutan Sinaro :
Alah mak datuak

Datuak Sati :
Panitahan sutan nan taanta kapado ambo, lompek dibari basitumpu, sambah tarapak batujuan, batinnyo
kapado niniak jo mamak Karajo nan bapokok, silang nan bapangka. Adopun panitahan nan ditibokan
pado mamak, pihak dikami nan datang, salangkah turun dari janjang, dari tanggo rumah kampuang
kami, barih tabantang kami turuik, labuah nan gadang kami tampauh masuak ka jorong kampuang
nangko.

Kok tibo alah baduduakan, lah tarunjak siriah dicarano, tando lah sudah minum jo makan. Pihak didiri
marapulai, lah duduak diateh rumah. Dilingkuang niniak jo mamak, dihadapan ibu jo bapak sarato ipa
parabisan. Kok tumbuah ditangah rumah, kajadi adat bijo nan baiak, katungkek pamani jalan, kakarih
pamaga diri, kok elok ratak tangannyo, panjang bao pangarek, singkek bao kamauleh, senteng bao
kapambilai. Kok elok ratak lidahnyo, kusuik bao kamanyalasai, karuah dapek mampajaniah. Tapi
samantangpun baitu, pihak diri marapulai, raso manetek niro pinang, antah baraie antah tidak, nan bak
alu patah batimpo, musim pabilo kabaturak. Ibo nan bak padi salibu, awak tumbuah musim talampau,
urek tagantuang kajarami, rangkiang tinggi nan dicinto. sabuah pintak dari sutan supayo batarimo elok
elok, iyo didalam tapak tangan,kan baitu lalunyo di Sutan

Sutan Sinaro :
yo baitu bana lalunyo mak datuak

Datuak Sati :
Panitahan Sutan nantun , alah diadat nan bapakai, alah talingka di pusako. Sungguahpun nan baitu,
karano lai dihadapan niniak mamak nan basamo, ambo ambiak kato baiyo, mananti sutan sakutiko, kan
lai didalam adat tu Sutan..?

Sutan Sinaro :
Alah didalam adat tu mak Datuak, mananti lah ambo

Datuak Putiah :
(Baiyo kamambari jo niniak mamak lain), dan mangumbalikan, ma.... Sutan Sinaro, kumbali panitahan
pada Sutan Sinaro. Nan sapanjang kato Sutan, iyolah kato sabananyo, satantang diri marapulai, alah
rancak ditimpo baiak, basi baiak diringgiti, alah talatak didalam adat, alahnyo duduak di pusako. Anak
ciek lah jadi duo, tampaiak baiyo jo batido, alah ditarimo elok-elok. Itulah nan kajadi barinyo di ambo
pado Sutan.

Sutan Sinaro :
Lah sampai di mak Datuak ..?

Datuak Putiah :
Alah Sutan

Sutan Sinaro :
Sapanjang pambarian mak Datuak, rundiang nan alah kami danga, rupo nan alah kami liek. Satantang
diri marapulai, alah rancak ditimpo baiak, basi baiak diringgiti, alah talatak didalam adat, alahnyo
duduak di pusako. Anak ciek lah jadi duo, tampaiak baiyo jo batido, alah ditarimo elok-elok.kan baitu
barinyo tadi di mak Datuak.

Datuak Putiah :
Iyo baitu bana Sutan

Sutan Sinaro :
Karano pintak alah buliah kandak alah balaku, Alhamdulillah kajawabnyo mak Datuak.

Datuak Putiah :
Sutan kato Alhamdulillah, panitahan bateh kito lai Sutan

Sutan Sinaro :
Sakiro-kiro babateh dulu mak datuak.

(Sutan Sinaro baiyo jo sialek untuak manitah kapulang )

Sutan Sinaro :
Maa malin mudo, kamanitah jo Malin.

Malin Mudo :
Sipangka) Lai Sutan Sinaro manitah lah.

Sutan Sinaro :
Sungguahpun Malin nan dihimbau, lompek dibari basitumpu, batinnyo kapado niniak jo mamak, karajo
nan bapokok, silang nan bapangka. Panitahan nan ditibokan pado Malin, dihari nan bak kini, nan
dimukasuik alah sampai, nan diama alah pacah, kok satantang minum jo makan, minum alah ubek auih,
makan alah ubek litak, Alhamdulillah kabarinyo. Baa lai diateh nantun, bulek lah sagiliang, pipih alah
satapiak dek niniak jo mamak, sarato sarato sudaro nan datang, bak ibarat urang manyumpik: Kapeh
tabang mambao angin, panulak damak kalua, damak lah rintang didaun, kumbang lah rintang dibungo,
buruang lah rintang dibuah, kapeh nak babaliak katanah, ikolah bana dianta bakeh Malin.

Malin Mudo :
A pulo nan manjadi kato di Sutan ka ambo, batinnyo kapado niniak jo mamak, karajo nan bapokok,
silang nan bapangka. Panitahan nan ditibokan pado Malin, dihari nan bak kini, nan dimukasuik alah
sampai, nan diama alah pacah, kok satantang minum jo makan, minum alah ubek auih, makan alah
ubek litak, Alhamdulillah kabarinyo. Baa lai diateh nantun, bulek lah sagiliang, pipih alah satapiak dek
niniak jo mamak, sarato sarato sudaro nan datang, bak ibarat urang manyumpik: Kapeh tabang mambao
angin, panulak damak kalua, damak lah rintang didaun, kumbang lah rintang dibungo, buruang lah
rintang dibuah, kapeh nak babaliak katanah, kan baitu lalunyo di Sutan..?

Sutan Sinaro :
Iyo baitu bana lalunyo Malin.

Malin Mudo :
Buah panitahan Sutan tadi, alah taracak diadat, alah talingka di pusako, tapi karano lai pulo nan
manuruik undang, bakato baiyo bajalan baamuah, ambo bao kato jo mupakat, kapado niniak mamak,
karajo nan bapokok, silang nan bapangka, mananti Sutan sakutiko, kan lai didalam adat tu sutan.

Sutan Sinaro:
Iyo lah tibo bana nan baitu nan diadatkan Malin, mananti malah ambo

Malin Mudo :
(Mupakat jo niniak mamak, mamak nan pangka)......
maa mak Datuak Putiah, kabarundiang jo mamak...

Datuak Putiah :
Lai Malin laluanlah...

Malin Mudo :
Nan kajadi parundiangan jo mamak, kok bunyi lah samo didanga, nan kabarinyo ambo japuikan ka
mamak Datuak

Datuak Putiah :
Samo samalam sajolah kito disiko. Malin

Malin Mudo :
Maa Sutan Sinaro, panitahan kumbali pado Sutan

Sutan Sinaro: Lai Malin

Malin Mudo :
Dimaso cako Sutan mananti, ambo manjapuikan nan kabarinyo kapado niniak jo mamak, karajo nan
bapokok, silang nan bapangka. Nan kabarinyo dibaliau, manuruik pasa nan biaso, rumah dibuek tampaik
bamalam, sumua dikali tampaik mandi, kayu gadang tampaik balinduang. Iyo mamintak karajo nan
bapokok, silang nan bapangka, samo samo bamalamlah kito disiko. Ikolah nan kabuah barinyo pado
Sutan.
Sutan Sinaro ;
Dimaso nan cako ambo mananti , Malin manjapuikan nan kabarinyo kapado niniak jo mamak, karajo nan
bapokok, silang nan bapangka. Nan kabarinyo dibaliau, manuruik pasa nan biaso, rumah dibuek tampaik
bamalam, sumua dikali tampaik mandi, kayu gadang tampaik balinduang. Iyo mamintak karajo nan
bapokok, silang nan bapangka, samo samo bamalamlah kito disiko. Kan baitu barinyo di Malin.

Malin Mudo : Iyo baitu bana Sutan.

Sutan Sinaro :
Sabanyak rundiangan Malin nan katangah, alah manuruik alua jo patuik. Tapi sungguahpun baitu.
Karano rumah gadang lai duo tigo, bamalam bana kami disiko, tantu nan ciek katingga pulo. Ikolah
saboknyo, mangko kami mamintak juo, dilapeh jo hati nan suci. Itulah bana dijamboan bakeh Malin

Malin Mudo;
Sabanyak pambarian Sutan nan katangah alah dirasuak manjariau, alah dilaie lakek atok. Tapi
sungguahpun baitu, mangko tabik juo kabanaran dikami, hari kalam bulan kok kabua, dihilie jalan kok
runtuah, dimudiak jalan kok taban, kami maanta tak saleso. Kok ado maro malintang, tantu nan pangka
kaberatan, ikolah mangko nak mamintak juo malam disiko. Sakian bana dianta bakeh sutan.

Sutan Sinaro ;
A pulo nan manjadi pambarian di Malin cako, hari kalam bulan kok kabua, dihilie jalan kok runtuah,
dimudiak jalan kok taban. Kok tumbuah maro malintang, nan pangka maanta tak saleso. Kan baitu
lalunyo di Malin

Malin Mudo :
Iyo baitu bana, sutan

Sutan Sinaro :
Sapanjang pambarian Malin, alah manuruik pasa nan biaso. Tapi mangko manjadi parmintaan juo bagi
kami, karano dihilie jalan lai luruih, dimudiak jalan lai pasa, kok ado bana maro nan malintang, kami
sairiang lai basamo. Nak lapeh juo lah kami jo hati nan suci jo muko nan janiah. Ikolah bana nan
dijapuikan juo bakeh Malin

Malin Mudo :
Maa.. Sutan Sinaro, ruponyo ciek di ambo panahan, duo di Sutan Sinaro pambarinyo, mako nak ambo
bao baliak bakato baiyo bajalan baamuah, kapado niniak mamak, karajo nan bapokok, silang nan
bapangka, mananti Sutan sakutiko, kan lai bana nan baitu Sutan.

Sutan Sinaro :
Asa lai pintak kabuliah, kandak kabalaku, mananti malah ambo Malin...

Malin Mudo :
Maa mamak Datuak Putiah , kabarundiang baliak jo mamak.

Datuak Putiah : Rancak Malin laluanlah..

Malin Mudo :
Nan kajadi rundiangan jo mamak , rasonyo iyo nan maurak selo, nak maasak langkah juo sialek
katampaik masiang masiang. Nan kajadi barinyo, ambo japuikkan baliak ka mamak datuak

Datuak Putiah :
(Baiyo jo nan pangka), dan mangumbalikan .
Maa Malin Mudo, kok marosoklah sahabih raso, kok mangaruak lah sahabis gauang. Kini baato hanyo
lai, kito lapeh juolah jo hati nan suci,jo muko nan janiah. Itulah nan
kabarinyo di ambo pado Malin.

Malin Mudo :
Karano nan dijapuik alah tabao, nan dijuluak alah lareh, ambo kumbalikan kaasanyo, mak Datuak
Datuak Putiah :
Kumbalikan lah Malin.

Malin Mudo:
Maa Sutan Sinaro, panitahan kumbali pado Sutan
Sutan Sinaro : Lai, Malin.....

Malin Mudo :
Dimaso nan cako Sutan mananti, ambo manjapuikan nan kabarinyo kapado niniak jo mamak karajo nan
bapokok, silang nan bapangka. Kok adatlah timbang bajawek, bana lah timbang balewai, pintak kami
nan alun kabalaku, pintak Sutan juo baru nan kabuliah. Dilapeh juo jo hati nan suci, sarato muko nan
janiah, itulah nan kabuah barinyo pado Sutan

Sutan Sinaro
Dimaso nan cako ambo mananti, Malin manjapuikan nan kabarinyo kapado niniak jo mamak silang nan
bapangka. Lah dapek nan kabarinyo, pintak buliah kandak balaku. Dilapeh juo jo hati nan suci, sarato
muko nan janiah, kan baitu barinyo di Malin

Malin Mudo :
yo baitu bana , Sutan

Sutan Sinaro :
Karano pintak alah buliah, kandak alah balaku, basugiro malah kami lai Malin

Malin Mudo
Tantang basugiro, parundiangan kito bateh lai sutan
Sutan Sinaro :
Karano Malin alah takiro kiro, diamboalah manjadi agak-agak pulo, eloklah rundiangkito batehi (sudahi)

BAGIAN III

Pidato Pasambahan Adat,

Ma-anta Marapulai
www.rangtalu.net

Oleh : Mak Uncu

Assalamu’alaikum Datuak,
Ba’a nyo Datuak -sianu- , pado datuak tibonyo sambah. Sungguahpun datuak surang nan disambah,
tagah dek adat jo pusako, dek barieh cupak jo gantang, dek alua datuak kasamonyo, kami datang
maantakan sambah.
Adopun sambah nan ka ditunggangkan pado datuak, talewah ka nan banyak…,
Bak manuruik adat kito juo, kok basiang di nan tumbuah, jikok manimbang di nan ado, tumbuah sarupo
iko kini. Sandi andiko dalam kampuang, di datuak tampuak tangkainyo. Inggiran silang jo salisiah, kusuik
di datuak salasainyo, karuah di datuak ka janiahnyo. Ibaraik diri badan datuak, kayu gadang di tangah
padang, baurek limbago matan, kabatang sandi andiko, badahan cupak jo gantang, barantiang barieh
balabeh, badaun rimbun dek adat, babungo mungkin jo patuik, babuah kato nan bana. Buliah baselo di
ureknyo, buliah basanda di batangnyo, kagantuangan cupak nan duo.Partamo cupak usali, kaduo cupak
buatan.
Cupak usali iyo nan sakundi-kundinyo, nan sapantiang tali bajak, kupang jo ameh masuak pulo. Nan
ganok duo baleh taiyeh, dikikia bahabih basi, dibasuah bahabih ayie, dianjak indaknyo mati, dibubuik tak
namuah layua, itu nan banamo cupak usali.
Nan tasabuik cupak buatan, nan batapuang kapua jo sadah, baliciek pinang jo gambia. Sasuai mangko
manjadi, saukua mangko takanak. Kok datang hujan jo paneh, batiuik angin jo ribuik, sabarieh
bapantang hilang, sabarieh tak namuah lupo.
Lah janiah cahayo adat, lah tarang bangun pusako, bak rumpuik ditimpo rinyai, musim pabilo lipua lai.
Salangkah turun dari janjang, dari tangah rumah di kampuang etan, barieh tabantang kami turuik,
labuah nan goloang kami tampuah, datang ka jorong kampuang datuak.
Kok tibo alah baduduak-an, lah ta unjuak sirieh di carano, tando lah sudah minum makan,
Nan sakarang iko kini, pihak di diri marapulai, lah duduak di ateh rumah. Duduak di ruang rumah nan
gadang, dilingkuang niniak jo mamak, di hadapan ibu jo bapo, sarato ipa dengan bisan, cukuik jo urang
mudo matah, lah duduak basandiang duo, nan bak bulan jo matohari, bintang kujaraha mangaliliang.
Kok tumbuah di tangah rumah, kajadi adat bijo nan baiak, katungkek pamanih jalan, kakarieh pamaga
adat, dalam adat baradat pulo. Kok elok ratak tangannyo, panjang bao kamangarek, singkek bao ka
mauleh, senteang bao ka mambilai. Kok elok ratak lidahnyo, kusuik bao ka manyalasai, kok karuah dapek
mampajaniah, kok ka hilia samo kahilia, ka mudiak samo ka mudiak.
Namun samantang pun baitu, di pihak diri marapulai, raso menitiak niro pinang, antah barayie antah
tidak, nan bak alu patah tatimpo, musim pabilo ka bataruak, ibo nan bak padi salibu, awak tumbuah
musim talampau, urek tagantuang ka jarami, rangkiang tinggi nan dicinto, supayo datuak tarimo elok-
elok, iyo di dalam tapak tangan…, sakian sambah pado datuak.
[Sumber:Pidato Aluah Pasambahan Adat-Idrus Hakimi Dt Penghulu-LKAAM Sumbar-1974]
Bagian IV
pidato adat minang kabau "maantakan marapulai "
MA ANTAAN MARAPULAI
ASS.WBB..
MANO SAGALO NINIAK MAMAK NAN GADANG BASA BATUAH RILA JO MAAF AMBO PINTAK NAN
DIATOK ATEH SURAMBI DISUSUN JARI NAN SAPULUAH SOMBAH JO SIMPUAH MANJALANI KABAKEH
DATUAK SOMBAH SABARIH SAPATAH KATO.
BARILAH AMPUN SAYO MANDATANGKAN SOMBAH, SOMBAH SAUJUD MANJALANI, KAHARIBAAN
SAGALO DATUAK SAGALO TUK ANGKU, NAN SAISI RUMAH NAN KO, NAN TATANAI DEK LANTAI, NAN
TALINGKUANG DEK DINDIANG, NAN TASUNGKUIK DEK ATOK, GADANG INDAK DISABUIK GALA, KETEK
INDAK DI IMBAU NAMO, DALAM BUAH PASAMBAHAN KASADONYO, ZAHIRNYO SAMBAH BAKEH
DATUAK. JO SAMBAH SIMPUAH SALAM DIANGKEK, SAKALI GAWA BARIBU AMPUN, MAAFKAN JUO
BADAN AMBO, DALAM BUAH PASAMBAHAN, KOK SALAH MINTAK DI PATUIK IN, SASEK MINTAK DI
IMBAU, TALUNCUA MINTAK DISENTAK, SOBOK AMBOKO KURANG PANDAPEK NAN BAK SIKEK, KURANG
SUSUN NAN BAK SIRIAH, ILMU PANGATAHUAN JAUH SAKALI,
A-LA NAN KAJADI BUAH PASAMBAHAN DIADAT SAWAJAH IKO KINI.
TANAH JAO TANAH PALEMBANG PULAU KARANG LABUAN KAPA BANGKA HULU TIMBUNAN LAWUIK,
DARI PAGAI SATUPUN TIDAK ADO NAN MAMBATAKAN, LAINYO UNDANG NINIAK MAMAK,
BAKATO-KATO URANG DAULU BABIDA-BIDA URANG KINI,
KAMANO JALAN KASUMPU
LINGKUE TUMBUAH DIPAKAN
CUPAK GANTANG URANG DAULU
ITU DITIRU DITULADAN

SITUOK NAMO BILALANG

NAGARI TURUN BANIAGO
LAI BACUPAK LAI BAGANTANG
BAUKIE LAI BALIMBAGO

KAYU SAPEK MODANG DILURAH

DIAMBIAK KAPAPAN TUAI
LABIAHNYO KAPAPAN TIMBO
DICALIAK KABEK TAK BARUBAH
DILIEK SIMPAI TAK BAUNGKAI
ITU DITIRU DITULADANI JUO
MULO SUMUA KAN DAGALI NAGARI KAN DIJAJAK ADAT NAK SAMO DI LAZIMKAN, DEK ADAT LAH
MANURUIK SARAK LAH TAMASAHUA KASONO-SINI, LALU KAAMBUN KAPATANI SALO MANYALO
UJUANG SIAM, DEK MUSIM SAMASO ITU TIGO SOPIE BALAHAN JURAI, NAN SAJURAI KABANDA RUHUN
NAN SAJURAI KABANDA CINO SAJURAI KAMINANG KABAU, NAN SAJURAI KAMINANG KABAU TUNGKU
TIGO SAJARANGAN RAJO TIGO NAIAK NOBAT, PATAMO RAJO DIBUO KADUO RAJO SUMPUR KUDUS
KATIGO RAJO PAGARUYUANG, TASABUIK RAJO DIBUO RAJO BAGALA RAJO ADAT, KADUO RAJO SUMPUR
KUDUS RAJO BAGALA RAJO IBADAT, MAMEGANG HAKIM KITABULOH, AMAL TA’AT HAKIM BADIRI LA
TAMASAHUA KASONO-SINI, LALU KALUHAK TANAH DATA TABENDANG-BENDANG KALUAK AGAM
TARUIH KALUAK LIMO PULUAH, ITU NAN DIKAKA LAWEH DIRANTANG PANJANG SAMPAI KINI BAITU JUO
RAJO BAGALA DUO SELO, NAN KATIGO RAJO PAGARUYUANG, BUKAN TU RAJO RANG DIBALI BUKAN
TURAJO RANG DI PINTAK, RAJO BADIRI SANDIRINYO RAJO BAGALA RAJO ALAM, SIPAPEK NAMO
TAMBILANG KAN PANGGALI LUBANG TABU TAKALI DILUBANG LAMO, KOK CAPEK AMBO MAMBILANG
LIEK KABUNGKA JO TARAJU NAK SURUIK KAPUSAKO LAMO.
SAIRIANG BALAM JO BARABAH
BALAM INGGOK BARABAH MANDI
SIRIANG SALAM DENGAN SOMBAH
SALAM DIANGKEK SOMBAH KUMBALI
SOMBAH NAN KAN AMBO PASOMBAHKAN, JIKOK DILIEK DIKONANG-KONANG DIPIKIE SAHABI PIKIE,
MANAKU AMBO KABUMI MANINGADA LALU KALANGIK, TOGAK KUDARAT DARI ALLAH IRADAT NAN
BAKAPANJANGAN ADAT DUO NAN TERJOLI, PARTAMO SORAK NAN MAUJUD KADUO ADAT NAN MAHA
MULIE, PIHAK DI SORAK NAN MAUJUD DEK BARI KOTO PILIANG ADAT DATUAK KATUMANGGUNGAN,
MANCARI KATO NAN SAIYO BULEK AIE KAPAMBULUAH BULEK KATO KAMUPAKAT, SAUKU MANGKO
TAKANAK SASUAI MANGKO MANJADI.
PIHAK DIADAT MAHA MULIE DEK WARI BODI CANIAGO,
ADAT DATUAK PARPATIAH NAN SABATANG, MALIEK LURUIH NAN SATUJU MANANTANG ADAT SAUJO
GALO LURUIH ARAH MANANTANG BANA, HUKUM ADIE MANAHAN BANDIANG KATO BANA MANAHAN
SUDI BANAMO ADAT MA ANTAAN MARAPULAI, PIHAK DI DIRI MARAPULAI LAH DUDUAK DIRUANG
TANGAH DILINGKUANG NINIAK DENGAN MAMAK SARATO IPA DENGAN BISAN CUKUIK JO ROMBONGAN
MUDO-MUDO, KOK TAJADI DITANGA RUMAH KAJADI ADAT BIJO BAIAK NAN BAK TUNGKEK PAMANI
JALAN NAN BAK KORI PAMAGA ADAT DALAM ADAT BARADAT PULO, JAMPANG KOK ELOK RATAK
TANGAN BALIAU PANJANG BAO MANGAREK SINGKEK BAO MAULEH TAPI SAMANTANG PUN BAITU,
KARONO BALIAU KO KETEK MUDU MATAH UMUA ALUN SATAHUN JAGUANG DARAH PUN BALUN
SATAMPUAK PINANG, KOK GADANGNYO TABAO DEK BUKU TINGGI TABAO DEK RUEH NAN BAK
MANETEH NIRO PINANG ANTAH BARAIAH ANTAH TIDAK, BAK ALUA PATA TATIMPO MUSIM PABILO
KABATARUAK IBARAIK PADI SALIBU AWAK TUMBUAH MUSIM TALAMPAU, RANGKIANG KINI KADI CINTO
UREK TASANGKUIK DIJARAMI, BA A NAN PINTAK PINTO KAMI NINIAK MAMAK NAN MANTAAN
MARAPULAI KAPADO NINIAK MAMAK DISIKO, PIHAK KADIRI MARAPULAI KOK SALAH MINTAK DIPATUIK
SASEK MINTAK DIMBAU TALUNCUA MINTAK DISENTAK KAN, SABAB BALIAU KO KURANG PANDAPEK
NAN BAK SIKEK KURANG SUSUN NAN BAK SIRIEH ILMU PANGATUHUAN JAUAH SAKALI.
TOGAK NAK DIBAO SAMO TINGGI DUDUAK NAK DIBAO SAMO RONDAH, WALAU BADUSUN BATARATAK,
SAMPAI BAKAMPUANG BANAGARI, IYO NAK DIBAO SAILIA SAMUDIAK, SALABUAH SATAPIAN SAUJO
SABEKAN, SALARANG SAPANTANGAN IYO NAK BATARIMO DEK NINIAK MAMAK DOSIKO, SAGITU
SOMBAH PADO DATUAK.
LAH SAMPAI DEK DATUAK
BILANG ALAH
SAPANJANG BUAH PANITAHAN DATUAK NAN TASERAK KATANGAH-TANGAH TATABUA KAMUKO NAN
RAPEK, LADIOTOK LADISUSUN DARI AWA SAMPAI KA AKHIA INDAK KADI ULANG KILIN DITIKAM JOJAK
DIULANG KILIN BONANG KOK PUTUIH DIULANG TIKAM JOJAK KOK LOPEH MANAN KAJADI BUAH
KABENARAN DEK DATUAK IYO MALAH, PIHAK DI DIRI MARAPULAI LAH DUDUAK DIRUANG TANGAH
DILINGKUANG NINIAK DENGAN MAMAK SARATO IPA DENGAN BISAN CUKUIK JO ROMBONGAN MUDO-
MUDO, KOK TAJADI DITANGA RUMAH KAJADI ADAT BIJO BAIAK NAN BAK TUNGKEK PAMANI JALAN NAN
BAK KORI PAMAGA ADAT DALAM ADAT BARADAT PULO, JAMPANG KOK ELOK RATAK TANGAN BALIAU
PANJANG BAO MANGAREK SINGKEK BAO MAULEH TAPI SAMANTANG PUN BAITU, KARONO BALIAU KO
KETEK MUDU MATAH UMUA ALUN SATAHUN JAGUANG DARAH PUN BALUN SATAMPUAK PINANG, KOK
GADANGNYO TABAO DEK BUKU TINGGI TABAO DEK RUEH NAN BAK MANETEH NIRO PINANG ANTAH
BARAIAH ANTAH TIDAK, BAK ALUA PATA TATIMPO MUSIM PABILO KABATARUAK IBARAIK PADI SALIBU
AWAK TUMBUAH MUSIM TALAMPAU, RANGKIANG KINI KADI CINTO UREK TASANGKUIK DIJARAMI, BA A
NAN PINTAK PINTO NINIAK MAMAK NAN MANTAAN MARAPULAI KAPADO KAMI NINIAK MAMAK NAN
DISIKO, PIHAK KADIRI MARAPULAI KOK SALAH MINTAK DIPATUIK SASEK MINTAK DIMBAU TALUNCUA
MINTAK DISENTAK KAN, SABAB BALIAU KO KURANG PANDAPEK NAN BAK SIKEK KURANG SUSUN NAN
BAK SIRIEH ILMU PANGATUHUAN JAUAH SAKALI.
TOGAK NAK DIBAO SAMO TINGGI DUDUAK NAK DIBAO SAMO RONDAH, WALAU BADUSUN BATARATAK,
SAMPAI BAKAMPUANG BANAGARI, IYO NAK DIBAO SAILIA SAMUDIAK, SALABUAH SATAPIAN SAUJO
SABEKAN SALARANG SAPANTANGAN IYO NAK BATARIMO DEK NINIAK MAMAK NAN DISIKO, KAN BAITU
BUNYI BUAH PANYAMBAHAN DATUAK TADI.
BANA
PIHAK DIKAMI SIPOKOK SIPANGKALAN TAGAK NAN BAPUSU DUDUAK NAN BAROPOK BULEK AIE LA
KAPAMBULUAH BULEK KATO LA KAMUPAKAT, IBARAT LA TASANGKUIK KANAN TINGGI LA TASANDA
KANAN GADANG IYO LA BATARIMO NAMO DI TUAK.
LIMBAGO TARIMO KASIH JANYO DATUAK DI NAK JAN SABOLAH TABIANG DISISIK ELOK DITARA
KADUONYO, IBARAT PINCOLANG BASENTAK ILIE NAN PELANG BASENTAK MUDIAK, IBARAT ANAU
TABAO DEK SIGAINYO YAITU PIHAK DIANAK KAMANAKAN KAMI NAN PADUSI, KOK TABAO DEK
JUNJUANGNYO TANTU KA KORONG KAMPUANG DATUAK, INGGIRAN SILANG JO SALISIAH KUSUIK DI
DATUAK SALASAINYO KARUAH DIDATUAK KAJANIAHNYO.
IBARAT BATANG TUBUAH DATUAK KAYU GADANG DITANGAH KOTO NAN BAUREK BALIMBAGO,
BADAHAN CUPAK JO GANTANG, BARANTIANG BARI BALABE, BABUNGO RIMBUN DEK ADAT, BABUAH
KATO NAN BANA, BULIEH BASELO DIPANGKANYO BULIEH BASANDA KA BATANGNYO KAGANTUNGAN
CUPAK NAN DUO PARTAMO CUPAK USOLI KADUO CUPAK BUATAN, NAN TASABUIK CUPAK USOLI NAN
SAKUNDI-KUNDINYO NAN SAPUNTIANG TALI BAJAK KUPANG JO AMEH MASUAK PULO NAN GONOK
DUO BALEH TAIE, DIKIKI BARABI BASI DI BASUO BARABI AIE DIBUBUIK TAK NAMUO MATI DIASAK TAK
NAMUO LAYUO TASABUIK CUPAK BUATAN, BATAPUAK KAPUAK JO SODAH BALACIK PINANG JO GAMBIE
SAUKO MANGKO TAKANAK SASUAI MANGKO MANJADI, LAH JANIAH CANDONYO ADAT LATARANG
JALAN KAPUSAKO, NAN BAK RUMPUIK DITIMPO RINYAI INDAK KAMUNGKIN LIPUAK LAI BA-A TOH NAN
KINI PINTAK PINTO KAMI TERHADAP NINIAK MAMAK NAN MANTAAN MARAPULAI.
PIHAK DI ANAK KAMANAKAN KAMI NAN PADUSI NAN BANAMO SIUPIAK KOK SALAH MINTAK DIPATUIK
SOSEK MINTAK DI IMBAU TALUNCUA MINTAK DISENTAK SOBOK BALIAU KO KURANG PANDAPEK NAN
BAK SIKEK KURANG SUSUN NAN BAK SIRIEH ILMU PENGETAHUAN JAUAH SAKALI, KARONO BALIAU KO
KETEK MUDO MATAH UMUA ALUN SATAHUN JAGUANG DARAH PUN BALUN SATAMPUAK PINANG, KOK
GADANG TABAO DEK BUKU TINGGI TABAO DEK RUEH, COPEK KAKI KOK PANARUANG COPEK TANGAN
KOK PAMACAH, PAI KASUMU EMBE CIEK KOK INDAK TABAO, KADAPU PUNTUANG CIEK KOK INDAK
TASORONGKAN, IYO NAK BATUNJUAK BA AJARI PULO DEK DATUAK NYO, BAA SABALIAK PADO ITU
BAPAKAI PULO DEK DATUAK MANURUIK PITUAH, HUTAN JAUAH BAULANGI HUTAN DAKEK BAKANONOI,
KOK SIANG BA COLIEK- COLIEK MALAM BADANGA-DANGA IYO MINTAK DITARIMO PULO DEK DATUAK.