Assalamualaikum wr wb

Sebagai sambung lidah dari segalo nan tuo-tuo,

sayo menyampaikan tunjuk ajar tegur sapo
kepado anak kemenakan kito yang baru
berumah tanggo. Anak ku.............. dan anak
ku................... Ado pun utang kami nan tuo-tuo
kepado kamu yang baru berumah tanggo yolah
memberi tunjuk ajar tegur sapo, kareno dalan
adat dikatokan : Makin pandai makin ditunjuk
Makin cerdik makin diaja Makin tau makin
disapo Anak ku ................. dan anak ku ................
Kini ko kasih kamu baru bajuak, sayang kamu
baru jolong basuo, cubo denga tunjuk aja kami
nan tuo-tuo, menurut adat yang tapakai, seloko
adat mengatokan : Kalau tadinyo ............... gadih
namonyo, dan ................. bujang namonyo, kini
tu kamu sudah tuo, karno kamu lah jadi duo
laki-bini. Walaupun baru sajo kamu berumah
tanggo, itu lah tuo namonyo, mako hendaklah :
ubah perangai, asak baso, ubah tutu. Kalau
perangai gadih tingallah di gadih, kalau
perangai bujang tinggallah di bujang. Jangan
lengah diujung tanjung, mencelik ayik ili, jangan
leko dikebun bungo mencelik bungo sedang
kembang, lupo dikain indak basiring, lupo
dipunggung idak batutup. Asak baso ubah tutu
Anak ku ................ adopun kau tu kini dinamokan
orang semendo, orang semendo idak bulih
bakato dulu sepatah, idak bulih bajalan dulu
selangkah, dan idak tau menenggang hati
urang, bilo ditengah jangan pulo hendak
memecah buih, bilo ditepi jangan hendak
meruntuh tebing, bilo di ateh jangan hendak
melayu pucuk, kok di bawah jangan hendak
mengurat bane, ndak tau pulo biang nan bakal
tembuk, genting na bakal putus dan ndak tau
pulo kilat ceermin nan kemuko, kilat beliung ke
kaki. Banyak macamnyo semendo yang idak
bulih dibuek : - Jangan dibuek semendo langau
hijau, telur tepanca awak terbang - Jangan
dibuek semendo Gajah Menong, kecik lawan
dilunyak, gedang dilindan - Jangan dibuek
semendo kacang miyang, awak ado orang
bagaduh - Jangan dibuek semendo lapik Buruk,
bakisong bae di rumah, idak hendak barusaho -
Jangan dibuek semendo ayam jaguk, dimano
betino ado, disitu awak bekukuk - Jangan
dibuek semendo kumbang bagirik, tengganai
ado dirumah awak batanggumum dalam bilik.
Adopun semendo yang iluk yolah semendo
ninik mamak, kareno orang batukuk ndak
banyak, bauleh ndak panjang,bakampuh ndak
leba, jangan bauleh panjang putus, bakampuh
leba cabik. Anak ku................ kini tu kau sudah
betunak betani namonyo, mako ado kewajiban
kepado anak bini kito iolah : hendak diasam
digaram, di palaman, di sawah, di ladang, di
rumah tanggo, dipalauk, di pa ikan, dikain
dibaju, seloko adat mengatokan : sayang bini
ditinggal-tinggalkan, sayang dianak diletak-
letakkan, maksudnyo : Jangan sayang dibini
ditunggu-tunggu sajo, sayang dianak
dipangku-pangku bae, keduonyo perlu minum
makan, bakain babaju, berumah batanggo,
segalonyo hendak dicari. Terhadap anak bini
kito harus seiyo sekato, setijak selangkah,
seayun selimbai, samo naik samo turun, sebiduk
sepencalang, kehilir sesembur dayung kemudik
seentak satang, senasib sepenanggungan, kok
dapat samo balabo, kok hilang samo merugi.
Kalau hendak berangkat dari rumah hendaklah
bepuji beperago dengan anak bini, iko nan
disebut pegi tempat bepetuwek, balik tempat
beberito, sebab kok ilang ndak tau pulo
runutnyo ka diturut, kok tenggelam nda tau
pulo riaknyo nan kadiselam. Begitu pulo
anakku................ kau tu kini lah belaki namonyo.
Ke ateh lah dikungkung dahan, ke bawah lah
dipasung bane, kok kaki lah baketuk,kok
pandang lah bahinggo, jangan kecak betih bak
betih, kecak lengan bak lengan. Bilo pegi
basaro, balik babarito kepado laki, cepat pergi
cepat balik, jangan sebulan dimuko pintu,
setahun dipangkal tanggo, semusim ditepian,
artinyo liko dek antak dengan kelayun, taro
bakitak dengan bakitok hari lah petang pulo,
asik bedendang biduk hanyut, asik beragam
badan tuo, dan hendaklah tau kewajiban selaku
bini, yaitu : Tau di alur dengan patut, tau diagak
dengan agih tau bekati samo berat tau beragih
samo banyak tau di haus dengan lapar tau
diereng dengan gendeng jangan mencelik
kubangan Gajah melimbah, kubang kandi ndak
melimbah pulo, kito ndak tau kecik upih-kecik
pulo seludang,kecik kayu kecik pulo dahannyo.
Bialah kito taup menaup bak getah di daun,
tampun manampun bak benak udang, bialah
kito balasu bak takuyung mudik,bialah lambat
kayo asal jangan begesa miskin. Kepado anak
ku keduo laki bini,hendaklah kamu dalam
rumah tanggo susun dan rukun, seiyo sekato,
seumpamo demam laki, bini mencari ureh,
kalau demam bini, laki mencari ubat. Apobilo
duduk dalam kampung hendaklah tudung
menudung bak daun sirih,jahit menjahit bak
daun petai, kok tumbuh bebantai tungau
hatinyo samo dicecah, kok tumbuh bebantai
gajah, hatinyo samo dilapah dan kito harus
bertungku cakah, berbakul cangah, dan
besenduk gedang. Begitu pulo terhadap induk
bapak kanti, yo lah induk bapak kito, mensanak
kanti mensanak kito. Kok tibo hari baik bulan
baik, anak menjelang induk bapak. Orang sakit
kito jengohkan, orang mati kito takziahkan,
jangan pulo kito seperti minyak dengan ayik,
awak sebotol tapi minyak di minyak, ayik di
ayik. Itulah tunjuk ajar tegur sapo kami, untuk
kamu pegang dan pakai duo laki bini sebaik-
baiknyo. Kok kelam jadikan suluh, kok licn
jadikan tongkat. Akhirnyo kami tutup : Api api
terbang malam Hinggap di kayu barangan Biar
tujuh kali dunio karam Kasih baduo becerai
jangan
Wassalamualaikum wr wb.