PASAMBAHAN DUDUAK

TIM ALUA PASAMBAHAN JORONG SITAKUAK

Sipangka : Yoo maa nyo sutan.

Sialek : Yoo Ambo sutan.

Sipangka : Ka sutan sambah sapatah.

Sialek : Manitahlah,,

Sipangka : Tantangan titah dengan sambah, Ketek diamba gadang, randah dianjuang
tinggi. Takalo sumua kadikali, takalo rantiang kadipatah, pangalu badiri
dalam nagari, Mandirikan adat jo pusako, mandirikan cupak dengan
gantang. Cupak tatagak utang maisi, pusako tingga marungguhi.
Kamujuran dek silang nan bapangka karajo nan bapokok. Pandang jauah
dilayangkan, pandang dakek ditukiakkan. Talayang pandangan jauah,
tatukiak pandangan dakek. Mangko dilapeh nan ketek mudo matah, nan
cadiak tau pandai, nan arif bijaksano. Kok jauah dilayangkan surek, kok
dakek makanan panggia. Jauah disaru alah datang, dakek dipanggia alah
tibo. Kok tibo alah disingkokkan pintu, kok duduak alah dikambangkan
lapiak. Limbak nan dari pado itu, tantangan daripado duduak, kok
tahereang jo tagendeang, kok caka kurang kaik, aluran katangah kok
katapi, aluran katapi kok katangah, ipa jo bisan kok taparampiangkan,
mak umah jo sumando kok tadakek’an, yobana nak dibari kami maaf
silang nan bapangka karajo nan bapokok. Sakian sambah kabakeh
sutan...

Sialek : Lah sampai dek sutan?

Sipangka : Dibilang alah sutan..

Sialek : Sapanjang buah kabanaran sutan nan katangah, nan taserak ka nan
rami, nan taunggun ka nan tinggi, tatumpah ka badan diri ambo, itulah
 kato sabanyo. Tapi samantangpun baitu, nan biasonyo kan iyoo? Datang
kandak capek dibari, datang pintak capek dipalakukan. Baa nan sarupo
iko kini, sabalum kandak kadibari, sabalum pintak kadipalakukan, pihak
kabadan diri ambo, dek karano duduak lai baropok, tagak lai bakapusun,
kok ambo ambiak rundiang baiyo, kato bamufakaik, lai kok adaik nan
baitu, sakian sambah kabakeh sutan.

Sipangka : Lah sampai dek sutan?

Sialek : Dibilang alah sutan..

Sipangka : Sapanjang buah kabanaran sutan nan katangah, nan taserak ka nan
rami, nan taunggun ka nan tinggi, tatumpah ka badan diri ambo, itulah
kato sabanyo. Ambo sangko budi bicaro ambo cako, kato surang kok
indak kadibulati, kato basamo kok indak dipaiyokan, baa nan sarupo iko
kini, kato surang kok lai kadibulati, kato basamo kok lai kadipaiyokan.
Alah dirasuak manjariau, lah di lae lakeknyo atok, lah cupak tatagak nan
baisi. Sakian sambah kabakeh sutan.

Sialek : Lah sampai dek sutan?

Sipangka : Dibilang alah sutan.

Sailek : Dek ambo yoo muluik sapatah itu pulo nan ambo nanti, saibarek lah
guguah dari tampuak, umpamo lah sokah dari dahan. InshaAllah
pandang jauah ambo layangkan, pandang dakek ambo tukiakkan.
Mananti sutan jo PANITAHAN.

Sipangka : InshaAllah ambo nanti sutan.

 MAMPALEGAKAN

Sialek 1 : Yoo maa nyo sutan..

Sialek 2 : Yoo ambo sutan.

Sialek 1 : Kabakeh sutan sambah sapatah.

Sialek 2 : Manitahlah sutan.

Silake 1 : Sungguahpun kabakeh sutan sambah sapatah, nan randah dianjuang

tinggi, nan ketek diamba gadang, maaf dipintak, jo bana sutan ambo
jalang. Bana ditibokan kabekeh sutan tu kini namonyo, dek karano bisiak
lah samo kadangaran, dek imbau lah lah raso kalampauan, lah manitah
pulo silang nan bapangka kabakeh kito sialek jamu. Adopun titah
dituturkannyo, tantangan gayuang kamanyambuik, tantangan kato
kamanjawab, dima tarabiknyo bak padi, dima katumbuahnyo bak bijo,
nak pancarian sutan tantang itu. Sakian sambah kabakeh sutan.

Sialek 2 : Yoo lah sampai dek sutan?

Sialek 1 : Dibilang alah sutan.

Sialek 2 : Sapanjang buah kabanaran sutan nan katangah, nan taserak ka nan
rami, nan taunggun ka nan tinggi, tatumpah ka badan diri ambo, itulah
kato sabanyo. Nan kajadi buah bana dek sutan kabakeh ambo, tantangan
gayuang kamanyambuik, tantangan kato kamanjawab, dima tarabiknyo
bak padi, dima katumbuahnyo bak bijo, nak pancarian ambo tantang itu,
kan baitu bana? (Sabananyo). Tapi samantangpun baitu, nan biasonyo
kan iyoo? Datang kandak capek dibari, datang pintak capek
dipalakukan. Baa nan sarupo iko kini, sabalum kandak kadibari, sabalum
pintak kadipalakukan, pihak kabadan diri ambo, dek karano duduak lai
baropok, tagak lai bakapusun, kok ambo ambiak rundiang baiyo, kato
bamufakaik, lai kok adaik nan baitu, sakian sambah kabakeh sutan.
Sialek 1 : Lah sampai dek sutan?

Sialek 2 : Dibilang alah sutan..

Sialek 1 : Sapanjang buah kabanaran sutan nan katangah, nan taserak ka nan
rami, nan taunggun ka nan tinggi, tatumpah ka badan diri ambo, itulah
kato sabanyo. Ambo sangko budi bicaro ambo cako, kato surang kok
indak kadibulati, kato basamo kok indak dipaiyokan, baa nan sarupo iko
kini, kato surang kok lai kadibulati, kato basamo kok lai kadipaiyokan.
Alah dirasuak manjariau, lah di lae lakeknyo atok, lah cupak tatagak nan
baisi. Sakian sambah kabakeh sutan.

Sialek 2 : Lah sampai dek sutan?

Sialek 1 : Dibilang alah sutan.

Sailek 2 : Dek ambo yoo muluik sapatah itu pulo nan ambo nanti, saibarek lah
guguah dari tampuak, umpamo lah sokah dari dahan. InshaAllah
pandang jauah ambo layangkan, pandang dakek ambo tukiakkan.
Mananti sutan jo PANITAHAN.

Sialek 1 : InshaAllah ambo nanti sutan.

MAMULANGKAN SAMBAH ALEK 2 KA ALEK 1

Sialek 2 : Yoo maa nyo sutan?

Sialek 1 : Yoo ambo sutan.

Sialek 2 : Kabakeh sutan dikambalikan sambah.

Sialek 1 : Manitahlah sutan.

Sialek 2 : Sungguahpun kabakeh sutan sambah dikumbalikan, adopun antaro

ambo jo sutan cako, panek manjadi parantian, patang manjadi
pamalaman, maambiak rundiang jo baiyo, maambiak kato jo mufakaik,
 mancari bulek nan sagolek, mancari pipiah nan salayang. Bulek lah dapek
digolekkan, pipiah lah dapek dilayangkan. Tantangan gayuang
kamanyambuik kato kamanjawab, yoo di ambo tibonyo. Tapi
sungguahpun baitu, karano siriah lai bagagang, dek pinang lai batampuak,
suruikkanlah siriah ka gagangnyo, pulangkanlah pinang katampuaknyo,
manyamoi ambo tantang itu. Sakian sambah kabakeh sutan.

Sialek 1 : Lah sampai dek sutan?

Sialek 2 : Dibilang alah sutan.

Sialek 1 : Sapanjang buah kabanaran sutan nan katangah, nan taserak ka nan rami,
nan taunggun ka nan tinggi, tatumpah ka badan diri ambo, itulah kato
sabananyo. Ruponyo antaro ambo jo sutan, indak bapilin pilin takkan
sariang, indak kabaunyuik unyuik takkan putuih. InshaAllah, ambo
suruikkan siriah ka gagangnyo, ambo pulangkan pinang katampuaknyo,
samoi dek sutan tantang itu.

Sialek 2 : InshaAllah ambo samoi sutan.

MAMULANGKAN SAMBAH SIALEK KA SIPANGKA

Sialek : Yoo maa nyo sutan?

Sipangka : Yoo ambo Sutan.

Sialek : Kabakeh sutan dikumbalikan sambah.

Sipangka : Manitahlah Sutan.

Sialek : Sungguahpun kabakeh sutan sambah dikumbalikan, adopun antaro

ambo jo sutan cako, panek manjadi parantian, patang manjadi
pamalaman, maambiak rundiang jo baiyo, maambiak kato jo mufakaik,
mancari bulek nan sagolek, mancari pipiah nan salayang. Bulek lah dapek
 digolekkan, pipiah lah dapek dilayangkan. Tantangan gayuang
kamanyambuik kato kamanjawab, yoo di ambo tibonyo. Tapi sabalum
gayuang kabasambuik, sabalum kato kabajawek. Dek tanjuang banyak
manjorok, dek labuah banyak baliku, kok tatampuah labuah nan panjang,
kan baa ko lah sutan?

Sipangka : Lah sampai dek sutan?

Sialek : Dibilang alah sutan.

Sipangka : Sapanjang kato sutan nan katangah, jikok didanga baritonyo, didanga
lah baiak bunyi, itulah kato sabananyo. Dek ambo asa lai kandak
kadibari, asa pintak lai kadipalakuan, indak ka bauji samo merah, indak
ka batimbang samo barek, panjang jo singkek kapado Allah kito
pulangkan. Sakian sambah ka bakeh sutan.

Sialek : Lah sampai dek sutan?

Sipangka : Dibilang alah sutan.

Sialek : Sapanjang buah kabanaran sutan nan katangah, nan taserak ka nan rami,
nan taunggun ka nan tinggi, tatumpah ka badan diri ambo, itulah kato
sabananyo. Baa nan sangko ambo cako, jikok ka bauji samo merah, jikok
ka batimbang samo barek, kok balari kok samo kancang. Kok lai indak
kadikaji saganok itu, inshaAllah gayuang ambo sambuik kato ambo
jawab. Kabakeh sutan juo malah,

Tantangan titah dengan sambah, Ketek diamba gadang, randah dianjuang

tinggi. Takalo sumua kadikali, takalo rantiang kadipatah, pangalu badiri
dalam nagari, Mandirikan adat jo pusako, mandirikan cupak dengan
gantang. Cupak tatagak utang maisi, pusako tingga marungguhi.
Kamujuran dek silang nan bapangka karajo nan bapokok. Pandang jauah
dilayangkan, pandang dakek ditukiakkan. Talayang pandangan jauah,
tatukiak pandangan dakek. Mangko dilapeh nan ketek mudo matah, nan
 cadiak tau pandai, nan arif bijaksano. Kok jauah dilayangkan surek, kok
dakek makanan panggia. Jauah disaru alah datang, dakek dipanggia alah
tibo. Kok tibo alah disingkokkan pintu, kok duduak alah dikambangkan
lapiak. Limbak nan dari pado itu, tantangan daripado duduak, kok
tahereang jo tagendeang, kok caka kurang kaik, aluran katangah kok
katapi, aluran katapi kok katangah, ipa jo bisan kok taparampiangkan,
mak umah jo sumando kok tadakek’an, yobana nak dibari maaf silang
nan bapangka karajo nan bapokok, kan baitu bana sutan? (sabananyo).
Tapi sungguahpun nan baitu, datang kami lah basingkokkan pintu,
duduak kami lah bakambangan lapiak. Tantangan daripado duduak, lah
rancak susunnyo bak siriah, lah elok liliknyo bak pamaturan. Indak ka
upek nan ka tibo, antah kok puji nan kadatang. Sakian sambah kabakeh
sutan.

Sipangka : Yoo lah sampai dek sutan?

Sialek : Dibilang alah sutan.

Sipangka : Dek ambo yo muluik sutan sapatah itu pulo nan ambo nanti, sanang lah
raso dalam hati, sajuak didalam pamikiran. Dek karano lah guguah dari
tampuak, lah sokah dari dahan, Alhamdulillah kajawek dari ambo.